“Ganahan Ka Ba nga Mas Masayod Pa?,” Liahona, Septiyembre 2023.
Mga Tingog sa mga Santos sa Ulahing mga Adlaw
Ganahan Ka Ba nga Mas Masayod Pa?
Usa sa akong mga kauban sa tolda lahi kay sa ubang mga sundalo, mao nga nangutana ko niya kon ngano.
Ang tagsulat gibunyagan ni Thomas Salisbury didto sa Sông Bé Lake, Vietnam.
Litrato sa maayong kabubut-on sa tagsulat
Miapil ko sa Kasundalohan sa Estados Unidos alang sa tulo ka tuig nga tagal ug miabot didto sa Habagatang Vietnam sa akong ika-20 nga adlawng natawhan. Human sa walo ka bulan, gisangon ko ngadto sa usa ka yunit sa amihanang kasadpan sa Saigon. Samtang anaa didto, dali akong nakabantay nga usa sa akong mga kauban sa tolda, si Thomas Salisbury, lahi kay sa uban.
Ang kalainan tataw kaayo nga sa kataposan nangutana ko niya, “Tom, nganong lahi man kaayo ka sa uban?”
“Tungod usa ako ka Santos sa Ulahing mga Adlaw,” mitubag siya.
“Unsa man ang usa ka Santos sa Ulahing mga Adlaw?” Nangutana ko.
Gisabot ko niya nga makigtagbo uban niya ug ni Harold Lewis, usa ka nauli na nga misyonaryo kinsa nagserbisyo isip usa ka kaabag ngadto sa chaplain sa yunit. Atol sa among unang miting diha sa usa ka tolda nga nagsilbing isip usa ka gamay nga chapel, ako miuyon nga kon ako motuo gayod sa unsay ilang gisulti kanako, ako magpabunyag. Nakadawat usab ko og kopya sa Basahon ni Mormon, nga akong gitipigan sa ubos nga bulsa sa akong karsones ug gibasa bisan kanus-a nga ako adunay libre nga panahon.
Pipila ka panaghisgotan ang misunod, ug akong nakaplagan nga ang matag leksiyon mitubag sa mga pangutana nga aduna ako sa akong pagpangita sa kamatuoran. Apan sa dihang si Tom ug si Harold nangutana kanako kon gusto ba kong magpabunyag, mibalibad ko. Wala ako makahibalo kon unsaon nako pagtuman ang tanang kasugoan nga ilang gitudlo kanako.
Human mitambong og komperensiya sa district didto sa Saigon, miadto ko sa Australia sulod sa usa ka semana sa pagpahulay ug pagrelaks. Samtang anaa didto, nagsugod kong makaamgo kon sa unsang paagi nahimong importante kanako ang mga pagtulon-an sa ebanghelyo. Sa akong pagpauli sa Vietnam, mipahibalo ko dihadiha dayon kang Tom nga ganahan kong magpabunyag.
Sa wala madugay, gibunyagan ko ni Tom didto sa Sông Bé Lake, si Harold mikompirmar kanako nga usa ka miyembro sa Simbahan, ug si Timothy Hill, among lider sa grupo sa Simbahan, miorden kanako nga usa ka deacon.
Sa dihang mipauli ko sa Estados Unidos unom ka semana ang milabay, gipaila nako ang ebanghelyo ngadto sa akong uyab, kinsa nahimo nga akong asawa. Gihangop usab niya ang malaomon nga mensahe sa ebanghelyo.
Mahangtoron akong mapasalamaton nga nangutana si Tom kanako kon gusto ba akong mas masayod pa. Ang iyang ehemplo ug imbitasyon mitubag sa akong tinguha sa pagpangita sa kamatuoran ug makatagamtam sa mga panalangin sa ebanghelyo.