“Biyernes sa Gabii nga Bunyag,” Liahona, Sept. 2023.
Mga Tingog sa mga Santos sa Ulahing mga Adlaw
Biyernes sa Gabii nga Bunyag
Ang akong tinguha nga maghinulsol mitabang kanako sa pagpangita sa Manluluwas ug sa Iyang Simbahan.
Paghulagway pinaagi ni Katy Dockrill
Human makasinati sa pasiunang kahinam sa pag-abot sa Estados Unidos gikan sa Tsina aron sa pagkuha sa akong PhD, nabuntog ako sa daghang akademiko nga papeles nga akong basahon ug isulat. Dili usab ako segurado kon unsaon sa pagpakighalubilo sa akong akademiko nga tigtambag [adviser], nga midugang sa akong kaugtas. Mibati ako nga nahisalaag ug nag-inusara, ug wala ako makahibalo kon unsa ang buhaton.
Nakahukom ko nga ang akong mga kasaypanan sa nangagi maoy nakaingon sa akong pag-antos ug nga ako kinahanglan nga maghinulsol. Gabii na kadto, mao nga nangita ko og “simbahan” sa online. Akong nakit-an nga Ang Simbahan ni Jesukristo sa mga Santos sa Ulahing mga Adlaw mao lamang ang simbahan nga abli hangtod sa alas 9 sa gabii. Midesisyon gayod ako nga maghinulsol didto sa simbahan, misugod ako og usa ka oras nga paglakaw.
Sa dihang miabot ko didto sa simbahan mga alas 6 sa gabii, nakakita ko og mga suga ug nakadungog og kinataw-anay ug musika nga naggikan sa sulod. Nangita ko sa palibot sa gambalay apan wala makakita sa pultahan. Diha sa usa ka bentana, nakakita ko og usa ka amahan nga nakigdula sa iyang anak nga lalaki diha sa usa sa mga lawak. Nanuktok ko diha sa bentana aron makuha ang iyang atensiyon. Gigiyahan niya ako ngadto sa pultahan, giabiabi ko pasulod, ug gisultihan ko nga dunay usa ka tawo nga gibunyagan.
Misunod ko sa iyang paggiya ug misulod ngadto sa usa ka lawak diin ang usa ka lalaki naghatag og panalangin ngadto sa usa ka batang lalaki kinsa bag-ohay lang nga nabunyagan. Nagbarog duol sa pultahan, naminaw sa panalangin, mibati ako nga ang Dios naghunghong usab og mga panalangin kanako. Mibati og kalipay ang akong kasingkasing, ug akong nabati ang unsay akong nahibaloan sa wala madugay nga ang Espiritu Santo. Nakadungog usab ako ug tingog nga nag-ingon nga ako napasaylo.
Human sa bunyag, miipon ko sa uban ug nakahimamat og daghang buotan nga mga tawo. Wala na ako mag-inusara. Usa ka lalaki kinsa mipaila sa iyang kaugalingon isip ang kanhi “presidente sa branch” mitanyag sa paghatod kanako pauli. Pipila ka bulan ang milabay, human naminaw sa misyonaryo nga mga leksiyon, ako nabunyagan.
Sa adlaw sa akong bunyag niadtong 2018 didto sa Cambridge, Massachusetts, usa ka brother namulong mahitungod kon sa unsang paagi ang atong minahal nga Langitnong Amahan mihan-ay nianang Biyernes nga bunyag. Siya mipasabot nga ang bunyag ipahigayon unta sa sunod nga Dominggo, apan tungod sa kaapiki sa panahon, kinahanglang usbon ang iskedyul niini alang sa Biyernes sa gabii. Kon wala kana nga kausaban, tingali dili gayod ako mahimong masayod sa Simbahan, sa atong Manluluwas ug sa atong Langitnong Amahan, ug sa akong mga brother ug mga sister sa ebanghelyo.