Pagpaambit sa Ebanghelyo ni Jesukristo

batan-ong babaye nga dunay abli nga mga kasulatan diha sa sabakan

Kon maghunahuna kita mahitungod sa mga panalangin nga atong nadawat tungod kay mga miyembro kita sa Ang Simbahan ni Jesukristo sa mga Santos sa Ulahing mga Adlaw, gusto kita nga mopaambit sa ebanghelyo ngadto niadtong atong gihigugma. Kita makapaambit sa atong mga pagpamatuod sa kamatuoran pinaagi sa atong mga pulong ug sa atong ehemplo. Kita mahimong mag-ampo alang sa inspirasyon nga mahibalo kon kinsa ang paambitan ug unsa ang isulti.

Higugmaa ang Uban

Usa ka importante nga bahin sa pagpaambit sa ebanghelyo mao ang paghigugma sa uban. Kon kita mopakita sa atong gugma ngadto sa uban pinaagi sa Kristohanon nga mga buhat, kita nagpaambit sa ebanghelyo ni Jesukristo—usahay nga dili mosulti og usa ka pulong. Ug kon ang uban mahibalo nga kita tinud-anay nga nagpakabana kanila, sila tingali mahimong mas bukas sa pagpaminaw sa atong mga hunahuna mahitungod sa ebanghelyo. (Tan-awa sa Gary E. Stevenson, “Paghigugma, Pagpaambit, Pagdapit,” Liahona, Mayo 2022, 84–87.)

Pagpaambit sa Normal ug Natural nga mga Paagi

Kita makapaambit sa unsay atong ganahan mahitungod sa ebanghelyo. Kon buhaton nato kini isip bahin sa atong inadlaw-adlaw nga mga kinabuhi, dili kini mahimong kiwaw o dili komportable. Sama pananglit, mahimo kitang maghisgot ngadto sa atong pamilya ug mga higala bahin sa unsay buhaton nato sa Dominggo. O kita makasulti kanila mahitungod sa kalipay nga atong bation kon kita moserbisyo sa uban. (Tan-awa sa Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 15–18.)

Dapita ang Uban nga Moapil Kanato

Kita makadapit sa uban nga magkat-on pa og dugang mahitungod sa ebanghelyo. Sama pananglit, kita makadapit kanila nga motambong sa usa ka miting o kalihokan sa Simbahan, mobasa sa Basahon ni Mormon, motan-aw og usa ka bidyo sa Simbahan, o makig-istorya sa mga misyonaryo. Kini nga mga kasinatian makatabang kanila nga mobati sa Espiritu ug gusto nga magkat-on pa og dugang.

Pangutana mahitungod sa Ilang Kasinatian

Human ang mga higala o mga sakop sa pamilya mosimba o makapaminaw og leksiyon sa mga misyonaryo, kita mahimong mangutana kanila mahitungod sa ilang kasinatian. Ang pipila ka pagtulon-an sa ebanghelyo tingali bag-o alang nila, mao nga makatubag kita sa ilang mga pangutana. Kita makapakita sa atong gugma ug suporta alang sa ilang mga paningkamot nga moduol ngadto kang Kristo.

Modugang ngadto sa Ilang mga Gituohan

Kita naghatag og bili ug nagtahod sa mga gituohan sa uban, ug maningkamot kita sa pagdugang ngadto sa hugot nga pagtuo nga anaa na kanila. Sama pananglit, ang usa ka higala nga nakakaplag og kahupayan diha sa mga kasulatan sa Biblia mahimong makakaplag usab og kahupayan diha sa mga pagtulon-an nga atong ipaambit gikan sa Basahon ni Mormon.

Tabangi ang Bag-o nga mga Miyembro sa Simbahan

Kon ang mga tawo mopasakop sa Simbahan, kita makatabang sa pagpalig-on sa ilang hugot nga pagtuo. Kita mahimo nilang higala, motubag sa ilang mga pangutana, ug mosuporta nila kon makadawat sila og mga calling. Kita makadasig kanila nga magpadayon sa pagsunod ni Jesukristo ug pagkat-on mahitungod sa Iyang ebanghelyo.

Moserbisyo og Full-time nga Misyon

Agig dugang sa pagpaambit sa ebanghelyo sa atong inadlaw-adlaw nga mga kinabuhi, ang mga miyembro sa Simbahan mahimong tawagon nga moserbisyo isip full-time nga mga misyonaryo. Kon andam na sila, ang batan-ong mga lalaki mahimong moserbisyo sa labing sayo sa edad nga 18. Ang batan-ong mga babaye ug mas tigulang nga mga hamtong mahimong moserbisyo usab. Makakita kamo og dugang nga impormasyon sa ChurchofJesusChrist.org/callings/missionary.