“Ako Nagtuo sa mga Milagro,” Liahona, Dis. 2023.
Ako Nagtuo sa mga Milagro
Ako nagtuo nga ang Dios makahimo ug manginlabot sa atong kinabuhi alang sa atong kaayohan karon, sama sa Iyang gibuhat sa tibuok Niyang mortal nga pangalagad. Ako nagtuo nga gibuhat Niya kini kada adlaw.
Litrato sa kamot gikan sa Christus nga estatuwa pinaagi ni Shannon Leanne Law
Usahay ang mga milagro dramatikanhon. Apan kasagaran dili.
Samtang naa sa gimbuhaton [assignment] alang sa mga magasin sa Simbahan didto sa Taiwan, nagbiyahe ko uban sa usa ka taghubad [interpreter] ug usa ka drayber. Bisag duna pa koy dakong oras nga trabahoonon, ang akong taghubad kinahanglang mobiya nako nga mag-inusara uban sa drayber, nga dili makasulti og Iningles. Walay paagi nga ako makahuman sa akong trabaho nga dili makigsulti sa drayber. Samtang naghisgot sila og mga opsiyon, ang akong taghubad misugod sa pagkatawa. Siya mipasabot nga ang drayber nagsulti og Kinatsila, diin siya nasayod nga akong nakat-onan sa akong misyon. Ang drayber ug ako malipayong nag-uban, ug nahuman nako ang akong trabaho nga walay problema.
Dili kini dramatikong pagkaayo o paglihok sa usa ka bukid. Apan usa kadto ka balaanong pagpanginlabot nga ang akong drayber maoy usa sa diyotay ra gayod ka mga tawo sa Taiwan nga makasulti og Kinatsila.
Nagkinahanglan Kita og mga Milagro
Ako nagtuo nga kita magkinahanglan og mga milagro kada adlaw o kita dili mouswag sa atong panaw balik ngadto sa Dios. Sa dihang ang pamilya ni Nephi “adunay hugot nga pagtuo nga ang Dios makahimo nga [ang Liahona] motudlo sa agianan nga sila kinahanglan mopanaw, tan-awa, kini mahimo; busa sila aduna niini nga milagro, ug usab daghang uban nga mga milagro nga nahimo pinaagi sa gahom sa Dios, sa matag adlaw” (Alma 37:40).
Ang atong hugot nga pagtuo nag-una sa milagro, apan ang milagro makapamatuod sa atong pagtuo, makatabang niini nga molambo, ug makapalihok nato sa dalan.1
Kita Gilibotan sa mga Milagro—Kon Kita Motan-aw
Ako nagtuo nga ang mga milagro moabot diha sa tanan nga mga porma ug gidak-on, gikan sa dramatiko ngadto sa dali ra ipatin-aw ingon nga sulagma. Ako nagtuo nga ang Ginoo mopanalangin kanato niini sa kanunay kon kita mangita niini, moila niini, ug moila niini uban sa pasalamat.2
Ako nagtuo nga ang pagpangita og mga milagro lahi kay sa pagpangita og mga timailhan. Ang pagpangita og mga milagro nagpasabot og hugot nga pagtuo, o labing minos paglaom; ang pagpangita og mga timailhan nagpasabot og pagduhaduha. Ang usa ka magtutuo ug usa ka maduhaduhaon makasaksi sa parehas nga milagro, apan usa ra kanila ang makaila niini kon unsa kini (tan-awa sa Doktrina ug mga Pakigsaad 63:7). Ang pagduhaduha dili makahimo og mga milagro, samtang ang Manluluwas miingon nga ang mga milagro ug “mga timailhan mosunod kanila nga motuo” (Marcos 16:17; Mormon 9:24; Ether 4:18; Doktrina ug mga Pakigsaad 84:65; tan-awa usab sa Dokrina ug mga Pakigsaad 58:64; 63:9; 68:10; 124:98).
Pag-ila sa mga Milagro
Ang mga milagro moabot sa daghang matang. Ang Manluluwas miingon:
“Kining mga ilhanan maganunot kanila nga motuo; sa akong ngalan sila mopapahawa sa mga yawa; magasulti silag mga bag-ong sinultihan;
“Makakupot silag mga bitin; ug kon makainom silag bisan unsa nga makahilo, dili sila mangadaot; ang mga masakiton pagapandongan nila sa ilang mga kamot, ug mangaayo sila” (Marcos 16:17–18).
Ug dayon Siya naglakip og usa ka milagro nga kanunay natong mataligam-an: “Bisan kinsa nga motuo diha sa akong ngalan, nga walay pagduha-duha, ngadto kaniya Ako mopamatuod sa akong mga pulong” (Mormon 9:25). Ako nagtuo nga ang pagpamatuod sa katinuod sa ebanghelyo ni Jesukristo usa ka milagro—usa ka milagro nga maangkon sa matag usa kanato kon kita mopili sa pagtuo ug sa pagsunod sa Iyang mga pulong (tan-awa sa Juan 7:17; Doktrina ug mga Pakigsaad 84:44).
Asa Ang Akong Milagro?
Adunay daghan nga nakasinati og mga pagsulay ug trahedya, ug sa dihang nangayo sila og balaanong pagpanginlabot, walay bisan usa. Mahimong mangutana niini, “Hain ang akong milagro?”
Pipila ka milagro dili nato makita. Ang uban molabay nga wala mailhi tungod kay nagdahom kita og butang nga lahi.3
Apan sa kataposan, nadawat man nato o wala ang milagro nga atong gipangita, ang matag usa kanato adunay pag-angkon sa labing talagsaong milagro sa tanan—ang Pag-ula ni Jesukristo, nga nagsaad nga makauban nato pagbalik ang mga minahal nga nawala; nga ang mga palas-anon matangtang ug makaplagan ang kahupayan; ug nga ang atong Manluluwas dili lamang nakahibalo pag-ayo sa atong matag kasakit, kasubo, ug pag-antos apan nahibalo usab kon unsaon sa pagtabang kanato nga makasagubang niini.4
Pilia ang Pagtuo
“Mahunong ba ang adlaw sa mga milagro?… Dili; kay pinaagi sa hugot nga pagtuo nga ang mga milagro nahimo; ug pinaagi sa hugot nga pagtuo ang mga anghel mopakita ug mangalagad sa mga tawo; busa, kon kini nga mga butang mohunong alaot ngadto sa mga katawhan, kay kini tungod sa pagkawalay pagtuo” (Moroni 7:35, 37).
Hinaot nga pilion nato nga motuo. Ug dayon unta kita magpuyo nga mapasalamaton sa mga milagro nga mosunod.