“Ang Akong Nagpadayon nga Misyon,” Liahona, Hulyo 2023.
Mga Tingog sa mga Santos sa Ulahing mga Adlaw
Ang Akong Nagpadayon nga Misyon
Ang kataposang sulat sa akong amahan mihatag og tambag nga makatabang sa akong kaugmaon, naghatag kanako og mga pulong nga importante kaayo kanako.
Nalingaw ko sa akong full-time nga misyon didto sa matahom nga kabukiran sa Cajamarca, Peru, sa dihang ang akong amahan kalit nga na-stroke. Sa wala madugay, namatay siya.
Sa dihang nakigkita ko sa akong presidente sa misyon, midangoyngoy ko samtang nahinumdoman nako nga gitudloan ko sa akong papa kon unsay buot ipasabot nga mahimong usa ka misyonaryo ug usa ka lalaki nga adunay kaligdong. Misulat siya kanako matag semana, nagpaambit sa iyang pagpamatuod, nagtudlo kanako og gamhanan nga mga panabot sa ebanghelyo, ug nag-awhag kanako sa pagbuhat sa akong labing maayo.
Human sa among miting, ang presidente sa misyon mihatag kanako og sulat—ang kataposang sulat gikan sa akong amahan. Ang iyang sulat mihatag og tambag nga makatabang sa akong kaugmaon, naghatag kanako og mga pulong nga importante kaayo kanako:
“Ikaw adunay laing [misyon] nga umaabot sa pipila ka bulan—usa ka lisod kaayo nga misyon, diin ikaw saligan sa pagpahinungod sa imong kinabuhi ngadto sa mga baroganan nga imong gitudlo, sa pagbuhat sa mga butang nga, hangtod niining puntoha, imo lamang nga gisangyaw. Kini mahimo nga ang labing mabungahon nga misyon. Ikaw sama sa igpapatubo diha sa pan. …
“Gimahal ka namo ug nag-ampo alang kanimo kada adlaw. Paningkamot ug buhata ang husto nga mga butang.”
Samtang gibasa nako ang iyang mga pulong, mihilak ko—tungod sa kasubo, nahibalo nga kini mao ang iyang kataposan nga mga pulong kanako niini nga kinabuhi, ug tungod sa kalipay, nahibalo sa gahom ug katuyoan niini alang kanako. Nasayod ko nga ang akong sunod nga misyon—ang nahibilin sa akong kinabuhi—mahimong hilabihan ka importante. Kini mahimong usa ka panahon sa tinuod nga pagsulay, ug kini magkinahanglan sa tanan nga akong nakat-onan ug nasinati isip usa ka misyonaryo.
Nasayod ko nga ang Langitnong Amahan adunay halawom nga makahuloganon nga plano alang sa matag usa kanato. Siya makapahimo nga mas maayo sa atong panahon sa yuta ug makahatag kanato og mga mata nga makakita ug makahibalo sa Iyang kamatuoran. Nakita nako kini samtang akong gipasalig ang akong kinabuhi ngadto Kaniya ug nakasinati sa Iyang mga panalangin. Ug nakita nako kini samtang ang akong matahom nga asawa ug ako nagtinabangay sa pag-ugmad og pamilya nga napuno sa mga paglaom, mga anak, ug sa ebanghelyo.
Ang Manluluwas mihatag kanamo og kusog samtang miluhod kami sa pag-ampo, mibasa sa mga kasulatan, miadto sa templo, ug miserbisyo sa uban. Nakita nako ang kamot sa Ginoo nga mitabang atol sa maanindot nga mga higayon sa akong kinabuhi samtang akong gipaambit ang ebanghelyo ngadto sa pamilya ug mga higala.
Ang Iyang misyon mao “ang pagpahinabo sa pagka-imortal ug sa kinabuhi nga dayon sa tawo” (Moises 1:39). Kana nga misyon sa pagkatinuod nagpadayon gayod.