4 ka Pangutana ug mga Tubag mahitungod sa Espirituwal nga mga Gasa

Ni Becca Wright

Mga Magasin sa Simbahan

Unsa nga espirituwal nga mga gasa ang motabang ninyo nga magpuyo ug magserbisyo sa kabuhong diha sa dalan sa pakigsaad ngadto sa kinabuhing dayon?

Ang Langitnong Amahan adunay buhat alang sa matag usa nato. Ug kitang tanan gihatagan og talagsaon nga mga gasa nga mag-andam nato sa pagtukod sa gingharian sa Ginoo sa paagi nga ang matag usa lang nato ang makahimo!¹ Kita usab magpadayon sa pagtubo ug pagpalambo og dugang espirituwal nga mga gasa aron mas mahimong sama ni Jesukristo ug moserbisyo Kaniya.

Sa unsa nga paagi nga ang pagpalambo sa atong mga gasa makahimo og maayong kausaban?

Si Presidente Russell M. Nelson mipahayag: “Ako kamong awhagon, uban sa tanang panghinaot sa akong kasingkasing, sa pag-ampo aron makasabot sa inyong espirituwal nga mga gasa—sa pag-ugmad, paggamit, ug pagpalapad kanila, gani sa mas labaw pa sukad. Inyong mausab ang kalibotan samtang inyo kining gibuhat.”²

Sa unsa nga paagi nga ang pagpalambo sa atong espirituwal nga mga gasa makatabang nato sa pag-akses sa gahom ni Jesukristo aron makatabang nga mausab ang kalibotan? Kon masabtan nato unsa ang atong espituwal nga mga gasa, magsugod kita sa pagsabot kon sa unsa nga paagi kini makapanalangin sa uban ug usab makatabang nato nga mahimong mas sama ni Jesukristo.

Unsa ang Katuyoan sa Espituwal nga mga Gasa?

Ang espirituwal nga mga gasa mao ang usa ka paagi sa Langitnong Amahan sa pagtabang kanato nga matuman ang atong buhat dinhi sa yuta ug sa pagdala sa atong mga kaugalingon ug sa uban nga mas mahiduol ngadto ni Jesukristo. Ang atong mga paningkamot mahiusa sa balaan nga buhat sa Langitnong Amahan sa “pagpahinabo sa pagka-imortal ug sa kinabuhing dayon sa tawo” (Moises 1:39). Siya mopahitabo sa pagka-imortal ug kinabuhing dayon, samtang kita mogamit sa atong espirituwal nga mga gasa sa pagsunod sa Iyang mga sugo ug motudlo sa atong mga kaugalingon ug sa uban ngadto Kaniya.³

Sumala sa kasulatan, ang kataposang katuyoan sa atong espirituwal nga mga gasa mao nga mapaduol kita ngadto ni Jesukristo ug sa paghimo niining mortal nga kinabuhi nga mas sayon og gamay alang sa atong kaigsoonan—“ alang sa kaayohan sa mga anak sa Dios” (Doktrina ug mga Pakigsaad 46:26; tan-awa usab sa mga bersikulo 8–9) ug alang “sa pagpatubo sa iglesia” (1 Mga Taga-Corinto 14:12).

Unsa nga Espirituwal nga mga Gasa ang Akong Tinguhaon?

Si Elder Bruce R. McConkie (1915–1985) mitudlo nga ang “espirituwal nga mga gasa walay kataposan ang gidaghanon ug dili maihap ang lainlain nga matang.”⁴ Ang Dios makasangkap sa bisan unsa nga gasa nga atong gikinahanglan aron matuman ang Iyang mga katuyoan, sa pagpalambo sa atong kaugalingon ug sa pagtabang sa uban.

Si Presidente George Q. Cannon sa Unang Kapangulohan (1827–1901) mitudlo, “Kon si bisan kinsa kanato dili hingpit, kini atong katungdanan ang pag-ampo alang sa gasa nga maghimo kanato nga hingpit.”⁵ Dili maihap ang lainlaing matang sa mga gasa sa pagpalig-on nato alang sa nagkadaiya nga mga hagit o mga kahuyang nga atong atubangon. Sama sa gitudlo ni Presidente Cannon: “Walay tawo nga angay nga moingon, ‘Ah, dili ko makatabang niini; mao kini ang akong kinaiya.’ Dili siya kahatagan og kaangayan niini.”⁶ Pinaagi ni Jesukristo, makadawat kita sa tanang gasa nga atong gikinahanglan sa pagpalambo ug sa pag-usab aron mahimong mas mahisama Kaniya.

Samtang mopalambo kita og Kristohanong mga hiyas, makahimo usab kita sa pagbayaw ug pagserbisyo sa uban sa Kristohanong mga paagi. Ang atong mga pamilya ug mga komunidad makabenepisyo ang tanan kon makatanyag kita kanila sa atong labing maayong kaugalingon.

Unsa nga espirituwal nga mga gasa ang inyong kinahanglan nga palamboon lapas sa “kinaiyanhon nga tawo” (Mosiah 3:19) ug mahimo unsa ang gusto sa Dios nga kamo mahimo?

Unsa ang Pipila ka mga Ehemplo sa Epirituwal nga mga Gasa?

Ang espirituwal nga mga gasa dili limitado sa unsay gilista sa 1 Mga Taga-Corinto 12:4–11, 30–31; Moroni 10:8–18; o Doktrina ug mga Pakigsaad 46:7–26. Ania ang mga ehemplo sa dugang nga espirituwal nga mga gasa nga gihatag sa mga lider sa Simbahan:

“Pagpangayo; …
“Pagpaminaw; …
“Pagpaminaw ug paggamit sa hinagawhaw, hinay nga tingog; …
“Makahimo sa pagbakho; …
“Paglikay sa panagbingkil; …
“Ang pagkamauyonon; …
“Paglikay sa kawang nga pagbalik-balik; …
“Pagtinguha niana nga matarong; …
“Dili mahukmanon; …
“Pagdangop sa Dios alang sa giya; …
“Ang pagpakadisipulo; …
“Pag-atiman sa uban; …
“Makahimo sa pagpamalandong;…
“Paghalad og pag-ampo; …
“Paghatag og gamhanan nga pagpamatuod; …
“Pagdawat sa Espiritu Santo.”⁷
“Adunay kaluoy,
“Pagpahayag og paglaom,
“Maayong makig-uban sa mga tawo,
“Pag-organisar sa epektibong paagi,
“Pagsulti o pagsulat nga madanihon,
“Pagtudlo sa klarong paagi,
“Pagkugi,”⁸ ug
Daghan, daghan pa.

Unsaon Nako nga Makaangkon og Espirituwal nga mga Gasa?

Agig dugang sa mga gasa nga dala sa pagkatawo, posible nga mopalambo og daghang dugang espirituwal nga mga gasa sa tibuok kinabuhi sa tawo. Ang pagdawat og espirituwal nga mga gasa sa kasagaran nagkinahanglan og paningkamot. Si Presidente Dallin H. Oaks, Unang Magtatambag sa Unang Kapangulohan, mitudlo nga ang espirituwal nga mga gasa “dili moabot nga klaro, awtomatik, ug diha-diha ngadto sa tanan nga nakadawat sa gasa sa Espiritu Santo.” Hinoon, siya mipadayon, “ang pagkadawat sa espirituwal nga mga gasa gibase sa hugot nga pagtuo, pagkamasulondon, ug personal nga pagkamatarong.”⁹

Bisan og gitawag kini og “mga gasa,” dili kita makadawat niini nga walay paningkamot. “Adunay posibilidad nga ang [Langitnong Amahan] mohatag nato og mga kahigayonan sa pagpalambo niana nga mga gasa kaysa ihatag lang kini kanato nga walay espirituwal ug pisikal nga paningkamot,” gitudlo ni Elder Juan Pablo Villar sa Seventy. “Kon magtinguha kita og dugang nga pasensya,” siya miingon, “mahimong atong makaplagan ang atong mga kaugalingon nga nagkinahanglan sa pagbansay niini samtang naghulat sa tubag. Kon gusto kita nga makabaton og dugang nga gugma sa atong silingan, ato kining masugdan pinaagi sa paglingkod tupad sa dili kaila diha sa simbahan.”¹⁰

Ang Espirituwal nga mga gasa Motudlo Nato ngadto sa Labing Dakong Gasa

Ang espirituwal nga mga gasa motabang nato nga magpadayon diha sa dalan sa pakigsaad—ug motabang nato sa pagdapit sa uban nga mouban kanato usab. Kini nga dalan maggiya nato ngadto sa “labing mahinungdanon sa tanan nga mga gasa sa Dios”: kinabuhi nga dayon (Doktrina ug mga Pakigsaad 14:7).

Sama sa gisulti ni Elder Bruce C. Hafen sa dihang siya usa ka sakop sa Seventy, “Maangkon nato ang kinabuhi nga dayon kon gusto nato, apan lamang kon kita wala nay laing gusto pa.”¹¹

Unsa gayod ang inyong labing gusto? Unsa nga espirituwal nga mga gasa ang makatabang ninyo nga moabot didto? Ang atong espirituwal nga mga gasa tingali dili makausab sa kalibotan alang sa tanan, apan ang pagpalambo niini aron moalagad sa uban makapausab sa atong kalibotan ug sa kalibotan niadtong atong giserbisyohan.