“Ang Kaaghop sa Babaye nga Taga-Canaan,” Liahona, Sept. 2023.
Ang mga Milagro ni Jesus
Ang Kaaghop sa Babaye nga Taga-Canaan
Unsa ang tahas sa hugot nga pagtuo ug kaaghop sa pagpangita sa mga milagro nga atong gikinahanglan?
The Woman of Canaan [Ang Babaye nga taga-Canaan], ni Harold Copping, Bridgeman Images
Taliwala sa dili maihap nga mga interaksiyon nga nahimo ni Jesukristo atol sa Iyang mortal nga pangalagad, adunay usa nga sayon lat-angan tungod kay kini mubo ra ug usahay dili masabtan: ang babaye nga taga-Canaan nga gihulagway diha sa Mateo15:21–28.
Apil ang pipila ka dugang nga konteksto, hinuon, kita makakat-on og maanindot nga mga kamatuoran mahitungod sa pasensiya ug kamapuangoron ni Jesukristo samtang kita mahimong pamilyar niining dili kanunay nga gihisgotan nga babaye nga adunay sumbanan sa hugot nga pagtuo ug kaaghop.
Ang Konteksto
Sa Mateo 14, kita makakat-on nga ang Manluluwas nakahibalo sa kamatayon ni Juan Bautista, kinsa gipunggotan sa ulo sa sulsol ni Herodes. Sa pagkahibalo sa kamatayon sa Iyang ig-agaw, si Jesus misulay sa pagbiya sakay sa usa ka sakayan ngadto sa “usa ka dapit nga awaaw,” tingali aron magbangotan, apan dakong pundok sa mga tawo miapas Kaniya nga naglakaw (tan-awa sa Mateo 14:13). Isip pagpakita og dakong kapuangod, gigahin ni Kristo ang adlaw uban sa katawhan ug gani naghimo pa og usa sa Iyang labing dako nga milagro, nagpakaon sa dakong pundok sa liboan nga katawhan og lima ka pan ug duha ka isda (tan-awa sa Mateo 14:15–21).
Nianang gabhiona, ang Manluluwas naghimo sa ikaduhang dako nga milagro. Mitungas siya sa usa ka bungtod, “nag-inusara” gikan sa Iyang mga disipulo, aron mag-ampo. Ang Iyang mga disipulo misakay og sakayan, nga napalibotan sa Dagat sa Galilea, gikusokuso sa mga balod ug hangin. “Ug … si Jesus miapas kanila, nga naglakaw ibabaw sa [tubig],” nga nakaaghat sa mga disipulo sa pag-ingon, “Ikaw gayod ang Anak sa Dios.” (Tan-awa sa Mateo 14:23–25, 33.)
Sunod nga mipanaw si Jesus padulong sa amihanan gikan sa Galilea ngadto sa kabaybayonan sa Tiro ug Sidon, nga naa sa modernong panahon nga Lebanon. Siya seguradong nangita og “kapahulayan, pag-inusara, o igo nga kahigayonan sa pagpanudlo sa Napulog Duha,” nga wala Niya nahimo.1 Mao kadto nga didto “usa ka babaye nga taga-Canaan nga gikan sa samang kabaybayonan, ug nagpakiluoy niya nag-ingon, Kaloy-i intawon ako, O Ginoo, Anak ni David; ang akong anak nga babaye giyawaan ug nag-antos pag-ayo” (Mateo 15:22).
Ang pagkaayo sa anak nga babaye sa babaye nga taga-Canaan nahitabo sa usa ka dapit sa rehiyon nga taliwala sa Sidon ug Tiro, amihanan sa Galilea.
Sidon (tan-awa ang paghulagway sa ibabaw): Naila usab isip Zidon. Sa karaang panahon, ang pangkomersiyo nga negosyo nakahimo niini nga usa sa labing importante nga mga siyudad sa Fenicia.
Tiro (tan-awa ang litrato sa ibabaw): Lain nga importanteng pang-komersiyo nga siyudad, nahimutang og mga 22 ka milya (35 km) sa habagatan sa Sidon. Atol sa iyang pangalagad, ang Apostol nga si Pablo mibisita sa mga miyembro sa Simbahan dinhi (tan-awa sa Mga Buhat 21:3–7).
Paghulagway sa Sidon pinaagi ni Balage Balogh
Ang Babaye sa Canaan
Pagkatalagsaon nga ang babaye miduol ni Jesus. Siya usa ka taga-Canaan, “natawo nga pagano o walay Dios,” ang mga taga-Canaan giisip nga “ubos sa mga Judio.”2 Apan ang iyang hugot nga pagtuo sa gahom ni Jesukristo ug ang iyang gugma sa iyang anak nga babaye nakaaghat niya aron mohangyo sa Manluluwas alang sa tabang. Si Elder James E. Talmage (1862–1933) sa Korum sa Napulog Duha ka Apostoles mipasabot, “Ang kamatuoran nga iyang gitawag si Jesus isip Anak ni David nagpakita sa iyang pagtuo nga Siya mao ang Mesiyas sa Israel.”3
Bisan kon kita gamay ra og nahibaloan mahitungod niining Hentil nga inahan, kita makatagna nga ang iyang hugot nga pagtuo parehas nianang uban nga kababayen-an nga gihisgotan sa Bag-ong Tugon. Sama sa babaye nga “nagsige og dugo” (Marcos 5:25), si Maria ug Marta sa Betania, ug Maria Magdalena, ang babaye nga taga-Canaan mihatag sa iyang tibuok nga pagsalig diha sa Manluluwas. Siya adunay nahiluna ug masaligon nga pagsabot kon kinsa Siya.
Sa sinugdanan, si Jesus wala motubag kaniya. Ang mga disipulo miawhag Kaniya nga papahawaon siya [ang babaye] tungod kay siya nakadisturbo kanila, ug sila naghunahuna nga siya nakadisturbo Kaniya sa iyang pagpangita og kalinaw.4
Sa kataposan, si Jesus mitubag. Mipasabot sa Iyang nahauna nga pagpakahilom, Siya miingon, “Gipadala ako ngadto lamang sa nawalang mga karnero sa nasod sa Israel” (Mateo 15:24).
Ang pahayag sa Manluluwas mas nakapakurat kabahin niining Hentil nga babaye nga miduol kay nangayo og usa ka panalangin alang sa iyang anak nga babaye. Siya dili babaye sa Israel, apan bisan pa niana siya nakahibalo nga si Jesukristo mao ang Mesiyas, usa ka Hari. Ug bisan pa og Iyang giklaro nga ang Iyang misyon alang sa mga Judio sa Israel, ang babaye adunay hugot nga pagtuo nga Iyang ayohon ang iyang anak nga babaye. Uban sa kaaghop, siya miluhod isip pag-ila sa iyang pagkahari ug gahom (tan-awa sa Marcos 7:25), “misimba kaniya,” ug sa makausa pa mihangyo, “Ginoo, tabangi intawon ko” (Mateo 15:25).
Kaaghop ug mga Milagro
Sa pagtubag nga mura og estrikto alang sa moderno nga mga disipulo, si Jesus mitubag, “Dili maayo nga kuhaon ang pagkaon sa mga anak aron ipakaon sa mga iro” (Mateo 15:26). Ang mga iskolar sa Bibliya mipasabot nga niini nga pagtandi ang “mga anak” mao ang mga Judio ug ang “mga iro” mao ang mga Hentil.
Sa laing pagkasulti, ang nag-una nga obligasyon ni Kristo mao ngadto sa mga Judio. Siya mopakaon kanila—o mohatag nila og una sa ebanghelyo—ug dayon sila mopakaon o motudlo sa kalibotan. Si Elder Talmage mipasabot: “Ang mga pulong, bisan morag estrikto man kon paminawon nato, nasabtan niya diha sa espiritu ang katuyoan sa Ginoo. … Segurado ang babaye wala malain sa pagkumparar.”5
Usab, ang tubag niining buotan nga babaye makatandog ug makapahingangha ug maaghop: “Tinuod kana, Ginoo: apan bisan gani ang mga iro makakaon man sa mga mumho nga mahulog gikan sa lamesa sa agalon” (Mateo 15:27).
Kining puno sa pagtuo nga babaye dili matarog. Imbes mopili nga mahiubos, siya mipili sa hugot nga pagtuo. Ang iyang tubag usa ka pagpahayag og paglaom bisan diha sa mga mumho. Unsa ka dako kaayo nga pagtuo aron motuo nga ang usa ka mumho gikan sa lamesa sa Manluluwas igo na aron mabuntog ang bisan unsa man nga naghasol sa iyang anak nga babaye. Ang tubag niining puno sa pagtuo nga inahan nagpakita og pagkamapahiubsanon ug kaaghop.
Si Elder David A. Bednar sa Korum sa Napulog Duha ka Apostoles mipasabot sa kaaghop isip “usa ka kalig-on, dili kahuyang; aktibo, dili walay timik; maisogon, dili mahadlokon.”6 Ang babaye nga taga-Canaan sa tinud-anay lig-on gayod, aktibo, ug maisogon sa pagpahayag sa iyang hugot nga pagtuo nga mapasalamaton siya nga bisan gani ang gamay lang nga gahom sa Manluluwas igo na alang niya.
Ang babaye nga taga-Canaan lig-on, aktibo, ug maisogon sa pagpahayag sa iyang hugot nga pagtuo nga mapasalamaton siya nga bisan gani ang gamay lang nga gahom sa Manluluwas igo na alang niya.
Sa kataposan, si Jesukristo mitubag sa usa ka gamhanan ug pamilyar nga tubag: “Babaye, pagkadako sa imong pagsalig: matuman ang imong gihangyo.” Kini nga pagpakita nga Siya mohatag og bili ug mogakos sa matag usa kanato sa atong panaw sa pagduol Kaniya gisundan diha sa natala sa mga kasulatan pinaagi sa kasegurohan nga “niadto gayod dayong gutloa naayo ang iyang anak” (Mateo 15:28).
Unsa ang Atong Makat-onan?
Si Elder Talmage mikomento, “Ang dalaygon nga pagkamakanunayon sa babaye gibase diha sa hugot nga pagtuo nga makabuntog sa dayag nga mga babag ug molahutay bisan pa sa pagkawagtang sa paglaom.”7
Kana nga matang sa malahutayon nga pagtuo ni Jesukristo mao ang tukma gayod nga gitambag sa atong pinalangga nga propeta, Presidente Russell M. Nelson, nga atong palamboon: “Ang hugot nga pagtuo diha ni Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto sa magatuo.”8
Ako nagsaulog sa babaye nga taga-Canaan kinsa lig-on, aktibo, maisogon, ug makanunayon sa pagpatigbabaw sa iyang hugot nga pagtuo diha ni Jesukristo isip ang Manluluwas, Mesiyas, ug Hari. Siya usa ka ehemplo sa hugot nga pagtuo ug kaaghop diha sa Bag-ong Tugon nga gikinahanglan sa tanang disipulo ni Jesukristo. Dili matarog, kita magmakanunayon sa pagsunod nianang matang sa hugot nga pagtuo diha sa “pangulong pari sa mga maayong butang” (Hebreo 9:11).