“Pagkakita sa mga Milagro sa Manluluwas sa Atong mga Kinabuhi,” Liahona, Hulyo 2023.
Ang mga Milagro ni Jesus
Pagkakita sa mga Milagro sa Manluluwas sa Atong mga Kinabuhi
Upat ka leksiyon nga atong makat-onan gikan sa pag-ayo sa Manluluwas sa buta.
Detalye gikan sa He Anointed the Eyes, ni Walter Rane
Adunay mga higayon sa atong kinabuhi diin kita naglaom ug nag-ampo alang sa milagro. Mahimong kini alang sa usa ka minahal sa kinabuhi o alang sa atong kaugalingon nga kaayohan. Ang atong paglaom mao nga ang atong pangamuyo tubagon, ang naguba nga sitwasyon ayohon, ang natig-a nga kalag pahumokon, ug ang Ginoo sa mga milagro mohatag sa resolusyon nga atong gitinguha. Kon ang resulta dili mao kon unsay atong gilaoman o motukma sa panahon nga atong giampo, kasagaran maghunahuna kita og ngano.
Si Moroni nagtudlo, “Ug ako moawhag kaninyo, akong hinigugma nga mga kaigsoonan, nga kamo mahinumdom nga siya sama sa kagahapon, karon, ug sa kahangtoran, ug nga ang tanan niini nga mga gasa diin ako namulong, nga mga espirituhanon, dili gayod pagahunongon, gani hangtod ang kalibotan magpabilin, sumala lamang sa pagkawalay pagtuo sa mga katawhan” (Moroni 10:19).
Kadto ba nga mga gasa ug mga milagro nga nakatala sa mga kasulatan anaa gihapon sa atong panahon? Unsaon nato nga mahimong sarang niadto nga mga panalangin? Ang Manluluwas ba nakahibalo kon unsa ang nanghitabo sa atong mga kinabuhi ug andam sa pagluwas kanato gikan sa atong mga hagit?
Gusto nako nga gamiton ang milagro sa Manluluwas sa pagpahiuli sa panan-aw sa buta isip basehanan sa tubag niini nga mga pangutana. (Alang sa mga sanglitanan, tan-awa sa Mateo 9:27–31; 12:22–23; Marcos 8:22–26; 10:46–52; Juan 9:1–11.)
Unsay Atong Makat-onan mahitungod sa Misyon sa Manluluwas gikan sa Iyang mga Milagro?
Aron masabtan ang epekto sa milagro ngari kanato ug sa atong mga kinabuhi, atong sugdan pinaagi sa paghatag og kahulogan sa milagro. Ang mga milagro “gituyo aron mahimong pruweba ngadto sa mga Judeo nga si Jesus mao ang Kristo. … Daghan niini simbolikanhon usab, nagtudlo … og balaanon nga mga kamatuoran. … Ang mga milagro kaniadto ug karon tubag sa hugot nga pagtuo ug ang labing maayo nga pagdasig niini. Dili gayod kini mahitabo kon wala ang pag-ampo, gibati nga panginahanglan, ug hugot nga pagtuo.”1
Si Elder Ronald A. Rasband sa Korum sa Napulog Duha ka Apostoles yano og maanindot kaayo nga miingon:
“Ang mga milagro mao ang balaanong mga buhat, mga pagpakita, ug mga pagpahayag sa walay kinutobang gahom sa Dios ug ang pagpamatuod nga Siya “sama sa kagahapon, karon, ug sa kahangtoran” [Moroni 10:19]. …
“… Ang mga milagro mga sumpay sa mahangtoron nga plano sa Dios; ang mga milagro importante nga hinabang gikan sa langit paingon sa yuta.”2
Sa ingon, ang usa ka mapuslanon nga paagi sa pagtuon sa mga milagro sa Manluluwas ug pagkat-on gikan niini mao ang paghinumdom nga ang matag milagro mopunting sa usa ka butang nga mas dako kay sa panghitabo mismo ug ang pagpangita og piho nga mga kamatuoran mahitungod sa Dios ug sa Iyang buluhaton.
Atong hisgotan ang pipila sa mga kamatuoran nga atong makat-onan gikan sa mga milagro sa Manluluwas sa pagpahiuli sa panan-aw sa buta. Kini mahimong bahinon sa upat ka leksiyon sama sa mosunod.
1. Ang Pagpahiuli sa Panan-aw usa ka Timailhan sa Mesiyas
Ang karaang mga propeta nga mipamatuod sa pag-abot sa Mesiyas misulti sa mga milagro nga Iyang pagahimoon, lakip na ang paghatag og panan-aw sa mga buta.
Ngadto ni Haring Benjamin, usa ka balaan nga anghel ang miingon nga ang Manluluwas “makig-uban taliwala sa mga tawo, magbuhat og kahibulongan nga mga milagro, ingon sama sa pag-ayo sa mga masakiton, pagbuhi sa mga patay, paghimo sa mga bakol nga molakaw, ang mga buta sa pagdawat sa ilang panan-aw” (Mosiah 3:5; tan-awa usab sa Isaias 35:4–5).3
Sa ingon, ang mga milagro sa pagpahiuli sa panan-aw sa buta nagkompirmar niadtong mga propesiya mahitungod sa pag-abot sa Manluluwas ug sa Iyang pagpangalagad sa mga anak sa Dios.
2. Si Jesus Mao ang Kahayag sa Kalibotan
Kini nga kamatuoran klaro nga gipahayag sa dihang si Jesus nakaagi og usa ka tawo nga buta sukad sa iyang pagkatawo (tan-awa sa Juan 9:1–11). Sa dihang ang mga disipulo nangutana kon ang tawo gipakatawo ba nga buta tungod sa sala, si Jesus miingon og dili, “apan aron ang gahom sa Dios ikapadayag diha kaniya” (bersikulo 3). Dayon, sa wala pa gipahiuli ang panan-aw sa tawo, ang Manluluwas mipahayag, “Samtang ania pa ako sa kalibotan, ako ang kahayag sa kalibotan” (bersikulo 5).
Si Elder Bruce R. McConkie (1915–1985) sa Korum sa Napulog Duha ka Apostoles mipasabot: “Sa wala pa ipabuka ang mga mata sa buta, sa pisikal nga paagi, si Jesus mipahinumdom sa iyang mga tigpaminaw sa iyang nag-una nga pahibalo, ‘Ako mao ang kahayag sa kalibotan,’ nga mora ba og nagtudlo nga: ‘Sa matag higayon nga inyong mahinumdoman nga akong gipabuka ang buta nga mga mata, sa pisikal nga paagi, hinumdomi usab nga ako miabot aron magdala og kahayag sa mga mata, sa espirituwal nga paagi.’”4
Kinahanglan nato nga hinumdoman kon unsa ka komon nga ang sala gipasabot diha sa mga kasulatan isip moral nga pagkabuta ug ang kalingkawasan gikan sa sala isip pagtangtang niini nga pagkabuta. Siya kinsa mao ang “kahayag sa kalibotan” migamit niini nga panghitabo aron sa pagtimaan sa mas taas nga buluhaton nga Siya mianhi sa kalibotan aron sa pagtuman.
3. Ang Hugot nga Pagtuo Mag-una sa mga Milagro
Samtang si Jesus miagi sa kadalanan sa Capernaum, duha ka buta nga kalalakin-an ang misunod Kaniya, nga misinggit, “ Anak ni David, kaloy-i intawon kami.” Dayon Siya nakig-istorya kanila, nangutana, “Nagtuo ba kamo nga makaayo ako kaninyo?” Ug sila mitubag, “Oo, Ginoo.”
Ang ebidensya sa ilang pagtuo nga ang Ginoo makatabang kanila mao ang ilang pagpadayon sa pagsunod Kaniya ug ilang dali ug bukas nga pagkompisal nianang gituohan sa dihang gipangutana. Gihikap sa Manluluwas ang ilang mga mata, nag-ingon, “Mamaayo kamo sumala sa inyong pagtuo.” Ang epekto dihadiha dayon: “nakakita sila” (Mateo 9:27-31).
Si Elder McConkie nakabantay: “Kasagaran sa pagpabuka sa mga mata sa buta, si Jesus, sama dinhi, mipauban sa iyang gipamulong nga sugo og pipila ka pisikal nga buhat. Dinhi ug sa uban pa nga okasyon iyang gihikap ang walay panan-aw nga mga mata.”
Nganong gibuhat man kini sa Manluluwas? “Wala niining dili kasagaran … nga mga buhat ang kinahanglanon aron mahimo ang gahom sa pag-ayo,” mipasabot si Elder McConkie. Apan kita nasayod nga ang hugot nga pagtuo mag-una sa mga milagro, ug busa “ang tataw nga katuyoan sa Agalon mao ang paglig-on sa pagtuo sa buta o bungol nga tawo.”5
4. Ang mga Milagro Usahay Moabot Pagtulon-an human sa usa ka Pagtulon-an
Sa Betsaida, dihay usa ka buta nga gidala sa pipila ka tawo ngadto kang Jesus. Human dad-a ang tawo ngadto sa gawas sa balangay, si Jesus [mitutho] sa iyang mga mata, ug gihikap kini.” Ang panan-aw niini nga tawo wala pa kaayo mapahiuli niining higayona, ug busa ang Manluluwas “mihikap pag-usab sa iyang mga mata,” naghatag og hingpit nga pagkabalik sa panan-aw. (Tan-awa sa Marcos 8:22–26.)
Gipasabot ni Elder McConkie ang mga kamatuoran nga atong makat-onan gikan niini nga panghitabo:
“Makita nga ang nagsunod-sunod nga mga higayon sa pisikal nga kasuod uban kang Jesus nakadugang og paglaom, kasiguroan, ug pagtuo sa tawo nga dili makakita.
“…Ang mga tawo kinahanglang magtinguha sa makaayo nga grasya sa Ginoo sa tibuok nilang kusog ug hugot nga pagtuo, bisan og ang ingon paigo alang sa anam-anam lamang nga pagkaayo. … Madawat dayon nila ang dugang nga kasiguroan ug hugot nga pagtuo sa hingpit nga pagkaayo. Ang mga tawo usab sa kasagaran mamaayo sa espirituhanon nilang mga kalisdanan sa anam-anam nga paagi, sa hinay-hinay samtang nagpahimutang sila sa ilang kinabuhi pinasubay sa mga plano ug mga katuyoan sa Dios.”6
Pinaagi sa paghimo niini nga milagro diha sa duha ka managlahi nga lakang, ang Ginoo mitabang sa buta nga tawo nga makaandam sa pagdawat sa tibuok panalangin. Makita ba usab nato kini nga sundanan diha sa atong kaugalingon nga pagpangita alang sa mga milagro—usa ka butang nga kinahanglan natong buhaton, o dili buhaton, sa dili pa maandam sa usa ka mas taas nga pagpanginlabot?
Hugot nga Pagtuo nga Dili Mamaayo
Bisan kon atong makita ang kamahinungdanon sa hugot nga pagtuo aron mahimo ang mga milagro, mahinungdanon nga mabantayan nga usahay bisan ang labing matinud-anon nga mga Santos dili matubag ang ilang mga gipangandoy ug mga pangamuyo.
Si Elder David A. Bednar sa Korum sa Napulog Duha ka Apostoles nagtudlo kanato:
“Ang pagkamatarong ug hugot nga pagtuo sa tinuod mao ang instrumento sa pagpalihok sa bukid—kon ang pagpalihok sa bukid magtuman sa mga katuyoan sa Dios ug pinasubay sa Iyang kabubut-on. Ang pagkamatarong ug hugot nga pagtuo sa tinud-anay gikinahanglan sa pag-ayo sa masakiton, bungol, ug bakol—kon ang ingon nga pag-ayo nagtuman sa mga katuyoan sa Dios ug sumala sa Iyang kabubut-on. Busa, bisan kon kita adunay lig-on nga pagtuo, daghang mga kalisdanan ang dili tangtangon. Ug dili tanan nga masakiton ang mamaayo. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.
“Kadaghanan sa mga leksyon nga atong makat-onan sa mortalidad madawat lamang pinaagi sa mga butang nga atong masinati ug usahay maantos. Ug ang Dios nagpaabot ug nagsalig nato nga moatubang sa temporaryong mortal nga kalisdanan uban sa Iyang tabang aron kita makat-on unsay atong kinahanglang makat-onan ug sa kataposan mamahimo sa unsay angay nato nga mamahimo sa kahangtoran.”7
Gusto nako nga idugang ang akong pagpamatuod ngadto sa pagpamatuod sa mga propeta nga karaan ug moderno. Ang mga milagro nahitabo gihapon sa atong taliwala. Ang Manluluwas nga si Jesukristo mao ang tinubdan sa tanan nga gahom, kahayag, ug kahupayan. Ako mopamatuod nga pinaagi sa atong hugot nga pagtuo Kaniya, kita mamaayo, ug kon pananglitan kita dili mamaayo, makakita gihapon kita og kalinaw pinaagi sa Prinsipe sa Kalinaw, ang Kahayag sa Kalibotan, ug ang Tig-ayo sa mga Mangangayo.