“Ang mga Milagro sa Dios Nagpadayon,” Liahona, Hulyo 2023.
Mga Hulagway sa Hugot nga Pagtuo
Ang mga Milagro sa Dios Nagpadayon
Akong naamgohan nga ang mga gituohan sa mga Santos sa Ulahing mga Adlaw mas parehas sa Biblia kay sa gipangangkon nga ang Biblia mihulip sa mga propeta ug pagpadayag. Gibati nako ang tinuod nga kamaya sa dihang akong naamgohan nga ako tingali nagpuyo sa moderno nga “biblikanhon nga mga panahon.”
Litrato sa maayong kabubut-on sa tagsulat
Niadtong Nobyembre 9, 1989, usa ka East German nga opisyal sa gobyerno ang nasayop sa pagpahibalo nga dihadiha dayon, ang mga lumulupyo sa ulohan nga siyudad gitugotan nga moagi sa Paril sa Berlin. Pipila ka minuto human niana ang kasagaran nga gilaay nga mga tigbantay sa utlanan walay nahimo kondili tugotan ang dako ug nagkadaghan nga pundok sa pagbiya sa teritoryo sa German Democratic Republic.
Ang akong suod nga higala, si Jakub Górowski, ug ako—nga nianang panahona mga ten-edyer pa—nagtan-aw sa wala damha nga milagro nga gipakita sa telebisyon gikan sa among panimalay sa Poland. Ang kalibotan nakasinati gayod og dakong kausaban apan dili ang makaguba nga matang. Ang diwa sa kagawasan ug paglaom mipuno sa mga kasingkasing sa minilyon ka tawo.
Alang ni Jakub ug nako, ang among damgo mao nga usa ka adlaw mobalhin gikan sa Poland ngadto sa Kasadpan—Denmark, Sweden, West Germany. Nadasig kami sa mga pelikula ug mga salida sa TV sa mga Amerikano. Ang akong paborito mao ang The Wonder Years. Ganahan ko sa palibot sa kinabuhi sa gawas sa mga siyudad sa Amerika.
Wala ko maghunahuna nga bisan kinsa sa matag habig sa Puthaw nga Kurtina [Iron Curtain] ang magdahom nga mahuman na ang grabe nga tensyon sa kasundalohan [Cold War]. Apan ang Langitnong Amahan adunay lahi nga plano. Niadtong 1975, wala kami kasayoran, si Presidente Spencer W. Kimball (1895–1985) nagdapit sa mga Santos sa Ulahing mga Adlaw sa “pag-apil sa usa ka seryoso nga padayon nga pangamuyo sa Ginoo sa pagbukas sa mga ganghaan sa kanasoran ug humokon ang mga kasingkasing sa mga hari ug mga tigmando hangtod nga ang mga misyonaryo mahimong mosulod sa tanang yuta ug magtudlo sa ebanghelyo.”1
Duha ka tuig human niana, si Presidente Kimball mibisita sa Warsaw, Poland. Usa ka buntag, kuyog sa usa ka gamayng grupo sa iyang mga kaubanan, lakip na ni Elder Russell M. Nelson, si Presidente Kimball mibiya sa iyang hotel, milakaw subay sa Tomb of the Unknown Soldier, ug misulod sa Saski Park. Dili layo gikan sa usa ka dako nga fountain nga hangtod karon nagbarog didto, siya miluhod ug gipahinungod pag-usab ang Poland alang sa pagsangyaw sa ebanghelyo.
Usa ka dekada sa kaguliyang ug pagprotesta sa katawhan ang misunod. Samtang ang mga hamtong wala na mosalig ug misupak sa politikanhong mga lider, daghan sa mga batan-on ang mikuwestyon sa pipila ka hiyas, mga tradisyon, ug mga kinaiya sa ilang mga ginikanan. Ang akong higala nga si Jakub ug ako mibati nga dili na maghunahuna sa Kristiyanismo sumala sa pagkasabot namo niini. Siya nawagtangan og interes sa relihiyon sa kinatibuk-an, samtang ako nainteresado sa mga pilosopiya nga nagsugod sa Asya.
Niadtong Abril 1990, si Jakub ug ako nag-hitchhike padulong sa Austria. Sa Vienna nahimamat namo ang duha ka buotan nga mga babaye nga nagbarog sa daplin sa usa ka bisi nga dalan. Ang usa kanila nagkupot og Basahon ni Mormon sa Polish. Gisultihan mi niya mahitungod sa pagbisita ni Jesus sa katawhan sa karaang Amerika ug misaad nga ipadala ang basahon sa among mga panimalay kon ihatag namo niya ang among mga address. Giablihan usab namo ang among sulatanan sa mga address ug gikopya ang mga address sa daghan namo nga mga higala. Naghunahuna kami nga nindot nga surprisa alang nila ang makadawat og regalo.
Pipila ka bulan human niana ang Poland Warsaw Mission gitukod, ug upat ka misyonaryo ang miabot sa among siyudad. Wala madugay, akong nahibaloan nga ang gidaghanon sa “mga referral”—ang mga address sa among mga higala—adunay dako nga tahas sa desisyon nga buksan ang among siyudad alang sa mga misyonaryo. Sa akong kahikurat pipila ka bulan human niana, si Jakub misulti nako nga duha ka “Mormon” nga mga misyonaryo ang mibisita niya ug nakadesisyon siya nga magpasakop sa ilang simbahan.
Nasakitan ko sa iyang gipahibalo. Naningkamot ko sa daghang tuig nga mainteresado siya sa relihiyon apan wala magmalamposon. Giunsa man sa mga langyaw gikan sa lahi nga nasod sa pagkabig dayon niya? Determinado ko nga atubangon sila ug ipakita ni Jakub nga dili sila makadaog sa usa ka debate uban nako.
Gibati Nako ang Usa ka Espesyal nga Butang
Sa dihang nakit-an nako ang duha ka batan-on, mapahiyomon nga mga misyonaryo nga nagbarog sa may pultahan sa apartment sa akong mga ginikanan, nakalimtan nako ang akong tumong nga ipakita nga sayop sila. Malipayon sila ug makalingaw. Daghan sila og gipangutana nako mahitungod sa akong kaugalingon ug sa akong mga gituohan. Sila mirespeto sa akong mga gibarogan. Sa wala madugay giingnan ko nila nga atol nianang una nga panagkita sa gahi og ulo nga lalaki nga adunay taas nga buhok ug gisi-gisi nga karsones nga nanigarilyo, naglisod sila sa paghunahuna nga ako mahimong interesado sa pagkahimong sumusunod ni Jesukristo. Apan mibati ako og espesyal nga butang sa ilang presensya, ug nakuryuso ko nga ang ilang Simbahan mao lamang ang Kristiyano nga pundok nga akong nahibaloan nga mituo sa usa ka kinabuhi sa wala pa dinhi sa kalibotan.
Nakadayeg usab ako sa ilang mga pagpamatuod ug sa lig-on nga mga baroganan ni Jakub ug ni Robert Żelewski, ang iyang bag-o nga higala sa Simbahan. Si Robert usa ka psychologist, maalamon apan mapaubsanon nga tawo kansang mga panglantaw ug mga kasinatian nakapalig-on sa akong interes sa relihiyon sa mga Santos sa Ulahing mga Adlaw.
Tanan nga gisulti sa mga elder, ni Jakub ug ni Robert makapahingangha, ilabi na ang doktrina sa plano sa kaluwasan, nga nagsugod sa kinabuhi sa wala pa dinhi sa kalibotan ug motapos sa tulo ka ang-ang sa himaya. Apan wala nako makita ang bisan unsa nga punto sa pagpasakop sa Simbahan hangtod nga akong hingpit nga masabtan ang ilang talagsaon nga mga gituohan. Ang akong nasabtan sa Kristiyanismo mao nga sa karaang panahon, ang Dios mihimo og mga milagro, mipadala og mga anghel, ug mitawag og mga propeta, apan kadtong tanan nga mga butang nahisakop sa biblikanhong panahon. Sa dihang ang Biblia nakompleto, ang katawhan wala na magkinahanglan og mga milagro ug pagpadayag tungod kay ang kasulatan naglangkob sa tanan nga kinahanglan natong masayran.
Ang kalamboan miabot atol sa among panaghisgotan mahitungod sa Grabe nga Apostasiya ug sa Pagpahiuli sa kahingpitan sa ebanghelyo pinaagi ni Propeta Joseph Smith. Akong naamgohan nga ang ilang mga gituohan mas parehas sa Biblia kay sa gipangangkon nga ang Biblia mihulip sa mga propeta ug pagpadayag. Gibati nako ang tinuod nga kamaya sa dihang akong naamgohan nga ako tingali nagpuyo sa moderno nga “biblikanhon nga mga panahon.”
Andam na ko sa kinasingkasing nga pagpangutana sa Dios alang sa personal nga pagpadayag, apan ang tubag wala moabot. Sa kataposan, ako miingon, “Langitnong Amahan, kon Imong gitawag si Joseph Smith isip Imong propeta, mosunod ko sa matag sugo nga Imong gipadayag pinaagi kaniya.” Dayon ang tubag miabot sa akong kasingkasing ug hunahuna uban sa kasigurohan, ug ako nasayod nga ang Dios mipahiuli sa kahingpitan sa ebanghelyo ug nga kini makita diha sa Ang Simbahan ni Jesukristo sa mga Santos sa Ulahing mga Adlaw.
Si Jakub nabunyagan niadtong Nobyembre 3, 1990, ug nagpadayon sa pagkamatinud-anon hangtod nga namatay sa usa ka makasubo nga aksidente samtang nag-hiking duha ka dekada human niana. Ako nagpasakop sa Simbahan niadtong Enero 11, 1991, determinado nga moserbisyo og misyon. Si Robert gitawag isip una nga lumad nga presidente sa among branch ug mihatod kanako padulong sa Freiburg, Germany, aron akong madawat ang akong pagtuga sa templo. Atol sa akong kataposan nga interbiyo niya, misaad ko nga mobalik sa Poland human sa akong pagserbisyo sa Illinois Chicago Mission aron gamiton ang akong kasinatian isip misyonaryo sa paglig-on sa Simbahan diha sa among nasod.
Duha ka tuig human niana, ang akong presidente sa misyon mikombinser kanako nga moeskwela ko sa Amerika sa Brigham Young University. Apan wala gayod nako kalimti ang akong saad ni Robert.
Human maminyo niadtong 2000, mibalik ko sa Poland kauban ang akong asawa, kinsa, niadtong 1998, nahimong ekstra sa ikaunom nga hugna sa The Wonder Years. Mitambong kami sa mga panagtigom sa Simbahan sa Krakow, nagpadako og duha ka anak nga lalaki ug nagpadayon sa pakigkonektar sa among duha ka mas magulang nga mga anak. Ang among mas magulang nga anak nga lalaki bag-ohay lang nga mipahibalo nga nakadesisyon siya nga moserbisyo og full-time nga misyon.
Sa ting-init sa 2021, akong gidala ang akong pamilya sa Berlin, diin akong gipakita nila ang dapit diin kanhi nagbarog ang paril. Wala na kini makapugong sa mga sulugoon sa Dios sa pagpaambit sa mensahe sa Pagpahiuli ngadto sa katawhan sa Silangang Uropa. Ang mga milagro sa Dios nagpadayon sa atong panahon.