Baika a Raka Aroia n te ka 193 ni Maungatabu ni Kabuta te Kauatai n te Ririki

Akea kaain ana kaintekateka Beretitenti Russell M. Nelson n tain te maungatabu ni kabuta, ma a rangi ni kimwareirei kaain te Ekaretia ni karekei ana taeka n reirei ao ana koaua aia burabeti ae 99 ana ririki ni maiu ni kabanean te tetere rinanon ana rongorongo are e kaman raweaki mai i mwaaina.

E taku Beretitenti Nelson bwa te maraki are e airi ma ikoakin nuukana n te tai ae nako e a tia ni karikirakea ana “karabwarabwa ibukin ana bwai n tangira Iesu Kristo ngke mate ibukin kamaiuara.” Ni kaungaakiia kaain te aro bwa a na “iangoa te tiretio” e tibwai bwaai ake e reiakin ibukin ana “baire ae moan te kororaoi” Tamara are i karawa:

“Aio te rongorongo ae kakukurei ibukin ana babaire te Atua: bwaai ake ko karaoi inanon te maiu ae mamate aika tamaroa mai iai a kona n titebo ma bwaai ake ko na karaoi inanon te maiu are akea tokina ni karekea te tamaroa mai iai!”
“Am rinerine n te bong aei e na bairei teniua bwaai: Am tabo ni maeka n te maiu are akea tokina, tein rabawatam ae na reke ngkana ko a manga kautaki, ao antai raom ake ko na maeka ma ngaiia n aki toki” (iteraniba 117).

E kaota ana koaua Beretitenti Dallin H. Oaks ibukin te karietaataki are a kakantaningaia aika a kakaonimaki Aika Itiaki (taraa iteraniba 26). E kaota ana koaua Beretitenti Henry B. Eyring ibukin ana kairi te Tamnei ae Raoiroi are e beritanaki nakoia Aika a Itiaki aika a tau (taraa iteraniba 92; taraa naba Unimwaane Stevenson, iteraniba 42). Ao e kaota ana koaua Beretitenti M. Russell Ballard ae moan te mwaakaroiroi iaon te Burabeti Iotebwa Timiti ao “tabena ae moan te kakannato n riki bwa te burabeti … ni koron boong n taina ae bwanin (iteraniba 74).

A anga reirei taan taetae n te maungatabu bwa ara rinerine aika a rang kabanea ni kakawaki n te maiu ae mamate e boboto i aon te Uea Iesu Kristo ao te ongotaeka nakon Ana tua, n ikotaki ma tuan te kabwianibwai (taraa Beretitenti Nelson ao Unimwaane Andersen, iteraniba 117 ao 32). A taku naba bwa ti kunea te kukurei, te kamarurungaki, ao te kantaninga rinanon te Tia Kamaiu ngkai ti waaki nako ni kawain te berita (taraa Unimwaane Bednar, Godoy, Choi, ao Cook, iteraniba 6, 16, 46, ao 82; Te Tari Newman, iteraniba 36; ao Titita Wright, Freeman, ao Runia, iteraniba 9, 76, ao 62) ao “kabwarabwara ni kaota ara motinnano n ara berita aika tabu n te toa nakon Iesu Kristo ao n tatabemaniira rinanon nakoara n te Ekaretia, iraorao, arora ni booibuako, ao ara mwakuri n ibuobuoki” (Unimwaane Gong, iteraniba 111).

A kaungaaki kaain te aro irouia taan kairiiri n te Ekaretia bwa a na kamwakura “te bwaintangira ae te rairannano” (Unimwaane Renlund, iteraniba 96; taraa naba Beretitenti Eyring ao Unimwaane Uchtdorf, iteraniba 92 ao 86). A taku bwa Kaokan te Euangkerio e karokoa te oota i aon “rikira mai ieta, rikira ni bwaibwai, ao ara konabwai” (Unimwaane Soares, iteraniba 70; taraa naba Unimwaane Phillips, Giraud-Carrier, ao Sabin, iteraniba 49, 114, ao 56). Ao a kauringiia Aika Itiaki “bwa a kainanoaki mitinare bwa na ikotiia Iteraera—ae riaon riki mwaitiia ake a beku,” ai moarara riki taanga ake a kara (Unimwaane Rasband, iteraniba 52; taraa naba Unimwaane Parrella, iteraniba 80).

Ni katanoataakin te baire ibukin katean 20 tembora aika a boou, e taku Beretitenti Nelson, “Am mwakuri ni ibuobuoki ao n nebonebo n te tembora e na buokiko n iangoa te abanuea ae te tiretio. (iteraniba 117; taraa naba Unimwaane Christofferson ao Esplin, iteraniba 19 ao 108).