Mensahe sa Unang Kapangulohan alang sa Pasko

Ang panahon sa Pasko kasagaran anaa gayuy mga gasa. Ang labaw nga gitinguha nga mga gasa mao kadtong gihalad ngari kanato sa atong mahigugmaon nga Langitnong Amahan ug sa atong Manluluwas, si Jesukristo. Kini nga mga gasa nahimong posible tungod kay si Jehova mikunsad aron moanhi sa yuta isip ang batang si Jesus. Natawo siya sa usa ka imortal nga Amahan ug usa ka mortal nga inahan. Natawo siya sa Betlehem ubos sa labing mapainubsanon nga mga sirkumstansya. Ang Iyang balaan nga pagkatawo nakita sa mga propeta sukad pa sa mga adlaw ni Adan. Si Jesukristo mao ang dili hitupngan nga gasa sa Dios—ang gasa sa Amahan ngadto sa Iyang tanang anak (tan-awa sa Juan 3:16). Kana nga pagkatawo malipayon natong saulogon matag panahon sa Pasko.

Ang walay kinutoban ug hingpit nga gugma sa Manluluwas nakaaghat Niya sa pag-ula alang sa tanang anak sa Dios. Kana nga gasa—ang Pag-ula ni Jesukristo—nagtugot sa tanan Niyang ubang mga gasa nga maato.

Mopamatuod kami nga ang Dios buhi! Si Jesus mao ang Kristo—ang Mesiyas. Ang Simbahan ni Jesukristo sa mga Santos sa Ulahing mga Adlaw Iyahang Simbahan, diin Siya ang nagdumala.

Ang Unang Kapangulohan