“Unimwaane Alexander Dushku,” Riaona, Nobembwa 2023.
Unimwaane Alexander Dushku
Mataniwi ni Kabuta n te Itingaun
Ana karo Unimwaane Alexander Dushku a kaaina te Ekaretia i Boston, Massachusetts, USA, i mwiin kawaran ana Kaotibwai te Aonaaba i New York City n 1964. E rangi n rootaki tamana n te tamnei n te bwai are e reiakinna ibukin te euangkerio n te maneaba are mwanenaki man te Ekaretia, ao e kaoiia mitinare bwa a na reireinna ao te aine are e nang riki bwa buuna.
A boou ana karo nakon te Ekaretia ngke e bungiaki, ma e taku Unimwaane Dushku bwa n taainako e ataia ae na bon nako ni karaoa ana mwakuri ni mitinare.
“Bon inanon te tai are I nako iai ni mitinare ae I a moanna ni mataata raoi ni mimitongin te mwakuri ni mitinare ao aron mwakakoroiroina,” e taku Unimwaane Dushku, are e beku i Portugal Lisbon Mission man 1986 nakon 1988. “A kaureaki matau n te aro ae bwanin nakon uean te Atua ao ae nanonaki raoi iai.”
E kakoaua Unimwaane Dushku bwa kaainakin te Ekaretia e rangi ni korakora bonganana ni karaoan te bitaki inanon te aonaaba.
“E ngae ngke e uarereke mwaitiia ara membwa, ma a bon rangi ni boongana ma ni korakora,” e taku. “Ti tataubai n mwananga ma Kristo. Imwiina ti ikarekebai n uaia n mwamwananga. Ti riki ngaira bwa bain ao bwanaan te Uea n tabekiarake ao ni kakorakoraia aomata.”
E bungiaki Alexander Dushku n Nobembwa 17, 1966, irouia Nicholas ao Donna Lee Dushku i Fairfield, California, USA. E mare Unimwaane Dushku ma Jennifer Burnham n 1988 n te Tembora i Salt Lake. Iai waniman natiia ao ruaman tibuia.
E reke ana beeba ae bubura Unimwaane Dushku n te economics mai Brigham Young University n 1990. E reke ana beeba n taokita ibukin te nakoa n rooia man mwakoron BYU ae J Reuben Clark Law Sschoo n 1993. E mwakuri n te kambwana n tua ibukiia te botanaomata are e bane nanona iai ao n riki bwa te kiraaka ibukin ana Boowi ae Rietaata Amerika ibukin te Mangatang n te Ka Itiua ni Mwakoro i mwaain mwakurina n ana kambwana n tua Kirton McConkie i Salt Lake City, ike e kabanea nanona i aon Moan Kaetan ana Karaotua Amerika ao inaomataia aaro.
E beku Unimwaane Dushku bwa te beretitenti n te titeiki n te tai are e weteaki iai. E a tia naba n riki bwa te bitiobi, kauntira ae rietaata, kauntira n te bitiobiriki, ao te beretitenti n te kooram n unimwaane.