Ikaw Nakadawat na sa Imong Pagtuga. Karon Unsa Man?

Ni Becca Wright

Mga Magasin sa Simbahan

Unsa ang sunod nga mahitabo human matugahan diha sa balay sa Ginoo?

Pahalipay! Nakatikang ka og dako diha sa “dalan sa pakigsaad balik sa atong Langitnong mga Ginikanan ug … sa atong mga minahal.”¹ Ang Langitnong Amahan adunay daghan kaayo nga giandam alang kanimo.

Balik sa Templo Kanunay Kutob sa Imong Mahimo

Karon nga nakadawat ka na sa imong kaugalingong pagtuga, balik kanunay kutob sa imong mahimo! Tingali nagpalambo ka pa sa imong pagpamatuod sa templo, ug OK ra kana. Wala kinahanglana kanimo nga masabtan ang tanang butang karon. Ang imong panabot ug pakigsaad nga relasyon uban sa Dios motubo samtang mobalik ka sa templo.

Kon nagpuyo ka duol sa templo, pagmatngon nga dili “ang pagkayano sa paagi, o ang kasayon niini” (1 Nephi 17:41) magpugong kanimo sa pagbalik kanunay. Si Elder Richard G. Scott (1928–2015) sa Korum sa Napulog Duha ka Apostoles mitudlo: “Akong nakita nga sa daghang mga higayon ang mga indibidwal mihimo og dakong mga sakripisyo sa pag-adto sa lagyo nga templo. … Kon ang templo duol na kaayo, ang gagmay nga mga butang mahimo nga mobalda sa inyong mga plano sa pag-adto sa templo. Paghimo og piho nga mga tumong, hunahunaa ang inyong mga kahimtang, kon kanus-a kamo makaapil sa mga ordinansa sa templo. Dayon ayaw itugot nga may bisan unsang butang nga makabalda niana nga plano.”²

Ibahandi ang Imong Rekomend

Unsa ka sagad kita mosimba diha sa templo mahimong mag-usab-usab, apan matag usa kanato mahimong ibahandi ang atong rekomend sa templo. Ang imong rekomend dili lamang usa ka pagtugot nga piraso. Kini nagpakita sa pagsalig sa Ginoo diha kanimo samtang nagdapit Siya kanimo ngadto sa Iyang balay dinhi sa yuta. Ang takos nga paghupot og rekomend sa templo nagpasabot sa imong tinguha sa pagbalik usa ka adlaw ngadto sa Iyang panimalay sa langit, usab. Si Elder Ronald A. Rasband sa Korum sa Napulog Duha ka Apostoles miawhag nato nga kanunayng magpuyo kada adlaw nga “girekomendar ngadto sa Ginoo”:

“Ang inyong rekomend sa templo nagpakita sa usa ka tinud-anay, espirituhanong tinguha nga naningkamot kamo sa pagsunod sa mga balaod sa Ginoo ug nahigugma sa Iyang mga gihigugma: pagkamapainubsanon, kalumo, pagkamakanunayon, gugmang putli, kaisog, kalooy, pagpasaylo, ug pagkamasulundon. Ug mopasalig kamo sa inyong kaugalingon niadtong mga sumbanan sa inyong pagpirma sa inyong ngalan nianang sagrado nga dokumento. …

“Aron mahimong ‘girekomendar ngadto sa Ginoo’ mao ang mapahinomdoman sa unsay gilaoman sa usa ka Santos sa Ulahing mga Adlaw nga nagtuman sa pakigsaad.”³

Ampingi ang Imong mga Garment sa Templo

Sumala sa gipahayag sa Unang Kapangulohan, ang sagrado nga pribilehiyo sa matinud-anong pagsul-ob sa garment sa templo usa ka “makita nga pagpadayag sa kaugalingong pasalig sa pagsunod sa Manluluwas nga si Jesukristo.”⁴

Ang tarong nga pagsul-ob sa mga garment sa templo mahimong malipayon nga pagkonsiderar “sa paagi sa Ginoo sa pagtugot kanato nga atong dad-on ang tipik sa templo kon kita mobiya. … Ug bisan og dili kita kanunay nga anaa sa templo, usa ka bahin niini kanunay nga ania kanato sa pagpanalangin sa atong kinabuhi.”⁵

Ang Langitnong Amahan naghatag kanimo og dakong gasa (mao kana ang gipasabot sa pagtuga). Ang matinahorong pagsul-ob ug pagsulti sa atong mga garment sa templo mao ang yano nga mga paagi nga imong mapakita ang imong kamapasalamaton alang niini nga gasa.

Pagmatinud-anon

Ang kamatinud-anon wala nagpasabot nga kanunay kitang puno sa Espiritu sa Ginoo. Nagpasabot kini nga molahutay kita diha sa hugot nga pagtuo bisan kon kita dili segurado. Ang Ginoo nagpasalig og dakong mga panalangin niadtong kinsa mopili Kaniya.

“Kamo gagmay nga mga bata, ug kamo wala pa gihapon makasabot unsa ka dako ang mga panalangin sa Amahan nga anaa sa iyang kaugalingon nga mga kamot ug giandam alang kaninyo;

“…sa ingon niana, paglipay, kay Ako mogiya kaninyo. Ang gingharian mainyo ug ang mga panalangin niana mainyo, ug ang mga katigayonan sa kahangtoran mainyo” (Doktrina ug mga Pakigsaad 78:17–18).

Si Presidente Russell M. Nelson midugang ngadto niining mga saad:

“Ako mosaad kaninyo nga sa kadugayan, ang templo mahimong usa ka dapit sa kaseguroan, kahupayan, ug pagpadayag.”⁶

“Ako mosaad nga kon inyong dugangan ang inyong panahon sa buhat sa templo ug sa family history, mouswag ug molambo ang inyong abilidad sa pagpaminaw Kaniya.”⁷

“Bahandia ug tahora ang inyong mga pakigsaad labaw sa tanan nga ubang mga pasalig. Samtang inyong ipatigbabaw ang Dios sa inyong kinabuhi, ako mosaad kaninyo og mas dako nga kalinaw, pagsalig, hingpit nga kalipay, ug oo, kapahulayan.”⁸

Ang matag usa niini nga mga panalangin mainyo samtang kamo maningkamot sa pagpadayon sa pagpalambo sa inyong pakigsaad nga relasyon uban sa Langitnong Amahan ug ni Jesukristo—ang labing mahinungdanon nga relasyon sa imong kinabuhi.