“Mga Igsoon nga Lalaki ug Mga Igsoon nga Babaye diha sa Ginoo,” Liahona, Sept. 2023.
Mga Igsoon nga Lalaki ug Mga Igsoon nga Babaye diha sa Ginoo
“Gihigugma pag-ayo sa Dios ang kalibotan ug tungod niini gihatag niya ang iyang bugtong Anak”—ug Siya mihatag kanato sa usag usa.
Gibuhi ni Kristo ang anak nga lalaki sa biyuda didto sa dakbayan sa Nain.
Nagbiyahe gikan sa Capernaum, ang atong Manluluwas miadto ngadto sa usa ka dakbayan nga gitawag og Nain. Duol sa ganghaan sa dakbayan, nakakita Siya og prosesyon sa lubong. Ang wala damha nga kamatayon sa usa ka bugtong nga anak mibiya sa usa ka kabos nga biyuda nga nag-inusara.
“Sa pagkakita ni Jesus sa biyuda, naluoy siya ug miingon sa babaye, Ayaw paghilak.
“Unya miduol si Jesus ug gihikap niya ang lungon ug mihunong ang mga tawo nga nagyayong sa lungon. Unya miingon si Jesus, Dong, bangon!”
Samtang ang batan-on nga lalaki milingkod ug misugod sa pagpamulong, “gitugyan siya ni Jesus ngadto sa iyang inahan” (tan-awa sa Lucas 7:11–15).
Sa tibuok sa Iyang pangalagad, ngadto sa 1 man o ngadto sa 99,1 ang atong Manluluwas hingpit nga mipakita og kapuangod, hugot nga pagtuo, paglaom, gugma nga putli, gugma, pagpasaylo, kaluoy, ug serbisyo.2 Siya nagdapit sa matag usa kanato, “sunod kanako” (Luke 18:22) ug mahimong “gani sama nga Ako mao” (3 Nephi 27:27).3
“Gani Sama nga Ako Mao”
Sa pagsunod sa hingpit nga ehemplo sa atong Manluluwas ug mahimong sama nga Siya mao, kita modawat sa Iyang pagdapit nga maglakaw uban Kaniya diha sa Iyang dalan sa pakigsaad (tan-awa sa Moises 6:34). Kita usahay moila sa dalan sa pakigsaad pinaagi sa mga ordinansa sa kaluwasan ug kahimayaan nga nagtimaan niini—bunyag ug pagkompirma aron makadawat sa gasa sa Espiritu Santo ug mahimong usa ka miyembro sa Ang Simbahan ni Jesukristo sa mga Santos sa Ulahing mga Adlaw; ordinasyon sa Melchizedek nga Pagkapari (alang sa mga lalaki); pagtuga diha sa balay sa Ginoo (alang sa matag usa kanato isip mga indibidwal); ug pagselyo diha sa templo.
Ang usa ka ordinansa nga gikinahanglan alang sa kaluwasan ug kahimayaan mao ang usa ka sagrado nga buhat nga gipahigayon pinaagi sa awtorisado nga awtoridad sa pagkapari nga nagtudlo kanato sa pakigsaad nga may kalabotan sa ordinansa. Sa pipila ka paagi, kita makahunahuna sa usa ka ordinansa sa kaluwasan ug kahimayaan isip usa ka makita nga buhat nga maghatag og makapabugkos nga relasyon sa Dios ug sa Iyang balaan nga Anak ngadto sa atong kinabuhi pinaagi sa pakigsaad.
Ang matag usa kanato, isip usa ka hinigugma nga anak nga lalaki o anak nga babaye sa Dios, mohimo sa atong kaugalingong sagrado nga mga pakigsaad ngadto sa Dios. Kita mobuhat sa ingon isip usa ka indibidwal, sa atong kaugalingong ngalan, tagsa-tagsa. Kini nga pakigsaad nga dunay koneksiyon sa Dios mohatag sa matag usa kanato og gahom, paglaom, ug saad. Kini nga mga pakigsaad makausab sa atong mga kinaiya gayod, makabalaan sa atong mga tinguha ug mga aksiyon, ug makatabang kanato nga isalikway ang natural nga pagkalalaki o natural nga pagkababaye samtang kita motugyan ngadto sa mga pagdani sa Espiritu Santo. Tungod sa pakigsaad, pinaagi sa Pag-ula ni Kristo ang Ginoo, ang matag usa kanato mahimong sama sa usa ka anak sa Dios—“manunuton, maaghop, mapainubsanon, mapailobon, puno sa gugma”(Mosiah 3:19).
Manag-uban sa Pagserbisyo pinaagi sa Pakigsaad
“Gihigugma pag-ayo sa Dios ang kalibotan ug tungod niini gihatag niya ang iyang bugtong Anak” (Juan 3:16)—ug Siya mihatag kanato sa usag usa. Ang pagkasakop diha sa pakigsaad—ang pagkahimong konektado sa Dios ug sa usag usa pinaagi sa pakigsaad—nagdapit kanato sa pagtuman sa atong balaanong pagkatawo ug katuyoan pinaagi sa pagpakigsulti sa langit ug pinaagi sa pagkonektar ug pagmugna og usa ka komunidad sa mga Santos samtang kita mohigugma ug moserbisyo sa usag usa ug niadtong naglibot kanato. Sa paghatag og kahigayonan alang sa pasalig sa pakigsaad ug pagkasakop diha sa pakigsaad, ang Dios walay pinalabi. Siya nagdapit sa matag usa kanato, kababayen-an ug kalalakin-an, minyo o dili minyo, bisan unsay atong kaagi ug kahimtang, nga moduol ngadto Kaniya ug ngadto sa usag usa pinaagi sa pakigsaad.
Kon kita mahisakop pinaagi sa pakigsaad ngadto sa Ginoo, kita usab mahisakop pinaagi sa pakigsaad ngadto sa usag usa. Mahitabo ang talagsaon nga mga butang kon kita mohigugma sa Ginoo ug motabang, magtinambagay sa usag usa, ug moserbisyo sa usag usa. Ang pakigsaad nga pagserbisyo mopalig-on sa atong relasyon ngadto sa Ginoo ug sa usag usa. Kini naglakip sa atong personal nga relasyon sa atong Langitnong Amahan, pamilya, kongregasyon sa Simbahan, komunidad, ug mga henerasyon sa pamilya. Samtang atong ipakabuhi ang atong mga pakigsaad, atong mawala ang atong pagpakabana lang sa atong kaugalingon ug makaplagan ang atong labing maayo nga kaugalingon nga nakasentro kang Kristo.
Ang Balaanon nga Plano sa Dios sa Kalipay
Sa balaanon nga plano sa Dios sa kalipay, miingon si Presidente Russell M. Nelson, “ang kalangitan abli ngadto sa mga babaye kinsa natugahan sa gahom sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.”4
Si Presidente Camille N. Johnson, Kinatibuk-ang Presidente sa Relief Society, mipahayag, “Kita adunay katungod sa paggamit sa gahom sa pagkapari isip resulta sa personal nga katakos.”5 Nagkutlo ni Presidente Nelson, miingon siya, “Nagkinahanglan kita og mga babaye kinsa nasayod kon unsaon sa paggamit sa gahom nga giandam sa Dios alang sa mga nagtuman sa pakigsaad.”6 Ang mga tigtuman sa pakigsaad kinsa nagtinguha ug nagpakabuhi uban sa hugot nga pagtuo, kamapainubsanon, ug kakugi makadawat og giya, inspirasyon, mga gasa sa Espiritu, pagpadayag, ug “tabang ug kusog nga mahimong mas sama ni Jesukristo ug sa Langitnong Amahan.”7 Samtang ang matag usa kanato motanyag sa atong talagsaon nga mga gasa nga makigtambayayong sa Ginoo ug sa usag usa, kita magmugna og “usa ka lawas” (1 Mga Taga-Corinto 12:13).
Sa plano sa Dios, ang mga inahan ug mga amahan mga kauban ug mga kaabag. Kita motabang sa usag usa isip managkauban diha sa gugma ug pagkamatarong aron sa pag-amuma ug pagsangkap sa usag usa ug sa atong mga pamilya. Ang kaputli sa hunahuna ug kinaiya mga panginahanglanon alang sa pagpadayag ug inspirasyon nga gikinahanglan sa kababayen-an ug mga kalalakin-an. Sa ilang mga panimalay, ang mga amahan ug mga bana mangulo uban sa kalumo, kaaghop, ug sa tiunay nga paghigugma—matarong nga mga kinaiya nga gikinahanglan sa kalalakin-an ug kababayen-an sa tanan natong mga relasyon.8
Ang Dios maguol kon, sa bisan unsa nga relasyon, adunay pag-abuso, pagkontrolar, o pagpamugos sa bisan unsa nga matang pinaagi sa kalalakin-an o kababayen-an. Ang pagdani, pagkamainantoson, pagkamabination, ug putli nga kahibalo mao ang Kristohanon nga mga kinaiya nga gitinguha sa matag usa kanato—bisan kon kita man minyo, dili minyo, nabiyuda, o nadiborsiyo (tan-awa sa Doktrina ug Pakigsaad 121:41–42). Kini tungod kay ang paagi nga ang Ginoo naghunahuna mahitungod kanato ug sa Iyang Simbahan gitino pinaagi sa atong personal nga kinaiya ug pagkamatarong sa pagsunod sa pakigsaad.
Pagtinambagay diha sa Konseho
Niining sama nga diwa, diha sa Simbahan sa Ginoo kita magtinambagay diha sa konseho samtang kita magkaubang moserbisyo. Sa atong mga konseho, ang mga lider magtinguha og mga panabot ug mga ideya gikan sa tanan. Mapasalamaton ko alang sa matag usa sa talagsaon nga kababayen-an ug kalalakin-an nga ako adunay pribilehiyo sa pagserbisyo, nagtinabangay, diha sa ehekutibo nga mga konseho sa Simbahan. Kining halangdon nga mga sister ug mga brother nagtabang sa pagpundok sa Israel pinaagi sa misyonaryo nga pagserbisyo, nag-andam kanato sa paghimamat sa Dios pinaagi sa serbisyo sa pagkapari ug sa pamilya, naghiusa sa mga pamilya alang sa kahangtoran pinaagi sa templo ug family history nga serbisyo, ug nangalagad niadtong nanginahanglan pinaagi sa welfare ug pagbarog pinaagi sa kinaugalingong pagpaningkamot nga serbisyo.
Sa matag kahimtang, atong makab-ot ang mas maayo nga mga desisyon ug adunay mas dako nga kalamposan diha sa pagserbisyo sa Ginoo samtang kita mohatag og bili sa mga kontribusyon sa usag usa ug magtinabangay, mga igsoon nga lalaki ug mga igsoon nga babaye diha sa Iyang buhat.
Sa samang paagi, ako mapasalamaton nga, sa atong mga stake ug mga ward, ang brother ug sister nga mga lider ug mga miyembro nagkahiusa diha sa buhat sa kaluwasan ug kahimayaan. Sa tibuok Simbahan, ubos sa direksiyon sa mapahinungoron nga mga lider sa misyon, ang mga konseho sa pagpangulo sa misyon naglakip og elder ug sister nga mga lider sa pagbansay kinsa nangulo sa atong mga misyonaryo, kansang matag usa nga buhat ug mga responsibilidad gihatagan og bili ug mahinungdanon. Diha sa militar sa Estados Unidos, ang Santos sa Ulahing mga Adlaw nga mga chaplain, mga lalaki ug mga babaye nga mga opisyal nga giendorso sa Simbahan, nagpanalangin niadtong nagserbisyo latas sa nakadaiyang branch sa militar.9 Sa pagpangalagad, ang atong batan-ong mga lalaki ug batan-ong mga babaye adunay kahigayonan ug gikinahanglan nga moserbisyo. Sa atong pagserbisyo, kitang tanan nagkahiusa.
Usa ka paagi nga kita mobarog ingon nga mga saksi sa Dios mao ang pagserbisyo isip mga saksi sa gipahiuli nga mga ordinansa sa ebanghelyo. Ang mga sister ug mga brother mobarog isip mga saksi alang sa mga bunyag, alang sa mga buhi ug sa mga patay. Ang mga brother ug mga sister mobarog isip mga saksi alang sa dugang nga mga ordinansa diha sa balay sa Ginoo. Didto, ubos sa mga yawe sa presidente sa templo, ang mga sister mopahigayon sa sagrado nga mga ordinansa alang sa mga sister ug ang mga brother mopahigayon sa sagrado nga mga ordinansa alang sa mga brother.
Sa balaanon nga plano sa Dios sa kalipay, miingon si Presidente Dallin H. Oaks, Unang Magtatambag sa Unang Kapangulohan, “ang gahom sa [pagkapari] makapanalangin natong tanan. Ang mga yawe sa [pagkapari] modumala sa kababayen-an ingon man sa kalalakin-an, ug ang mga ordinansa ug awtoridad sa [pagkapari] may kalabotan sa kababayen-an ingon man sa kalalakin-an. … Bisan kinsa nga naglihok diha sa katungdanan [office] o calling nga nadawat gikan sa tawo nga naghupot sa mga yawe sa [pagkapari] naggamit sa awtoridad sa [pagkapari] sa paghimo sa iyang gisangon nga mga katungdanan.”10
Mopatigbabaw sa Kalibotan
Samtang maningkamot kita nga “mausa,” bisan sama nga si Jesukristo nahiusa ngadto sa Amahan (Juan 17:21), kinahanglan natong “isul-ob … ang Ginoong Jesukristo” (Mga Taga-Roma 13:14).
Kita mahimong mabalaan samtang, grasya ug dugang pa nga grasya, kita magkat-on ug himoong atong kaugalingon ang mga hiyas ni Jesukristo—mas hingpit nga mohigugma, mas dali nga mopasaylo, dili dali mohusga, mas andam nga moserbisyo ug mosakripisyo, mas halawom ug mas kanunay nga mopakita og kaluoy.
Atong saligan ang doktrina ug ehemplo ni Kristo, nahimuot sa kamatuoran ug mahimong Iyang mapainubsanon nga mga sumusunod (tan-awa sa 2 Nephi 28:14)—matag usa kanato isip mga indibidwal ug isip mga igsoon nga lalaki ug igsoon nga mga babaye diha sa Ginoo.11