Alang sa mga Ginikanan

Motan-aw sa Dios alang sa Katuyoan ug Direksyon

Minahal nga mga Ginikanan,

Ang atong Amahan sa Langit wala mopadala kanato sa kalibotan nga walay giya. Pinaagi sa balaanong mga gasa sa kasulatan, pag-ampo, buhi nga mga propeta, sa matag usa, ug uban pa, kita makatan-aw sa Dios alang sa katuyoan ug direksyon. Samtang inyong basahon kini nga isyu sa Liahona, hinuktoki ang mga kapanguhaan nga Iyang gihatag kanato aron matabangan kita nga maadunay kahulogan nining kinabuhia ug mobalik Kaniya sa sunod.

Mga Panaghisgotan sa Ebanghelyo

Ang Atong Nahiusang Tahas diha sa Plano sa Dios

Isip usa ka pamilya, mahimo ninyong basahon ang 1 Mga Taga-Corinto 11:11 ug hisgotan unsa ang ipasabot niini. Ipakigbahin ang mga pahayag gikan sa artikulo ni Elder Gerrit W. Gong (pahina 4), nga nagpasabot sa nahiusang tahas sa kalalakin-an ug kababayen-an diha sa plano sa kaluwasan. Sa unsang paagi nga ang atong mga kalainan mohiusa nato imbes nga mobahin nato?

Ang Makaayo nga Gahom sa Hugot nga Pagtuo

Basaha ang Mateo 15:21–28 og dungan, nga naghisgot sa babaye nga taga-Canaan. Ngano kaha sa inyong hunahuna nga ang iyang pagtuo misangpot sa pagkaayo sa iyang anak nga babaye? Basaha ang mga pahayag gikan sa artikulo ni Presidente Camille N. Johnson sa pahina 8 aron mas masabtan ang tahas sa kaaghop ug hugot nga pagtuo aron makadawat sa gahom sa Ginoo.

Inadlaw-adlaw nga mga Pahinumdom ni Jesukristo

Pangutan-a ang imong pamilya, Giunsa ninyo sa paghinumdom sa Manluluwas sa inyong kinabuhi? Basaha ang mahinungdanong mga bahin gikan sa artikulo diha sa pahina 38 mahitungod sa kamahinungdanon sa paghinumdom. Ikonsiderar ang pagbutang diha sa inyong panimalay og larawan o kinutlo nga makapahinumdom nimo ni Kristo.

Dali, Sunod Kanako Kalingawan sa Pamilya

Hinumdomi ang mga Panalangin ni Kristo Matag Adlaw

1 Mga Taga-Corinto 15

Gitudloan ni Pablo ang mga Santos sa Corinto “nga si Kristo namatay alang sa atong mga sala … ug nga gilubong siya, ug sa ikatulo ka adlaw nabanhaw” (1 Mga Taga-Corinto 15:3–4). Siya midasig kanila nga “hinumdoman” (1 Mga Taga-Corinto 15:2) ang ebanghelyo nga giwali niya kanila. Dapita ang imong pamilya nga magdula niining dula sa panumdoman:

1. Hatagi ang matag usa og higayon nga makasulat og mubo nga tubag sa mosunod nga pangutana: Unsa ang panalangin sa ebanghelyo nga inyong naangkon tungod sa Pag-ula sa Manluluwas? (Alang sa pipila ka ideya, tan-awa sa 1 Mga Taga-Corinto 15:19–29.)

2. Pagpuli-puli og pagpakigbahin sa unsay inyong gisulat ug balikon sa panumdoman ang unsay gisulat sa tawo nga inyong gisundan.

Panaghisgotan: Unsaon nato nga mas makahinumdom sa mga panalangin nga gihatag ni Kristo kanato? Ikonsiderar ang paghimo og plano sa pamilya nga maghunahuna og usa ka paagi matag adlaw nga si Kristo mipanalangin sa inyong mga kinabuhi.

Gisumiter ni Mitzi Schoneman

Gikan sa Alang sa Kalig-on sa mga Kabatan-onan nga Magasin

Pagpangandam alang sa Kinatibuk-ang Komperensiya

Tan-awa ang pipila ka espesyal nga mga kalihokan ug mga artikulo nga makatabang sa kabatan-onan nga makaandam alang sa kinatibuk-ang komperensiya karong Oktubre.

Pagkat-on sa Pagbuhi ug Pagpaminaw

Si Sister Kristin M. Yee namulong mahitungod sa wala damha ug milagroso nga dalan nga gisunod sa iyang kinabuhi isip usa ka batan-ong babaye sa dihang siya midesisyon sa pagtugot sa Ginoo nga mo-impluwensiya sa iyang mahinungdanon nga mga desisyon.

Pagsagubang sa mga Pakigbisog sa Kahimsog sa Pangisip

Pagkat-on og dugang mahitungod kon unsaon pagsagubang ang mga pakigbisog sa kahimsog sa pangisip nga tingali masinati nimo o sa usa ka minahal sa kinabuhi.

Mga Leksiyon gikan sa mga Tuig sa Pagka-tinedyer ni Joseph Smith

Tan-awa kon unsa ang makat-onan sa mga batan-on karon gikan sa mga kasinatian ni Joseph Smith 200 ka tuig na ang milabay.

Gikan sa Higala nga Magasin

Tabang gamit ang Dali, Sunod Kanako

Pangita og sinemana nga mga kalihokan aron makatabang nga mahimong makalingaw ang inyong pamilya nga pagtuon sa kasulatan.

Kababayen-an nga may Hugot nga Pagtuo

Basaha ang usa ka mensahe gikan ni Presidente Dallin H. Oaks mahitungod sa matinud-anon nga mga ehemplo sa mga babaye sa iyang kinabuhi.

Emosyonal ug Mental nga Kaayohan

Ang isyu niini nga bulan sa ang Higala adunay mga kapanguhaan nga makatabang sa pagtudlo sa inyong mga anak mahitungod sa kahimsog sa pangisip, lakip na ang mga istorya mahitungod sa pagkahingpit ug sa sayo nga nauli nga igsoong misyonaryo. Makakita ka usab og mahigalaon sa bata nga mga sugyot alang sa kaayohan diha sa “Alang sa mas Magulang nga mga Bata” nga seksiyon.