2023
Koaua Aika Akea Tokiia
Nobembwa 2023
10:40

Koaua Aika Akea Tokiia

Iroun Unimwaane John C. Pingree Jr.

Man te Itingaun

Kainanora ibukin kan kinaakin te koaua bon te bwai ae rang kakaawaki!

Tariu ao mwaaneu, kam rabwa ibukin ami kakaonimaki nakon te Atua te Tama ao Natina, Iesu Kristo, ao kam rabwa ibukin ami tangira ao ami ibuobuoki i marenami. Kam rang tamaroa!

Moantaeka

I mwiin karekean te wewete nakoiu ma kainnabau bwa ti na beku bwa taan kairiiri n te mition ae bwanin taina, ti nanomatoa n ara utu n reiakina araia mitinare n tatabemaniia i mwain rokoia n te tabo ni mitinare. Ti karekei tamnei, karaoi kaati ni kauring, ao ni waaki ni kamatebwaia ao ni kamamatei araia.

N te tai are ti roko iai, ti karaoa te maungatabu ni kaotiara ma mitinare. Ngke ti mena ibuakoia, I ongo bwanaan natiu ae ruaiwa ana ririki.

“I kakukurei te kaitibo ma ngkoe, Sam!”

“Rachel, kain ia ngkoe?”

“Aue, David, ko rang abwabwaki!”

Ma te aki rau irou, I nakon natira te mwane ao n wirikiriki, “Ei, uringnga n weteia mitinare bwa Elder ke Titita.”

E taraai ma te nanououa man taku, “Dad, I taku bwa ti na kamatei araia.” E karaoa ae taku bwa e eti natira ni kaineti ma mataatana.

Ngaia are, tera otara n te koaua n te aonaaba ni boong aikai? Ti buakanaki ma taian iango ma koaua aika bati, ribooti aika inanonano, ao rongorongo aika aki raoi bwanin. N te tai naba anne, karekean ao mwaitin rongorongo a rang baiti rikirakeia. Kainanora ibukin kan ataakin te koaua e bon rang korakora kakawakina!

Koaua a bon rang kakawaki iroura ibukin katean ao kakorakorakin te reitaki ma te Atua, karekean te rau ma te kimwareirei, ao n atai ara konabwai mai i karawa. N te bong aei, ti na iangoi titiraki aikai:

  • Tera te koaua, ao bukin tera e kakawaki?

  • Ti na kanga n kunea te koaua?

  • Ngkana ti kunea te koaua, ti na kanga n tibwauaia?

Akea tokin te Koaua

E reirei nakoira te Uea i nanon koroboki aika tabu bwa, “te Koaua bon te atatai ni bwaai n aroia ngkai, ao n aroia ngkoa, ao n aroia n taai aika a na roko” (Reirei ao Berita aika Tabu 93:24). E “bon karikaki ao ni karaoaki” (Reirei ao Berita aika Tabu 93:29) bwa e na “akea tokina” (Reirei ao Berita aika Tabu 88:66).1 Te koaua ae bwanin, e matoatoa, ao n aki kona ni bitaki. N taekana teuana, akea tokin te koaua.2

E buokira te koaua n totokoi iango ni mwamwanaea te aba,3 n ataa te raoiroi ma te buakaka,4 karekea te kamanoaki,5 ao n kunea te mweraoi ma te kamaiuaki.6 Te koaua e kona naba ni kairira ni bwaai aika ti karaoi,7 ni kainaomataira,8 kaitiakiira,9 ao ni kairiira nakon te maiu ae akea tokina.10

E Kaoti Koaua aika Akea Tokiia te Atua

E kaoti koaua aika akea tokiia te Atua nakoira rinanon te reitaki ma Ngaia n te kaotioti ma bon ngaia, Iesu Kristo, te Tamnei ae Raoiroi, burabeti, ao ai bon nakoira. Tina kabwarabwara te kaokoro ma te aro n tabeia naake a irekereke ma te waaki aio.

Te moan, te Atua bon ngaia boton koaua aika akea tookia.11 Ngaia ma Natina, Iesu Kristo,12 a katiteuanaaki n otaia ae kororaoi n te koaua ao a mwakuri n tainako ni booraoi ma koauan reirei ao tua.13 N te mwaaka aio ao e anganiia te kona ni karaoa ao n tautaekana te aonaaba14 n aron naba ae a na tangiriiira, kairiira, ao n ribanaira n te aro ae kororaoi ngaira n tatabemaniira nako.15 A tangiriira bwa ti na matata ao ni maiuna te koaua bwa ti na kona ni kimwareirei ni kakabwaia ake A karaoi.16 A anga te koaua nakoia aomata ke, n are e taneiai riki te aba iai rinanoia taan ua rongorongo n ai aron te Tamnei ae Raoiroi, anera, ke burabeti aika maiu.

Te kauoua, e kaoti koauan bwaai ni kabane te Tamnei ae Raoiroi.17 E kaoti koaua aika a kaineti nakoira ao kakoauaan koaua ake a reiakinaki irouia aomata. Iango mai iroun te tamnei a na roko n ara iango ao n namakinna i nanora.18

Te kaaua, a karekea te koaua ara burabeti mai iroun te Atua ao n tibwaia nakoira n tatabemaniira.19 Ti reiakina te koaua mai irouia burabeti ake ngkoa i nanon koroboki aika tabu20 ao mai irouia naba ara burabeti aika a maiu n tain te maungatabu ni kabuta ao ai bon kawai riki n reitaki tabeua.

Te kabanea ngkanne, Ngai ma ngkoe iai tabera ae rang kakawaki n te mwakuri aei. Te Atua e kantaningaira bwa ti na ukeuken, ni kinna, ao ni kamwakura te koaua. Ara konabwai ni karekei ao ni karaoi koaua e a oioi iaon korakoran ara reitaki ma te Tama ao te Nati, arora ni karaoi ana wirikiriki te Tamnei ae Raoiroi, ao kairakira irouia ara burabeti ni boong aika kaitira.

Ti riai n uringnga bwa Tatan e mwakuri ni kararoaira man te koaua. E ataia bwa n akea te koaua, ti aki kona ni karekea te maiu ae akea tokina. E karekerekei koaua ma rabakaun te aonaaba ni kaminoira ao ni kararoaira man ara reitaki ma te Atua.21

Ukoukoura, Kinaa, ao Mwakuria te Koaua ae Akea Tokina

Ngkai ti ukoukora te koaua ae akea tokina,22 titiraki aika uoua a kona ni buokiira ni kina bwa te reirei e roko mairoun te Atua ke man te tabo teuana:

  • Te kaantaninga are e reiakinaki e botau ma are a koreaki ni booki aika tabu ke n taekinaki irouia burabeti aika maiu?

  • Te kaantaninga anne e kamatoaaki ao n kakoauaaki iroun te Tamnei ae Raoiroi?

E kaotii reirei aika a koaua te Atua rinanoia burabeti, ao e kamatoai koaua akanne nakoira n tatabemaniira te Tamnei ae Raoiroi ao ni buokiira bwa ti na maiuakin.23 Ti riai n ukeuke ao ni katauraoira bwa ti na karekei namakin tamnei aikai ngkana a kaoti.24 Ti na kona ni karekea ana kakoaua te Tamnei ngkana ti bwaina te nanorinano,25 tataro ma nanora ao ni kamatebwaia ana taeka te Atua,26 ao ni kawakin Ana tua.27

N te tai are e kamatoa te koaua nakoira te Tamnei ae Raoiroi, e a korakora riki ootara ngkai ti kamwakura te reirei anne. Ngkana ti reitinako ni maiuakin reirei akanne, ti na karekea te atatai ae matoa n te koaua anne.28

Te katotoo, I a tia ni karaoa te kairua ao n namakina te nanokawaki man rinerine aika kabwaka. Ma rinanon te tataro, kamatebwai, ao onimakinan Iesu Kristo, I karekea te kakoaua n te reirei i aon te rairannano.29 Ngkai I reitinako n rairannano, e rikirake ni matoa otau n te rairannano. I namakinna bwa I a kaan ma te Atua ao Natina. I ataia ngkai bwa e kona ni kabwaraaki bure rinanon Iesu Kristo, ibukina I a namakina te kakabwaia man karaoan au rairannano ni katoa bong.30

Onimakinan te Atua I mwain Ae Kaoti Koaua Aika Raba

Ngkanne, tera ae ti riai ni karaoia ibukin ukoran koaua aika raba mai iroura? Iai au namakin ae korakora ibukia naake a teimatoa n ukoukori kaeka ake a bon taraa n aki kona n roko kaekaia.

E reirei te Uea, nakon Iotebwa Timiti, “Tai kakarongoa ni karokoa I nooria bwa e a kona ni kaotaki bwaai ni kabane … ni kaineti ma aio” (Reirei ao Berita aika Tabu 10:37).

Ao nakon Emma Timiti, E taku, “Tai ngurengure ibukin bwaai ae ko tuai noorii, bwa a bon tauaki mai iroum ao man te aonaaba, bwa bon te wanawana aei irou ibukin te tai ae na roko” (Reirei ao Berita aika Tabu 25:4).

Ngai naba I a tia ni kakaei kaeka nakon titiraki aika a nako man te nano. A mwaiti kaeka aika a tia n roko, ao tabeua a tuai.31 Ngkai ti kamatoatoaira—n onimakina wanawanan ao ana tangira te Atua, ni kawakin Ana tua, ao ni katan iaan bwaai ake ti bon atai—E na buokira bwa ti na kunea te rau ni karokoa te tai are E na kaota iai koauan bwaai ni kabane.32

Mataata n Reirei ao Kaetieti n te Ekaretia

Ngkana ti Ukora te koaua, ao e bon buokiira ni kamataata te kaokoro i marenan taeka aika reirei ao kaetieti. Reirei e kaineti nakon koaua aika akea tokiia, n aron te aro n Atua, te babaire ni kamaiu, ao ana angnano n ana mwakuri ni kamaiu Iesu Kristo. Kaetieti ngkanne bon kammwakuran ke maiuakinan te reirei aika a kaineti ma bwaai aika riki i nanon maiura. A buokiira kaetieti ni waakina te Ekaretia n te kawai ae barongaaki.

E bon aki kona ni bitaki reirei, ma a kona ni bitaki kaetieti n te tai teuana ma teuana. E mwamwakuri te Uea rinanoia Ana burabeti ni kateimatoaa Ana reirei ao ni katamaroai kaetieti n te Ekaretia ni kaineti nakon are a kainnanoia Natina.

Te kananokawaki, bwa n tabetai ao ti a manga kairurua te kaetieti ma reirein te ekaretia. Ngkana tiaki ataa te kaokoro, ao e na reke te kai un ngkana iai bitaki n te kaetieti, are e na karika titirakinan wanawanan te Atua ke tabeia burabeti ni karekea te kaotioti.33

Reireia te Koaua ae Akea Tokina

Ngkana ti karekea bwaninin te koaua mai iroun te Atua, ao E kauringiira bwa ti na tibwaua te atatai anne ma temwaangina.34 Ti karaoa aio ngkana ti reireinia kaain te kiraati, kaira te ataei, ke n marooroakina koaua n te euangkerio ma raoraom.

Ara taakete bwa ti na reirei taekan te koaua n te aro ae na kaoa te Tamnei ae Raoiroi35 N na tibwai tabeua kakao mairoun te Uea ao Ana burabeti aika a kona ni ibuobuoki.36

  1. Boboto i aon Tamara are i Karawa, Iesu Kristo, ao aan Aia reirei.37

  2. Teimatoa i nanon warekan booki aika tabu ao n aia reirei burabeti ni boong aika kaitira.38

  3. Katan iaan reirein ake a kateaki irouia ake anganaki te kariaiakaki.39

  4. Totokoa karioakin iango, iango n aomata, ke iango n bwain aon te aba.40

  5. Anga reirei iaon reirein te euangkerio ni kairekereke ma koaua i nanon te euangkerio.41

  6. Kabonganai kawai n angareirei ake a kaoa ana wirikiriki te Tamnei.42

  7. Reitaki n kamataata raoi n totokoa te aki mataata.43

Tataekina te Koaua i nanon te Tangira

E bon rang n kakawaki arora n anga te reirei i aon te koaua. E kaungaira Bauro bwa ti na tataekina “te koaua i nanon te tangira” (taraa I-Ebeto 4:14–15). Are nanona bwa te koaua e na uota te kakabwaia nakoia tabeman ngkana e kaotaki rinanon ana tangira ae kororaoi Kristo.44

Koaua ake a reiakinaki ma akea te tangira e kona ni karika te namakin n motiki taeka, bwara n nano, ao te nanomaroaa. E na bon kairiira nakon te unraa ao te kakaokoroaki—ao ai te itabaraara. Irarikin anne, te tangira n akean te koaua bon akea nanona ao ni kamemeerea te rikirake are beritanaki.

Te koaua ao te tangira a uaia ni kakaawaki ibukin rikiraken maiura n tamnei.45 Te koaua e katauraoi reirei, tuua, ao tua ibukin karekean te maiu ae akea tokina, ma tataekinan te tangira e karika kaungaan nanora bwa ti na matoatoa ao ni karaoi ara mwakuri ma te koaua.

I rang kakaitau nakoia naake a tia n reireinai ma te taotaonakinnano n koaua aika akea tokiia ma te tangira.

Kainiin

N kainan au marooro, ao I kan tibwa te koaua ae akea tokina are e a riki bwa te atinroo i nanou. I a moanna n atai koaua aikai man karaoan nanon reirei ake I taekin n te bong aei.

I ataia bwa te Atua bon Tamara are i Karawa.46 E atai bwaai ni kabane,47 e bane irouna te mwaaka,48 ao e kororaoi ana tangira.49 E karaoa ana baire ibukira bwa ti na karekea te maiu ae akea tokina ao n riki n ai Arona.50

Ni mwakoron te babaire anne, E kanakoa Natina, Iesu Kristo, bwa e na buokiira.51 E reireiniira Iesu bwa ti na karaoa nanon te Tama52 ao n itangitangiri i marenara.53 E mate ibukin ara bure54 ao e anga Maiuna i aon te kaibangaki.55 E uti man te mate i mwiin tenibong.56 Rinanon Kristo ao Ana akoi, ti na manga kautaki,57 a kona ni kabwaraaki ara bure,58 ao ti kona ni karekea te korakora i nanon karawawatakira.59

I nanon Ana tai ni mwakuri iaon te aba, E katea Ana Ekaretia Iesu.60 I nanon te tai, ao e bitaki te Ekaretia anne, ao a bua koaua ake i nanona.61 E kaoka ana Ekaretia Iesu Kristo ma koaua aika eti n te euangkerio rinanon te burabeti Iotebwa Timiti.62 Ni boong aikai, E reitinako ni kaira Ana Ekaretia Kristo rinanoia burabeti ao abotoro aika maiu.63

I ataia bwa ngkana ti nakon Kristo, ti na bon waekoa ni “kakororaoaki irouna” (Moronaai 10:32), ao ni karekea “bwaninin te kimwareirei” (Reirei ao Berita aika Tabu 93:33), ao [ni] “karekea ana bwai ni kabane Tamau” (Reirei ao Berita aika Tabu 84:38). I kaota koauan koaua Aika Akea Tokiia aikai n aran Iesu Kristo, amen.

Bwaai aika a na taraaki

  1. Tara naba Taian Areru 117:2; Reirei ao Berita aika Tabu 1:39.

  2. “Kaitarakin aia nano kokoraki tabeman, bon iai te bwai ae eti ao ae bure. Bon iai te koaua ae kororaoi—te koaua ae akea tokina. Teuana te kangaanga n ara bong aikai bwa e karako mwaitiia aomata ae ataia bwa a na rairaki nako iai ni karekea te koaua” (Russell M. Nelson, “Pure Truth, Pure Doctrine, and Pure Revelation,” Liahona, Nov. 2021, 6).

  3. Taraa Iotebwa Timiti—Mataio 1:37.

  4. Taraa Moronaai 7:19.

  5. Taraa 2 Nibwaai 1:9; Reirei ao Berita aika Tabu 17:8.

  6. Taraa Iakoba 2:8.

  7. Taraa Taian Areru 119:105; 2 Nibwaai 32:3.

  8. Taraa Ioane 8:32; Reirei ao Berita aika Tabu 98:8.

  9. Taraa Ioane 17:17.

  10. Taraa 2 Nibwaai 31:20.

  11. Taraa Reirei ao Berita aika Tabu 88:11–13; 93:36.

  12. Taraa Ioane 5:19–20; 7:16; 8:26; 18:37; Mote 1:6.

  13. Taraa Aramwa 42:12–26; Reirei ao Berita aika Tabu 88:41.

  14. Taraa Moses 1:30–39.

  15. Taraa 2 Nibwaai 26:24.

  16. Taraa Reirei ao Berita aika Tabu 82:8–9.

  17. Taraa Ioane 16:13; Iakoba 4:13; Moronaai 10:5; Reirei ao Berita aika Tabu 50:14; 75:10; 76:12; 91:4; 124:97.

  18. Taraa Reirei ao Berita aika Tabu 6:22–23; 8:2–3.

  19. Taraa Ieremia 1:5, 7; Amota 3:7; Mataio 28:16–20; Moronaai 7:31; Reirei ao Berita aika Tabu 1:38; 21:1–6; 43:1–7. Te burabeti bon te aomata are e a tia ni weteaki ao n taetae ibukin te Atua. Ngkai ana tia uarongorongo te Atua, e karekei tua te burabeti, taetae ni burabeti, ao kaotioti mairoun te Atua. Taben te burabeti bwa e na kaota ana kantaninga ao aron raoi te Atua nakoia aomata nako ao ni kaota nanon Ana reitaki ma ngaia. E aki kukurei n te bure te burabeti ao e a kaman taekina rekenikaia. Bon te tia tataekina te raoiroi. N taai tabetai, e kairaki iroun te tamnei te burabeti bwa e na taekina te bwai ibukin taai aika a na roko ibukin aroia aomata nako. Moan tabena ae kakawaki, bwa, e na kaota te kakoaua iroun Kristo. Te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira bon ana burabeti te Atua i aon te aba n te bong aei. Ti kamatoaia te Moan Beretitentii ao Abotoro ake Tengaun ma Uoman bwa burabeti, taan mamata, ao taan kaotioti” (Guide to the Scriptures, “Prophet,” Gospel Library). Katoton reirei aikai a reke ni maiun Atam (taraa Mote 6:51–62), Enoka (tara Mote 6:26–36), Noa (taraa Mote 8:19, 23–24), Aberaam (taraa Karikani Bwai 12:1–3; Aberaam 2:8–9), Mote (taraa Te Otinako 3:1–15; Mote 1:1–6, 25–26), Betero (taraa Mataio 16:13–19), ao Iotebwa Timiti (taraa Reirei ao Berita aika Tabu 5:6–10; 20:2; 21:4–6).

  20. Taraa 2 Timoteo 3:16.

  21. Taara Ioane 8:44; 2 Nibwaai 2:18; Reirei ao Berieta aika Tabu 93:39; Mote 4:4.

  22. Taraa 1 Nibwaai 10:19. Beretitenti Dallin H. Oaks e tua: “Ti riai n taratara raoi ngkai ti ukoukora te koaua mai iroun te [Atua] ao n rinei booki n ibuobuoki ibukin te kakae anne. Ti riai n aki kairuruai kakawakin bwain aon te aba ma kariaia bwa bwaai ni kakoaua aika a koaua. … Ngkana ti kakaea koauan te aro, ti riai ni kabonganai kawai aika a kabonganaaki ibukin te kakae anne: tataro, ana kakoaua te Tamnei ae Raoiroi, ao kamatebwaian koroboki aika tabu ao aia taeka burabeti n taai aikai” (“Truth and the Plan,” Liahona, Nov. 2018, 25).

  23. E reirei Unimwaane D. Todd Christofferson: “Abotoro ao burabeti … a taekina ana taeka te Atua, ma n raonna, ti kakoauaia mwaane ao aine ni kabuta ao bon ataei a kona n reiakin mai iai ao ni kairaki man te mwaaka ae mimitong ni kaekaan te tataro ao ni kamatebwai booki aika tabu. … Membwa n ana Ekaretia Iesu Kristo a anganaki te bwaintangira ae te Tamnei ae Raoiroi, are e kairii reitaki aika a waakinaki ma Tamaia are i Karawa.… Aio e aki nanonaki bwa membwa n tatabemaniia a taetae ibukin te Ekaretia ke ni kona ni kabwarabwarai ana reirei ma n tatabemaniia a kona ni karekea te kairaki mai karawa n rinanon kakaewenako ao tibwangaia teuanne ke neienne inanon maiuia” (“The Doctrine of Christ,” Liahona, May 2012, 89–90, note 2).

  24. Taara 2 Nibwaai 33:1–2.

  25. Taraa Reirei ao Berita aika Tabu 1:28.

  26. Taraa Moronaai 10:3–5; Reirei ao Berita aika Tabu 9:7–9; 84:85.

  27. Taraa Reirei ao Berita aika Tabu 5:35; 63:23; 93:27–28. N aki tarai aia kakorakora ni mwakuri, tabeman mai iroura a kona n teimatoa n ininimaki ni kataia n namakina te Tamnei ni kaineti ma kanganga ni marurungin aia iango. Te nanokawaki ae reitinako, tabeaianga, ao tein aroaro nako a kona ni kamwaiti kanganga ni kinaakin te Tamnei ae Raoiroi. Ibukin aikai, te Uea e kaoira bwa ti na reitinako ni maiuakina te euangkerio, ao E na kakabwaiaira (taraa Motiaea 2:41). Ti kona n taratarai rakan waaki—n aron te ongora nakon katangitang aika a tabu, katabeatabeaki ni mwakuri n ibuobuoki, ke ni kabanei ara tai n ara otabwanin—are e buokiira n namakina uaan te Tamnei (taraa I-Karatia 5:22–23) ao ni kakorakorai ara reitaki ma te Atua.

    Unimwaane Jeffrey R. Holland e taekinna: “tera arora ni kaeka ae tamaroa riki ngkana ko kaitara ma kakaewenako n te iango ao te namakin nakoim ke nakoia ake ko tangiriia? Iaoia ni kabane, kona tai kabua am onimaki iroun Tamam are i Karawa, are e tangiriko riki nakon ae ko ataia. … Kakaonimaki ni karekei taneiai ni kataaki inanon te tataro are e uota Tamnein te Uea inanon maium. Ukoukora aia reirei naake iai irouia kiing ibukin kamarurungan te tamnei. Bubuti ao kauaai kakabwaia n te nakoanibonga. Anaa te toa ni katoa wiiki, ao teimatoa n tou mwiin nako berita n ana Mwakuri ni Kamaiu Iesu Kristo. Kakoauai taian kakai; I a tia n noori angiina n roko ngkana e a kaoti te bwarannano. Te kaantaninga e aki bua” (“Like a Broken Vessel,” Liahona, Nov. 2013, 40–41).

  28. Taraa Ioane 7:17; Aramwa 32:26-34. Tokin te tai, ao te Atua e tangiriira bwa tina karekea te koaua “teutana i mwin teutana, te reirei teuana i mwin teuana,” ni karokoa ti bane ni mataata ni bwaai ni kabane iai (taraa Taeka n Rabakau 28:5; 2 Nibwaai 28:30; Reirei ao Berita aika Tabu 88:67; 93:28).

  29. Taara 1 Ioane 1:9–10; 2:1–2.

  30. E taku ana reirei Beretitenti Russell M. Nelson: “Karaoan te rairannano n te bong koraki e na kainaomataira, e na anganira te kakanato, ao e kakaawaki nakon rikirakera n tatabemanira. Te rairannano bon te bwai ae e na mwakuriaki. Boni kiingin te kukurei ma te rau n te kantaninga. Ngkana e ikotaki ma te onimaki, te rairannano e kauki ara kona ni karekea mwaakan ana Mwakuri ni Kamaiu Iesu Kristo” (“Ti Kona ni Karaoa ae Tamaroa Riki ao ni Katamaroaki,” Riaona, Meei 2019, 67).

  31. I aki ataa bukina bwa e aera e taui tabeua koaua te Atua, ma Unimwaane Orson F. Whitney e katauraoa te nonoori ae katiki nano aei: “A kakabwaiaki ake a kakoaua ma aki nooria, bukina ngke a kamwakura te onimaki are roko man te rikirake n te maiu n tamnei, aki kamwakuran te onimaki, e na bon kamemeerea aron rikirakena. ‘Te wanawana bon te mwaaka;’ ao a riai n ataaki bwaai ni kabane inanon taina. Ma wanawana aika waekoa n roko—ataakina n tiaki taina—e kamamara te rikirake ao te kakukurei” (“The Divinity of Jesus Christ,” Improvement Era, Jan. 1926, 222; taraa naba Riaona, Dec. 2003, 14–15).

  32. Taraa Reirei ao Berita aika Tabu 76:5-10. Te Uea, e reireina naba Hyrum Smith bwa e na “Tai ukoukora taekinan au taeka, ma ukoukora moa karekean au taeka.” Tai ukoukora taekinan au taeka [ma] ukoukora moa karekean au taeka” (Reirei ao Berita aika Tabu 11:21–22). Te burabeti Aramwa e katauraoa te katooto ibukin kaeka ake aki kaekaaki: “Ngkai mwakuri aika a kamimi aikai a bon aki kaotaki ni bwanin nakoiu; ngaia are I taona nanou.” (Aramwa 37:11). E bon kabwarabwara naba nakon natina are Korianton bwa “mwaiti bwaai aika a kamiimi aika a kawakinaki, ae akea e atai ma bon ti te Atua n ti ngaia” (Aramwa 40:3 I a tia naba ni karekea te kakorakoraaki man ana kaeka Nibwaai ngke e katerei titiraki aika e aki kona ni kaekai: “I ataia ae [te Atua] e tangiriia natina; ma I aki atai nanon bwaai ni kabane” (1 Nibwaai 11:17).

  33. Ni koauana ao, katei ma aroaro n te aba bon tiaki reirei ao kaetieti n te ekaretia. A kona n rang ni bongana n buokiira iriiri reirei ao kaetieti n te ekaretia, ao ni kona naba ni karikirakea maiun tamneira ngkana aki boboto iaon reirei aika koaua. Ti riai n totokoi katei ake a bon aki kona n unika te onimaki inanom ke ni buokiko n rikirake nakon te maiu ae akea tokina.

  34. Taara Reirei ao Berita aika Tabu 15:5; 88:77–78.

  35. Taraa Reirei ao Berita aika Tabu 50:21–23.

  36. Anaaki man te beeba ae “Principles for Ensuring Doctrinal Purity,” a bon kariaiakaki man te Moan Beretitentii ao te Kooram n Abotoro n te Tengaun ma Uoman inanon Beberuare 2023.

  37. Taraa 1 Nibwaai 15:14 E tuangia ana toro te Uea bwa a na aki atong reirei aika a nano,ke koaua aika aki kaineti ma Ana euangkerio: “Ao n aki atong reirei aika nano, ma ko na taekina te rairannano ao te onimaki iroun te Tia Kamaiu, ao kamaunaan bure n te bwabetito, ao man te ai, eng, are te Tamnei ae Raoiroi” (Reirei ao Berita aika Tabu 19:31

    E reirei Unimwaane Neil L. Andersen bwa: Ti riai ni katurua ara taratara iaon te Tia Kamaiu Iesu Kristo ao te bwaintangira n Ana karea ni kabwara bure. Tiaki nanona bwa ti aki kona n taekina ara taneiai man oin maiura ke n tibwai taian iango mairouia tabeman. Ngkana ara reirei tao ibukiia utu ke ibuobuoki ke tembora ke am mition ngkoa, bwaai ni kabane …ana kotea te Uea ae Iesu Kristo“ (“We Talk of Christ,” Riaona, Nov. 2020, 89–90).

  38. Taraa Reirei ao Berita aika Tabu 28:2-3, 8 Ao e tua te burabeti ae Aramwa nakoia ake a rineaki bwa na reirei te euangkerio “bwa akea te bwai ae a na reiakinna ma ti bwaai aika e a tia n reireinia, ma bwaai ake a tia n taekinaki irouia burabeti aika a tabu” (Motiaea 18:19

    E katanoata nakoira Beretitenti Henry B. Eyring bwa, “Ti riai n anga reirei n reirein te euangkerio are kanoana bon kainibaire ao aia reirei burabeti, are tabeia bon katanoataakin reirein te euangkerio“ (“The Lord Will Multiply the Harvest” [evening with a General Authority, Feb. 6, 1998], in Teaching Seminary: Preservice Readings [2004], 96).

    E kakoaua Unimwaane D. Todd Christofferson bwa “n te Ekaretia n taai aikai, n arona n taai ake ngkoa, ai aron naba ekaretia n rimoa, kateakin ana reirei Kristo ke kaetakin taian kakaokoro bon mwakurin te kaotioti ae mimitong nakoia ake a kabaeaki iroun te Uea n te kariaia n abotoro” (“The Doctrine of Christ,” 86).

  39. Taraa 2 I-Korinto 13:1; 2 Nibwaai 11:3; Ita 5:4; Reirei ao Berita aika Tabu 6:28. E karaoa ana kakae Unimwaane Neil L. Andersen: “N tabeua titiraki ni kaineti ma te onimaki ao ni kunea teuana ana taeka temanna te tia kairiiri n te Ekaretia n ririki aika bwakanako are e bon kaitaraa reirein ara ekaretia. Iai tua aika kakawaki ibukin boutokaan reirein te Ekaretia. Te reirei ae nako mai irouia 15 kaain te Moan Beretitentii ao te Kooram n te Tengaun ma uoman. E aki karabaaki inanon te barakarabe n teuana te marooro. Reirei aika koaua a teimatoa n reiakinaki ao n maiuakinaki irouia aika mwaiti. E bon aki matoatoa aron reken reirein te euangkerio” (“Trial of Your Faith,” Riaona, Nov. 2012, 41).

    Unimwaane Christofferson e reirei: “E riai n uringaki bwa tiaki ni kabane rongorongo aika karaoaki irouia taan kairiri n te Ekaretia, n te tai are ngkoa ao ngkai, are a na tau ni karinaki bwa te reirei. E bon rangi n ataaki inanon te Ekaretia bwa te rongorongo ae karaoaki iroun temanna te tia kairiri n te tai ae tii teuana e kaonoti. ibon ibukin ana iango ae tamaroa, e aki kantaningaki bwa e na riki ke ni kamatoaki ibukin te Ekaretia ae bwanin” (“The Doctrine of Christ,” 88).

  40. Taraa 3 Nibwaai 11:32, 40 E taku beretitenti Gordon B. Hinckley: “I taetae nakoimi n te tai aei iaon kakawakin te ongeaba nakon reirein te Ekaretia ae itiaki. … I raraoma iaon aei. Bitakin reirein te euangkerio e uota te kangaaga ae bubura iaon rongorongo aika aki eti” (Teachings of Gordon B. Hinckley [1997], 620).

    E kauring Beretitenti Dallin H. Oaks bwa iai tabeman aomata ake “anai tabeua mwakoron aia taeka n reirei burabeti ao n kabongana ibukin boutokaan aia akenta ni bwaai n tautaeka ke bon ibukiia. … Anaakin aia taeka burabeti ibukin boutokaan iango ni kakaitara, waaki n tautaeka ke kangaanga n te mwane, titebo ma ko kataia n anaa nanon te burabeti, bwa e na aki iriiri a” (“Our Strengths Can Become Our Downfall” [Brigham Young University fireside, June 7, 1992], 7, speeches.byu.edu).

    E kaungaira Beretitenti Henry B. Eyring bwa: “Te reirei e karekea mwaakana ngkai e kamatoa koauana te Tamnei ae Raoiroi. … Ibukina bwa ti kainanoa te Tamnei ae Raoiroi, ti riai ni karaurau ao n taraia raoi bwa ti na aki riaon reirein te euangkerio ae koaua. Te Tamnei ae Raoiroi bon Tamnein te Koaua. Ti karekea ana kamatoa ngkana ti kanakoa te anua ni kairiiribai ke iango ni kabuakaka. Anne e kona n riki bwa te bwai ae kaangaanga karaoana. … Ti na bae ni kaririiaki bwa tina karaoi baika a boou ke ni kaingainga nano. Ma ngkai ti kaoa te Tamnei ae Raoiroi bwa e na riki bwa raoraora ti riai ni karaurau ao n taraia raoi bwa ti na aki riaon reirein te euangkerio ae koaua. Teuana mai ibuakon kawai aika ko na totokoi ngkana ko a kaan reke n reirei aika kewe bwa ko na rineia n tiku iaon am koaua. E reke te mano man te mataata ae bubura, ao ni bua ti teutana” (“The Power of Teaching Doctrine,” Riaona, Turai 1999, 86).

    E reirei unimwaane Dale G. Renlund bwa: “Ukeran te atatai riki ae korakora bon te mwakoro ae kakawaki n rikiraken maiun tamneira, ma taiaoka taratara raoi. Mwiin te iango e aki kona n onea mwiin te kaotioti. Iango ni katautau a aki kona ni kairiko nakon atatai n tamnei, ma e kona ni kairira nakon te mwamwanaaki ke ni bita ara nonoori man te bwai are e a tia ni kaotaki” (“Your Divine Nature and Eternal Destiny,” Liahona, May 2022, 70).

  41. Taraa Mataio 23:23 E kauring Beretitenti Joseph F. Smith: “E kaairua ngkana ti anaa mwakoron koaua ao ni bukinna bwa e tei ibukin bwaai ni kabane. … Reirei ni kabane ake a kaotaki n ana euangkerio Kristo a bon bane ni kakawaki ibukin te babaire ni kamaiu.” E reitia ni kabwarabwara: “E kakawaki bwa ti na rinea teuana mai ibuakon katieti ke reirein te ekaretia, katebenakoa mai ibuakon am koaua n te euangkerio, karikia bwa te mamate n nano ae onoti, ao maiuakinna ibukin rikirakera ao te kamaiuaki. … A bane ni kakawaki” (Gospel Doctrinete ka 5 n kaobi [1939], 122).

    E kabwarabwara Unimwaane Neal A. Maxwell: “Reirein te euangkerio … e kainanoa te kakamwakuri. Ngkana a uaia n ikatikitiki imarenaia ke n tei raroa ma are teuana, aia atatai ma aia babaire mwaane e na bon rang bubura iaon reirei aikai. Te tangira, ae aki rinanon te kaitiua n tua, bon te wenenibure ae aki itiaki. E taekinaki n te Kanimaua n tua karineaia ara karo, ma e riai moa ni karineaki are n te moan tua, are e na karika te tangira ae kororaoi nakoia karo ao te Atua. … Riki te taotaonannano e kabaerantaki ‘ma te matoatoa, ngkana ti kairaki iroun te Tamnei are Raoiroi’ [Reirei ao Berita aika Tabu 121:43]” (“Behold, the Enemy Is Combined,” Ensign, May 1993, 78–79).

    E kabwarabwara Beretitenti Marion G. Romney, “te Ukeuke inanon [koroboki aika tabu] bon te kantaninga ibukin karekean te reirei are bon ana reirei Iesu n tabetai ao e kaminonano aron kakaeakin taian kibuntaeka ake a na kaineti ma boutokakin te mwakuri n ibuobuoki” (“Records of Great Worth,” Ensign, Sept. 1980, 3).

  42. Taraa 2 Nibwaai 31:13; Moronaai 10:4 E kabwarabwara Unimwaane Jeffrey R. Holland kainanoan te reitaki ma ana euangkerio Iesu Kristo n te aro are e na kairiira ni maiun tamneira rinanon Tamneina ae Tabu: “E bon aki kona n anga te reirei te Uea nakon ana ekaretia nakon reiakinan moa te euangkerio ‘are mai iroun te Tamnei, e ngke e a tia ni karuoaki te tia Karaunano bwa e reirei te koaua.’ Ti reirei taekan te euangkerio ‘ma te Tamnei ae Raoiroi are bon Tamnein te Koaua?’ E a tia n titirakiniira. Ke ti reirei iaona ‘n te kawai riki teuana? Ao ngkana man kawai tabeua,’ E kauring, ‘bon tiaki mai iroun te Atua’ [Reirei ao Berita aika Tabu 50:14, 17–18]. … Bon akea te wanawana are na kona n onea mwin te Tamnei ae ruo mai kawara. … Anne te bwai ae rang kainanoia ara membwa. … A tangira aia onimaki bwa e na kamanoaki ao aia kaantaninga ni kabouaki. A tangiria, ni kauarerekeana, ni kamwarakeaki n ana taeka aika raraoi te Atua, ni kakorakoraaki man mwaakan karawa” (“A Teacher Come from God,” Ensign, May 1998, 26).

  43. Taraa Aramwa 13:23 Ngkai ti taetae iaon Tamara are Ikarawa, ao e kakoauaa Beretitenti Russel M. Nelson bwa, “E reitaki n te aro ae bebete, inanon te aki kakarongoa, ao n kawai ake ti bon aki kona n aki ota Irouna ia” (“Ongo Irouna,” Riaona, Meei 2020, 89).

  44. Taraa Taian Areru 26:3; I-Rom 13:10; 1 I-Korinto 13:1–8; 1 Ioane 3:18.

  45. Taraa Taian Areru 40:11.

  46. Taraa I-Rom 8:16.

  47. Taraa 1 Tamuera 2:3; Mataio 6:8; 2 Nibwaai 2:24; 9:20.

  48. Taraa Karikan Bwai 17:1; Ieremia 32:17; 1 Nibwaai 7:12; Aramwa 26:35.

  49. Taraa Ieremia 31:3; 1 Ioane 4:7–10; Aramwa 26:37

  50. Taraa 2 Nibwaai 9; Reirei ao Berita aika Tabu 20:17–31; Mote 6:52–62.

  51. Taraa Ioane 3:16; 1 Ioane 4:9–10.

  52. Taraa Ioane 8:29; 3 Nibwaai 27:13.

  53. Taraa Ioane 15:12; 1 Ioane 3:11.

  54. Taraa Ruka 22:39–46.

  55. Taraa Ioane 19:16–30.

  56. Taraa Ioane 20:1–18.

  57. See 1 I-Korinto 15:20–22; Motiaea 15:20–24; 16:7–9; Reirei ao Berita aika Tabu 76:16–17.

  58. Taraa Makuri 11:17–18; 1 Timoteo 1:14–16; Aramwa 34:8–10; Moronaai 6:2–3, 8; Reirei ao Berita aika Tabu 19:13–19.

  59. Taraa Mataio 11:28–30; 2 I-Korinto 12:7–10; I-Biribi 4:13; Aramwa 26:11–13.

  60. Taraa Mataio 16:18–19; I-Ebeto 2:20.

  61. Taraa Mataio 24:24; Mwakuri 20:28-30.

  62. Taraa Reirei ao Berita aika Tabu 20:1–4; 21:1–7; 27:12; 110; 135:3; Rongorongon—Iotebwa Timiti 1:1–20.

  63. Taraa Reirei ao Berita aika Tabu 1:14, 38; 43:1–7; 107:91–92.