“Unsaon Nato Paghimo sa Atong mga Kongregasyon nga Mas Magkahiusa?” Liahona, Sept. 2023, 44.
Dali, Sunod Kanako
Unsaon Nato Paghimo sa Atong mga Kongregasyon nga Mas Magkahiusa?
Paghulagway pinaagi ni Vicky Scott
Nakabalita si Pablo nga adunay mga pagkabahin-bahin taliwala sa mga miyembro sa Simbahan didto sa dakbayan sa Corinto (tan-awa sa 1 Mga Taga-Corinto 11:18). Agig tubag, nangamuyo siya kanila diha sa usa ka sulat “[nga kinahanglan] walay pagkabahin diha sa lawas [sa Simbahan], hinuon aron ang mga bahin [mga miyembro] niini makaangkon sa samang pagtagad alang sa usa ug usa” (1 Mga Taga-Corinto 12:25).
Kita makapakita niining “samang pagtagad alang sa usa ug usa” pinaagi sa walay hinakog nga mga buhat sa gugma ug gugmang putli. Si Pablo naghisgot og pipila ka paagi nga kita makabuhat niini aron sa paghimo sa atong mga relasyon nga mas mahiusa.
Pagmaya ug pagbangotan kuyog ang uban.
“Kon ang usa ka bahin mag-antos, ang tanan magdungan sa pag-antos; kon ang usa ka bahin pasidunggan, ang tanan magdungan sa paglipay” (1 Mga Taga-Corinto 12:26).
Paghimo og walay hinakog nga mga buhat sa pagserbisyo.
“Wala untay maningkamot alang lamang sa iyang kaugalingong kaayohan, kondili sa kaayohan hinuon sa uban” (Joseph Smith Translation, 1 Corinthians 10:24).
Ihiusa ang atong mga pagpamatuod sa Manluluwas.
“Tungod kay usa ra man ang pan, kita usab usa lamang ka lawas bisan daghan kita, kay kitang tanan nakig-ambit man sa usa ra ka pan [ni Kristo]” (1 Mga Taga-Corinto 10:17).
Higugmaa ang tanan.
“Ayaw ninyo hatagi ug kapandolan ang mga Judio o ang mga Grego o ang iglesia nga iya sa Dios” (1 Mga Taga-Corinto 10:32).