Welcome Niini nga Isyu

Nagkahiusa isip mga Igsoon nga Babaye ug mga Igsoon nga Lalaki diha ni Kristo

Ang mga tingog sa kababayen-an ug kalalakin-an parehong gikinahanglan aron matuman ang buhat sa Ginoo. Bisan tuod talagsaon, kita mokompleto sa usag usa, nagkahiusa sa atong komon nga tumong nga mahimong mga disipulo ni Kristo.

Ang atong mga kalainan dili kinahanglang mopatipas gikan niini nga tumong. Hinuon, ang atong mga kalainan naglakip sa atong mga talento ug mga kontribusyon nga magkaubang makapalig-on sa atong epekto sa tibuok kalibotan nga buhat sa kaluwasan ug kahimayaan. Si Elder Gerrit W. Gong sa Korum sa Napulog Duha ka Apostoles misulat dinhi niini nga isyu, “Atong makab-ot ang mas maayo nga mga desisyon ug adunay mas dako nga kalamposan diha sa pagserbisyo sa Ginoo samtang kita mohatag og bili sa kontribusyon sa usag usa ug magtinabangay, mga igsoon nga lalaki ug mga igsoon nga babaye diha sa Iyang buhat” (pahina 4). Unsaon nato pagkab-ot ang maong panaghiusa? Kita kinahangalan nga adunay hugot nga pagtuo nga ang Ginoo makagamit sa atong mga kalainan alang sa kaayohan sa Iyang gingharian.

Sa akong artikulo sa pahina 8, ako mipakigbahin sa unsay akong nakat-onan gikan sa asoy sa Bag-ong Tugon sa babaye sa Canaan, kinsa nagtinguha sa Manluluwas sa pag-ayo sa iyang anak nga babaye. Ang babaye dili sakop sa balay sa Israel. Apan siya adunay hugot nga pagtuo nga ang gahom sa Ginoo makaayo sa iyang anak, ug kining talagsaon nga hugot nga pagtuo mihiusa kaniya sa katawhan sa pakigsaad ug mipahinabo sa milagro.

Atong tan-awon ang Manluluwas sa tanan natong buhaton, uban sa atong “mga kasingkasing [nga] nabugkos diha sa pagkahiusa ug diha sa gugma sa usag usa” (Mosiah 18:21). Kita adunay pribilehiyo nga magkat-on gikan sa gamhanan nga mga kalainan sa usag usa ug hatagan kini og bili sama nga si Kristo mihatag og bili niini. Mapasalamaton kaayo ako nga adunay usa ka Magbalantay kinsa nakadungog sa talagsaon nga mga tingog sa matag usa sa Iyang mga karnero.

Matinuoron,

Presidente Camille N. Johnson

Kinatibuk-ang Presidente sa Relief Society