Ibukin Kabwaiaia Am Kariki
Kam na aki riki bwa te toma ae mamaara n tieinin te onimaki ae tamaroa ae ko waakina aio, ke are ko karekea, n aron ami bwaibwai n onimaki. Ko na riki bwa are te kabanea n korakora.
Tabeua te ririki n nako, ngke I mwakuri n te Aono ae South America Northwest ao ni maeka i Lima, Peru, I karekea te taneiai ae moan te tamaroa are I kan tibwauaia ma ngkami.
E riki ngke I a okira mweengau i mwiin au wiikente ae kakanoa ni katabeau aika a bati. I mwiin tian katauraoan beeba ibukin kawaran te aba n te marae ni wanikiba, I a kunea te turaiwa ae moan te iraorao anuana ae tataningaai man aobitin te tabo n kaa ae ti taneiai ni kabongana. E kairai nakon ana kaa, ao I a tekateka mai buki n iangoa reken motirawau ao man kukurei n akean te karongoa inanon butiu n okira mwengau. Ngke tia raroa nako ma auti tabeua, e a tarebooniaki te turaiwa iroun ana tiubwawaitia , n tuangnga bwa e bure baou are I toka iai. Iai te kaa tewaana ae katauraoaki ibukiu, ao e tuangaki iroun ana tiubwawaitia bwa e na manga nikirai n te marae ni wanikiba ngkana I tangiria ni bita baou. I tuangnga bwa e aki riai, ao ti bon kona ni butinako. I mwiin tabeua te miniti n aki karongoaa, e taraai man ana kiraati ao n titiraki, “Kaain te Moomon ngkoe, e koaua anne?”
Eng, i mwiin te titiraki ae kaunganano arei, I ataia bwa e a toki au tai ae rau. I rangi n kukurei ni marooro ni kaineti ma ana titiraki te turaiwa.
I ataia bwa ngaia arana Omar, aran buuna bon Maria Teresa, ao iai uoman natiia—aika Carolina, 14 ana ririki, ao Rodrigo, 10 ana ririki. E a kaman kaaina te Ekaretia Omar inanon uarerekena. A kakaonimaki ana utu, ma ibukin baika aki kantaningaaki, e a toki naba nanakoia ana karo n taromauri. E keerikaaki kakaonimakin Omar n taromauri ngke koro 15 ana ririki. Ao ngkai ai 40 ana ririki ni maiu.
N te tai anne ao I kunea bwa e aki bure te bao are I toka iai. Ao tiaki te bwai ae mannenanti n riki! I tuangnga bwa antai Ngai ao I toka n ana kaa ibukina bwa e weteia te Uea ni kaokia nakon Ana nanai.
Ti a maroroakina te tai are ngke e rangi ni kakaonimaki iai ma ana utu nakon te Ekaretia. E korakora ururingan tain boboakin aia kainutu n te tairiki ma ana utu aika a kakateke, ao ni katang tabeua kunan te Moanrinan. Ngkanne e a karaua n anenei tabeua taekan te kuna ae “Ngai Natin te Atua.”1
I mwiin reken ana aetureti, nambwan ana tareboon, ma te kariaiakaki n tibwai ma ana bitiobi, I tuangnga bwa N na karekea rokou n te umwantabu n ana moan bong n okira te taromauri. Ti a roko n tokin mwanangara bwa I a roko ni mweengau, ao n aron naba mwanangara ae uarereke n ara marooro i aon bongini maiuna ngkoa, ao ti a nako ni kawaira aika a kakaokoro.
Tabeua te wiiki i mwiina e a tarebooniai ana bitiobi, e tuangai bwa e nang ira te taromauri Omar n te Tabati teuana. I tuangnga bwa N na bon roko. N te Tabati anne, e roko Omar ma natina te mwaane. Buuna ma natina te aine akea nanoia n kain iri n te tai anne. Tabeua te namwakaina i mwiina, e a manga tarebooniai riki ana bitiobi, n te tai aei e a tuangai bwa e nang bwabetitoa buuna ma natiia ake uoman Omar, ao e kaoai bwa N na riai n roko ikekei. Aio tamnein kamatoakiia n te Taabati anne ngke a riki bwa kaain te Ekaretia.
N te bong naba anne, I tuanga Omar ao ana utu bwa ngkana a tauraoi, inanon teuana te ririki N a rangi ni kakatonga ni karaoa te kabaebae ibukiia n te Lima Peru Tembora. Aio tamnein te tai ae rangi n ururingaki iroura ni kabane, ae raweaki teuana te ririki i mwiina.
Bukin tera I tibwa te taneiai aei ma ngkami? I tibwaia bwa iai bukina aika uoua.
Te moan, n taetae nakoia membwa ake iaan bukina aika aki kantaningaaki ao a tia n kitana ana euangkerio Iesu Kristo ae tia n manga kaokaki. Te kauoua, e bon kaineti ma kaain te ekaretia ake a kakaonimaki n roroko n te tai aei ma aki rangi ni kakaonimaki nakon aia berita aika tabu nakon ae a bon riai. N itera aika uoua aikai, a na rootaki rooro akana i mwiina, ao kakabwaia ma berita ake a tia ni kawakinaki ibukiia aia kariki a kona n aki koro nanoia.
Ti na moanna man te moan bwai ae e riki, kaain te aro aika a raraoi ake a tia ni kitana kawain te berita ae tabu, n aron are e riki nakon raoraou ae kaain Peru ae Omar. Ngke I titirakinna bwa tera bukina ngkai e manga rineia bwa e na oki, e taku bwa e namakinna ngaia ma buuna bwa a na kona n rangi ni kukurei natiia inanon maiuia n ana euangkerio Iesu Kristo. E namakinna bwa e a bon riai n okira te ekaretia ibukin kabwaiaia natiia.
E rangi ni kakanokawaki ngkana ti kaitibo ma kaain te aro ake a tia ni kitana te ekaretia aoaika tiaki kaain te Ekaretia ake a bon tia n karekea te euangkerio ngkoa inanon aia utu ao ni manga bua man aia babaire aia karo ke tibuia bwa ana kitana te Ekaretia. E na iai mwiin te babaire anne i aoia aia kariki n aki toki!
A tuukaki natiia ao tibuiia man ana kamanomano ao ana kakabwaia ana euangkerio Iesu Kristo inanon maiuia. Ae kauruaki nano riki, a tia ni kabuaa te berita ibukin te utu ae akea tokina are e mena ngkoa irouia. Ana babaire temanna e na kona n rootiia rooro ma kanoa aika a mwaiti. Te bwaibwai n te onimaki anne e a uruaki.
E ngae n anne, n aron ae ti ataia, te bwai are e uruaki e kona ni manga kaboouaki rinanon Iesu Kristo. Ibukin aei, taiaoka iangoa te kakao aei mairoun Beretitenti Russell M. Nelson: “Ngkai, ngkana ko a tia n tibanako man te kawai, I kaoi ngkami ma te kaantaninga inanou bwa kamwa taiaoka n manga oki. Tera nako am tabeaianga, tera nako am kangaanga, iai nnem, n ana Ekaretia te Uea. Ngkami ao te roro aika a tuai bungiaki a na kakabwaiaaki man ami mwakuri ngkai kam oki nakon kawain te berita ae tabu.”2
N te tai aei, ti na maroroakina te kauoua ni bwai are tia n kateaki imatami, rorokoia kaain te aro ni boong aikai ake aki rangi ni kakaonimaki n aron are a bon riai. Babaire ake a karaoaki ngkoananoa e na roota kanoan te bong aei, babaire ibukin te bong aei e na rooti kanoan ara bong ma aia bong ara utu.
E reireiniira Beretitenti Dallin H. Oaks:
Ana euangkerio Iesu Kristo are e kaokaki e kaungaira bwa ti na iango ibukin taai aika a na roko. … E reireinira iango aika korakora ibukin taai aika imwaira ake a na kairii baike ti karaoi ngkai.
Ni kaitaraana, ti ataiia aomata ake a ti iangoa kanoan te bong aei: a mwakurii ngkai, a kukurei iai ngkai, ao akea iangoan taai aika a na roko.
“… Ngkai ti karaoi babaire ngkai, ti na aki toki n titiraki, ‘E na kairiira aio nakea?’”3 Ara babaire aika ngkai a kairiira nakon te kimwareirei n te tai aei ao n akea tokina, ke a na kairiira nakon te rawawata ao te tang?
Tabeman a na iango, “Ti aki riai n nanako n taromauri ni katoa Tabati,” ke “Tia kabwaka ara kabwianibwai ngkana a nakoraoi bwaai,” ke “N na aki boutokaia taan kairiiri n te Ekaretia i aon te bwai aei.”
“Ma,” a taku, “ti ataia bwa e koaua te Ekaretia, ao ti na bon aki kitana ana euangkerio Iesu Kristo.”
Naake a iango n aron aikai aki ataia bwa te rootaki ae aki raoiroi n aron “te aomata ae aki matoa ana motinnano” ao ni bwain ana kakaonimaki inanon te euangkerio a na rootaki maiuia ma maiuia aia kariki. A na teimatoa kaaro ni kakaonimaki, ma natiia a na aki rangi ni kakaonimaki—inanon te maiu aei ao n aki toki.
Ni kaineti ma naake aki karekea te abanuea are te tiretio ma aia utu, e taku te Uea, “Aika naake aki kakaonimaki n te koaua ibukin Iesu; ngaia are, a aki karekea te baunuea i aon abanuean Atuara.”4 Anne ae ti tangiria ibukira ke ibukiia natira? E riai ae tao ti na rang kakaonimaki ao kauarerekea aki tauraoin nanora ibukin kabwaiara ao kabwaiaia kanoara?
E marooro naba Beretitenti M. Russell Ballard iaon te raraoma aei:
Ibukiia tabeman, ana kakao Kristo ni kakoaua ao te teimatoa n reitinako e matoatoa. … Tabeman reirei e kangaanga irouia bwa ana oota n tabeua ana reirei te Ekaretia. Tabeman a kunei tabeiaianga n rongorongon te Ekaretia ke ni kairuaia tabeman kaain te aro ao taan kairiiri, ake ngkoa ao ngkai. …
“… Te babaire n “aki manga airiri” ma kaain te Ekaretia ao ana tia kairiiri te Uea ake a tia n rineaki e na iai mwiina ae reitinako ae e aki kona n noraki n te tai aei.”5
Ai kananokawakira katibanakoan te kakabwaia aio—ao tera bukina? Bwa tera nako bukina, e aki tau ni kaitaraaki ma te buakaka are e na riki man rootia kanoam ake imwiina.
Tairu ao mwaaneu aika a tangiraki, ngkana kam rinanon teuana mai buakon bwaai aika I taekin inanon au rongorongo, taiaoka manga iangoia riki. Kam ataia bwa iai te babaire ibukira n te maiu aei. Kam ataia bwa te utu e kona n reitinako n akea tokina. Bukin tera ngkai kam uoti ngkami nakon te kangaanga? Kam na aki riki bwa te toma ae mamaara n tieinin te onimaki ae tamaroa ae ko waakina aio, ke are ko karekea, n aron ami bwaibwai n onimaki. Ko na riki bwa are te kabanea n korakora. Aei ami tai ni karaoia, ao te Uea e kona ni buoki ngkami.
Mai kabin nanou, I kaoi ngkami bwa kam na iangoia, n tarai taai aika a na roko ao n ukeria bwa “e na kairai nakea aei” ao, ngkana e riai, bwa kam na rangi ni kakaonimaki ni kanakoraoa kawaimi ibukin kabwaiaia ami kariki. N aran Iesu Kristo, amen.