Nanorinano ni Butimwaia ao Iriiria
Te nanorinano bon te kainibaaiare ae kakawaki ibukira n tauraoi n okira matan te Atua.
N te kanimaua ni mwakoro n Aramwa, te titiraki ae nano ae kateaki: “Kam kona n taekinna, ngkana kam a weteaki nakon te mate n te tai aio, i nanomi, bwa kam a tia n nanorinano n ae tau?”1 Te titiraki anne e katerea ae te nanorinano e kainanoaki ae e na iai ngkana ti na katauraoira n okira matan te Atua.
Ti bane n tataku bwa e tau nanorinanora, ma ara taneiai tabeua n te maiu aio ao ti noora, te mwaane ni kamoa ke te kamoa n aine bwa a maiu i nanora.
N ririki aika tia n nako, ngke a maeka ni mwengara natira aine ake uoman , I a iangoia bwa N na kairiia ma buu au tabo ni beku are I a tia n mwiokoaki bwa N na tararuaia man te kambwana are I mwakuri iai.
Oin raoi nanou bwa N na kaota te tabo nakoia ae, kaokoro ma mwengara, ao aomata iai a karaoi bwaai ake I tuangiia n aki titiraki bwa tera bukina. Ngke tia roko n mataroan te tabo, are e ukuki i bon irouna ngkana e roko au car, I a miimi n te tai aio bwa e aki uki. Ma, e a kaoti te tia tararua ae I aki nonoria mai i mwaina n tuangai bwa N na kaota au ID man te kambwana.
I tuangnga ae I aki kakainanoa kaotan au beebwa ni kanikinaa ngkana nna rin ma au kaa n te tabo aio ao I a titirakinna naba ma te titiraki ni kamoa are: “Ko ataia bwa antai ae ko taetae ma ngaia?”
Ao e kabooa, “Eng, ngkai akea am beebwa ni kanikinaa man te kambwana, ao I aki kona n ataia bwa antai ngkoe, ao ngkai I tei n te mataroa aio, ko aki kona n rin ikai n akea kawarabwarakim.”
I iangoa taraakin kiraatin te kaa n taraia natiu aine n te bwai are e a tia n riki, ma I ataia bwa a bane ni matakuakina ao noora te bwai are e a tia n riki! E ioioa atuuna buu mai irarikiu n kaota aki kukureina n arou aio. Au kabanea n anga ngkanne bwa N na kabwara au bure nakon te tia tei n tararua ao n tuanga bwa I rangi ni karautaeka ibukin au taetae nakoina ae rangi ni buakaka. E taku, “E bwara am bure,” ma n akean am beebwa n kanikinaa man te kambwana ao koaki kona n rin ngkai!”
I mwiina I karaurau n buti n okira mwengara bwa N na anaa au beebwa ni kinaaki, ao I karekea te reirei ae kakawaki: Bwa ngkana ti rineia bwa ti na aki nanorinano, ti na aitara ma te bwainrang.
N Taeka n Rabakau ao ti kunea, “E na karinanoa te aomata ana kainikatonga: ma ane nanorinano e na reke te karineaki I rouna.”2 N aron karekean te nanorinano, ti riai n oota raoi bwa tera nanona n ana kainibaire te euangkerio.
Tabeman aomata a kairiuruaa te nanonorinano ma bwaai tabeua n aron, te katooto, te maiu n kainano. Ma a mwaiti aika a kainano ma a nang kainikatonga ao a mwaiti naba aika kaubwai ma a nanorinano. Tabeman ake a mamaemae ke a kai bwara nanoia a kona n taraa n nanorinano mai tinanikuia ma nanoia e onrake n te kainikatonga.
Tera ngkane te nanorinano? N kaineti ma Tataekina Au Euangkerio, bon te “konabwai ni karaoa nanon te Atua. … E nang kai reiakinaki. … [Bon] mwakoron rikiraken tamneira ae kakawaki.”3
E bon rangi n mwaiti kawai nakoira aika ti kona iai n katamaroaa Anuan Kristo aio iroura. I tangiria n rinanon moa bwa nanorinanora ngaira, ke ae ti riai n kaotia, n irakinan aia reirei ara burabeti. Te kamwaninga ibukira n tatabemaniira e kangai:
-
Ti taetaekina aran te Ekaretia ae bwanin n ara mamaroro? E taekinna Beretitenti Nelson, “Kanakoan aran te Uea man ana Ekaretia te Uea bon te tokanikai ae korakora iroun Tatan.”4
-
Ti momoanibwaia te Atua n maiura man butimwaean aia kakao ara burabeti aika onoti? “N te bong aei I weteia ara membwa n taabo nako bwa a na katoki anua ao mwakuri ni karaoan te kakaokoroaki.”5
-
Ti totokanikai iaon te aonnaba, n onimakina riki ana reirei Kristo nakon aia koaua aomata, n aron are reireiniira ara burabeti?6
-
Ti a tia n riki bwa taan karekea te rau, n taetaekinan bwaai aika raraoi ao ibukiia aomata? E reireiniira Beretitenti Nelson n te maungatabu ni kabuta ae nako: “Ngkana iai te bwai ae raoiroi, ae kakateke, ke ae tamaroa rongorongona, ke e kamoamoaaki are ti kona n taekina rongorongon riki temanna te aomata—tao n taekinna ma ngaia ke n taekinna n te tabo ae raba—are e na riai n riki bwa ara kainibaire n te reitaki.”7
Aikai kaetieti aika bebete ma a korakora. Uringa, ni kabane ana aomata Moote ana kona n marurung ngkana a taraa te naeta are buraati are e tabekia rake.8 Ma “ibukina ngkai e beebete te kawai, ke e aki kaangaanga, ao a mwaiti ake a mate.”9
N te maungatabu aio ao ti a tia n ongo ao ti na teimatoa n ongo reirei aika a korakora mairouia ara burabeti ao abotoro. Bon te tai ae tamaroa ibukin karekean te nanorinano ao n katuki ara iango aika korakora n katokanikaia te koaua ae te Uea e taetae rinanoia ana taan kairiiri aika a tia n rineaki.
I aon bwaai ni kabane, ni karikirakean te nanorinano, ti riai n oota raoi man butimwaea ae tiaki kona n tokanikai i aon kataakira ni kabane ke n karekea bwaninin ara konabwai man oin ara mwakuri. Taan taetae ni kaunga nano, taan korokaraki, taan anga te kataneiei ao taan anga te katooto ni kabuta te aonnaba, moarara riki ake i aon te intanete, ana taekinna ae bwaai ni kabane e a nakoira ao ara mwakuri. Te aonnaba aio e kakoauaa ana mwakuri te rabwata.
Ma rinanon te euangkerio ae e a tia n kaokaki, ti reiakinna bwa ti kainanoa ana nanoanga Tamara i Karawa ao ana Mwakuri ni Kamaiu ara Tia Kamaiu Iesu Kristo, “bwa ti ataia bwa bon rinanon te akoi are ti kamaiuaki iai i mwiin bwaai ni kabane ake ti kona ni karaoi.”10 Ngaia anne bukina e rang kakawaki bwa ti na karaoi man kawakinii berita aika tabu ma te Atua, bwa man karaoan anne ao ti kona n karekea bwaninin ana kamaiu, mwakuri, ao mwaakan Iesu Kristo ae koraraoi rinanon Ana Mwakuri ni Kamaiu.
Iriran te bootaki n toa ni katoa wiiki ao te nebonebo n te tembora n taainako n ira buakon taian otenanti n karekei man kabouii berita aika tabu bon te kanikina bwa ti nora kainnanoan Tamara i Karawa ao ara Tia Kamaiu, Iesu Kristo. Anne ae e na kaoa Mwakaia nakon maeura ao n buokiira n kaitarai kangaanga ao n tokin te tai n kakoroa nanon karikara.
Tabeua te tai n nako e kataaki nanorinanou ao otau n kainanoan te Uea. I toka n te kaa n kaea te marae ni wanikiba bwa N na kakioa kibau ae uarereke nakon te tabo teuana ae iai te kangaanga ae riki iai ae kainanoa taobarakina. Te tia kabuta te kaa, tiaki kain te Ekaretia, e taraai man te kiraati ao e taku, “I kona n noria man taraakim bwa ko namakina te aoraki te bong aei!”
“Ko kona n noria?” I titiraki.
“Eng,” e taku. I mwiina e taekina aio, “Iai teim taraakim ae okoro!”
I kabwarabwara nakoina bwa iai te kangaanga ae I aitara ma ngaia, ao e titirakinai i mwiina, “Koa tia n kabanea korakoram n kataia n buoka taobarakina?”
I kaeka ae I a tia n kabanea au konaa.
I mwiina e taekina te bwai ae I aki konaa ni mwaninga: “Ao katikua i nanon bain te Atua, ao bwaai ni kabane a na nakoraoi.”
I rang tangiria n kan titirakinna , “Ko ataia bwa antai ae ko kakaraki ma ngaia?” Ma I aki! Te bwai ae I karaoia I kananorinanoai n tataro nakon te Uea i nanon kibaiu ae teuana te aoa maanna, n bubuti buokau mai ieta. Ngke I a ruo man te wanikiba, ao I a kunea bwa te kangaanga are N na buoka taobarakina e a reke ae riai iai ao e aki kainanoaki bwa N na karoko ikekei.
Tariu ma mwaneu, te tua, te kakao, ao te berita mairoun te Uea e mataata man karaunano: “Ko na nanorinano; ao te Uea ae Atuam e na kairiko ni baina, ao n anganiko kaekaan am tataro.”11
Tia bwaina te nanorinano n iriiri aia reirei ara burabeti ao n butimwaea ae ti te Atua ao Iesu Kristo aika kona n bitiira—rinanon otenati ao berita aika tabu aika karekeaki n Ana Ekaretia—nakon arora ae te kabanea n tamaroa n te maiu aio ao, te bong teuana, a kakororaoira iroun Kristo. N aran Iesu Kristo, amen.