“Naayo diha sa Templo,” Liahona, Sept. 2023.
Mga Tingog sa mga Santos sa Ulahing mga Adlaw
Naayo diha sa Templo
Diha sa templo, mibati ko og lig-on nga kasegurohan nga ang Ginoo nahigugma nako ug naghunahuna sa akong mga pakigbisog.
Litrato pinaagi sa maayong kabubut-on sa tagsulat, background nga litrato sa Durban South Africa Temple pinaagi ni Matthew Reier
Ang among unang anak nga lalaki patay nang daan sa pagkatawo niadtong 2017. Siyam ka bulan sa wala pa ipahinungod ang Durban South Africa Temple niadtong 2020, ang among ikaduhang anak nga lalaki patay nang daan sa pagkatawo.
Nianang higayona, gibati nako nga sama ni Hannah sa Daang Tugon. Ako “labihang guola ug nag-ampo ngadto sa Ginoo, ug naghilak pag-ayo” (1 Samuel 1:10).
Gibati nako nga walay mahimo ug nasuko, ug grabe kaayo ang gibati nako nga kasakit. Nakigbisog ko sa emosyonal, pisikal, ug espiritwal nga paagi. Ang pagkupot sa gunitanan mora og pagkupot ngadto sa usa ka hilo nga hinay-hinay nga nahaplos sa akong mga kamot. Ako tinuod nga nasunog sa “hurnohan sa kasakit” (Isaias 48:10).
Mapasalamaton kaayo ako nga nakadawat ko og tabang ug kaayohan gikan sa akong pamilya, sa mga kasulatan, ug pag-ampo. Nakadawat usab ako og tabang gikan sa mga tigtambag. Ang kataposan sa akong pagkaayo, hinuon, miabot diha sa templo.
Sa dihang nagsugod ko og serbisyo sa templo, nagsugod ko nga napuno sa nagkadugang nga kahayag. Mibati ko nga komportable didto. Gibati usab nako ang lig-on nga kasegurohan nga ang Ginoo nahigugma nako ug naghunahuna sa akong mga pakigbisog.
Samtang ako nagpadayon sa pagserbisyo diha sa balay sa Ginoo, nagsugod ko sa pagtan-aw sa mga ngalan sa akong mga katigulangan sa lahi nga paagi. Dili na kini mga ngalan lamang. Ako nakaamgo, pananglitan, nga ang usa ka katigulangan usa ka anak nga babaye, usa ka inahan, usa ka apohan nga babaye, usa ka iyaan, usa ka igsoon nga babaye, usa ka pag-umangkon nga babaye. Ang iyang pagkamatay tingali lisod kaayo alang sa nahibilin nga mga kaliwat. Apan ang mga panalangin nga gitanyag niini nga katigulangan diha sa templo pinaagi sa puli nga mga ordinansa naglangkob sa dako ug tam-is nga kamaya nga molabaw sa bisan unsa pa nga sakit nga tingali gibati sa iyang mga kaliwat atol sa iyang kamatayon.
Kini nga pagsabot nakapanalangin nako samtang ako naghunahuna mahitungod sa among bililhon nga mga anak nga lalaki, sa mahangtoron nga kahimtang sa atong mga espiritu, ug sa plano sa kaluwasan sa Langitnong Amahan. Ang pagkawala sa among mga anak nga lalaki nakaaghat nako nga buhaton ang labing maayo sa pagsunod sa ebanghelyo.
Ang ubang mga adlaw mas lisod pa gihapon kay sa uban. Apan ang paghupot sa mga saad sa akong pakigsaad nakapahimo niadto nga mga adlaw nga mas sayon.
Sa paghulam sa mga pulong ni Presidente Russell M. Nelson, “Gimingaw kaayo kami sa among [mga anak nga lalaki]. Apan, tungod sa gipahiuli nga ebanghelyo ni Jesukristo, wala kami mabalaka bahin [kanila]. Samtang padayon namong gitahod ang among mga pakigsaad sa Dios, nagpuyo kami nga nagpaabot sa among pagpakig-uban [kanila] og usab.”1