“Dawaton Siya sa Atong Panimalay,” Liahona, Dis. 2023.
Mga Tingog sa mga Santos sa Ulahing mga Adlaw
Dawaton Siya sa Atong Panimalay
Ang akong apo nga babaye nagpahinumdom kanako nga mahinungdanon ang paghatag kang Jesukristo og espesyal nga luna sa atong matag adlaw nga kinabuhi.
Paghulagway pinaagi ni Anastasia Suvorova
Atol sa bag-ohay nga panahon sa Pasko, miabiabi ko sa akong kwatro anyos nga apo nga babaye sa balay. Ang iyang mga ginikanan dili aktibo sa Simbahan.
Akong gipahimuslan ang among panahon nga magkauban aron sa pagdayandayan sa akong Christmas tree uban kaniya. Samtang nagtan-aw siya sa akong Belen, nga ako nang nabutang, ang iyang nawong makita nga nahibulong. Mao nga, nagsugod ko sa pagsulti niya sa yano nga paagi sa istorya sa pagkatawo ni Jesus. Akong gipasabot niya nga ang batang Jesus mahimong labing maayo nga tawo sa yuta, nga mahimo Siyang usa ka halangdon nga Hari, ug nga Siya kanunay nga motabang nato.
Ako siyang giistoryaan nga tungod kay si Maria ug si Jose walay makit-an nga lugar nga makatulgan, kinahanglan silang moistar sa usa ka kuwadra nga dunay mga hayop sa duol. Ug usab, nalibog siya.
Samtang nag-uban kami nianang adlawa, matag karon ug unya moduol siya sa Belen ug mosibog sa mga estatuwa. Wala siya kabantay, akong gitan-aw asa niya kini ibalhin. Matag higayon, iyang kuhaon ang estatuwa sa batang Jesus gikan sa pasongan ug isibog ang plastik nga mga manok ug ubang mga hayop palayo sa eksena sa Pagkatawo ni Jesus. Ako kining ibalik sa lugar niini, apan iya na pod kining ibalik og sibog.
Nianang gabhiona, sa pagkatulog na sa akong apo, akong nakaplagan ang akong gagmay nga mga manok sa sulod sa duol nga gagmay nga karton nga mga balaybalay, ang ubang mga hayop gipagawas aron manibsib, ug ang batang Jesus gikuha na usab gikan sa pasongan. Sa kataposan nakasabot na ko.
Human makadungog sa istorya sa pagkatawo ni Jesus, ang akong apo naghunahuna nga ang usa ka gimahal nga bata dili kinahanglan nga magpabilin diha sa dili komportable ug dili limpyo nga dapit. Hilabihan ang akong giistorya bahin sa Manluluwas nga dili siya makatugot nga anha ra siya sa usa ka pasongan nga gilibotan og mga hayop.
Ang akong gamay nga apo nagpahinumdom kanako nga mahinungdanon ang paghatag sa atong Manluluwas og usa ka espesyal nga dapit sa atong matag adlaw nga kinabuhi. Siya usab nagpahinumdom kanako nga kinahanglan kitang dili sama sa tinugyanan sa balay-abotanan nga walay gihatag nga lawak alang sa pamilya ni Jesus. Kondili, kinahanglan natong dawaton si Jesus ngari sa atong mga panimalay ug mga kasingkasing isip ang Hari sa Kalinaw.