Digital Lamang: Mga Young Adult
Magkat-on Nga ang Pagkayugot sa Kaugalingon Dili Mao ang Pamaagi sa Manluluwas
Nataod-taoran ang akong pagkat-on nga ang Dios dili gusto nga kayugtan nako ang akong kaugalingon sa akong mga sayop.
Migahin ko og daghang panahon sa pagsaway sa akong kaugalingon. Nahitabo, nga ang akong pagpanaway sa kaugalingon sa tinuod wala makapahimo nakong mas maayo.
Bata pa kong naminyo, ug samtang ang akong kaminyoon kanunay nga maanindot ug malipayon, nakapahimo kini nako sa pag-atubang sa mas huyang nakong mga taras. Labaw pa niana, ang akong bana ug ako nakahukom nga manganak dayon, ug ang una nakong pagmabdos maoy labing makahasol nakong kasinatian sukad. Nag-atubang ko og pisikal nga mga hagit nga dili nako mahunahuna. Ang akong kinaiya maglahilahi, ug ang depresyon nahimo nga tinuod kaayo ug bag-o kaayong pakigbisog.
Naningkamot ko nga mahimong maayo nga asawa, ug maayo nga inahan, ug maayo nga estudyante, apan ingon og wala gayod nako makab-ot ang kaugalingon nakong mga sumbanan. Sa maong panahon, ang kasuko sa akong kaugalingon nahimo nga maoy una nakong reaksiyon.
Nakasabot ko nga ang duha ka nag-unang mga sugo nag-ingon nga “higugmaa ang Ginoo nga imong Dios” ug “higugmaa ang imong isigkatawo sama sa imong kaugalingon” (Mateo 22:37, 39; nga nagpasabot nga kita kinahanglan nga mohigugma sa atong kaugalingon. Apan mibati ko nga dili takos higugmaon.
Naghunahuna ko nga, “Kon makasala ko ug nahigugma gihapon sa akong kaugalingon, dili ba kaha kana maghatag sa akong kaugalingon og pagtugot aron padayon kong mohimo og sayop? Total, nagkinahanglan man kita nga mohalad og usa ka masulob-on nga kasingkasing ug mahinulsolon nga espiritu, mao nga dili ba angay nga mamiserable kita hangtod nga kita mas momaayo?”
Niana nga higayon motubag unta ko og “oo,” apan ang tinuod mao ang usa ka lanog nga “dili.”
Si Elder S. Gifford Nielsen sa Seventy mitudlo: “Gusto sa atong Langitnong Amahan nga higugmaon nato ang atong kaugalingon … aron atong makita ang atong kaugalingon sama sa Iyang pagkakita kanato: kita ang Iyang pinalanggang mga anak. Kon kini nga kamatuoran motuhop gayod sa kahiladman sa atong kasingkasing, ang atong gugma sa Dios molambo.”1 Ug kon ang akong gugma sa Dios molambo, mas momaayo ako. Kon higugmaon nako ang Dios, akong makita ang akong gasa sa Manluluwas nga maghimong posible nga ako mapasaylo sa akong mga sala ug makabuntog sa akong mga sayop. Kon higugmaon nako ang Dios, mas sayon ang paghigugma sa akong kaugalingon.
Ang pagkayugot ngadto sa uban dili makatabang nga sila molambo; makapasagmuyo lamang kini kanila. Kauban sa pagkorihir, nagkinahanglan usab sila og pagdasig. Busa ngano kaha nga lahi man ako? Unsaon nako nga makahalad sa akong kaugalingon sa sama nga kamanggiloy-on?
Pagpangita og Suporta
Dihang gitug-an nako sa akong bana ang mahitungod niini nga panglimbasog, mibati ko og kasubo. Mas komportable ko nga ipadayon ang naandan nakong kinaiya bahin sa negatibong mga pulong batok sa akong kaugalingon, mao nga kinahanglan kong magmaisogon ug madani sa pag-angkon sa akong mga kahuyang sa dayag nga paagi. Apan ang paghulagway sa akong suliran ngadto sa laing tawo nakatabang nako sa pagkaplag og dugang nga katin-awan ug mga solusyon.
Gi-edukar nako ang akong kaugalingon pinaagi sa makabayaw nga mga kapanguhaan aron masabtan ang mga desinyo sa akong hunahuna ug unsaon sa paglambo. Nakat-onan sab nako nga ang regular nga pag-ehersisyo makahimo og dako kaayong kalainan. Sa una mag-ehersisyo ko tungod kay gikayugtan nako ang akong lawas ug gusto nakong usbon kini. Karon mag-ehersisyo ko tungod kay gusto kong mobati og maayo ug makaangkon og dugang nga kalagsik.
Ang akong mga kausaban mas naepektibo tungod kay miangkon ko nga ang Manluluwas nagsuporta nako kay sa nanghimaraot kanako. Kaniadto, ang akong pagtuon sa kasulatan, pag-ampo, ug pagtambong sa templo puno sa kaulaw ug nag-limit sa akong espirituhanong paglambo. Karon ang akong mga pag-ampo mas tinuoray na ug matinuoron kay wala nako itago ang akong kaugalingon gikan sa Ginoo.
Pagpili kon Asa nga Tingog ang Sundon
Kinahanglan usab akong mohukom unsay importante ug kinsa ang pamation. Ang atong kalibotan, atong kasilinganan, ug ang atong mga platform sa social media daghan kaayo og mga ekspektasyon kon unsaon sa paglihok, pagtan-aw, pagkaginikanan, pagsulti, ug uban pa. Imposible kaayo ang pag-angkon og tibuok kalibotan nga pag-aprobar.
Apan kahibalo kamo kon si kinsa pa ang nag-atubang og pagdis-aprobar? Si Jesukristo. Buotan Siya, manggiloy-on, ug hingpit, apan wala Siya mahimong mananaog sa mga kontest sa popularidad. Gani, ang pagpili nga ipakita ang Iyang gugma ngadto sa pihong mga tawo sa kasagaran mosangpot nga Siya wala tahora sa uban. Kinahanglan nakong dawaton nga dili nako mapahimuot ang tanan ug imbis niana gikinahanglan ang paningkamot sa pagpahimuot sa Dios.
Magbaton og Hugot nga Katuyoan sa Akong mga Hunahuna
Ang tumong sa kaugalingong paghigugma dili pagpangatarongan sa sayop, o sa pagkadili kaayo kontento. Akong giila nga ang ingon niana nga negatibong mga pagbati makatabang nako, sama sa diosnong kasubo—apan wala ako magpatuyang niana kay kana dili kauswagan.
Si Elder Neil L. Andersen sa Korum sa Napulog Duha ka Apostoles miingon:
“Ang pagbati nga sad-an may importanting tahas kay mopahinumdom kini sa angay natong usabon, apan dunay mga limit kon asa kutob kanang pagbati para makatabang kanato.
“Ang pagbati nga sad-an sama sa bateriya sa de gasolina nga sakyanan. Mohatag kini og kahayag sa sakyanan , mopaandar, ug mopasiga sa mga suga sa sakyanan, apan dili makahatag og gasolina alang sa taas nga biyahe. Ang bateriya lang, dili gayod kaigo. Mao usab ang pagbati nga sad-an.”2 Kinahanglan nakong isiguro nga dili ko madakin-as ngadto sa negatibong mga sumbanan sa panghunahuna ug angay nga matutokan ang paghigugma ni Kristo ug sa akong kaugalingon.
Nahimo kining usa ka proseso nga ibutang kining palas-anon diha sa tiilan sa akong Manluluwas, ug nagsilbi kini. Ang ginagmayng mga kausaban nga akong gihimo, daghan niini sa sulod sa kaugalingon nakong ulo, nakahimo og dako kaayong kalainan tungod sa grasya sa Manluluwas.
Mapasalamaton ko nga ang labing mahinungdanong aspeto sa ebanghelyo mao ang gugma. Gugma sa Dios, gugma sa uban, ug gugma alang sa akong kaugalingon.