“Pagpakigbahin og 72 ka Kopya sa Basahon ni Mormon,” Liahona, Sept. 2023.
Mga Tingog sa mga Santos sa Ulahing mga Adlaw
Pagpakigbahin og 72 ka Kopya sa Basahon ni Mormon
Matag higayon nga akong ablihan ang akong ba-ba aron moistorya mahitungod sa Basahon ni Mormon, ang Espiritu Santo anaa nag-uban kanako.
Paghulagway pinaagi ni Allen Garns
Atol sa COVID-19 nga pandemya, kami napanalangingan nga adunay maayong medikal nga pag-atiman alang sa akong bana, si Claude, sa among panimalay. Didto, ang among mga anak ug ako mahigugmaong miabag sa pag-atiman niya hangtod nga siya hilom nga mibalik ngadto sa atoang langitnong panimalay.
Sa sayo pa, si Claude ug ako nag-ampo kon amo ba nga ipausab ang among hawanan ngadto sa usa ka lawak alang sa medikal nga pag-atiman, diin among mapaigo ang tanan nga iyang kinahanglanon aron mahimong komportable. Nakadawat kami og kompirmasyon nga kinahanglan kaming magpadayon.
Aron matrabaho ang hawanan, pipila ka trabahador ang nagkinahanglan og agianan padulong sa among panimalay. Maayo na lang, ang hawanan adunay pultahan sa luyo, mao nga ang mga trabahador makasulod ug gawas nga dili na kinahanglan nga mosulod sa among panimalay. Dako kadto nga panalangin atol sa mga paghigpit tungod sa COVID-19.
Human nga nakompleto ang lawak ni Claude, ang mga nars moabot kada adlaw. Sila buotan, mahigugmaon, ug maalamon mahitungod sa unsay among gikinahanglan nga buhaton aron magpabilin nga komportable si Claude.
Sa dihang mipasakop ko sa Simbahan, gitudloan ko nga ang matag miyembro sa Simbahan usa ka misyonaryo.1 Tungod kay ganahan ko nga mopakigbahin sa ebanghelyo, nag-order ko og tulo ka kahon nga Basahon ni Mormon, tag 24 ka basahon sa matag kahon. Misaad ko nga mohatag og basahon sa matag tawo nga mosulod sa among panimalay.
Akong gimarkahan ang importante nga mga seksiyon sa matag basahon gamit ang business card nga akong gidisenyo nga nagpakita sa akong gikuha nga hulagway sa Salt Lake Temple. Gipapilit usab nako ang akong pagpamatuod sa blangko nga pahina sa atubangan sa matag basahon. Dayon, sa dili pa nako ihatag ang basahon ngadto sa usa ka trabahador o nars, akong ipasabot nila kon unsa ang Basahon ni Mormon.
Ako malipayon nga nasurprisa sa ilang mga reaksyon. Usa lamang ka tawo ang mibalibad sa pagdawat sa basahon. Ang tanan interesado nga maminaw mahitungod niini. Ang uban mapasalamaton kaayo nako, nag-ingon nga sila nakahibalo na mahitungod sa Basahon ni Mormon ug ganahan og usa. Daghang tawo nalipay kaayo nga ila gani ko nga gigakos.
Ako nakombinser nga nahitabo kini tungod kay sa matag higayon nga akong ablihan ang akong ba-ba ug moistorya mahitungod sa Basahon ni Mormon, ang Espiritu Santo anaa uban kanako. Masaligon ko nga ang mga healthcare workers ug mga nars mobati sa Espiritu. Akong nahatag ang tanang 72 ka basahon, ug bag-ohay lang nag-order ko og dugang pa nga 24.