“Hapin sa Punoan sa Christmas Tree ni Sharon,” Liahona, Dis. 2023.
Mga Tingog sa mga Santos sa Ulahing mga Adlaw
Hapin sa Punoan sa Christmas Tree ni Sharon
Alang kanako, ang gasa sa igsoon nga babaye sa akong bana nahimong usa ka simbolo sa Pag-ula ni Jesukristo.
Paghulagway pinaagi ni Anastasia Suvorova
Samtang ang akong bana ug ako nangeskwela sa kolehiyo ug sa daghang tuig human niadto, ang sitwasyong pinansyal medyo gipit alang namo. Imbes mamalit og mga gasa, naghimo lang ko. Usa ka tuig naghimo ko og mga hapin sa punoan sa Christmas tree aron ihatag sa akong mga igsoong babaye ug sa mga igsoong babaye sa akong bana.
Gipundok nako ang mga tinangkas nga materyal ug mga salin nga lunhaw, pula, puti, o sagol niini nga mga kolor. Kadaghanan sa mga panapton dili pang-Pasko og printa. Gigunting nako kini ngadto sa yano nga mga kwadro ug gitahi kini aron mahimong hapin sa punoan sa tree. Matag hapin adunay lain-lain nga klase sa panapton.
Nianang tuiga alang sa Pasko, mibyahe kami paingon sa balay sa akong mga umagad. Si Sharon, igsoon sa akong bana, nagpuyo sa duol lang, mao nga gibisita namo ang iyang pamilya ug gihatod ang among mga gasa.
Sa akong kasagmuyo, ilawom sa iyang Christmas tree nakakita ko og nindot kaayo nga panapton ug quilted nga hapin hinimo sa sinunod nga mga materyal sa Pasko ug giringgiring nga mga tumoy. Si Sharon adunay talento sa pagtahi, pag-quilt, pagburda, pagganselyo, paglala [weave], ug uban pang mga kahanas. Gihimo niya ang hapin sayo nianang tuiga.
Dili nako mapugngan ang pagtandi sa iyang maanindot kaayo nga hapin sa Christmas tree ngadto sa akong yano ra nga hinimo. Naulaw ko mohatag niini ngadto niya. Ako siyang giingnan nga makasabot ko kon dili siya ganahan mogamit niini.
Sa dihang among giablihan ang among gasa gikan ni Sharon pagkasunod tuig, natingala kami nga iyang gihatag kanamo ang hapin sa Christmas tree nga akong giganahan sa miaging tuig. Mabination siyang midawat sa akong yano nga gasa ug agig balos mihatag kanamo og mas nindot nga gasa.
Human makigbisog og pisikal nga sakit sulod sa 12 ka tuig, si Sharon namatay sa dihang 38 pa lang siya. Mga pipila ka tuig nang milabay, samtang akong gibutang ang iyang hapin sa Christmas tree sa among tree ug naghunahuna kaniya, ang hapin sa Christmas tree nahimong simbolo sa gasa sa Pag-ula sa Manluluwas nga gitanyag alang kanato. Bisan unsa ka maayo ang atong gitinguha nga mamahimo, kitang tanan mga mortal, nga adunay mga sayop ug mga kahuyang. Dili kita perpekto, sama sa yano nga hapin sa Christmas tree nga akong gihatag ni Sharon.
Agig pagtandi sa kaanindot sa kinabuhi sa Manluluwas, kanunay gayod kitang masayop. Apan kon buhaton nato ang atong pinakamaayo sa paghatag sa Manluluwas og masulub-on nga kasingkasing ug mahinulsolon nga espiritu, Siya usab motanyag kanato sa mga panalangin sa Iyang maanindot nga Pag-ula. Makadawat kita og butang nga mas dako kaysa atong gasa ngadto Kaniya.
Mapasalamaton ko alang sa espesyal nga pahinumdom sa Iyang Pag-ula nga nahimo sa hapin sa Christmas tree alang kanako.