“Pag-usab sa Akong Pamaagi sa Pag-angkon og usa ka Pagpamatuod,” Liahona, Hulyo 2023.
Mga Young Adult
Pag-usab sa Akong Pamaagi sa Pag-angkon og usa ka Pagpamatuod
Alang sa unang higayon nakabaton ko og usa ka yano nga binhi sa hugot nga pagtuo nga tinuod.
Nagdako ko sa Simbahan—miadto ko sa mga kalihokan, ug miapil ko sa pag-ampo sa pamilya ug pagtuon sa kasulatan. Apan wala gayod akoy pagpamatuod. Wala ko kahibalo kon nagtuo ako sa Dios o sa Iyang Anak. Wala ko kahibalo kon tinuod ang Basahon ni Mormon.
Gusto ko makabaton og pagpamatuod, apan mibati ako og kasagmuyo human mag-ampo og kadaghan nga wala mibati nga daw nakadawat ko og tubag. Nagsugod ko sa paghunahuna, “Kon tinuod ang Dios, nganong dili man ko Niya pakit-on? Nganong tugotan ra man ko Niya nga maglingkod dinhi nga naghunahuna?”
Sa paghandom, klaro nakong nakit-an nganong wala ko nakakuha og tubag: wala gayod ko naningkamot. Mobasa ko sa akong mga kasulatan sulod sa lima ka minuto kausa sa usa ka semana ug magdahom og kasinatian sa pagpadayag tungod lang kay nangayo ko niini.
Wala ko makasabot nga ang hugot nga pagtuo usa ka baroganan sa paglihok.
Usa ka Binhi sa Hugot nga Pagtuo
Si bisan kinsa nga dili miyembro nga nagtan-aw mahimong motawag kanako nga “aktibo” sa Simbahan, apan wala gihapon ko nakahibalo kon tinuod ba ang Simbahan. Apan gusto gayod akong makahibalo.
Mao nga midesisyon ako nga moserbisyo og misyon. Sayop ang akong gituohan nga isip usa ka misyonaryo, awtomatik nga mas lagmit nga makakuha ko og mga tubag gikan sa Dios. Wala pa gihapon ko naningkamot og maayo sa pag-ampo o pagtuon, apan sa wala madugay nakabaton ko sa akong buluhaton.
Sa sinugdanan sa akong misyon, nanglimbasog ko nga mabati ang Espiritu samtang online nga nagbansay atol sa pandemya tungod sa akong taphaw nga paningkamot. Apan dayon personal ko nga nakaadto sa missionary training center. Ug ang akong panahon didto mao ang labing espirituhanon nga kasinatian sa akong kinabuhi. Mao kadto ang unang higayon nga nakabaton ko og usa ka yano nga binhi sa hugot nga pagtuo nga tinuod.
Paghimo og Kausaban
Sa kataposan lisod ang pagsulod sa natad sa misyon. Gibati nako nga daw ang gamay nga pagpamatuod nga akong naangkon nawala.
Usa ka adlaw naghilak ko, ug dayon ang usa ka panumdoman misantop sa akong hunahuna. Ang akong papa kanhiay mangutana kanako kon kumusta ang akong adlaw sa eskwelahan, ug kanunay akong moingon nga laay kadto. Ug moingon siya, “Aw, tungod kana kay gihimo nimo kini nga laay. Kon gusto nimo nga mahimong lingaw ang pag-eskwela, himoa kining makalingaw.” Naamgohan nako nga pwede nakong pahimuslan ang akong panahon sa akong misyon pinaagi sa pagkat-on ug paglambo o pwede ra kong magmiserable.
Mao nga nag-ampo ako sa mas sinsero nga paagi kay sa kaniadto aron sultihan ang Langitnong Amahan nga ako maningkamot ug mousab sa akong kinaiya. Human niana, nadasig ako nga mohimo og bag-o nga paningkamot. Nagsugod ko nga tinud-anay nga magtuon ug mag-ampo ug mamalandong, ug sa paglabay sa panahon kanang gamay nga pagpamatuod mibalik—ug mipadayon sa paglambo. Wala na kaayo ko nasagmuyo, ug nagsugod ko nga nakakaplag og kalipay diha sa ebanghelyo.
Unsay Atong Ihatag Mao Ang Atong Makuha
Kon kamo nasagmuyo sa pagbati nga daw ang inyong hugot nga pagtuo wala maglambo, mahimong maghunahuna kamo kon anaa ba diha ang Dios ug kon Siya nagpabakana ba. Apan akong nakat-onan nga Siya kanunayng nag-uban kanato ug motabang kanato sa paglig-on sa atong hugot nga pagtuo ug pagpamatuod kon akohon nato ang responsibilidad ug maningkamot (tan-awa sa Moroni 10:4).
Si Elder Robert D. Hales (1932–2017) sa Korum sa Napulog Duha ka Apostoles miingon, “Samtang daw walay eksakto nga sulundan [formula] diin ang matag usa kanato makadawat og pagpamatuod, adunay daw mamatikdan nga sundanan.”1 Kini nga sundanan naglakip sa pag-angkon og matinuorong tinguha nga mahibalo sa kamatuoran, pag-ampo, pagkahimong andam sa pagserbisyo kon asa kita tawagon, pagpaningkamot nga mahimong masulundon, pagtuon sa mga kasulatan ug paggamit niini sa atong mga kinabuhi, ug pagbaton og kinaiya sa pagkamapainubsanon.
Dili gayod ako makapalig-on sa akong hugot nga pagtuo kon dili mousab sa akong kinaiya, mosunod niini nga sundanan, ug matinuoron nga makig-istorya sa Langitnong Amahan ug ni Jesukristo. Sa dihang gihimo nako kadto nga mga kausaban, nagsugod kong makadawat og mga tubag ug motuo sa mga kamatuoran.
Si Sister Rebecca L. Craven, Ikaduhang Magtatambag sa Kinatibuk-ang Kapangulohan sa Young Women, bag-ohay lang miingon: “Ang pagkahimong disipulo ni Jesukristo naglangkob og labaw pa kay sa molaom o motuo. … Kini nagkinahanglan nga kita adunay buhaton.”2 Akong nakat-onan sa akong kaugalingon nga kini tinuod: unsay akong ibutang sa ebanghelyo mao ang akong makuha.
Alang sa mga nagbantay, ang akong lebel sa pagkaaktibo sa Simbahan tingali makita nga pareho ra sama kon unsa gayod kini. Apan akong giusab ang akong pasalig ngadto sa ebanghelyo sa akong kasingkasing. Ug kana mao ang nakahimo sa tanang kalainan.
Ang tagsulat nagpuyo sa Washington, USA.