Mga Sukaranan sa Ebanghelyo

Pag-atiman Niadtong Nanginahanglan

He Healed Many of Diverse Diseases [Giayo Niya ang Daghang mga Tawo nga Nag-antos sa Nagkalainlaing mga Sakit], ni J. Kirk Richards, dili mahimong kopyahon

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita mosunod sa pagtulon-an sa Ginoo sa pag-atiman niadtong nanginahanglan. Kita moatiman sa uban pinaagi sa pagserbisyo kanila, pagtabang kanila nga mahimong mobarog pinaagi sa kinaugalingong pagpaningkamot, ug pagpakigbahin sa unsay anaa kanato.

Ang Ehemplo ni Jesukristo

Si Jesukristo naghigugma, naghupay, ug nag-ampo alang niadtong naglibot Kaniya. Siya “miadto … sa tanang dapit ug naghimog mga maayong butang” (Mga Buhat 10:38). Kita makasunod sa Iyang ehemplo pinaagi sa paghigugma, paghupay, pagserbisyo, ug pag-ampo alang niadtong naglibot kanato. Kita mahimong kanunay nga mangita og mga paagi sa pagtabang sa uban.

Pagpangalagad

Ang pulong nga pagpangalagad gigamit diha sa mga kasulatan ug sa Simbahan sa Ginoo aron sa paghulagway kon unsaon nato sa pag-atiman sa usag usa. Ang mga tighupot sa pagkapari gisangonan isip tigpangalagad nga mga brother ngadto sa matag indibidwal o pamilya diha sa ward o branch. Ang tigpangalagad nga mga sister gisangonan ngadto sa matag hamtong nga babaye. Ang tigpangalagad nga mga brother ug mga sister moseguro nga tanang miyembro sa Simbahan nahinumdoman ug giatiman.

Pagtabang sa Uban nga Mahimong Makabarog Pinaagi sa Kinaugalingong Paningkamot

Makatabang kita sa mga sakop sa pamilya ug mga higala nga mahimong makabarog pinaagi sa kinaugalingong paningkamot pinaagi sa pag-awhag kanila sa pagpangita og malungtaron nga mga solusyon ngadto sa ilang mga problema. Kita dayon makasuporta kanila samtang sila maningkamot sa ilang mga tumong. Pangita og dugang nga impormasyon mahitungod sa pagbarog pinaagi sa kinaugalingong pagpaningkamot diha sa Mga Sukaranan sa Ebanghelyo nga artikulo sa Agosto 2023 nga Liahona.

Pagserbisyo sa Uban

Adunay daghang paagi nga kita makaserbisyo niadtong naglibot kanato ug makatabang sa pagsangkap sa ilang temporal, espirituwal, ug emosyonal nga mga panginahanglan. Ang pagkat-on mahitungod sa uban makatabang kanato nga makahibalo kon unsaon nato nga mas makaserbisyo kanila. Mahimo kitang mag-ampo alang sa giya aron mahibalo kon unsay atong mabuhat aron sa pagtabang.

Pagpakigbahin sa Unsay Anaa Kanato

Makaserbisyo kita sa uban pinaagi sa pagpakigbahin sa unsay gipanalangin sa Dios kanato. Sama pananglit, makahatag kita og ubay-ubay nga mga halad sa puasa o modonar ngadto sa pundo sa Humanitarian Aid sa Simbahan. Makaserbisyo usab kita diha sa atong komunidad ug sa atong mga calling sa Simbahan.

Mga Katungdanan sa mga Lider sa Simbahan

Ang bishop nagdumala sa pag-atiman alang niadtong nanginahanglan diha sa iyang ward. Makagamit siya sa kwarta gikan sa mga halad sa puasa aron sa pagtabang sa mga miyembro nga adunay mga panginahanglan. Ang uban nga mga lider, lakip sa iyang mga magtatambag ug ang mga kapangulohan sa Relief Society ug korum sa mga elder, motabang sa mga miyembro sa pagpangita og mga kapanguhaan nga ilang magamit sa pagsangkap sa ilang mga panginahanglan.

Makitawhanong mga Paningkamot sa Simbahan

Ang Simbahan motabang sa mga tawo sa tibuok kalibotan sa pagtubag panahon sa emerhensiya, mga proyekto sa komunidad, ug ubang mga programa sama sa limpyo nga tubig ug mga pagpabakuna. Aron makakat-on og dugang pa, tan-awa sa Dallin H. Oaks, “Pagtabang sa mga Kabos ug sa mga Nagkalisod,” Liahona, Nob. 2022, 6–8.

Gikan sa mga Kasulatan

“Ang Dios nahigugma sa malipayong naghatag” (2 Mga Taga-Corinto 9:7).

Tudloan nato ang atong mga anak nga moserbisyo niadtong nanginahanglan (tan-awa sa Mosiah 4:15–16).

Kita mohupay sa uban ug motabang kanila sa pagdala sa ilang mga alantoson (tan-awa sa Mosiah 18:8–9).

Mga Pulong nga Hinumdoman

Calling: usa ka piho nga responsibilidad sa pagserbisyo diha sa Simbahan. Ang mga lider sa Simbahan magtinguha og inspirasyon aron mahibalo kon kinsa ang ipatawag sa Ginoo kanila.

Mga halad sa puasa: kwarta nga atong ihatag ngadto sa Simbahan kon kita magpuasa, sa dili momenos tugbang sa kantidad nga atong magasto unta sa pagkaon atol sa puasa.

Pagbarog pinaagi sa kinaugalingong paningkamot: makaatiman sa mga panginahanglan sa atong mga kaugalingon ug sa atong mga pamilya.

Pagkaplag Pa og Dugang

Kon kamo adunay mga pangutana mahitungod sa pag-atiman niadtong nanginahanglan, mahimo kamong makigsulti sa inyong tigpangalagad nga mga brother o mga sister, sa inyong mga lider sa ward o branch, o sa mga misyonaryo. Makakita usab kamo og mga pakigpulong sa kinatibuk-ang komperensiya kabahin niini nga hilisgotan ug ubang mga kapanguhaan diha sa Gospel Library (sa ChurchofJesusChrist.org o diha sa mobile nga app).