Mga Tahi sa Pagserbisyo

Ni Lisa Morton Mills

Ang tagsulat nagpuyo sa Alabama, USA.

Kining nagkaedaran na nga inahan ug ang anak nga babaye, kauban sa mga sister sa ward, nga nagpanalangin sa kinabuhi sa mga pamilya nga nawad-an og masuso nga anak.

Si Presidente Henry B. Eyring, Ikaduhang Magtatambag sa Unang Kapangulohan, mitudlo sa kinatibuk-ang komperensiya nga “ang matag anak nga babaye sa Dios nga naminaw sa akong tingog nakadawat og tawag gikan ni Ginoong Jesukristo. …

“… Ang anak nga mga babaye ug mga lalaki sa pakigsaad sa Dios … tanan nag-inambitay sa usa ka importante ug malipayong tawag. Kana mao ang pagserbisyo sa uban alang Kaniya.”¹ Kana nga tawag tinuod alang sa mga tigtuman sa pakigsaad bisan pilay edad—otso anyos man o 108.

Ang nubentay nuwebe anyos nga si Louise Allred migahin sa hapit tibuok niyang kinabuhi sa pagserbisyo sa uban, ug bag-ohay lang nakakat-on siya og bag-ong paagi sa pagserbisyo gikan sa iyang anak nga babaye, si Mary Helen.

Tulo ka tuig nang milabay, si Mary Helen wala mangita og bisan unsa nga butang dihang miapil siya sa JustServe.org. Sa pagsuhid [browse] niini, nakakita siya og usa ka panginahanglan alang sa dili pangnegosyo nga grupo sa mga boluntaryo kinsa mohimo sa gidonar nga mga sinina nga pangkasal [wedding gowns] ngadto sa usa ka sinina para panglubong alang sa bag-ong mga natawo nga wala makagawas sa ospital.

Inubanan sa kombiksiyon sulod sa iyang kasingkasing nakaplagan niya ang butang nga gusto niyang buhaton, si Mary Helen ug ang iyang lokal nga Relief Society mikontak sa direktor sa organisasyon. Usa ka kalihokan ang giplano para sa mga sister sa ward, ug 10–12 ka sinina nga pangkasal ang gitabas-tabas atol sa proyekto sa pagserbisyo. Gidala ni Mary Helen sa balay ang mga piraso ug mihimo og mga gown pinaagi niini.

Samtang naghimo si Mary Helen sa matag gown, nag-ampo siya alang sa matag ginikanan ug pamilya kinsa mogamit sa gown nga iyang gipanghimo. Nakatagbaw kaayo kini sa iyang pagbati sa espirituhanong paagi, nakapaduol kaniya sa Manluluwas pinaagi sa pagsunod sa Iyang tambag sa paghigugma sa usag usa (tan-awa sa Juan 13:34–35; tan-awa usab sa 1 Juan 4:11). Sa kalit kaayo, naamgohan ni Mary Helen nga ang usa ka higayon nga kalihokan dili igo para kaniya. Nakaplagan niya nga ang JustServe.org mahimo niyang kaabag alang sa daghang proyekto para kaniya.

duha ka babaye nga nagtupad sa paglingkod

Ang mama ni Mary Helen, si Louise, nagsugod usab sa pagtabang. Gitabas-tabas niya ang mga wedding gown gikan sa matag tahi. Ang tanan dayon gilabhan, gitabas, giritaso, ug gitahi aron himoon nga mga gown sa gagmayng bata, ug dayon ang mga paanindot gipangtahi gamit ang kamot. Ang matag gown sa bata mokabat og duha ka oras sa paghimo.

Silang duha, kining inahan ug ang anak nga babaye makahimo og kapin sa 100 ka gown alang sa patay nga mga bata matag tuig. Ang mga ospital sa tibuok Alabama, USA, mihangop niini nga mga donasyon.

Miingon si Mary Helen nga siya ug ang iyang inahan nalingaw niining panahona nga naggahin silang duha sa pagserbisyo sa gagmayng mga anak sa Langitnong Amahan ug sa ilang mga pamilya kutob sa itugot sa panahon. Sigon sa gitudlo ni Russel M Nelson: “Ang atong kinadak-ang kalipay moabot kon motabang kita sa atong mga kaigsoonan, bisan asa kita nagpuyo niiining matahom nga kalibotan. Ang pagtabang sa uban—ang paghimo og makahuluganong paningkamot sa daghan o labaw pa kay sa pag-atiman sa atong kaugalingon—maoy atong kalipay. Modugang ko, ilabi na, kon dili sayon ug kon gikinahanglan nga mobuhat kita og dili kasagarang butang. Ang pagsunod nianang dako nga ikaduhang sugo mao ang yawe sa pagkahimong tinuod nga disipulo ni Jesukristo.”²

Agig dugang sa kalipay nga dala niini nga pagserbisyo, si Louise ganahan sa hagit ug sa pagbati sa katumanan nga iyang nasinati. Miingon si Mary Helen nga kining higot tali kaniya ug sa iyang inahan nahimo usab nga labing gihambin nga giambitan nga kasinatian.

Ang “tanan makaserbisyo,” miingon si Mary Helen—kinahanglan lamang nga pangitaon ninyo unsay maayo alang kaninyo!