“Ang mga Kausaban nga Gusto—ug Dili Gusto—Nato nga Atubangon,” Liahona, Hulyo 2023.
Mga Young Adult
Ang mga Kausaban nga Gusto—ug Dili Gusto—Nato nga Atubangon
Unsay inyong taas og tagal nga tumong? Kon nahibalo kamo kon unsay inyong gipunting, mahimo kamong andam, ug gani mahinamon, sa paghimo og mga kausaban sa inyong kinabuhi.
Nakasinati ba kamo nga kinahanglan mohimo og kausaban nga kamo wala kaayoy kadasig sa paghimo? O usa ka kausaban nga kamo wala magdahom nga kinahanglan ninyong himoon?
Mga 15 ka tuig ang milabay ang akong doktor misulti kanako nga kinahanglan kong maghimo og kausaban sa pamaagi sa kinabuhi: “Pagsugod nga mahimong mas aktibo, o dili na kaayo ka mabuhi og dugay,” siya misulti kanako. Seryoso nakong gidawat ang iyang pasidaan. Nakahukom ko nga magsugod sa pagdagan.
Aron magmalamposon niining kausaban sa pamaagi sa kinabuhi, nagkinahanglan ko nga magbaton og taas nga panglantaw sa hunahuna tungod kay kon ako adunay mubo lamang nga panglantaw, dili kaayo ko layo og maabtan.
Ang akong taas nga panglantaw mao ang usa ka nagbalik-balik nga tumong nga modagan og usa ka marathon matag tuig. Kini nga tumong nakatabang kanako nga mobangon ug modagan kada adlaw tungod kay nasayod ko nga sa usa ka piho nga adlaw sunod tuig, kinahanglan kong modagan og 26.2 ka milya (42.2 ka kilometro). Nagpabilin kong disiplinado sa pagbansay ug pagkab-ot sa akong mubo og tagal nga mga tumong matag semana tungod kay nasayod ko nga kini nag-andam kanako alang sa adlaw sa lumba.
Usahay adunay mga butang nga mosulay ug mopugong kanako, sama sa panahon. Tingali init kaayo o tugnaw kaayo sa gawas, o tingali nag-ulan. Mao nga kinahanglan kong modagan sa sulod diha sa treadmill, bisan og mas ganahan gayod kong modagan diha sa dalan. Ang mga pagkaangol [injuries] mosulay ug mopugong usab kanako. Tingali wala ko nag-stretch og maayo sa dili pa ang akong dagan, mao nga nalisa nako ang akong kaunoran dapit sa bagtak [hamstring]. O tingali dili gayod nako sala nga ako naangol. Apan dili igsapayan kon sa unsa nga paagi kini mahitabo, dili ko mahimong moundang tungod kay nasayod ko nga modagan ko sa usa ka marathon sunod tuig. Mao nga mohimo ko og mga kausaban sa akong pagbansay. Naulian ko ug mibalik sa pagdagan.
Ang pagdagan nakatudlo kanako og daghan mahitungod sa ebanghelyo. Kitang tanan adunay taas og tagal nga tumong sa ebanghelyo nga molahutay hangtod sa kataposan ug makakab-ot og kahimayaan. Apan kita maghimo og mugbo og tagal nga mga tumong sama sa pag-ambit sa sakramento diha sa simbahan matag semana nga makatabang kanato nga maabot didto. Maangol kita sa espirituhanon nga paagi kon kita makahimo og mga sayop. Apan dili kita moundang. Maghinulsol kita, ug mopadayon kita sa pagkab-ot sa atong mga tumong. Ang bugtong nga paagi nga kita makakab-ot sa atong taas og tagal nga tumong mao ang paghimo og ginagmay nga mga kausaban samtang magpadayon aron motabang kanato nga magpabilin nga nakatutok sa tumong.
Mopili nga Mag-usab
Lapas sa usa ka dekada, mitrabaho ko isip senior vice president alang sa Walmart sa Brazil. Ang akong pamilya wala maglisod sa pinansyal, nalingaw ko sa akong trabaho, ug maayo ang kinabuhi. Apan ang trabaho nagkinahanglan og dako kaayo nga panahon. Kini nagkinahanglan kanako nga kanunayng mobiyahe, nga misumpaki na sa among pamilya ug sa akong pagserbisyo sa Simbahan. Human sa 11 o 12 ka tuig, nahimo na kining sobra na kaayo.
Ang akong asawa ug ako nagtinambagay ug misugyot nga biyaan nako kini nga trabaho. Gihisgotan namo kini uban sa among anak, ug magkauban kaming miingon, “Panahon na alang kanato nga mohimo og kausaban.”
Sa dihang miundang ko, nahagsa ko gikan sa senior vice president ngadto sa walay trabaho. Mikabat og hapit usa ka tuig sa pagpangita ug pagdawat og laing trabaho. Sa dihang sa kataposan midawat ako og usa ka posisyon diha sa usa ka gamay nga kompanya sa real estate sa Estados Unidos, maayo ang akong gibati mahitungod niini. Kini nga trabaho motugot kanako nga makagahin og mas daghang panahon ngadto sa mga butang nga mahinungdanon gayod.
Apan ang ubang mga tawo misulti kanako nga nabuang ko. Nganong biyaan ang usa ka maayo nga trabaho alang sa usa ka kompanya sa real estate nga gani walay tawo nga nakadungog bahin niini? Ug mobalhin tadlas sa katunga sa kalibotan ngadto sa Estados Unidos?
Husto sila nga kini dako kaayo nga kausaban nga gipili namo nga buhaton. Apan nasayop sila nga kini usa ka dili maayo nga pagpili.
Kini nagkinahanglan og dako kaayo nga hugot nga pagtuo alang kanamo nga mobalhin og laing trabaho ug mobalhin ngadto sa usa ka bag-o nga nasod, apan ang Ginoo miatiman kanamo. Ug ako nakabaton og daghang panahon sa pagtuman sa akong mga responsibilidad isip usa ka bana, amahan, ug miyembro sa ward.
Nagtuo ko nga ang kausaban gikinahanglan aron sa pagkab-ot sa atong potensiyal. Dili gayod kita mahimo sa unsay gusto sa Langitnong Amahan nga kita mamahimo kon kita mag-urong lang sa atong mga kinabuhi. Ug kita mahimong sama Kaniya samtang kita mohimo og tinuyo nga mga kausaban uban sa hugot nga pagtuo.
Napugos nga Mag-usab
Ang laing dako nga kausaban nga nahitabo sa akong pamilya mao ang panahon sa dihang namatay ang akong kinamahangoran nga igsoon nga lalaki sa usa ka aksidente sa sakyanan. Kami wala mipili o gusto niana alang kaniya o alang kanamo, ug sakit gihapon kini, bisan 10 ka tuig na ang milabay. Ang napugos nga kausaban dili gayod sayon.
Apan ang mga kausaban nga wala nato gipili mahimong mga kahigayonan usab sa pagpalig-on sa atong hugot nga pagtuo sa Langitnong Amahan ug ni Jesukristo. Sayon ang pagpabiling matinud-anon kon ang mga butang sa kinabuhi mahitabo sumala sa atong gusto. Apan mahimo ba kitang magpabilin nga matinud-anon ug magpadayon kon ang mga butang wala mahitabo sumala sa atong gusto?
Ang diborsiyo, pagkadili makaanak, pagkawalay trabaho, sakit, ug ubang masakit nga mga kasinatian sama niini dili mao ang mga kasinatian nga atong gilaoman ug giplanohan. Kini mahimong mopabati kanato nga daw nahitabo ang kinabuhi nga dili nato makontrolar. Apan dili gayod kana tinuod—taliwala sa inyong wala gipangayo nga mga kahimtang, aduna gihapoy mga butang nga inyong makontrolar. Makahimo kamo og gagmay nga mga tumong, bisan lang ang tumong nga makalahutay og usa pa ka adlaw. Makahimo kamo niini! Makaantos kamo sa tanan niini nga mga butang uban sa pagkamapailobon! (tan-awa sa Alma 38:4).
Si Jose sa Ehipto usa ka hingpit nga ehemplo niini. Ang iyang kinabuhi napuno sa napugos nga kausaban—nawad-an siya sa iyang kalingkawasan kaduha! (Una sa dihang ang iyang mga igsoon nga lalaki mibaligya kaniya sa pagkaulipon, ug usab sa dihang gipapriso siya ni Potifar.) Apan si Jose wala mawad-i og paglaom tungod ang iyang mga kahimtang dili nindot o wala giplano. Siya mipahiangay ug milambo pinaagi sa iyang mga kasinatian. Ug sa kataposan, siya miluwas sa iyang pamilya ug sa usa ka tibuok nga nasod. Ang Ginoo mihulma ug miandam kaniya sa kinatibuk-an (tan-awa sa Genesis 37–46).
Lisod nga mahimong mapailobon kon ang napugos nga kausaban makaguba sa inyong plano, apan hinumdomi nga ang taas og tagal nga tumong mao ang pagkab-ot og kahimayaan. Ang Langitnong Amahan nasayod sa unsay atong gikinahanglan aron makaabot didto: “Kamo dili makahimo sa pagharong sa atubangan sa Dios karon, ni pagpangalagad sa mga anghel; busa, padayon diha sa pagpailob hangtod kamo mahingpit.” (Doktrina ug mga Pakigsaad 67:13).
Ang Kausaban Makatabang Kanato nga Mahimong Sama sa Manluluwas
Ang Langitnong Amahan nahigugma kaninyo ug gusto nga kamo magmalamposon. Gusto Siya nga kita magmalipayon. Ug Siya mipahimutang og usa ka plano alang kaninyo aron makab-ot kadtong duha ka butang.
Kon akong tan-awon ang mortalidad alang sa unsay katuyoan niini—pagbansay—ang mga kausaban sa akong kinabuhi mahimong mas makahuloganon. Ang kausaban motabang kanako sa pagkab-ot sa akong taas og tagal nga tumong, nga mao ang mamahimong sama sa akong Manluluwas nga si Jesukristo. Nasayod ko nga ang Langitnong Amahan adunay sama nga taas og tagal nga tumong alang kanako ug alang sa tanan Niyang mga anak. Ingon nga ang akong doktor nahibalo nga gikinahanglan nakong usbon ang usa ka butang alang sa kaayohan sa akong panglawas, ang Dios klarong nakakita sa mga kausaban nga kinahanglan natong himoon aron mahimong sama Kaniya. Siya mosuporta kanato ug mohatag og mga kapanguhaan sama sa mga kasulatan, usa ka lokal nga kongregasyon, ug usa ka buhi nga propeta aron sa pagtabang kanato sa atong tinguha nga mag-usab alang sa mas maayo.
Sa kinalisoran nga mga adlaw—kadtong mga adlaw sa dihang lisod mobangon ug mosul-ob sa inyong mga sapatos nga pangdagan, sa dihang nakahibalo kamo nga gikinahanglan ninyo nga maghinulsol, o sa dihang nanglimbasog kamo og laing pipila ka wala damha nga kausaban—kita mopahinumdom sa atong kaugalingon sa walay kataposan nga gugma sa Dios ug sa Iyang tinguha alang kanato nga mahimong mas malipayon kay sa unsa kita karon.
Kana nga pahinumdom maghatag kanato sa kalig-on sa paghimo og mga kausaban nga ang Espiritu moaghat kanato sa paghimo. Ug kini motabang kanato nga mosalig nga ang wala damha nga mga kausaban nga napugos kita sa paghimo kabahin sa Iyang plano alang sa atong kinadak-an nga kalipay.