Pag-apil sa Buhat sa Kaluwasan ug Kahimayaan—Bag-ong mga Mensahe gikan sa mga Propeta, mga Apostol, ug Ubang mga Lider sa Simbahan

Septiyembre 2023

Digital Lamang

Pag-apil sa Buhat sa Kaluwasan ug Kahimayaan—Bag-ong mga Mensahe gikan sa mga Propeta, mga Apostol, ug Ubang mga Lider sa Simbahan

Tan-awa kon unsa ang bag-ohay lang nga gitudlo sa mga lider sa Simbahan diha sa social media mahitungod sa buhat sa kaluwasan ug kahimayaan.

babaye nga mihikap sa sidsid sa sinina ni Kristo

“Ang katuyoan sa doktrina ug mga palisiya niining gipahiuli nga Simbahan,” miingon si Presidente Dallin H. Oaks, Unang Magtatambag sa Unang Kapangulohan, “mao ang pag-andam sa mga anak sa Dios alang sa kaluwasan didto sa celestial nga gingharian ug alang sa kahimayaan sa kinatas-an nga ang-ang niini.”¹ Kanunay kita nga naghisgot bahin niini nga buhat—ang buhat sa kaluwasan ug kahimayaan—apan unsay ipasabot niini?

“Samtang moduol kita ngadto ni Kristo ug motabang sa uban sa pagbuhat sa ingon, kita miapil sa buhat sa Dios sa kaluwasan ug kahimayaan. Kini nga buhat gigiyahan sa duha ka dagkong mga sugo sa paghigugma sa Dios ug sa paghigugma sa atong mga silingan (tan-awa sa Mateo 22:37–39). …

“Ang buhat sa kaluwasan ug kahimayaan nagtutok sa upat ka balaang gitudlo nga mga responsibilidad. …

Pagsunod sa ebanghelyo ni Jesukristo.
Pag-atiman niadtong nanginahanglan.
Pagdapit sa tanan nga modawat sa ebanghelyo.
Paghiusa sa mga pamilya alang sa kahangtoran.”²

Tan-awa kon unsa ang bag-ohay lang nga gitudlo sa mga lider sa Simbahan diha sa social media kon unsaon nga kita makahimo sa pagsunod, pag-atiman, pagdapit, ug paghiusa.

Mag-ampo alang sa Giya sa Pagtabang Niadtong Nanginahanglan

“Niining Nasodnong Adlaw sa Pag-ampo, akong gipamalandongan ang naglibot nga kahulogan diha sa atong katilingban bahin sa hugpong sa mga pulong nga ‘mga hunahuna ug mga pag-ampo.’ Alang sa kadaghanan, usa gihapon kini ka sinsero nga pagpahayag og pahasubo ug pagpakabana. Alang sa uban, gitan-aw kini isip kakulang sa lihok sa pag-atubang sa trahedya.

“Ako adunay lig-ong pagtuo nga ang pag-ampo alang niadtong nanginahanglan makapahimuot sa Dios; gani, Siya misugo nato nga modangop ngadto Kaniya ug mag-ampo alang sa uban! Hinuon, kini akong kaugalingong kasinatian nga sa dihang nangayo ko sa Dios og giya kon unsay akong buhaton aron motabang sa pagpangalagad, pagbayaw, paghigugma, ug pagsuporta niadtong nanginahanglan, Siya mitubag niini nga mga pag-ampo pinaagi sa piho ug yano nga mga butang nga mahimo gayod nako sa pagpanalangin sa usa sa Iyang mga anak.

“Ako modapit ninyo sa pagkonsiderar kon sa unsang paagi nga ang inyong mga hunahuna ug mga pag-ampo mopasiugda nga ang Dios modasig ug mogiya ninyo ngadto sa mga buhat sa kamabination, kaluoy, ug kamanggihatagon. Hunahunaa kon unsa ka daghan sa maayong butang ang inyong mahimo sa kalibotan—ug sa inyong kaugalingong pamilya, eskwelahan, ug trabahoan. Kon magtinguha kita nga mahimong Iyang mga kamot sa pag-ayo ug pagtabang, kita segurado nga mohimaya sa Ginoo.”

Presidente Russell M. Nelson, Facebook, Mayo 5, 2022, facebook.com/russell.m.nelson.

Mopasaylo sa Uban ug Motan-aw Nila isip mga Igsoong Lalaki ug mga Igsoong Babaye

“‘Amahan, pasayloa sila; kay wala sila makasabot sa ilang ginabuhat’ (Lucas 23:34).

“Kini nga mga pulong, nga gilitok sa Manluluwas nga si Jesukristo samtang nagbitay Siya sa krus, naghatag nato og sundanan nga sundon sa atong kaugalingong kinabuhi. Siya mitudlo kanato sa paghigugma sa atong mga kaaway, sa pagbuhat og maayo ngadto sa nagdumot kanato, ug gani panalanginan ang mga nanghimaraot kanato.

“Kon kita mopili nga mopasaylo sa uban, kita magtugot sa Ginoo sa pagtangtang sa hilo gikan sa atong mga kalag. Kita magtugot Kaniya sa paghupay ug paglukmay sa atong kasingkasing aron atong makita ang uban, ilabi na kadtong nakasala kanato, isip mga anak sa Dios, ug isip atong mga igsoong lalaki ug mga igsoong babaye.

“… Ako modapit ninyo nga mainampoong ikonsiderar kon adunay usa ka tawo nga kinahanglan ninyo nga pasayloon o usa ka tawo nga kinahanglan kamong mangayo og pasaylo. Ako mosaad nga samtang kamo mopasaylo, ang Manluluwas mohupay sa inyong kasuko, pagdumot, ug kasakit. Ang Prinsipe sa Kalinaw magdala kaninyo og kalinaw.

“… Hinaot nga kita modangop ngadto sa nabanhaw nga Ginoo samtang nagtabang Siya nato nga masinati ang kamaya ug milagro sa pagpasaylo.”

Presidente Russell M. Nelson, Facebook, Abr. 2, 2023, facebook.com/russell.m.nelson.

Ipadan-ag ang Inyong Kahayag

“Isip young adult nga miyembro sa Ang Simbahan ni Jesukristo sa mga Santos sa Ulahing mga Adlaw, tingali nakasinati kamo og mga higayon diin naghunahuna kamo kon unsay inyong buhaton aron makahimo og kaayohan sa kalibotan. Sa sayo pa, akong nakat-onan nga kon gusto ninyong usbon ang kalibotan, kinahanglan una ninyong usbon ang inyong kaugalingon.

“Ganahan ko sa kasinatian ni Gordon B. Hinckley isip usa ka batan-ong misyonaryo sa dihang giingnan siya sa iyang amahan, ‘Kalimti ang imong kaugalingon ug pagtrabaho.’ Ang kalibotan nanginahanglan sa inyong kadasig, inyong kalagsik, inyong hugot nga pagtuo, inyong pagpamatuod. Adunay daghang paagi nga kamo makapaambit sa inyong kahayag ug makahimo sa kalibotan nga usa ka mas maayo nga dapit. …

“Bisan sa unsang paagi ninyo ipakigbahin ang kahayag nga anaa ninyo, ang uban makabenepisyo sa inyong mga kasinatian. Kamo mas mapaduol ngadto sa Manluluwas kon kamo moapil sa maayo nga mga kalihokan ug moserbisyo sa uban. Ako mosaad nga kini mousab ninyo ug sa kalibotan alang sa mas maayo”

Elder Dieter F. Uchtdorf, Facebook, Peb. 3, 2023, facebook.com/dieterf.uchtdorf.

Mahibalo sa Atong mga Responsibilidad

“Ang akong pamilya nahimong mga kagiw sa duha ka higayon. Ang unang higayon mao niadtong kuwatro anyos pa ko; ang ikaduhang higayon mao niadtong 11 anyos ko. Naghunahuna ko niini samtang ako adunay pribilehiyo nga mamulong sa mga chaplain nga mga Santos sa Ulahing mga Adlaw gikan sa tibuok kalibotan. …

“Ang akong kasingkasing mapuno sa kasubo kon maghunahuna ko sa daghang mga kagiw ug mga langyaw sa tibuok kalibotan ug sa pag-antos sa daghan kaayong mga pamilya ug sa inosente nga mga bata. Sila atong mga igsoon. Kita kinahanglan nga nahibalo sa atong mga responsibilidad isip mga Kristiyano.

“Ang mga balaod sa nasod kinahanglang sundon, ug ang mga balaod kinahanglang magpakita usab sa atong kaandam isip mga Kristiyano sa pagtabang sa mga kabos ug sa nanginahanglan, nga andam sa pagbangotan uban nila, sa paghupay nila, sa pag-ampo uban nila, sa madagayaong pagpakigbahin sa atong mga kapanguhaan ug mga posibilidad uban nila, ug sa pagkatinuod mahimo nila nga mga higala.

“Ang pagpasalig sa atong kaugalingon niini nga matang sa pagserbisyo labing makapahayag sa tiunay nga gugma ni Kristo ngadto sa atong isigkatawo. Ang Kristohanon nga kaluoy ug empatiya alang sa atong isigkatawo makapausab nato. Magdala kini og positibong kausaban sa kaugmaon sa kalibotan. Ang atong tinguha ug ang atong lihok sa pagtabang sa usa ka tawo nga masakiton, gigutom o anaa sa problema magdala og kalinaw sa atong kaugalingong kinabuhi. Makapanalangin kini sa inyong mga komunidad ug magdala og kalinaw ni Kristo ngadto sa mga nasod sa kalibotan. Busa, ang matag adlaw mahimo ug kinahanglang usa ka adlaw sa bag-ong sinugdanan.”

Elder Dieter F. Uchtdorf, Facebook, Okt. 10, 2021, facebook.com/dieterf.uchtdorf.

Tugoti nga ang Gugma Mao ang Modasig Ninyo

“Kon mahitungod sa pagpakigbahin sa ebanghelyo, ang yano nga sundanan sa “paghigugma, pagpakigbahin, ug pagdapit’ magdala og mas maayo nga nakapunting sa tanang aspeto sa buluhaton sa Ginoo. Sa natural nga paagi ang pagsunod niining sukaranan nga mga baroganan sa ebanghelyo makapahimo nato nga makatabang sa uban sa pagduol ngadto kang Kristo pinaagi sa paghimo ug pagtuman sa mga pakigsaad. Tingali dili gani nato mamatngonan nga nagpakigbahin na diay kita sa ebanghelyo, tungod kay ang pagpakigbahin ug pagdapit mga natural nga ekspresyon sa atong tinuoray nga paghigugma sa uban. Kabahin lamang gayod kini kon si kinsa kita!

“Nag-ingon ang mga kasulatan nga ang ‘[gugmang putli] mapailobon’ ug ‘molahutay gayod’ (1 Mga Taga-Corinto 13:4, 7). Ang gugma walay eskedyul o petsa sa paghupas. Kon ang atong pagpakigbahin dinasig sa gugma, dili kita mawad-an og pailob. Padayon kitang mosulay, ug mosalig kita sa Ginoo samtang motabang kita sa uban.”

Elder David A. Bednar, Facebook, Ago. 2, 2021, facebook.com/davida.bednar.

Pagpasiugda sa Plano sa Amahan sa Kalipay

“Daghan ninyo nga nagbasa niini mga kabahin sa Generation Z. Nagdako kamo nga adunay natural nga kahibalo sa internet, mga smart device, social media, ug ubang may kalabotan nga mga teknolohiya nga kaming mas tigulang nga mga henerasyon kinahanglan pang maningkamot aron makat-on. Alang ninyo, ang ‘pag-like,’ ‘pag-share,’ ug ‘direkta nga pagmensahe’ ingon ra ka komon sa pagtawag, pagpanuktok, ug pagsulat nga gihimo sa mga henerasyon nga nag-una ninyo. Apan kuyog sa inyong halapad nga kahibalo sa digital nga kalibotan nga naglibot ninyo, kamo adunay usa ka butang nga gani mas labaw pa nga inyong gipanag-iya—kamo adunay pundasyon nga mahimong labing makahimo nga henerasyon sa pagpasiugda sa plano sa atong Langitnong Amahan sa kalipay ngadto sa tanan Niya nga mga anak. Ug nagkinahanglan kami sa inyong tabang.

“Mopakigbahin ko ninyo og [usa ka] pagdapit …: Hinumdomi nga ang inyong mga pagpili mahinungdanon. Samtang mohimo kamo sa inyong inadlaw nga mga pagpili sa pagsunod sa ehemplo ni Jesukristo, kamo makakaplag og kalamposan, kalipay, ug katuyoan nga mopanalangin sa inyong kinabuhi sa mga paagi nga dili matukib.”

Elder Quentin L. Cook, Facebook, Ene. 26, 2023, facebook.com/quentin.lcook.

Pangandam sa Pagsulod sa Balay sa Ginoo

“Ang pagtukod sa [Monrovia Liberia Temple] wala pa masugdi, apan mipakigbahin ko sa dakong panagtigom didto sa Liberia nga ang panahon nga ang indibidwal mangandam alang sa templo magsugod karon.

“Kaniadto, ang mga indibidwal nga nangandam alang sa pagsimba sa balay sa Ginoo maghunahuna kon unsa nga matang sa halad ang ilang himoon aron makasulod niining balaan nga balay.

“Hinuon, karon, ang mga miyembro sa Simbahan didto sa Liberia—ingon man ang mga Santos sa Ulahing mga Adlaw sa tibuok kalibotan—kinahanglang mosunod sa ehemplo ni Jesukristo ug mohalad og ‘masulub-on nga kasingkasing ug mahinulsolon nga espiritu’ (3 Nephi 9:20). Kita nga nangandam sa atong kaugalingon niini nga paagi mahimong mas balaan nga mga tawo ingon nga kita adunay oportunidad nga moapil sa serbisyo diha sa templo.”

Elder D. Todd Christofferson, Facebook, Mar. 10, 2023, facebook.com/dtodd.christofferson.

Magbaton og Dakong Pagtuo ug Kaisog

“Nakadayeg kaayo ko sa mga young adult ug sa kabatan-onan nga akong nahimamat dinhi [sa Tokyo]. Ang Japan usa ka nasod nga adunay 125 ka milyon nga mga tawo. 1% lang sa populasyon ang Kristiyano, ug mas minos sa 10% sa mga Kristiyano ang mga miyembro sa Simbahan. Nagkinahanglan og dakong pagtuo ug kaisog ang pagpakabuhi isip mga sumusunod ni Jesukristo ug pagpakigbahin sa ilang tinuohan ngadto sa uban.

“Misulti ko nila mahitungod sa bukas nga pagpakigbahin nga sila nagtuo ug nagsunod kang Jesukristo. Ako mipahayag kanila sa atong gugma alang nila ug kon si kinsa sila. Miingon ko nila nga ang Ginoo nagkinahanglan nila nga padayong magmaunongon nga mga disipulo ni Jesukristo taliwala niining matahom ug maanindot nga katawhan.”

Elder Neil L. Andersen, Facebook, Mayo 27, 2022, facebook.com/neill.andersen.

Higugmaa ang Dios

“Ang Josue 22:5 naglangkob sa upat ka lakang nga nagtudlo nato kon sa unsang paagi nga kita makahigugma sa Dios, nagtuman sa unang dakong sugo:

Mosunod sa Iyang ehemplo. Kita nagsunod sa Iyang ehemplo kon kita magpakabana sa mga butang nga Siya nagpakabana. Siya nagpakabana kaninyo, busa nganong dili man usab kita magpakabana sa Iyang mga anak?
Maghupot sa Iyang mga sugo. Si Presidente Russell M. Nelson mitudlo, ‘‘Ang mga balaod sa Dios hingpit nga nadasig sa Iyang walay kinutubang gugma kanato ug sa Iyang tinguha alang kanato nga mahimong maayo kutob sa mahimo’ (‘The Love and Laws of God’ [debosyonal sa Brigham Young University, Sept. 17, 2019], speeches.byu.edu).
Mounong Kaniya. Kon kamo mounong sa Dios, kamo magpaduol Kaniya ug mas makadungog Kaniya.
Moserbisyo Kaniya sa tibuok ninyong kasingkasing ug sa tibuok ninyong kalag. Ang pagserbisyo sa akong pamilya ug sa Simbahan nahimong usa sa labing dakong panalangin sa pag-ugmad kon kinsa ko.

“Mohimo og pasalig karon nga higugmaon ang Dios. Ako mosaad nga ang tanan pang mga butang mahapsay ra kon Siya ang inyong unahon. Ang paghigugma sa Dios mao ang yawe sa kalipay ug moandam ninyo sa pag-atubang sa bisan unsa nga moabot.”

Elder Ronald A. Rasband, Facebook, Peb. 13, 2022, facebook.com/ronaldarasband.

Hibaloi nga si Jesukristo Apil sa Iyang Buhat

“Usa sa mahinungdanong mga baroganan sa Pagpahiuli sa ebanghelyo ni Jesukristo mao nga Siya apil gayod sa buhat sa kaluwasan.”

Elder Dale G. Renlund, Facebook, Mar. 2, 2021, facebook.com/DaleGRenlund.

Sugdi ang Paghimo og Kaayohan

“Kon unsaon nato sa pag-atubang ang mga bintaha ug ang mga disbentaha kana usa ka bahin sa pagsulay sa kinabuhi. Kita hukman dili sa kon unsa ka daghan ang atong gisulti apan kon giunsa nato sa pagtratar ang tawo nga talandogon ug nagkalisod. Isip mga Santos sa Ulahing mga Adlaw, magtinguha kita sa pagsunod sa ehemplo sa Manluluwas, aron sugdan ang paghimo og kaayohan. Atong ipakita ang atong gugma sa atong silingan pinaagi sa paglihok nga masiguro ang dignidad sa tanang mga anak sa Langitnong Amahan. Samtang maningkamot kita sa pagkahimong sama sa Manluluwas, makapalambo kita og dugang empatiya, panabot, ug gugmang putli.”

Elder Dale G. Renlund, Facebook, Hulyo 19, 2021, facebook.com/DaleGRenlund.

Magmahimong Tigsumpay sa mga Henerasyon sa Pamilya

“Pinaagi sa atong hugot nga pagtuo kang Jesukristo, hinaot nga kita magmahimong tigsumpay sa atong mga henerasyon. Hinaot nga kita mokonektar sa atong mga katigulangan ug mopanalangin sa atong kasamtangan ug umaabot nga mga pamilya—ang mga pamilya nga anaa kanato ug ang mga pamilya nga gusto nato.”

Elder Gerrit W. Gong, Facebook, Mar. 21, 2023, facebook.com/gerritw.gong.

Magtrabaho uban sa Ginoo

“Sa miaging bulan sa tibuok kalibotan nga debosyonal, midapit ko ninyo nga mahimong mas maayo nga ‘kamo’ samtang magtrabaho kamo kauban sa Ginoo.

“Isip mga disipulo ni Jesukristo, ang atong pakigsaad sa Dios ug sa usag usa nagdapit nato nga mahimong maayo ug mohimo og maayo. Abi ninyo, ang atong Simbahan mohatag og makitawhanong tabang nga walay pagtagad sa kaliwat, sa giapilan nga relihiyon, o sa nasyonalidad. Makigtambayayong kita sa tanang mga relihiyon, o sa walay relihiyon. Motubag kita sa dinalian ug taas og tagal nga mga panginahanglan. Bation nato ang mga panalangin sa langit samtang atong ipadayag ang atong gugma sa Dios sa paghimo sa tanang posible alang sa atong kaigsoonan, sa Iyang mga anak nga lalaki ug mga anak nga babaye, bisan asa, sa matag paagi nga atong mahimo.

“Kon nangita kamo og mga paagi nga mahimong mas maayo nga ‘kamo,’ ikonsiderar ang pag-download sa JustServe.org nga app sa pagpangita og mga oportunidad nga anaa duol kaninyo.”

Elder Gerrit W. Gong, Facebook, Peb. 12, 2021, facebook.com/gerritw.gong.

Ilha Kinsa Kamo

“Samtang inyong tinguhaon ang pagdiskobre ug ipasa ngadto sa inyong mga kaliwatan kon si kinsa kamo, ug kon diin ug kon kinsa ang inyong gigikanan, inyong mahibaloan kon kinsa Siya—ang inyong Manunubos nga si Jesukristo; ug ako mosaad kaninyo nga kamo makakaplag og kaputli ug kalinaw, panglantaw ug katuyoan, ug kamo makakaplag og gahom ug luna diha sa pamilya sa Dios.”

Elder Ulisses Soares, Facebook, Mar. 5, 2022, facebook.com/soares.u.

Pagdiskobre og mga Istorya sa Pamilya

“Unsa nga mga istorya sa pamilya ang gikuhaan ninyo og kalig-on? Unsa nga mga tradisyon ang inyong madasigon nga gipadayon? Kon wala kay usa nga mahunahunaan, ayaw kawala og paglaom. Dasigon namo kamo sa pagkaplag niini; ug hinumdomi, ang family history dili tanan kabahin sa dugay na nga kaagi. Kombinasyon kini sa nangagi ug sa karon nga naghimo kanimo nga talagsaon nga ikaw.”

Elder Ulisses Soares, Facebook, Mar. 2, 2022, facebook.com/soares.u.

Magtinambagay mahitungod sa Buhat sa Kaluwasan ug Kahimayaan

“Ang Relief Society kinahanglang usa ka luwas nga dapit diin ang mga sister makapakigbahin sa ilang mga kasinatian, magtinambagay, makatampo og makahuloganong panudlo sa ebanghelyo, ug makabati sa gugma sa Langitnong Amahan ug sa Manluluwas. …

“Ang Kinatibuk-ang Tamdanan nga Basahon nagdapit nato sa paggahin og panahon sa matag miting sa Relief Society nga magtinambagay bahin sa mga hilisgotan nga may kalabotan sa buhat sa kaluwasan ug kahimayaan, nga maglakip sa bisan unsa gikan sa pagserbisyo sa atong komunidad ngadto sa pagsabot sa usa ka hilisgotan sa ebanghelyo o pag-atubang og piho nga hagit—nagtutok kanunay sa atong Manluluwas.

“Kami nanghinaot nga ang matag lokal nga kapangulohan sa Relief Society mainampoong mopili og mga hisgotanan nga kinahanglanon sa kababayen-an diha sa ilang pag-atiman. Kini nga panahon mahimong usa ka bililhon nga kapanguhaan alang sa pagkat-on ug pagpangalagad sa usag usa sama sa buhaton ni Jesukristo.”

Presidente Camille N. Johnson, Facebook, Ene. 8, 2023, facebook.com/RSGeneralPresident.

Pag-akses ug Paggamit sa Gahom sa Pagkapari

“Mga sister, maka-akses kamo sa gahom sa pagkapari! Ang mga panalangin sa gahom sa pagkapari maanaa sa tanang miyembro nga nagtuman sa ilang mga pakigsaad—kababayen-an, kalalakin-an, ug kabataan.

“Akong nakat-onan nga aron makagamit sa gahom sa pagkapari, kinahanglan ko nga mobuhat labaw pa kaysa pagsunod sa mga sugo. Kinahanglan nakong ihiklin ang mga butang niining kalibotan ug ipahinungod ang akong mga talento, panahon, ug mga kapanguhaan ngadto sa Dios. Usa kini ka matang sa pasalig sa kasingkasing, gahom, hunahuna, ug kusog ngadto sa buhat sa kaluwasan ug kahimayaan—ang pagpundok sa Israel—nga magtugot nako nga magamit ang gahom nga gituga kanako.

“Si Presidente Russell M. Nelson misaad nga ‘kadtong natugahan diha sa balay sa Ginoo nakadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon sa paggamit niana nga gahom’ (‘Espirituhanon nga mga Bahandi,’ kinatibuk-ang komperensiya, Okt. 2019).

Agi og tubag sa iyang saad, naningkamot ko sa pagsusi sa akong kinabuhi. Naghimo ko og lista: ‘Unsay angay nakong buhaton sa usa ka adlaw/semana/bulan?’ Dayon mangutana ko sa akong kaugalingon, uban sa mainampoong kasingkasing, ‘Unsa ang dili na angayan nga gahinan sa akong panahon ug kusog?’ Sama sa gisugyot sa propeta, ang mga butang nga kanhi morag importante dili na kaayo giprayoridad, ug ang ubang mga kalihokan giwagtang na sa akong lista, tungod kay samtang ingon og dili makadaot, kini makabalda.

“Ang pagsusi sa kaugalingon dili usa lamang ka higayon nga buluhaton. Akong nakat-onan nga ang makuti nga pagsusi sa akong panahon ug kusog, sama sa gisulti ni Presidente Nelson, usa ka ‘proseso sa tibuok kinabuhi sa pagpahinungod sa [akong] kinabuhi ngadto sa Ginoo’ (‘Espirituhanon nga mga Bahandi,’ kinatibuk-ang komperensiya, Okt. 2019) ug nakapausab sa akong pagsabot bahin sa unsay akong buhaton aron makagamit sa gahom sa pagkapari diin maka-akses ko kon magtuman ko sa akong mga pakigsaad.

“Moapil ba mo nako sa pagtinguha sa pag-akses ug paggamit sa gahom sa pagkapari?”

Presidente Camille N. Johnson, Facebook, Nob. 13, 2022, facebook.com/RSGeneralPresident.

Mag-ampo ug Maminaw

“Ang Manluluwas naghimo sa Iyang buhat pinaagi sa matag usa nato. Busa mag-ampo kita alang sa usag usa ug maminaw kon unsaon nga Siya mosugo nato sa pagpanalangin niadtong naglibot nato. Siya motubag tungod kay ganahan Siya sa inyong maayong kasingkasing, ug nahigugma Siya niadtong anaa sa inyong dalan. Hinaot nga inyong bation ang Iyang gugma alang ninyo samtang kamo nagtan-aw ug nagpanalangin sa uban sama sa Iyang buhaton.”

Sister Kristin M. Yee, Facebook, Peb. 8, 2023, facebook.com/RS2ndCounselor.

Motabang sa Kabataan nga Moapil sa Buhat sa Kaluwasan ug Kahimayaan

“Samtang nagbisita sa lainlaing grupo sa Primary sa tibuok kalibotan, nadasig ko kanunay kon unsa ka andam ug ka takos ang kabataan sa pag-apil sa buhat sa kaluwasan ug kahimayaan. Ang mga bata nga nabunyagan na nagtuman sa ilang mga pakigsaad sa bunyag!

“Ang among pangandoy isip kapangulohan mao nga ang tanang kabataan makasabot ug makatuman sa ilang mga pakigsaad nga gihimo atol sa bunyag—ingon man makaandam alang sa ubang mga ordinansa diha sa dalan sa pakigsaad sa Manluluwas.

“Naghinam-hinam kami nga mopakigbahin og bag-ong mga kapanguhaan alang sa mga ginikanan ug mga lider sa Primary aron matabangan ang kabataan ug kabatan-onan nga makasabot sa mga panalangin ug mga pribilehiyo sa paghimo ug pagtuman sa sagrado nga mga pakigsaad. Nanghinaot ko nga inyong makaplagan ug marebyo kini nga mga kapanguhaan diha sa Dali, Sunod Kanako nga manwal diha sa Gospel Library nga app o sa ChurchofJesusChrist.org.”

Presidente Susan H. Porter, Facebook, Okt. 28, 2022, facebook.com/PrimaryPresident.

“Tan-awa ang Inyong Gagmay nga mga Bata”

“Sa dihang ang Manluluwas miawhag sa mga tawo sa karaang Amerika sa ‘[pag]tan-aw sa [ilang] gagmay nga mga bata’ (3 Nephi 17:23), Siya midapit nila nga dili lang sila motan-aw nila apan motan-aw nila sa kinahiladman. Motan-aw sa ilang mga mata ug makita ang ilang balaanong bili, kapasidad, ug potensiyal. Ang sama nga pagdapit kalabot sa atong bililhong gagmay nga mga bata gihatag kanato karon. Ang atong kabataan gidapit sa propeta sa Dios sa pagpundok sa Israel. Ako mopamatuod nga sila adunay kapasidad sa pagbuhat niana. Nadasig kaayo ko sa kabataan nga akong nahimamat atol sa akong bag-ohay lang nga pagbisita sa Pilipinas samtang mipaambit sila kon unsay ilang mahimo sa pagtabang sa paglig-on sa gingharian sa Dios.

“Sa unsang paagi nga kamo nakakita sa kabataan nga nagsunod sa ebanghelyo ni Jesukristo, nag-atiman niadtong nanginahanglan, nagdapit sa tanan sa pagdawat sa ebanghelyo, ug naghiusa sa mga pamilya alang sa kahangtoran sulod sa dapit diin kamo adunay impluwensya?”

Sister Amy A. Wright, Facebook, Ene. 18, 2023, facebook.com/Primary1stCounselor.