“Ang Atong Kaugalingon nga Dalan Padulong sa Emmaus,” Liahona, Hulyo 2023.
Dali, Sunod Kanako
Ang Atong Kaugalingon nga Dalan Padulong sa Emmaus
Lima ka yano nga kalihokan ang makatabang nato nga makahibalo nga ang Manluluwas anaa kanunay sa duol.
On the Road to Emmaus [Sa Dalan Padulong sa Emmaus], ni Wendy B. Keller, sa maayong kabubut-on sa Havenlight
Ang akong amahan namatay tungod sa kanser sa dihang 4 anyos pa ko. Nagdako ko nga naghunahuna ngano nga kinahanglan niya nga mamatay. Gipangutana nako ang Dios ug nangutana ngano nga dili patas ang kinabuhi. Paglabay sa napulo ka tuig, sa dihang 14 na ko, akong nahimamat ang mga misyonaryo. Samtang sila nagtudlo namo, gibati sa akong mama nga sila nagtudlo sa kamatuoran ug nga kinahanglan namo nga maminaw. Sa dihang mipasakop kami sa Simbahan, ang ebanghelyo ni Jesukristo ug ang pagkasabot sa plano sa kaluwasan miabot sa akong kinabuhi sa panahon nga gikinahanglan kaayo nako kini.
Sa wala madugay, sa dihang naselyo ko sa akong mga ginikanan sa templo, ang akong inahan mihunghong nako, “Gibati nako ang presensya sa imong amahan.” Samtang naghunahuna ko mahitungod sa mga panalangin sa pagkaselyo, nakahibalo ko nga ang Ginoo nakaila sa among pamilya ug nga Siya anaa kanunay namo, bisan kon kami wala makabantay.
Naghunahuna ka ba kon ang Manluluwas nakaila nimo? Nakahibalo ba Siya sa imong mga panlimbasog ug mga kabalaka? Unsa ang Iyang isulti nimo kon ikaw kauban nga maglakaw ug makaistorya Niya?
Siya Milakaw uban Nila
Tulo ka adlaw human sa kamatayon ni Jesukristo, duha sa Iyang mga disipulo ang naglakaw subay sa dalan padulong sa balangay sa Emmaus, nga gibana-bana og pito ka milya (12km) gikan sa Jerusalem. Sila nadala og maayo sa ilang mga gihunahuna ug mga kabalaka, sa dihang sila gikuyogan sa usa ka langyaw.
Ang langyaw nangutana, “Unsa bay inyong gipanagsultihan samtang nanaglakaw kamo, ug kamo masulub-on?”
Ang mga disipulo misulti sa bag-ohay lang nga mga nahitabo “kabahin ni Jesus nga Nazaretnon.” Sila nagtuo nga si Jesus miabot aron sa pagtubos sa Israel, apan Siya dili makataronganon nga gisilotan ug gilansang sa krus. Miingon usab sila nga kadtong mga hingpit nga nakaila ni Kristo nag-ingon nga Siya nabanhaw gikan sa mga patay.
Ang langyaw miingon kanila nga sila “dugay nga motuo sa tanang gisulti sa mga propeta.” Iyang gibalik unsay gitudlo sa mga kasulatan ug giunsa ni Kristo pagtuman ang mga panagna. Kini mipuno sa mga disipulo sa hingpit nga kalipay.
Pag-abot nila sa Emmaus, gihangyo sa mga tinun-an ang langyaw nga “magpabilin uban [kanila].” Sa panihapon ang langyaw mipanalangin sa pan ug mipikas-pikas niini. Dihadiha, ang mga disipulo nakaila nga ang langyaw dili na langyaw kondili ang Manluluwas Mismo! (Tan-awa sa Lucas 24:13–32.)
Nagauban Siya Kanato
Tingali maghunahuna kita ngano nga ang duha ka disipulo wala makahibalo nga ang Manluluwas mikuyog og lakaw nila. Sa gihapon kapila man kita napakyas sa pagsabot nga Siya mikuyog og lakaw kanato? Kasagaran kita nakatutok og maayo sa atong mga hagit, ug gani sa mga kamaya, diha sa atong inadlaw-adlaw nga mga kinabuhi nga wala nato makita nga ang Manluluwas anaa sa atong kiliran.
Tingali dili nato makita giunsa Niya pagkuyog kanato, pagpakigbisog uban kanato, pagbuhat uban kanato, ug paghilak uban kanato. Bisan sa atong labing subo nga mga higayon, kon kita maniid, ato Siya nga mabati nga nag-uban kanato ug madungog ang Iyang mga pulong: “Hunong, ug ilha ako nga mao ang Dios” (Salmo 46:10; tan-awa usab sa Doktrina ug mga Pakigsaad 101:16).
Ang Atong Personal nga Dalan
Matag usa kanato adunay destinasyon nga adtoan niini nga kinabuhi. Adunay mga higayon sa atong panaw, kita tingali nag-atubang og sakit o kita tingali nakigbisog sa atong kaugalingon nga kahuyang. Tingali kita adunay mga problema sa kwarta o mga hagit nga naggikan sa kalamposan, bahandi, ug garbo.
Samtang kita mopanaw sa atong personal nga dalan padulong sa Emmaus, dili kita kinahanglan nga maglakaw nga mag-inusara. Mahimo kitang mohangyo sa Manluluwas nga mouban kanato. Ania ang lima ka yano nga mga kalihokan nga makatabang kanato nga mapaduol ngadto Kaniya.
Mga paghulagway pinaagi ni Lovetta Reyes-Cairo
1. Pag-ampo Kada Adlaw
Ang pag-ampo kinahanglan nga mag-una sa atong matag adlaw nga mga kinabuhi. Kini makatabang nato nga makadawat sa pag-uban ug giya sa Langitnong Amahan. Kita mahimong mangayo alang sa kalig-on sa pagsunod sa Iyang Anak ug alang sa gahom sa Espiritu, labi na sa mga higayon nga ang atong mga hunahuna modala nato sa sala.
Ang batan-on nga si Joseph Smith, samtang nangamuyo sa Dios diha sa pag-ampo alang sa tubag, nakabantay nga ang kaaway nagtinguha sa pagpugong kaniya (tan-awa sa Joseph Smith—Kasaysayan 1:16). Sama ni Joseph, kita kinahanglan nga mopadayon sa pag-ampo ug mosalig nga ang Langitnong Amahan dili gayod kapoyon sa pagpaminaw kanato. Siya motabang nato nga makasabot sa Iyang tukmang panahon ug sa Iyang mga tubag.
2. Pagbusog diha sa mga Kasulatan
Ang Manluluwas nagpakita sa ehemplo alang kanato pinaagi sa pagtuon sa mga kasulatan. Siya kanunay nga mokutlo gikan niini samtang Siya nagtudlo. Ang makanunayon nga pagtuon sa kasulatan makatabang nato nga makabaton og tin-aw ug bukas nga panghunahuna, madawaton nga kasingkasing nga mohatag og bili sa pulong sa Dios, ug mga kamot nga andam sa pagserbisyo.
Samtang kita magtuon sa mga kasulatan, ang Balaang Espiritu mopuno kanato og tinguha nga mobuhat sa matarong. Kini mopatin-aw sa atong panan-aw nga makita ang dili makita sa yano nga mga mata. Kini motabang nato nga makadungog sa mga pangamuyo sa nanginahanglan. Kita mapanalanginan sa pagsunod sa ehemplo sa Manluluwas sa paghupay niadto nga nagkinahanglan sa kahupayan (tan-awa sa Mosiah 18:8–9). Dayon samtang kita moatubang sa mga buluhaton nianang adlawa, kita dili gayod maglakaw nga mag-inusara. Ang Manluluwas mokuyog og lakaw kanato usa ka lakang matag higayon.
3. Sunda ang Buhi nga mga Propeta
Kinahanglan natong sundon ang tambag sa atong pinalangga nga propeta, si Presidente Russell M. Nelson, ug ang uban nga mga propeta, mga manalagna, ug mga tigpadayag. Dayon atong makita nga ang atong dalan padulong sa Emmaus mahimong luwas ug klaro. Sila luwas nga mogiya nato ug motabang nato nga masayod nga ang Manluluwas anaa uban kanato.
4. Dapita Siya nga Magpabilin
Samtang kita nagkat-on mahitungod ni Jesukristo ug samtang kita nagsunod sa Iyang mga sugo, kita nagdapit sa Manluluwas nga mouban kanato. Kita makat-on sa pag-ila sa Iyang impluwensya sa atong mga kinabuhi.
Ang duha ka disipulo diha sa dalan padulong sa Emmaus, naglakaw uban sa Manluluwas, nakig-istorya Niya, ug mibati nga ang ilang mga kasingkasing nagdilaab (tan-awa sa Lucas 24:32). Ang ilang pangamuyo Kaniya, “Anhi lang ta mamahulay” (Lucas 24:29), kinahanglan mao usab ang atong pangamuyo.
Sa dihang ang mga disipulo nakaila sa Manluluwas, Siya kalit nga nahanaw sa ilang panan-aw. Ang mga disipulo namalik dayon sa Jerusalem ug mipamatuod sa mga Apostoles nga ang Manluluwas nabanhaw. Samtang sila nagpamatuod, ang Ginoo “mitungha sa taliwala nila” og usab (Lucas 24:36). Kita usab mobati Niya kon Siya anaa sa atong taliwala.
5. Bag-oha ang mga Pakigsaad sa Kanunay
Ang mga ordinansa ug mga pakigsaad sa ebanghelyo ni Jesukristo makausab sa atong kinaiya. Si Presidente Dallin H. Oaks, Unang Magtatambag sa Unang Kapangulohan, miingon, “Ang atong pagsimba ug paggamit sa mahangtoron nga mga baroganan mas makapaduol kanato sa Dios ug mopalambo sa atong kapasidad nga mohigugma.”1 Pananglitan, ang bunyag motugot sa Ginoo sa paglimpyo kanato. Ug kon kita matinud-anon ug masulundon, ang mga pakigsaad ug mga ordinansa sa templo moandam kanato sa pagpuyo sa umaabot nga adlaw sa presensya sa Amahan ug sa Anak.
Ang sakramento makatabang nato nga mahinumdom ug motugot nato nga mobag-o sa atong mga pakigsaad, sa paghinulsol, ug mosulay pag-usab. Kon kita moambit sa sakramento, atong gipakita ang atong kaandam sa pagdala sa ngalan ni Jesukristo diha kanato ug mosaad pag-usab sa paghinumdom Kaniya ug sa pagtuman sa Iyang mga sugo. Kita dayon gisaaran nga ang Iyang Espiritu kanunayng magauban kanato. (Tan-awa sa Doktrina ug mga Pakigsaad 20:77, 79.) Kinahanglan nga atong hinumdoman kanunay ang mga ordinansa ug mga pakigsaad nga atong gihimo.
Ang Manluluwas Anaa lang sa Duol
Sa atong kaugalingon nga dalan padulong sa Emmaus, ang Manluluwas mahigugmaon nga midapit kanato sa pagduol Kaniya ug maglipay diha Kaniya. Samtang kita mag-ampo matag adlaw, magbusog diha sa mga kasulatan, mosunod sa buhi nga mga propeta, modapit Kaniya sa pagpabilin uban kanato, ug mobag-o ug motahod sa atong mga pakigsaad, Siya maanaa duol kanato. Kita dayon makahibalo, sama sa nahibaloan sa mga disipulo diha sa dalan padulong sa Emmaus, nga si Jesukristo nabanhaw ug nga Siya tinuod nga buhi ug nahigugma kanato.
Mopamatuod ko nga si Jesukristo mao ang atong Manluluwas ug Manunubos. Siya naghinam-hinam nga mouban kanato ug mogiya kanato nga luwas diha sa atong agianan.