Mga Tingog sa mga Santos sa Ulahing mga Adlaw

Dili Kita Mahadlok

Ni Luis Robledo, Tamaulipas, Mexico

Nakahibalo ko nga magmalipayon kita samtang atong ipaambit ang ebanghelyo ngadto sa daghang tawo kutob sa atong mahimo.

Litrato sa maayong kabubut-on sa tagsulat

Daghan sa akong mga higala ug mga klasmet nga dili mga miyembro sa Ang Simbahan ni Jesukristo sa mga Santos sa Ulahing mga Adlaw ang kasagaran mangutana nako kabahin sa Simbahan. Paglabay sa higayon, gikapoy na ko og tubag sa sama nga mga pangutana nga gibalik-balik, mao nga nakahunahuna ko og solusyon.

Ganahan ko nga mohimo og mga bidyo sa internet aron paglingaw sa mga tawo. Maghimo ko og mga bidyo sa musika, mga makasayoran nga bidyo, ug mga kataw-anan nga istorya. Usa ka adlaw samtang naghunahuna ko kon unsay akong buhaton alang sa sunod nako nga bidyo, nakadesisyon ko nga maghimo og bidyo nga motubag sa mga pangutana kabahin sa Simbahan.

Akong gikuha ang akong camera. Dayon, wala magsulat kon unsa ang akong isulti apan naghinumdom sa mahinungdanon nga mga kasulatan nga gusto nakong hisgotan, gihimo nako ang bidyo. Wala koy ideya kon unsa ang mahitabo. Gibati lang nako ang pag-aghat nga himoon ang bidyo. “Ug ako giubanan sa Espiritu, wala masayod sa sinugdanan sa mga butang nga ako mobuhat” (1 Nephi 4:6).

Wala mabalaka kon unsa kaha ang reaksiyon sa akong mga higala, mga klasmet, ug mga kaliwat—mga miyembro sa Simbahan o dili— ako kining gi-upload.

Pipila ka semana human gi-upload ang bidyo, nagsugod ko og kadawat og feedback sa akong account sa social media. Ang mga tawo nga dili gani nako kaila nagsugod sa pagkomento ug nagpasalamat nako alang sa akong bidyo. Tungod sa akong bidyo, usa ka tawo ang nagsugod na gani og paminaw sa mga panaghisgotan sa mga misyonaryo. Wala madugay, kana nga tawo midesisyon nga magpabunyag.

Sukad sa akong paghimo sa bidyo, ang mga tawo kinsa akong nahibaloan nga dili mga miyembro sa Simbahan morag ganahan ra gihapon nako—tingali labaw pa. Pipila kanila mihunong na gani sa pagpanaway sa Simbahan. Ang uban mihunong na sa pagpangutana og sama nga mga pangutana kabahin sa Simbahan tungod kay karon aduna na silay mga tubag.

Dili kita mahadlok sa pagbuhat sa unsay gisugo sa Ginoo kanato. Miingon Siya, “Panglakaw kamo sa tibuok kalibotan, ug iwali ninyo ang maayong balita ngadto sa tibuok nga kabuhatan” (Marcos 16:15).

Ako mosaad nga kita dili magmahay kon kita motuman Kaniya.