Rongorongon te Ekaretia

Abotoro ao Burabeti a Buokiia Aika Itiaki ni Kabuta te Aonaaba

N te Bong ni Kabwarabure n te Aonaaba inanon Turai, Beretitenti Russell M. Nelson e tibwaua rongorongon te kabwarabure i aon bwaai ni kaongora. “Te kabwarabure tiaki te mwakuri ae karaoaki n teuana te tai ma bon te waaki ae reitinako karaoana are e kainnanoa te taotaonakinnano, te nanoanga ao n iai te atatai,” e taku. “N taainako ao e bon aki bebete kabwaraan aia bure naake a tia ni kammarakiko. Ko kona ni karekea te korakora mairoun Iesu Kristo.”

Beretitenti Dallin H. Oaks, Te Moan Kauntira n te Moan Beretitentii, e kaumakiia kairake n ikawai ni kabuta te aonaaba n tain te bootaki n taromauri ni Meei 21 bwa a na kateimatoa aia taratara ae akea tokina ngkai a borauakin kanoan boong aikai “taai aika a karawawata.”

“Tera nako kakaokorora n aron ana karikibwai Tamara are i Karawa, E tangiriira ni kabane, ao iai n nera inanon Ana babaire ni kukurei ae kororaoi ibukira ni kabane,” e taku Beretitenti Oaks. “Ti kaota ara tangira Nakoina man kawakinan Ana tua ao tangiraia natina.”

Beretitenti Henry B. Eyring, Kauoman ni Kauntira n te Moan Beretitentii, e kaungai nanoia Aika Itiaki ake a ira katabuan te Saratoga Springs Utah Tembora n Aokati 13 ni kaeka ma te onimaki ao te korakora nakon ana auti te Uea ae boou.

Kaain te Ekaretia “a anganaki te tembora ae boou aei bwa kanikinaean onimakinan te Uea … ao Ana onimaki bwa [a] na kaeka ma te onimaki ao te korakora,” e taku Beretitenti Eyring. “Te tembora aio bon te tabo are ko kona ni karekea riki mwaakan berita n te tembora aika tabu. E ataa nanom. E ataa nanom ni kan tabekakirake ao n riki bwa te aomata ae moan te raoiraoi riki—ngkai te aonaaba e a tabe n rikirake ni kakauntaeka ao ni bwaka.”

Ngkai kaain te aro a maroroakina ao n tibwaa te rongorongo ibukin Kaokan te Euangkerio, tabeman a na namakina koauan aia taeka, e taku Beretitenti M. Russell Ballard, Te Bonomwi ni Beretitenti n te Kooram n Abotoro n te Tengaun ma Uoman. “Te kabanea ni bwai ae moan te kamiimi n rongorongon te aonaaba e riki n te Buakonikai ae Tabu n 1820,” e taku. “E kaukaki karawa.”

N ana tai n taetae nakoia kaain te aro ao mitinare i Toronto, Ontario, n Eberi, e kaota ana koaua Beretitenti Ballard iaon weteakin Iotebwa Timiti bwa te burabeti. “Tao bon te bwai ae e ninianako rabwatana—man baun atuuna nakon toun waena—ngke e ongo bwanaan Tamara are i Karawa ni wetea arana, ‘Iotebwa, aio Natiu ae Tangiraki. Ongo Irouna!” [taraa Iotebwa Timiti—Rongorongo 1:17]. Bon anne ara rongorongo,” e tuangiia mitinare.

N Eberi, Unimwaane Dieter F. Uchtdorf e nako Buranti, Aikubita, ao Iteraera. E ira te bootaki n te toa i Aikubita, e taetae nakoia ataein te reirei n te Brigham Young University Jerusalem Center, ao ni kawarii taabo aika a tabu.

“Bon te namakin ae kakukurei ae riaon kabwarabwarakina ngkai E a tia te Uea ni karikai bwa temanna Ana reirei n te tai aei,” e taku. “E koaua, ti bon riai ni bane n riki bwa a na reirei, ao ti riai ni maiuakin berita aika tabu ake ti a tia ni karaoi.

“Ma rokou ikai ao ni kaota au kakoaua ngkai ngai ana reirei, n aroia Abotoro ake rimoa, bon te bwai ae kamaraua nanou ao n tabekairake nakon taabo aika a kangaanga aron iangoaia. Ao ma korakoran namakinan te nanorinano, I namakinna bwa e onimakinai te Uea n riki bwa te tia kakoaua Ibukina ao Arana. Ai bon kakukureira te nakonako n te tabo are a tia ni maeka ao n nakonako iai ara Abotoro aika a tangiraki.”

Unimwaane David A. Bednar e katabua manga kaboouan mweengan Iotebwa ao Emma Timiti i Kirtland, Ohio, n Aokati 26. E taetae Unimwaane Bednar nakoia kurubu n aomata ae kaania 300 mwaitiia, n ikotaki ma aomata aika a rine man taian komiunite ao taan kairiiri n aaro: “Te auti aei e bon riao riki kakawakina nakon ae te kateitei ae tangiraki ae kakaongora rongorongona. Te auti aei bon mweengaia ni koaua Iotebwa ao Emma Timiti—te tabo are a bane ni maeka iai n te tai ae maan i mwaain maten Iotebwa.”

Unimwaane Quentin L. Cook e taetae i Brigham Young University n tain ana Maungatabu ni katoa ririki ae karaoaki inanon Aokati. E taekinna bwa taan rabakau iaon rikiraken mwatain te iango a kaotia bwa karaoan te mwakuri ni mitinare e katauraoa waakin te nano n ikawai ibukin te reiakinaki are bon te katauraoi ibukin karekean te reirei are e rietaata.

E riaon riki uoua te katenimwakoro ataein te reirei ae BYU ake a tia ni mitinare, e taku Unimwaane Cook. “Ni kaeti ma aron te tiemeetita, anne e raka riki i aon 21,000 ake a bane aia tai ni rmitinare. Iangoa korakoraia ataein te reirei ae BYU are a uouotia ni kabuta te aonaaba. Ibukin anne, iangoia bwa a kanga baike a tia n rinanona inanon aia tai ni mitinare ni kakorakora te tabo ibukin te reiakinaki n te tabo n reirei.”

N ana tai ni mwananga nako Nu Tiran ao Aotiteria inanon Meei, Unimwaane D. Todd Christofferson e kaoiia Aika Itiaki i Nu Tiran bwa a na katauraoiia ibukin katabuan te Tembora i Auckland n 2024 bwa a na kona riki n tabu ao n riki n aron Kristo.

E kaoiia bwa a na titirakiniia i bon irouia, “Tera ae I kona ni karaoia ae na kona ni karikai bwa te aomata ae tabu, te angabwai ae tamaroa ao te bwaintanigra ae boni ngai n anga nako matan te Uea ni bongin te katabu anne?”

Uniwaane Neil L. Andersen e kaota koauan Iesu Kristo n tain karaoan tabena n nakona nako Atia. “N au taneiai ngkai I riki bwa ana Abotoro te Uea e a tia n anganai te kakoaua bwa Iesu bon te Kristo ao E kaira Ana mwakuri i aon te aba rinanon Ana burabeti ao rinanoia Ana Abotoro,” e taku. E mena Unimwaane Andersen n ana Aono te Ekaretia i Atia Meang bwa e na kaitibo ao ni buokiia Aika itiaki i aon Korea, Mongolia, ao Tiaban.

N Eberi 22, Unimwaane Ronald A. Rasband e kaitibo ma te bonomwi ni beretitenti i Aberika Maiaki, Paul Mashatile, te kauoman ni bonomwi iroun te beretitenti i Aberika Maiaki. Aio kanikinaean te tai are e kaitibo iai te tia kairiiri n te Ekaretia ma te aobitia man te tautaeka ae e maan n te nakoa i Aberika Maiaki.

Taan kairiiri aikai a kauring i aon tabeua kawai ike e a tia ni ibuobuoki iai te Ekaretia ni katoki kainnanoia te botanaomata ao ni kakorakoraia aomata mai Aberika Maiaki, n te mwaiti ni mwane ae R240 te mirion ( i aon mwanen US $13 te mirion) te mwaiti ibukin waaki ni ibuobuoki n 2018. Angamwane aikai a karinanaki ni katokan kangaanga aika a karina ibukin te boutoka ma karinakin kataumwane ni kamwakuri ibukiia te roronrikirake, kateimatoaan burokuraem ibukin te ununiki, mwakuri ni bangaomata ao n iowawa nakon te aomata.

E taku Unimwaane Rasband bwa n ana kantaninga kekeiaki aikai a kaotia bwa te Ekaretia e mena “ikai inanon te tai ae maan. Ti karaoa aio n ira ana tua te Atua aika uoua aika moan te korakora bwa ti na tangira te Atua ao n tangiriia aomata nako.”

Inanon mwanangana n Tebetembwa nako Iceland, Scotland, ao Engiran, Unimwaane Gary E. Stevenson e katuruturua te bwai ae a riai ni karaoia Aika Itiaki bwa e na “ti teuana nanoia ao teuana aia iango” (Mote 7:18) ma “te maiu ae boboto i aon Iesu Kristo,” ni karaoa aia kabanea ni kona n Iriiria. N raonaki iroun kainnabana, ae Lesa, e mwananga Unimwaane Stevenson nako Reykjavik, Iceland, n Tebetembwa 7 i mwaain nakona nako Edinburgh, Scotland, ao Northampton, Engiran, n Tebetembwa 9–10.

N te bootaki n taromauri n te Marriott Tienta n tain ana wiiki n reirei Brigham Young University n Aokati 22, Unimwaane Dale G. Renlund e anga ana kabwarabwara ae moan te nano iaon irekereken te kamatebwai, te iango, ao te onimaki n uaia ni mwakuri ni kabebetea reken te kaotioti. Ngkana a katukaki bon ti ngaiia, te kamatebwai, te iango, ao te onimaki a na aki kona n onimakinaki, e reirei Unimwaane Renlund. Bwaai aika teniua aikai a riai n ikarekebai ni mwakuri.

“Te onimaki ‘are akea ana mwakuri’ [Iakobo 2:20] e aki kona n rikirake i bon irouna. E na rikirake te onimaki man kamatebwaiana ma taraakin nanona, n raonaki ma tabeua riki mwakuri n tamnei. N raonaki ma aei, te kamatebwai, te iango, ao te onimaki bon bwaai aika a riai ni karaoaki nanoia tiaki ti ibukin karekean oin am kaotioti ma karekean kaotaakim n te kaotioti anne.”

N Tuun 15, Unimwaane Gerrit W. Gong e kaitibo ma Teuae e Kinaaki ae Sheik Osman Nuhu Sharubutu, te Mataniwi n Imam n te Aro ni Muslim n te Aba ao te Grand Mufti man te Republic of Ghana. E karaoaki te boowi aio n ana tabo ni maeka te Grand Mufti i Accra.

E tibwaia Unimwaane Gong bwa e kanga Ana Ekaretia Iesu Kristo ibukiia Aika Itiaki ni Boong aika Kaitira n ataa kakawakiia ara moan karo, Atam ao Nei Ewa: n aroia naba tenaan Muslim: “Ngaira, naba, ti kakoaua bwa ti roko mairouia ara karo aika titebo ao n riai ni maeka inanon te rau kanga teuana te utu.” E taekinna Unimwaane Gong bwa ti kairaki mairoun ana burabeti te Atua, ae Beretitenti Russell M. Nelson, ae bon titebo raoi ana reirei ma naake kain te Imam. “E reireiniira ara burabeti bwa ti na kariaia te Atua bwa e na tautaekani maiura, e reireiniira bwa ti riai n riki bwa taan karaoa te rau, e reireiniira bwa ti riai ni buokiia ara roronrikirake bwa a na karekea te reirei ao te kataneiai bwa aonga n tokanikai inanon maiuia, ao e reireiniira bwa ti na kakorakoraia aine ao te roro ae rikirake. Aikai bwaai ni kabane ake I ongo mairoumi n te bong aei.”

Unimwaane Ulisses Soares e karaoa mwanangana ae 10-te bong maanna nako Chile, Uruguay, ao Argentina inanon Tuun. N ana tai i Argentina e irianaki ma ana marooro n tain te maungatabu ibukiia aaro aika a kakaokoro, ana intawiu ma te tia kareke rongorongo ae kinaaki mai Argentina, ao ana mwakuri n ibuobuoki nakoia kaain te Ekaretia.

“E moanaki te rau ma te karinerine ibukin katiteboan temanna ma temanna,” Unimwaane Soares e tuangiia naake a roko n ira ana Bwabwaro te Aonaaba ibukin Bootaki n Aro ao Te Kakarabakau Imarenaia Kurubu n Aomata ma Katei aika a Kakaokoro i Buenos Aires. “Te iango ibukin kinaakin ma karinean te aomata e bon kakaokoro man te katei teuana nakon teuana, ma e teimatoa ni mwakuri n te aonaaba ae rangi ni waekoa ni ibitaki. Inaomatan te aomata e kamaraua te aki boraoi n aron te tibwanga, kaubwai, ao te tai ni kabwaia. Ao inaomata akanne a riai ni kamwakuraki n taabo nako.”