Taari Mwane ao Aine i nanon Kristo
Ti na kukurei ibukin te reitaki n tamnei are e reke i marenara ao n kamanenai anua n maiu ao bwaai n tituaraoi ake ti karekei.
Raou aika kam tangiraki, e rangi n tikiraoi ara tetere n te maungatabu n te bong aei. Ti bane n namakina Tamnein te Uea ao Ana tangira rinanon taian reirei ake a tibwaaki irouia ara mataniwi. I namakina te kukurei ngkai I riki bwa te kabanea n tia taetae n te tetere n te tairaki aei. I tataro bwa e na teimatoa n raoniira Tamnein te Uea ngkai ti ikotaki ni kukurei n ai aroia n koaua taari mwaane ao aine inanon Kristo.
E taku, ara burabeti ae tangiraki, Russel M. Nelson: “I wetei ngkami kain te ekaretia ni kabane bwa kam na kitana te anua ni kairiribai ao te inanonano. I bubuti ngkami bwa kam na kaota te banna ni karinerine nakoia natin te Atua ni kabane.”1 Ngkai e tabe n rikirake te ekaretia ni kabuta te aonnaba, ara ongeaba nakon ana kakao ara burabeti bon te bwai ae rang kakawaki ibukin katean abanuean ara Tia Kamaiu i aon te aba ni kabuta.
E reireiniira ana euangkerio Iesu Kristo bwa ngaira natin tamara are i karawa n tamnei ao e rang tangiriira2 ao ti maeka bwa utu ngaira i matan te Atua i mwain ae ti bungiaki nako aon te aba. E reirei naba te euangkerio bwa ti bane ni karikaki ni katotongan te Atua.3 Ma, a bane n titebo arora ni kabane i matana,4 bwa E “katiteuanaia mwaane [ao aine] ni kabane i aon te aba ni kabutaa n ti teuana te rara.”5 Ma, ti bane n ni kona n riki n ai arona, ni bwaibwai, ao ara konabwai, bwa bon ti “temanna te Atua ae Tamara ni kabane, Are bon ngaia moan te rietata, i aon bwaai nako, ao i [ aora] ni kabane.”6
Ngkai ana reirei Kristo ngaira, ti kaoaki bwa ti na karikirakea ara onimaki, ao ara tangira ibukia, tarira ao mwanera man te kokoaua i nanora ao n ikoikotia i nanon te bonnano ma te tangira, n aki kakaokoroaki, ao ni katea bannan te karinerine nakoia natin te Atua.7
Tiaki raoi anne te bwai ae a tia n namakinna ana aomata Nibwaai i nanon te maan ae kaania uoua te tienture i mwiin rokon Iesu ni karaoa ana mwakuri ni ibuobuoki nakoia?
“Ao e koaua bwa bon akea riki te botanaomata n ai aroia ae a kukurei i buakoia aomata nako ake a karikaki ni bain te Atua. …
Ao akea naba Reimwanaite, ke aekan reeti riki n aomata; ma a katiteuanaaki, natin Kristo, ao taan bwaibwai n uean te Atua.
Ao ai kakabwaiara ngaiia!8
E karababa riki ni kabwarabwara beretitenti Nelson kakawakin arora ni bwaina te karinerine nakoia aomata ngke e taekinna bwa: “E weteira te tia Karikibwai bwa ti na kitana te anua ni kairiribai ao te inanonano nakoia natin te Atua ni kabane. Ane iai mai buakora are iai irouna te inanonano nakon te reeti teuana e riai n raira nanona! … Bon tabera ngaira n tatabemaniira nako bwa ti na karaoa ara kabanea ni kona n kateimatoai anuara ni karinerine nakoia natin te Atua n te aonaaba aei.”9 N te maiu, aroia aomata ni bwaina te karinerine bon man tarakia aomata n aroia ae kaokoro.10
Ngkana ti iangoia bwa tera te bwai ae na katiteuanaira ma te Atua ngaira aika natina, ana taetae ni burabeti n kakairi Beretitenti Nelson bwa ti riai n aki maaku ni katea te buriiti nakon katean te oo n inanonano ao ni kakaokoroaki i marenara.11 Ma, e kauring Bauro nakoia I-Ebeto, bwa ngkana ti kan tokanikai i aon aei, ao e riai iroun temanna ao ngaira n kekeiaki ni maiu n aki kainikatonga, n nanorinano, ao n raraoma nakoia aomata.12
Iai te karaki ae bon rongorongon te tia reirei ae te Iutaia ngke e rang ni kukurei n te moaningabong teuana ma uoman raoraona. Ao e titirakinia ni kangai, “Kam kanga n ataia bwa e toki korakoran te tairiki, ao ni manga roko te bong ae boou?”
Temanna mai ibuakoia e kaeka, “Ngkana ko taraa mainiku ao ko kona n kinaa riki te tiibu nakon te kooti.”
Are temanna e a manga kaeka, “Ngkana ko taraa te oraitan ao kona n kiina riki te kai ae te oriwa nakon te kai te biiku.”
A manga uaia n rairaki nakon te tia reirei ao n titirakinna naba te titiraki anne. I mwiin te tai ae maan n iango, ao e a kaeka, “Ngkana ko taraa mainiku ao n noora kabaangin te aine ke te mwaane ao ko kangai,‘Neiei bon mwaneu; ao teuaei bon tariu.’”13
Raou aika kam tangiraki, I taekinna nakoimi bwa otan te bong ae boou e bon kaotai nanora ao maiura bwa ti na kona n nooria ao n karineia aomata ai aroia taari ao mwaane ni koaua i nanon Kristo.
I nanon Ana tai ni mwakuri Iesu i aon te aba, e kaota maiuakinan te reirei aei ae kororaoi ngke E “karaoi waaki aika a raraoi”14 nakoia aomata ni kabane, n kaoiia bwa a na roko nakoina ao ni katoonga Raoiroina n aki kakaokoroaki, bwa e kaubwai ke kainnao, ke aron te katei. E kawariia, ni kamaiuia, ao n tauraoi n taainako nakon kainanoia aomata, riki naake a kaokoroaki, katinanikuaki, ke n kabaneaki. Ao akea ae totokoia ma E katitebooi arora ni kabane ao n tangiriira, bwa E noriia bwa tarina ao mwanena, naati iroun te Tama ae ti temanna aika mwaane ao aine.15
Teuana te bwai ae riki n te tai anne ngke e mwanaga te Tia Kamaiu nako Kariraia, e mwananga n rinanon te kaawa ae Tamaria.16 Ngkanne e a iangoia Iesu bwa e na motirawa i etan ana mwaniba Iakobwa. Ngke e mena ikekei, e roko bwa e na itiran te aine ae te I-Tamaria. E taetae, Iesu, nakoina, “Anganai te ran bwa N na mooi.”17
E kubanako te aine aei ngke te Iutaia e a bubutia te I-Tamaria ana ibuobuoki ao n taetae, ni kangai, “Ko aera ngkai Ko butiai nimam, ngkai te I-Iutaia Ngkoe, ao ngai ainen Tamaria? Bwa a aki iraorao I-Iutaia ma I-Tamaria.”18
Ma e roko Iesu, bwa e na kamaunanakoa te katei ni kairiribai i marenaia I-Tamaria ao Iutaia, e reirei ma te tangira nakon te aine aei, ao ni buokia n ataia bwa antai raoi Ngaia, bwa bon, te Mesia, are na kaotii bwaai ni bane ao are e a kaman kariariaa rokona.19 E rotaki te aine aei n ana reirei Iesu ao e biri n nako ni katanoataa nakoia aomata n te kaawa te bwai ae e riki, ao n taku, “naaka tiaki aio te Kristo?”20
E korakora au nanoanga nakoia naake a kaokoroaki ibukin aroia, a katinanikuaki, ke ni bwainikirinaki irouia taan inanonano, ibukina, bwa i nanon maiu, ao I a tia n noora te rawawataia aomata aika raoiroi ibukin motikakin taekaia ke ni katinanikuaki ibukin kangaangan aia taetae, taraakia, ke maiuia ae kaokoro. I namakina te rawawata i nanou ibukia aomata ake a tiku n te rotongtong, ake a aki kona ni karababaa aia taratara, ao ake a tiku ni matoatoa ibukin aia koaua ni karinanoakiia naake a kaokoro ma ngaiia. Aia taratara ae memeere i aoia ake tabeman e bon tuuka aroia n nooria ao n ataia bwa bon ngaiia natin te Atua.
N aron are e a tia n taekinaki irouian ara burabeti, ti maeka i nanon te bong ni kakatauraoi i mwain Rokon Kaua riki te Tia Kamaiu.21 E tabe ni maabubu te aonaaba man te taratara ae kaokoro, e korakora te ikaikawii n te reeti, tautaeka, ao rabwata riki tabeua. Te kaokoroaki aio e kona n roota maiuia aomata n tabetai ao n ibitaki anuaia nakoia rao ake tabeman. Man aio, e aki nonoraki aroia aomata ni bita aron tein te iango, mwakuri, ao tataekinan aron kateia tabeman, reeti, ao ni katinanikuaia I-Abatera, ni kabonganai iango aika a karioaki, aika a kairua, ao iango ni kakaitara, ni kauekea te anua ni kakaniko, kakaokoroaki, akean te karinerine, ao te inanonano nakoia aomata. Anua ni maiu aikai bon wakaan te kainikatonga, te kamoamoa, te bakantang, anua ni kan bwaibwai,22 anua ake a kaitara ma anuan maiun Kristo. Te waaki aio e bon aki riai bwa e na karaoaki irouia naake a kekeiaki bwa na riki bwa Ana reirei ni koaua Iesu.23 Ni koauana, tariu ao mwaneu, bon akea nnen iango ke mwakuri n inanonano n aia komiuniti aika itiaki.
Ngkai naati mwaane ao aine ngaira n te berita ae tabu, ti kona n ibuobuoki ni katoki anua aikai man taraakin te kaokoro are e riki i marenara ma matan te Tia Kamaiu24 ao man bwaai naba ake ti taneiai i nanona—kinakira mai karawa ao n ara reitaki. E ngae n anne, ti kona n bon betiraoi n ara iango, ara kantaninga, n kainanora, ao n rawawataia kain rarikira. Ngaira bon natin te Atua aika taan borau n te maiu aei, titebo arora n ara tai n bwaka ao n ara iango ni uaiakina te rikirake. Ti kaoaki bwa ti na uaia ni mwananga, ma te rau, ma nanora aika kaonaki n tangiran te Atua ma aomata ni kabane—ke, n aron are e taekinna Abraham Lincoln, “ma tiaki te riribai nakon te aakea ao te tangira ae kororaoi nakoia ni kabane.”25
Ko a tia n bon iangoia bwa e na kanga reirei ni karinean aroia aomata ma te katiteuanaaki n irekereke ma arora n oneira i nanon ana auti te Uea? Ti bane n nakon te tembora bwa ti aonga ni katiteuanaaki ao ni kaonaki ma te kantaninga ae tina riki ni kororaoi ao tabu ngkana ti maeka Inanon mimitongina. Ti oneira n te mainaina, ti bane ni butimwaeaki iroun te Uea bwa Natina aika e tangiriia, mwaane ao aine a tei ibukin te Atua, ao bon ngaira bon kanoan Kristo.26 Ti karabwarabwa bwa titebo te otenanti ae ti karaoia, ma berita aika tabu ake ti karaoi, ao n kekeiaki bwa ti na maiu i nanon te mimitong n ai arona, ao ni karekei naba berita ake a tia ni beritanaki ibukin te maiu are akea tokina. Katiteuanaaki n te iango, ti noorira ma te taratara ae boou, n riki bwa ti teuana ngkami, Ti na kukurei bwa ngaira nati mai karawa aika a onoti iroun te Atua.
E aki maan nako I kairiia aomata aika kakanato ao taan mwakuri n te tautaeka tain kaukan ana tembora Brazil. I tiku ma te kauoman n beretitenti mai Brazil n te ruu n onoono, ao ni marooroakina kunikai mainaina ake a bwabwainaki irouia aomata i nanon te tembora. I kabwarabwara nakoina bwa kabonganaan kunikai mainaina aikai bon kanikinaean arora ae titebo ma te Atua ao bwa, i nanon te tembora, kinaakira bwa te kauoman n beretitenti n te aba ke taan kairiiri n te ekaretia ti bane n titebo bwa ngaira natin Tamara are i Karawa ae tatangira.
Te karaanga ae Iguazu e buti nako maiakin Brazil ao n toki n te tabuki are e a karika te bwaro n ran ae kinaaki n te aonaaba ae te Iguaçú Falls—teuana mai ibuakon ana karikibwai te Atua ae moan te tikiraoi ao n kakamataku, n karikaki bwa te ka-itiua ni kamimi n te aonaaba. Mwaitin te ran are e biri nakon karaanga n ran ao ni manga tibwaia nako, are e a manga karekea riki bubua bwaro n ran aika a mwaangaanga nako. I taetae ni kabotau, bwa aron butin ma birinirin te bwaro n ran bon kaotaaia ana utu te Atua ake a mena i aon te aba, bwa ti tibwai maiun tamneira ao kaubwaira, ni karekea te bonnano ao te bwaibwai i karawa. Ma, ngaira n tatabemaniira ti roko ma katei aika a okoro, n ara reeti, abara, kaokoron ara iango, taneiai, ao ara namakin. Katinanikuan anne, ti waaki nako, bwa natin te Atua ao taari mwaane ao aine i nanon Kristo, n aki bua reitakira n tamnei, are e a kaokoroira bwa aomata aika ti tatangiraki n ara komiuniti.27
Tariu ao mwaneu aika kam tangiraki, ke ti booti nanora ma ara iango ma te wanawana ao kakoaua bwa bon titebo ngaira i matan te Atua, bwa ti bane n entaute ma korakorara mai karawa ao rikiara. Ti na kukurei ibukin te reitaki n tamnei are e reke i marenara ao n kamanenai anua n maiu ao bwaai n tituaraoi ake ti karekei. Ngkana ti karaoi baikai, I berita nakoim bwa ti na bon rikirake i bon iroura, n ai aron te bwaro n ran are Iguaçú Falls, n aki kabua ara reitaki mai i karawa are na kaota iai kaokorora, “natin Kristo, ao taan bwaibwai naba i abanuean te Atua.”28
I kakoaua nakoimi bwa ngkana ti teimatoa ni buti te kawai aei n maiura, e na roko te bong ae boou ma oota ae boou are e na kaotai nanora ao n tauraoi ni butimwaei tibwanga aika kakawaki, ao n kakabwaiaki man, kakaokoron ana karikibwai te Atua ibuakoia Natina.29 Ti na riki ni koaua bwa bwaai ni mwakuri n baina ao n kaotiota te banna ni karinerine ibuakoia ni kabane Natina mwaane ao aine. E maiu te Atua. Iesu bon te Tia Kamaiua te aonnaba. Beretitenti Nelson bon ana burabeti te Atua n ara bong aei. I kakoauai koaua aikai n aran Iesu Kristo ae tabu, amen.