Kamaiuaki n te Bong Anne iroun Kristo

Iroun Titita Amy A. Wright

Moan Kauntira n te Beretitentii ni Kabuta n te Moanrinan

E kangaraoa aio nakoira Iesu Kristo bwa “ti na maiu n te bong anne.”

Bon te bong ae onrake ni taian kaikonaki, titiraki aika a na iangoaki, ao reirei aika a nano. I mwiin taekinan te kauring ae matoatoa nakoia ake ai aron “ rua ni mate aika kamainainaki, are a tamaroa aoia, ma a on nanoia n riia maate, ma te kamwara ni kabanea,”¹ E reirei riki teniua kaikonaki Iesu ibukin te katauraoi n tamnei ao te riki bwa te reirei. Teuana man aikai bon te kaikonaki irouia kiibono ake tengaun.

“Ao uean te Atua ai aroia tengaun te kibono, ake a anai aia b’ae n oti nako ni butimwaea te tia iein.

“A nanobaba niman ao a wanawana niman.

“Bwa ngke auoti aia bae naake a nanobaba, ao aki ua bwa:

“Ma naake a wanawana a uota aia bwa i nanon aia atinib’a ma aia b’ae.

“Ao ngke e banikai te tia iein, ao nakekei a bane n nimatutu ma ni matu.

“Ao ngke e nukanibong, ao e takarua te aba ni kangai, Noria, te tia iein; kam na oti nako ni butimwaia.

“Ao a bane n teirake kibono akekei, ao a kauramwakai aia b’ae.

“Ao a taku naake a nanobaba nakoia naake a wanawana, kamai teutana n ami b’a, bwa a kani mate ara b’ae.

“Ao a kaekaia naake a wanawana ni kangai, Tao e aki tau nakoimi ao nakoira; ma kam na nakoia taani kabo b’a ni kaboi ami b’a.

“Ao ngke a nako ni kaboa te bwa, ao e roko te tia iein; ao a rin ma ngaia n te baka naake a tauraoi aia bwai: ao e a bonotaki naba te mataroa.

“Ao rimwi a roko kibono ake raoia, ao a kangai, Te Uea, Te Uea, ko na kaukia nakoira.”²

“Ao e kaekaia ni kangai, E koaua ae I a tuangkami ba I aki kinaingkami.”³

Ma ngaia ae kam na kamarurungingkami, ba kam aki ata te bong arei ma te aua arei. ”⁴

E kaota te titiraki ae na iangoaki Beretitenti Dallin H. Oaks ni irekereke ma rokon te tia Iein te mwaane:⁵ “Tera ngke arona bwa ningabong Ana bong n roko? Ngkana ti ataia ae ti na kaitibo ma te Uea n ingabong—rinanon matera ae moantaai ke rinanon Okina ae akea kantaningaakina—tera ae ti na karaoia n te bong aei?”⁶

I reiakinna man ae riki nakoiu bwa te katauraoi n tamnei ibukin rokon te Uea e aki ti kakawaki ma bon ti te kawai n kunea te rau ni koaua ao te kukurei.

Bon te bong ae raoi ngke I moan ongo te taeka ae “E reke iroum te kaentia.” Ti rangi n tounako ngai ma kaainabau! Ni butira n okira mwengara n akea te kakarongoa, ni iangoa te rongorongo arei, e nako nanou nakoia natira mwaane teniman.

I titiraki n au iango Tamau are i Karawa, “N na mate?”

E wirikiriki te Tamnei ae Raoiroi, “E na bon akea te Kangaanga.”

I a manga titiraki i mwiina, “N na maiu?”

E roko te kaeka, riki, “E na bon akea te Kangaanga.”

I rangi n aki oota. Bukin tera I karekea te kaeka ae titebo bwa N na maiu ke ni mate?

N te tai ae tawe, e onrake nanou n te rau ni koaua ngke I kauringaki: Ti aki riai ni waekoa n okira mwengara n reireiniia natira aron te tataro. A ataa aron karekean taian kaeka ao karaunano man te tataro. Tiaki riai n waekoa n okira mwengara n reireiniia taekan koroboki aika a tabu ke aia taeka burabeti aika a maiu. Taeka akanne a kaman kinaaki bwa bwaai aika a karekea te kakorakora ao te atatai. Ti riai n aki waekoa n okira mwengara ao n reireiniia taekan te rairannano, te Mangauti, Kaokakan bwai, te babaire ni kamaiu, utu aika akea tokiia, ke bon ana reirei Iesu Kristo.

N te tai anne ao a bane ni kakawaki te anga reirei n te bootaki n utu n te tairiki, karaoan kamatebwai n koroboki aika a tabu, karaoan tataro n onimaki, anga kakabwaia, tibwaan kakoaua, karaoan berita aika a tabu ao kawakinaia, te rin n ana auti te Uea, ao ururingan te Tabati—O, ai bon kakawakira! E a rimwi bwaanakin ara taura te bwae. Ti kainnanoa te timna i mwiin te timna,, ao ti kainnanoia ngkai naba!

Ibukin Iesu Kristo ao Ana euangkerio ae kaokaki, ngkana I mate, a na karauaki nanoia au utu, a na kakorakoraaki, ao n te bong teuana a na manga okira aroia n kukurei. Ngkana I maiu, N na karekea te mwaaka i aon te aonaaba aio ae rangi ni korakora n anganaki buokau, kamatoaaki, ao n kamaiuai. Ni kabaneana, ana bon nakoraoi bwaai ni kabane, ibukin Iesu Kristo.

Ti reiakinna man kamatebwaian Reirei ao Berita aika Tabu ae karaoaki raoi bwa tera taraan te taeka ae “Nakoraoi:

“”Ao n te bong anne, ngkana I roko ni mimitongiu, e na kakoroaki bukin te taetae ni kaikonaki are I taekinna ibukiia kiibono ake tengaun.

“Bwa naake a wanawana ao n tia ni karekea te koaua, ao n tia n anaa te Tamnei ae Tabu ibukin kairaia, ao n tuai ni mwamwanaaki—e koaua ae I tuangkami, a na bon aki koreaki ao n teweaki nako nanon te ai, ma a na maiu n te bong anne⁷

E kangaraoa aio nakoira Iesu Kristo bwa “ti na maiu n te bong anne.” E aki nanonaki maiura n te bong anne bwa kamwaitan riki kanoan bwaai ake ti na karaoi. Iangoa te kiraati ae kabuburaa taraan te bwai. Oin bukina bwa e na aaki ti karikii bwaai bwa a na taraa ni bubura. E konaa naba ni karekea te ota bwa e na korakora riki. Ti riai ni kauarerekea, kabanei korakorara, ao n riki bwa taan anga Otan Iesu Kristo. Ti kainnanoi riki taneiai aika a tabu ao aika a reke man te kaotioti.

Te maunga ae tamaroa ae aki toki n aranaki bwa “maunga ae kiriin n akea tokina”, e kuneaki i meangin maeaon Iteraera.” Te Maunga ae Carmel⁸ e maiureirei n aki toki n te ririki ma kaai aika aomwaiwai man aika a bubura nakon ake a uarereke. E rikirake maiuraoina ni katoabong. N ai aron aoin Karemera,”⁹ ngke ti ukora maiuraoin tamneira “ni bwaai aika a kaineti ma te raoiroi,”¹⁰ a uarereke man aki kangaanga,”¹¹ a na maiu ara kakoaua ao aia kakoaua natira!

Ko kona ni iangoia, ngkai, “Ma Titita Wright, ko aki ataiia au utu. Ti rangi ni kekeiaki ao tiaki anne ae reke iroura.” Kam koaua. I aki ataia ami utu. Ma te Atua ae akea tian ana tangira, nanoanga, mwaaka, ae ataibwai, ao ni mimitong e ataia.

Titiraki aika tao kam kona n titiraki bon titiraki mai nanomi aika a korakai i nanon tamneimi. A kuneaki aekakin titiraki akanne n koroboki aika a tabu:

“Te tia Reirei, ko aki mutiakini mateia [au utu]?”¹²

“Ao e ngaa au kaantaninga iai?”¹³

“Tera ae [I] riai ni karaoia, bwa e aonga ni kamwawaki te nang ae rootongitong aei mai [i aou]?”¹⁴

“Ma e na reke ma ia te rabakau? ao e nga nen te ataibwai?”¹⁵

Ao ngkai, tariu, [N] na kanga n tauii ni kabane bwaai aika a raoiroi?”¹⁶

“Te Uea tera ae ko tangirai bwa N na karaoia? ”¹⁷

Ao i mwiina a roko kaeka:

“Ko kakoaua mwaakan Kristo nakon te kamaiuaki?”¹⁸

E a tia te Uea n tuangiia tabemwaang bwa a na aki taua ana raoiroi“?”¹⁹

“Kam taku i nanomi bwa [E] konaa ni karaoa te baenne?”²⁰

“Ko kakoaua te burabeti?”²¹

Kam kamwakura ami onimaki n te kaboaki iroun are e karikingkami?”²²

“Tiaki E na karaoa ae riai te tia Motiki taekaia kaain aonaaba ni bane?”²³

Raou aika kam tangiraki, tiaki kona ni tibwai ara bwaa, ma ti kona n tibwaa Ana Ota. A na aki ti buokira ara bwaan ara taura “ni maiu n te bong” ma e kona naban riki bwa te buoka nakon te kawai are e kairiia aika ti tangiria nakon te Tia Kamaiu, ake a tauraoi “ma baina aika a tangaina bwa e na butimwaeiia”.²⁴

E kangai ana taeka te Uea: Ko na katoka bwanaam man te tang, ao matam man raniia: bwa e a kaboaki am mwakur, … ao a na manga oki mai abaia aiaia.

“Ao bon iai mwiokoan kaitiran am bong, bon ana taeka Iehova, ao a na manga roko natim i abaia.”²⁵

Iesu Kristo bon te mwioko n te kaitira ni bong.” Akea te bwai ae ti karaoia ke n aki karaoia, ae riaon karekean ana anga karea ae akea tiana ma tokina. Bon ngaia bukina ngkai e aki konaa n toki ara karaki.²⁶ Ngaia ae kam na waaki nako man teimatoa i nanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Mangaia, ae [ti] na waaki nako, ni kanuaingkami n ana taeka Kristo, ao n teimatoa ni karokoa te toki, ao taraia, e kangai ana taeka te Tama: [Ti] na reke iroumi te maiu ae akea tokina.”²⁷

Te Maiu ae akea tokina bon te kimwareirei ae akea tokina. Te kimwareirei n te maiu aei, ngkai—n aki tabe ma kangaanga n reke iroura ma ibukin ana buoka te Uea n reiakinaki iai ao n tokanikai i aoia—ao te kimwareirei ae akea tiana n te maiu ae na roko. Ana akea rannimata, a na kamaoaki naano aika a uruaki, e na manga kuneaki are e bua, a na taobaraaki raraoma, a na kaokaki utu, ao ni kabane ana bwai te Tamae na anganaki.²⁸

Taraa te Uea ma ni maiu²⁹ bon au koaua n aran te “Tia Kawakin Tiibu ae tabu man tatangiraki ao te Bitiobu ibukin tamnei[ra],”³⁰ Iesu Kristo, amen.

Bwaai aika a na taraaki

1. Mataio 23:27.

2. Mataio 25:1–11.

3. Ana Rairairi Iotebwa Timiti, Mataio 25:11 (n Mataio 25:12, ae na taraaki i nano a).

4. Mataio 25:13.

5. E reirei Unimwaane James E. Talmage: “Te tia iein bon Iesu Kristo; te baka n amwarake e tei ibukin rokona n te mimitong, ni butimwaea Irouna te Ekaretia n te aonaaba bwa kanga Te tia iein. Kibono a tei ibukia ake a kakoaua iroun Kristo, koraki, ake, a kakoaua ni koaua bwa a warekaki ibuakoia ake a kakabwaiaaki n te baka n amwarake. Taura ake a ura, ake a uouotaki irouia aine, bon kaotan aia koaua ao aia waaki Kiritian; ao te bwaa are e tatara irouia ake a wanawana ti konaa n noora te korakora n tamnei ao e bati ae wanawana ao taromauri ni karine nakon ana beku ae okoro te Atua ae konaa ni kamanoaki” (Jesus the Christ [1916], 578–79).

6. Dallin H. Oaks, “Preparation for the Second Coming,” Liahona, May 2004, 9.

7. Reirei ao Berita aika Tabu 45:56–57; e kairaki ma katuruturuana.

8. “Ruon te aaoi e karekea teutana te aomwaimwai n tain naba te abuee, ao e kakawaki n unikakin aroka n aron te watermelon. Kaanin te tebo nakon taari, e rangi n tamaroa riki ibukin ruon te aaoi n te tairiki are akea iai te ang ngke a rikirake n mwaitoro te tabo nakon te eea ngke e kaitibo ma te tano. N arona, Taabo ake a kaan ma taari a karekea riki te aooi nakon are e reke i nuukan te aba; e rangi maiureirei te Maunga ae Carmel, are e karekea 250 te tairiki n aooi n teuana te ririki” (Efraim Orni and Elisha Efrat, Geography of Israel, 3rd rev. ed. [1971], 147).

9. Reirei ao Berita aika Tabu 128:19.

10. Motiaea 23:18.

11. Aramwa 37:6.

12. Mareko 4:38.

13. Iobi 17:15.

14. Ereman 5:40.

15. Iobi 28:12.

16. Moronaai 7:20.

17. Mwakuri 9:6.

18. Aramwa 15:6.

19. 2 Nibwaai 26:28.

20. Mataio 9:28.

21. Mwakuri 26:27.

22. Aramwa 5:15.

23. Karikan bwaai 18:25.

24. Moomon 6:17.

25. Ieremia 31:16– 17; e kairaki ma katuruturuana.

26. Taraa Camille N. Johnson, ““Kaoa Kristo Bwa E na Korea Am Karaki,”,” Riaona, Nobembwa. 2021, 82: “Karika te kakaitara ao te karawawata ake kanoan karaki aika a raraoi bwa ana kaaniko riki, ao n riki n ai aron, Iesu Kristo.”

27. 2 Nibwaai 31:20.

28. Taraa Reirei ao Berita aika a Tabu 84:38.

29. Taraa Aramwa 37:47.

30. 1 Betero 2:25.