Mga Baroganan sa Pagpangalagad

Pagpangalagad uban ang Pagkamaunongon

Kita makahimo og dakong kalainan pinaagi sa pagpangalagad uban ang pagkamaunongon.

Litrato pinaagi ni Kay Lynn Hodges

Ang kinabuhi ni Apostol Pedro usa ka makapadasig nga ehemplo sa pagkamaunongon ug pagkamatinud-anon ngadto sa Manluluwas. Apan si Pedro kinahanglang magkat-on ug motubo niini nga mga hiyas, sama sa atong tanan. Bisan tuod nga kaniadto iyang giproklamar si Jesus isip ang Mesiyas (tan-awa sa Mateo 16:16) ug gani andam nga magpakamatay alang Kaniya (tan-awa sa Lukas 22:33), siya milimod nga nakaila kang Jesus sa dihang gipangutana (tan-awa sa Mateo 26:69–74). Human niini nga pagbudhi, si Pedro “mihilak sa hilabihang kasakit” (tan-awa sa Mateo 26:75). Gipasaylo ni Jesus si Pedro, ug sa kaulahian isip pangulong Apostol, si Pedro nangulo sa unang Simbahan ni Jesukristo.

Kini nga asoy nagtudlo kanato nga bisan kon kita mapakyas, mapasaylo kita pinaagi sa Pag-ula ni Jesukristo kon kita tinud-anay nga maghinulsol ug maunongon ngadto Kaniya. Si Pedro nahimong talagsaong ehemplo sa pagkamaunongon sa tibuok niyang kinabuhi, bisan pa sa paglutos ug pag-antos samtang siya nag-alagad sa Ginoo. Sa kataposan, iyang gihatag ang iyang kinabuhi.

Si Pedro mitudlo nga kita mapanalanginan kon kita maunongon sa Manluluwas bisan sa mga pagsulay ug pagpanglutos:

“Kon kamo panamastamasan tungod sa ngalan ni Kristo, bulahan kamo kay ang espiritu sa himaya ug sa Dios anha man kaninyo: sa ilang bahin siya gipasipalahan, apan sa imong bahin siya gihimayaon. …

“Apan kon aduna may paantoson tungod sa iyang pagka-Kristohanon, nan, dili niya kini pag-ikaulaw, hinonoa kinahanglan magahimaya siya sa Dios tungod sa maong ngalan” (1 Pedro 4:14, 16).

Makapakita kita og dili matarog nga pagkamaunongon ngadto sa Manluluwas pinaagi sa pagbuhat sa Iyang gisugo kanato, ug kita makapakita og pagkamaunungon niadtong atong gipangalagaran pinaagi sa pagtrabaho sa pagtukod og tinuod, sinsero nga mga panaghigalaay.

Pagpalambo og Pagkamaunongon

Ang pagkamaunongon usa ka Kristohanon nga kinaiya nga atong mas makat-onan ug mapalambo diha sa atong mga kaugalingon. Ania ang pipila ka ideya:

1. Pakigsulti sa epektibo nga pamaagi: Pinaagi sa pagkahimong klaro ug bukas sa inyong komunikasyon ug aktibong pagpaminaw sa mga panglantaw sa uban, mahimo ninyong mapalambo ang mas lawom nga pagsabot ug pagsalig, magtabang kaninyo sa pagtukod ug sa pagpadayon sa maunongon nga mga relasyon.

2. Pagkamakanunayon: Kon ang mga tawo makasalig kaninyo nga anaa alang kanila ug sa pagsunod sa inyong mga pasalig, sila mosalig ug mosalig kaninyo, nga mosangpot sa lig-on, maunongon nga mga relasyon.

3. Pag-ampo: Kon kamo mag-ampo alang niadtong inyong gialagaran, ang mga pagbati sa pagkamaunongon ngadto kanila natural nga molambo.

Litrato pinaagi ni Shirlene Stoddard

Pagpangalagad uban ang Pagkamaunongon

1. Mahimong masaligan: Sunda ang mga pasalig ug mahimong maabagon kon kadtong inyong gipangalagaran nagkinahanglan og pagdasig.

2. Maminaw pag-ayo: Pinaagi sa tinuoray nga pagpaminaw, pagsabot, ug sa pagkaana alang sa mga tawo nga inyong gipangalagaran, kamo makahimo og mas lig-on nga mga koneksiyon ug nagpakita kamo nga nagpakabana sa ilang kaayohan.

3. Hupti ang mga pagsalig: Ang usa ka maunongon nga higala motipig og mga pagsalig kon mangalagad—ug sa tanang panahon. (Diha sa espesyal nga mga kahimtang, sama sa mga kahimtang sa pag-abuso, pangayo og pagtugot ug dayon tabangi sila sa pagpangita og sakto nga pagtabang.)

4. Pagpakita og gugma ug kaluoy: Kon kamo tinuoray nga nagpakabana niadtong inyong gialagaran, sila mobati nga adunay bili ug gitamod [appreciated], nga magmugna og relasyon diin ang pagkamaunongon molambo.

5. Pagserbisyo: Kon kita moserbisyo sa matag usa inubanan ang gugma, kita nagpakita sa atong pagkamaunongon ngadto sa Manluluwas ug sa atong kaandam sa pagpakaon sa Iyang karnero (tan-awa sa Juan 21:15–17).

Pagdiskobre pa og Dugang

• Basaha ang pakigpulong ni Presidente Thomas S. Monson sa kinatibuk-ang komperensiya sa Oktubre 2013 nga “Ikaw Dili Ko Kawangon, ni Biyaan Ko Ikaw” (Liahona, Nob. 2013, 85) bahin sa unsang paagi ang Dios mobarog nga maunongon uban kanato sa tibuok natong mga pagsulay.

• Tan-awa kining makapatandog nga bidyo mahitungod sa magtiayon kinsa maunongon ug mahigugmaon bisan pa sa grabe nga pisikal nga mga hagit: “Enduring Love,” ChurchofJesusChrist.org/media.

• Tan-awa kini nga bidyo mahitungod sa usa ka apohan nga mipakigbahin sa iyang apo sa ehemplo ni Kapitan Moroni, lakip sa hugot nga pagtuo ug pagkamaunongon ni Moroni ngadto sa Manluluwas: “Captain Moroni,” ChurchofJesusChrist.org/media.