Konteksto sa Bag-ong Tugon

Ang Konseho sa Jerusalem

Ni Jared Ludlow

Propesor sa Karaang Kasulatan, Brigham Young University

Kat-oni unsay gitudlo ngari nato karon bahin sa unsay gihulagway sa konseho diha sa Mga Buhat 15.

Ang Mga Buhat 15 misaysay pag-usab sa usa ka labing una nga mga konseho sa Krisitiyano, ang Konseho sa Jerusalem, ug mitudlo og mga baroganan nga magamit gihapon sa Simbahan karon.

Kini nga konseho mag-abot aron sa paghisgot sa isyu bahin sa kon unsay angay buhaton sa mga Hentil (dili mga Judio) kon makabig ngadto sa pagka-Kristiyano. Samtang ang mga Judio ang nag-unang mga tumutuo kinsa midawat ni Jesus isip Mesiyas, ang mga Hentil naggikan sa lahi-lahi nga kagikan sa relihiyon ug etniko, mao nga ang ilang pagkaapil sa mitumaw nga Kristiyanong Simbahan nahimo nga usa ka isyu.

Sa kasagaran, ang mga Judio ug mga Hentil walay suod nga relasyon tungod sa panaglahi sa mga gituohan, kultura, ug pinulongan, ingon man usab sa mga pamalaod sa pagkaon (kosher) nga gisunod sa mga Judio. Ang nag-unang mga Kristiyano naghunahuna kon ang mga kustombre ug mga tradisyon sa mga Judio ipadayon ba, kay si Jesus ug ang nag-unang mga Apostoles nagtubo man nga nagbuhat niining mga butanga.

Lahi-lahing mga Panglantaw tali sa Nag-unang mga Miyembro sa Simbahan

Ang nag-unang mga miyembro sa Simbahan adunay managlahing punto niini nga isyu. Ang uban mitudlo nga ang mga lalaki kinsa gustong maluwas ug modawat ni Jesus kinahanglan nga matuli, kay maoy naandan ubos sa balaod ni Moises (tan-awa sa Mga Buhat 15:1).¹

Si Pablo ug si Bernabe mipresentar og lahi nga punto. Kaniadto pa silang nagtudlo sa mga Hentil ug mibati nga ang Espiritu Santo mitabang sa pagkabig kanila. Nakita kini ni Pablo ug Bernabe isip usa ka saksi nga ang buhat nga ilang gihimo tinuod (tan-awa sa Mga Buhat 15:2–4). Wala nila himoang rekisito alang sa bunyag ang pagpatuli o pagsunod sa mga pamalaod sa mga Judio bahin sa pagkaon.

Kining magkasukwahi nga mga panglantaw nagkinahanglan og usa ka konseho tali sa mga lider sa Simbahan sa Jerusalem aron mahusay kini nga butang.

Pamahayag ni Pedro

Si Pedro, ang labaw nga Apostol namulong sa konseho. Iya silang gipahinumdoman bahin sa iyang kasinatian diin nakakat-on siya nga ang mga Hentil kinahanglan nga makadungog sa ebanghelyo ug nga ang Espiritu Santo misaksi sa kamatuoran ngadto nila mao usab ngadto sa mga Judio nga midawat ni Jesus isip Mesiyas (tan-awa sa Mga Buhat 15:7–8; tan-awa usab sa Mga Buhat 10).

Miingon siya nga ang Dios “walay gipalabi tali kanato ug kanila, giputli usab niya ang ilang mga kasingkasing kay mituo na man sila.” (Mga Buhat 15:9). Ang mga kasinatian sa mga Hentil kauban sa Espiritu Santo mao ang mga panghimatuod nga ang ilang pagkakabig ngadto kang Kristo gidawat sa Dios. Ug nasinati nila kini nga walay pagtuman sa mga rekisito sa balaod ni Moises.

Si Pedro mitapos uban sa iyang panghinaot nga “kita maluwas pinaagi sa grasya sa Ginoong Jesus, maingon man usab sila” (Mga Buhat 15:11).

Ang Pag-uyon ni Santiago

Si Santiago, ang igsoong lalaki ni Jesus ug usa ka mahinungdanon nga lider sa nag-una nga Simbahan sa Jerusalem, namulong usab sa konseho. Giila niya ang mga kasinatian ni Pedro nga misangpot sa iyang pagkasayod nga ang Dios mohimo og mga katawhan sa pakigsaad gikan sa mga Hentil. (Tan-awa sa Mga Buhat 15:13–17; tan-awa usab sa Amos 9:11.)

Dayon misugyot siya og usa ka makapauyon nga sulbad. Misugyot siya nga ang mga Hentil kinahanglang mohunong pinakaminos sa upat ka butang nga may kalabotan sa pagtuman sa balaod ni Moises (tan-awa sa Mga Buhat 15:20, 29):

• Mga karne nga ihalad ngadto sa mga dios-dios

• Pakighilawas (imoralidad sa sekswal)

• Karne sa gituok ra nga hayop (ang dugo sa karne nga wala mapaagas)

• Dugo (may kalabotan sa paglikay sa karne sa gituok nga hayop nga wala mapaagas ang dugo)

Kini nga mga pagdili ang magtino sa kalahian tali sa nakabig nga mga Hentil gikan sa ubang mga Hentil kay kini nga mga buhat usahay adunay kalambigitan sa Hentil nga pagsimba og mga dios-dios ug mga diosa.

Usa ka Mensahe alang sa mga Santos

Ang tanan nga didto sa konseho miuyon sa gisugyot ni Santiago, mao nga mipadala sila og mga sulat ug mga representante ngadto sa Antioch ug sa ubang Kristiyano nga mga kongregasyon sa pagpahibalo kanila niini nga palisiya (tan-awa sa Mga Buhat 15:23–29). Giila usab nila sa sulat ang tahas sa Espiritu Santo sa pagsaksi nga kini nga palisiya maayo.

Karon ang tanang Kristiyano, nga Judio ug Hentil ang mga kagikan, mahimong magsalo sa pagpangaon. Ang palisiya mipasabot usab og maayo sa dili direktang paagi nga ang hugot nga pagtuo ug mga pakigsaad kang Jesukristo mao ang dalan sa kaluwasan, dili ang balaod ni Moises.²

Mga leksiyon gikan sa Konseho sa Jerusalem

Pinakaminos lima ka baroganan gikan sa Konseho sa Jerusalem ang magamit sa Simbahan karon:

1. Ang pagpakigbahin og lahi-lahing mga ideya sa usa ka konseho makatabang sa mga miyembro samtang magtinguha sila sa kabubut-on sa Ginoo ug mahimong mosangpot ngadto sa panag-uyon nga mahimong sundon sa uban.

2. Ang kataposang panag-uyon o desisyon naghatag og katungod sa matag lider niini; ang mga sakop sa konseho ug ang mas lapad nga kasakopan sa Simbahan makasuporta ug makasalig niining awtorisado nga mga desisyon.

3. Ang Simbahan mahimong mohiusa niining managlahi nga kultura ngadto sa usa ka lawas, ug ang mga miyembro makakat-on kon asa niining kultural nga mga buhat ang nahisupak sa kultura sa ebanghelyo ug kinahanglan nga dili na buhaton.

4. Ang Espritu Santo mohatag og lig-ong pagpamatuod kon unsay kabubut-on sa Dios ug lig-ong pagpamatuod nga ang usa ka tawo nagsunod niini.

5. Ang pagdawat kang Jesukristo pinaagi sa bunyag ug sa ubang mga pakigsaad maoy usa ka yawe sa pagkakabig ug pagpasakop sa Simbahan.

Ang pagsunod niining mga baroganan sa mga konseho sa Simbahan karon mosangpot sa pagtahod sa mga panglantaw sa uban. Makapakita usab kita og kamapaubsanon pinaagi sa pagdawat ug pagsuporta sa mga desisyon sa mga konseho.

Ang Simbahan sa Ginoo Giorganisar pinaagi sa mga Konseho

“Ang Dios mitawag og dako nga konseho sa premortal nga kalibotan sa pagpresentar sa Iyang mahimayaong plano alang sa atong mahangtoron nga kaayohan. Ang simbahan sa Ginoo giorganisar nga dunay mga konseho sa kada ang-ang, sugod sa Konseho sa Unang Kapangulohan ug Korum sa Napulog Duha ka Apostoles ngadto sa konseho sa stake, ward, branch, korum, ug mga konseho sa pamilya. …

“Kon ang lider sa konseho mohimo na sa desisyon, ang mga sakop sa konseho mopaluyo niini sa kinasingkasing nga paagi.”

Presidente M. Russell Ballard, Akting nga Presidente sa Korum sa Napulog Duha ka Apostoles, “, “Strength in Counsel,” Ensign, Nob. 1993, 76, 78.

Mubo nga mga sulat

1. Ang Mga Buhat 15:5 migamit sa ulohan nga “magtutuo [ni Kristo] nga sakop sa pundok sa mga Pariseo” sa paghulagway og pipila ka “Mga Judiong Kristiyano” kinsa miinsister sa ilang mga tinguha nga ipadayon ang naandan nga mga buhat sa mga Judio isip kabahin sa Kristiyano nga pakigsaad. Dili kini mao ang mga Pariseo nga kanunayng gihisgotan diha sa Mga Ebanghelyo. Mga kinabig sila nga mga Kristiyano kinsa kusganong nagtinguha nga ipadayon ang ilang Pagka-Judio ug tingali sakop sa Pariseo nga sekta sa wala pa sila makabig ug tingali adunay padayon nga koneksiyon sa mga Pariseo.

2. Ang posibling nakat-onan gikan sa konseho padayong naggiya sa nag-una nga Simbahan. Sama pananglit, gitudlo ni Pablo sa wala madugay nga ang pagtuli ug ang pagsunod sa balaod ni Moises, wala kinahanglana alang sa pagdawat kang Jesukristo, bisan og ang uban nagpadayon sa pagtudlo niining mga butanga (tan-awa sa Mga Buhat 21:20–21), ug gisubli niya ang upat ka nag-unang gikinahanglan nga buluhaton sa nakabig nga mga Hentil gikan sa Konseho sa Jerusalem (tan-awa sa Mga Buhat 21:25).