Mwaakan Iesu Kristo ni Maiura ni Katoabong
Boton te korakora n ara onimaki bon iroun Iesu Kristo ngkai ti ukoria n roko Nakoina ni katoabong.
Tariu ao mwaaneu aika a tangira, aio bon Ana Ekaretia Iesu Kristo ibukiia Aika Itiaki ni Boong aika Kaitira. E kakukurei te ikotaki n Ana Ekaretia. I karabwarabwara ngkai e a tia ni kauringiira Beretitenti Russell M. Nelson bwa ti na kabongana aran ana Ekaretia te Uea ae eti n taai nako bwa ti aonga n ataia bwa antai ana Ekaretia aei ao antai ae reirei bwa ti na iriiria.
E a tia n taekina aio Beretitenti Nelson: “Ni boong aika i mwaira, ti na noori korakoran mwaakan te tia Kamaiu ae e tuai man nonoraki n te aonaaba. … E na karekei aanga aika bati, kakabwaia, ao kakai i aoia aika a kakaonimaki.”1
Teuana te kakabwaia ae korakora ibukiu ma kaainabau, Renee, bon kaitiboakira ma Aika a Itiaki n te tabo are ti beku iai. Ti ongo aia karaki, ti kakoaua n aika a bua mairouia, ti raonia n nanokawakia, ao ni kukurei n aia tokanikai. Ti kakoauai kakabwaia ao kakai aika a bati are e a tia ni katokaa i aoia aika a kakaonimaki te tia Kamaiu. Ti kaitibo ma aomata ake a tia n rinanon te kangaanga, ao n rinanon kangaanga aika a riao iangoaia.
Ti a tia n noora korakoran mwaakan te tia Kamaiu iroun te aine ae akea buuna are e mate n aia tai ni beku ibukin te Uea i Bolivia.2 Ti nooria naba iroun te ataeinaine i Argentina are e bwaka iaan te turein ao ni karika korean rangana, ibukina bwa e tangiria temanna in kimoaa ana tareboon.3 Ao iroun ana karo ae akea buuna, are e a manga kakorakoraa natina te aine i mwiin karaoan te mwakuri n akiako nakoina. Ti a tia n nooria naba irouia utu ake a bua mwengaia ao aia bwai ni kabane n tain te ai are e riki i Chile uabong i mwain te Kiritimati n 2022.4 Ti a tia n nooria irouia ake a rinanon kangaangan te raure ao ake a rinanon te bwainikirikaki n akea aia bure.
Tera ae anganiia te korakora n rinanon kangaangan akanne? Tera ae karekea nakoia te korakora ae raka ni waaki nako e ngae ngke e taraa ni bua bwaai mairouia?
I a tia ni kunea bwa te buoka n te korakora anne bon te onimaki iroun Iesu Kristo ngke bon mai inanona ti ukoria n roko Nakoina ni katoabong.
E reirei te burabeti Iakobwa, “Ao e a roko nakon te aonaba bwa e na kamaiuia aomata ni kabane ake a ongo ni bwanaana; bwa taraia, e a tia ni kammarakaki ibukiia aomata ni kabane, eng, ni marakiia bwaai ni kabane aika a maiu, n ai aroia mwaane, aine, ma ataei, aika kaain ana utu Atam.”5
N tabetai, karekean te onimaki iroun Iesu Kristo e konaa n taraa ni kangaanga, ni kangaanga iangoana. Ti kona ni iangoia bwa te roko nakon Kristo e kainnanoa te konamaki, te korakora, ao te kororaoi ae akea iroura, ao ti aki kona ni kunea te korakora ni karaoaia ni kabane. Ae I a tia n reiakinna mairouia aomata aikai ni kabane bwa onimakinan Iesu Kristo e karekea nakoira te korakora n waakin maiura. Ti konaa ni iango n tabetai, “I riai ni kanakoraoa maiu i mwain ae I nakon Iesu,” ma te koaua bwa ti roko nakon Iesu ni kanakoroi maiura irouna.
Ti aki nakon Iesu bwa ti kororaoi. Ti Nakoina ibukina bwa ti aki kororaoi ao ti konaa ni “kakororaoaki” irouna.6
Ti na kanga ni moana mwakurian te onimaki teutana ni katoabong? Irou e moanaki n te ingabong: Ngkana I uti, I tataro, nakon are N na taraa au tareboon. Te taroro ae tau. I mwiina I wareki koroboki aika tabu. E buokai aio ma au berita ae tabu ni katoa wiiki ake I karaoi ngke I kana te toa n “aki toki n ururingnga.”7 Ngkana I moana au bong ma te tataro ao koroboki aika a tabu, I konaa n “ururingnga” ngkana I tara naba au tareboon. I konaa n “Ururingnga” ngkana I kaaitarai kangaanga ao kamangaongao, ao I keiaki ni kaaitarai n ai aron Iesu.
Ngkana I “ururingnga,” I namakina te kan bitaki ae korakora, n raira nanou. I kunea te buoka n te korakora ni kaawakina au berita ae tabu, ao I namakina ana buoka te Tamnei ae Raoiroi ni maiu “ma ni kaawakin ana tua nako ake e a tia n [anganai]; bwa e aonga ni memena Tamneina [irou].”8 E buokai bwa N na teimatoa n uaa te toki.9 Ke i nanon kabanean te bong! Ao ni boong ake I mwaninga n ururingnga i nanon te bong ae bwanin, E bon mena ikekei, e tangirai ao n tuangai bwa e “TIKIRAOI; ko kona ni manga kataia riki ningaabong.”
E ngae ngke ti aki kororaoi n ururingana, e aki bua uringakira iroun Tamara are i Karawa ae tatangira.
Teuana mai ibuakon kaairua ae ti kakaraoia bon iangoan kaawakinan ara berita aika a tabu, ke berita ake ti karaoia ma te Atua, kanga te bwai ae e koreaki ae ti karaoia ma Ngaia: I ongotaeka, ao E kaawakinai man bwaai aika a na riki nakoiu aika a aki raraoi. I kabwakaa au kabwianibwai, ao e na bon aki bua au mwakuri ke n buee au auti n te ai. Ma ngkana e aki reke are ti kaantaningaia, ti tang nakon te Uea, “Ko aki mutiakinna ngkana I mate?”10
Ara berita bon tiaki ti baika a na karaoaki; a uota te bitaki ae tabwanin.11 Rinanon au berita I karekea te kaitiakaki, mwaakan Iesu Kristo ni kakorakora, are karikai bwa te aomata ae boou, ni kabwarai buure ake a kangaanga kabwarakiia, n tokanikai i aon aika a kangaanga. N ae bon nako mai inanom n ururingakin Iesu Kristo n taainako e mwaaka; e anganai te korakora ni “kaawakin ana tua ake e a tia n [anganai].”12 E buokai bwa N na tamaroa riki, n wiingare n akea bukina, n riki bwa te tia raoi,13 ni kariaia te Atua ni maiu.14
Ngkana a rangi ni korakora marakira ao marakin temanna ae ti tangiria n te aro are ti aaki kona, ururingan Iesu Kristo ao te roko Irouna e kona ni kabebetea rawawatara, karaui nanora, ao ni katoka te maraki. Aio te mwaaka are e angan te karo n riaon ana konaa i bon irouna ni boutokaa natina te aine rinanon te maraki man akean rangana teaina.
Ngke e kawaran Argentina Unimwaane Soares n Tuun ae nako ao n titirakina Flavia mwiin kabuanibwaina, e kaeka ma te onimaki n taku, “I rotaki n te aki rau, te un, ao te riribai ngke [e riki aio]. Te bwai ae buokai bon aei bwa N aki titiraki, ‘e aera bwa ngai?’ ma ‘bukin tera?’ … Aio te bwai ae E kaaniai riki nakoia tabeman ao te Uea. … Irarikin ae N aki kararoaai mai irouna, I riai n nim ma Ngaia.”15
E reirei Unimwaane Nelson: “Te kaniwanga ibukin kawakinan berita ma te Atua bon te mwaaka mai karawa—mwaaka are e kakorakoraira ni kaaitarai ara kangaanga, kariiri, ao ni kanakoraoi kainanon nanora. … Ngaia are, taan kawakin aia berita a na anganaki te motirawa.”16 Aio bon te motirawa ao te rau are I nooria ni matan te aine are akea buuna, irarikin kainnanon nanona are e namakinna n uringan buuna ni katoabong.
E tuangiira te Nu Tetamenti taekan te tai ngke e mena Iesu ma Ana reirei i aon te booti:
“Ao e roko te ang ae baibati, ao a bwaroa te boti nao. …
“Ao e … matu i aon te uninga: ao a kautia, ao a taku nako ina, Te tia Reirei, ko aki mutiakina matera?
“Ao e uti, ao e boa te ang, ao e taku nakon te nama, Raoi, bwaaka. …
“E taku nako ia, Kam aera ngkai kam maaku? ao e aera ngkai akea te onimaki i roumi?”17
E rangi n ananaaki nanou n te karaki aio. E kaantaningaia te Uea bwa ana kabonganaa aia onimaki ni katoka te buaka? Ni boaa te ang? Onimakinan Iesu Kristo bon namakinan te rau ni kaaitara te buaka, ataakina bwa ti na bon aki mate ibukina bwa raora Ngaia n te booti.
Aio te aeka n onimaki are ti nooria ngke ti kawariia utu i mwiin te urarake i Chile. A buee aia auti ni mannang; a bua aia bwai ni kabane. Ma ngke ti nakonako n taabo ake a tei ngkoa iai mweengaia ao ni karakina are a rinanona, ti namakinna bwa ti tei n te tano ae tabu. E taku temanna te aine nakon kaainabau, “Ngke I nooria bwa a buee auti ake a kaan ma au auti, I ataia bwa e na buee naba ara auti, ao ni bane ni bua ara bwai iai. Irarikin are N a namakina te nakonnano, I karekea namakinan te rau. N te aro teuana, I namakinna bwa a na bon NAKORAOI bwaai nako.” Onimakinan te Atua ao kaawakinan ara berita aika a tabu ma Ngaia e uota te korakora nakon mamaarara ao n karau nanora man korakaira.
I kakaaitau n reken te tai irou ma Renee n kaitibooaki ma aomata Aika a Itiaki aika a tamaroa, ibukin aia katooto ae bati n te onimaki, te korakora, ao te teimatoa n waaki rake. Karakin uruakin naaano ao korakai a na bon aki riki bwa karaki n toka ni moanbaan te nutibeebwa ke n aki butanako. Taamnein raanimata ake a bwaro ao tataro ake a karaoaki ake a aaki raweaki i mwiin buan te bwai ke aomata, ke te raure ae kauruakinano; ao n akean katokaakin taekaia aika a maaku, a rawawata, ao maraki ake a konaa ni kaaitaraaki bon te karabwarabwa nakon aia onimaki iroun Iesu Kristo ao Ana Mwakuri ni kamaiu. A kakorakoraa au onimaki aomata aikai, ao I rangi ni kakaitau n anne.
I ataia bwa aio ana Ekaretia Iesu Kristo. I ataia bwa E tei n tauraoi n anganiira Mwaakana ngkana ti nakoina ni katoabong. N aran Iesu Kristo, amen.