Alang sa mga Ginikanan

Pagsunod ug Pagpaambit sa Ebanghelyo

Minahal nga mga Ginikanan,

Duha ka paagi nga kita mopakita sa Dios sa atong pasalamat alang sa ebanghelyo mao ang pagsunod niini ug pagpaambit niini. Ang mga artikulo sa isyu niini nga bulan nagtutok sa paghimo sa ebanghelyo ni Jesukristo nga usa ka mas dako nga bahin sa atong mga kinabuhi, pinaagi man sa pagpalig-on sa hugot nga pagtuo diha Kaniya, paghimo og importante nga mga kausaban, o pagsangyaw sa Iyang mga kamatuoran sa tibuok kalibotan. Ang hingpit nga kalipay nagpaabot niadtong kinsa magkat-on ug mosunod sa mga pagtulon-an sa Manluluwas ug mopaambit sa Iyang mga mensahe sa pulong ug sa buhat.

Mga Panaghisgotan sa Ebanghelyo

Pagpaambit sa Ebanghelyo pinaagi sa Pagpamatuod

Dapita ang matag sakop sa pamilya sa pagpaambit og usa ka mubo nga pagpamatuod bahin sa usa ka paborito nga baroganan sa ebanghelyo. Ipaambit ang mga kinutlo mahitungod sa misyonaryo nga buhat gikan sa artikulo ni Elder Quentin L. Cook sa pahina 4. Naghunahuna mahitungod sa mga baroganan sa ebanghelyo nga bag-ohay lang ninyong gipaambit, ipangutana: Aduna bay mga tawo nga atong mapaambitan niini nga mga baroganan?

Mobati nga Mas Duol ngadto ni Jesukristo

Pangutan-a ang inyong mga anak kon kanus-a sila mobati nga labing duol ni Jesukristo. Paghimo og lista sa ilang mga tubag. Ipasabot ang lima ka makapalig-on sa hugot nga pagtuo nga mga kalihokan ni Elder Patricio M. Giuffra (tan-awa sa mga pahina 42–43). Isip usa ka pamilya, ikonsiderar ang pagbuhat sa usa niini nga mga kalihokan nga inyong nauyonan nga makahimo og kalainan sa inyong panimalay. Magdungan sa paghimo og plano aron tutokan kana nga kalihokan karon nga bulan.

Ang Kausaban Mahimong Mosangpot ngadto sa Espirituhanon nga Paglambo

Ang kausaban, gidahom ug wala gidahom, kabahin sa atong kasinatian sa mortalidad. Basaha ang artikulo ni Elder Ciro Schmeil sa pahina 30 mahitungod sa lain-laing matang sa mga kausaban sa atong mga kinabuhi. Sa unsa nga paagi kini nga mga kausaban makatabang kanato nga mas mahisama sa Manluluwas?

Dali, Sunod Kanako Kalingawan sa Pamilya

Ang Dios Nahigugma sa Tanan Niyang mga Anak

Mga Buhat 10

“Ang Dios walay pinalabi: Ang mahadlokon kaniya ug nagbuhat sa matarong iyang dawaton bisag taga-diin pa siya” (Mga Buhat 10:34–35).

Ang Kinatibuk-an nga mga Awtoridad naggikan sa lainlaing yuta. Mga katunga naggikan sa Estados Unidos. Ang uban naggikan sa Tunga-tunga ug Habagatang Amerika, Asya, Uropa, Africa, Oceania, Mexico, ug Canada.

• Makahingalan ba kamo og Apostol nga natawo sa Uropa?

• Makahingalan ba kamo og Apostol nga gikan sa Habagatang Amerika?

• Makahingalan ba kamo og Apostol kansang mga ginikanan gikan sa Sweden ug Finland?

• Makahingalan ba kamo og Apostol kansang pamilya orihinal nga naggikan sa Tsina?

Mahimong naggikan kita sa lainlaing dapit, apan ang Dios nahigugma kanatong tanan.

Panaghisgotan: Sa unsa nga mga paagi nga tingali kita susama o lahi sa ubang mga tawo? Ang Dios ba nahigugma kanato base sa unsay hitsura nato o diin kita naggikan? Basaha ang istorya ni Pedro ug Cornelio nga makita sa Mga Buhat 10. Unsa man ang ilang nakat-onan mahitungod sa paghukom sa uban? Unsa nga mga kinaiya ang importante ngadto sa Ginoo?

Gisumiter ni Mitzi Schoneman

Gikan sa Alang sa Kalig-on sa mga Kabatan-onan nga Magasin 

Natural nga mga Paagi sa Pagpaambit

Pagkuha og pipila ka sugyot kon unsaon sa pagpaambit ang inyong hugot nga pagtuo sa normal ug natural nga mga paagi.

Pagpakabuhi uban sa mga Sangpotanan sa mga Pagpili sa Uban

Sutaa kon unsaon ninyo nga makapadayon ug makakaplag og kalinaw bisan og ang ubang tawo mipili sa pagbuhat sa mga butang nga negatibong nakaapekto sa inyong kinabuhi.

Ang Dios Walay Pinalabi

Pagkat-on kon sa unsa nga paagi ang Dios nagtan-aw sa tanan sa Iyang mga anak nga susama—ug sa unsa nga paagi nga ang pagkahibalo niini makausab sa inyong kinabuhi.

Gikan sa Higala nga Magasin

Pagkat-on mahitungod sa mga Misyonaryo

Pangita og mga istorya ug mga kalihokan mahitungod sa unsay gibuhat sa mga misyonaryo—ug unsaon nga ang inyong anak mamahimong misyonaryo usab!

Family History sa Argentina

Himamata si Benjamin ug basaha kon giunsa niya pagkat-on sa pagbuhat sa family history.

Kabahin Ba Ako sa usa ka Mahangtorong Pamilya?

Diha sa “Unsay anaa sa Inyong Hunahuna?” niini nga bulan, basaha ang usa ka makapahupay nga mensahe ngadto sa mga bata kansang mga ginikanan wala pa maselyo sa templo.

Istorya sa Kasulatan sa Bag-ong Tugon

Basaha ang usa ka gihulagway nga istorya mahitungod ni Pedro aron sa pagdugang sa inyong pamilya nga pagtuon sa Dali, Sunod Kanako.