Ang Akong Manluluwas Ang Tanan Alang Kanako

Ni Umu Sesay, Washington, D.C., USA

Si Jesukristo naghatag kanato sa Iyang ebanghelyo diha sa usa ka yano nga paagi. Siya motabang kanato subay sa dalan. Kon kita mosunod Kaniya, ang tanan mamaayo ra.

Kanunay nakong makita ang full-time nga mga misyonaryo sa akong panimalay sa Sierra Leone, apan wala ko moduol kanila tungod kay lahi ang akong tinuohan. Sa wala madugay, sa dihang nahimamat nako sila sa usa ka hunonganan sa bus sa Washington, D.C., nagsugod sila sa pagsulti kanako mahitungod sa Manluluwas ug sa unsa nga paagi Siya nahigugma kanako. Gidapit ko nila sa simbahan, mao nga miadto ko.

Ang unang butang nga nakapahibalo kanako nga kini mao ang dapit nga ako unta anaa mao ang pag-abiabi gikan sa mga miyembro sa Simbahan. Usa ka babaye ang migakos nako pag-ayo nga sa akong hunahuna nakadungog ko, “Welcome ka dinhi. Mahimo kang mobalik.” Miingon ko, “OK.”

Ang Espiritu moabot uban sa mga misyonaryo kon sila mosulod sa inyong balay, ug sila mobilin niini uban kaninyo. Ang Espiritu naglihok diha kaninyo ug mousab kaninyo. Ang akong kausaban naggikan sa kamatuoran sa gisulti sa mga misyonaryo kanako ug sa gugma nga akong gibati.

Ang mga misyonaryo mitudlo nga ang Langitnong Amahan nahigugma kanako, nga ako Iyang anak nga babaye, ug nga gusto Niya nga ang tanang pamilya maghiusa sa kahangtoran. Nagtuo ako kaniadto nga kon mamatay kamo, lainlain ang inyong adtoan ug ang tanan magbulag. Apan sa Simbahan, kami nagtuo nga makita ninyo pag-usab ang inyong pamilya. Kana mitandog sa akong kasingkasing. Gusto nako kana para nako, ug gusto nako kana para sa akong pamilya.

Kinahanglan nakong tawagan ang akong tulo ka anak sa balay ug sultihan sila. Gusto nakong ipakigbahin ang gugma nga gipakita ni Kristo kanako.

“Nakatagbo kog pipila ka misyonaryo dinhi,” giingnan ko sila. “Gitudloan ko nila niini. Gitudloan nila ako niana.” Giingnan nako sila sa pag-imbestigar sa Simbahan.

Ang akong mga anak anaa na sa Simbahan karon, nabunyagan sa Sierra Leone. Ang usa gusto gani nga magmisyon. Mao kana ang kaayo ni Kristo. Ang ubang mga sakop sa pamilya magpasakop usab sa Simbahan, apan ang uban nagpanuko. Gipresentar ko gihapon si Kristo ngadto kanila.

Inyong Bag-ong Pamilya

Gimingaw ko sa akong mga anak, ug gimingaw sila kanako. Apan giingnan nako sila, “Wala ko sa Sierra Leone, pero naa ang Simbahan. Ang Simbahan mao ang inyong bag-o nga pamilya.” Ang Simbahan ni Jesukristo sa mga Santos sa Ulahing mga Adlaw naglambo didto. Sa dihang nakadungog ko nga magkanaa na kami og templo sa Sierra Leone, mitindog ko ug milukso. Ang templo malinawon kaayo. Mao kini ang labing maanindot nga gambalay sa tibuok nasod.

Sukad nagpamiyembro ko sa Simbahan, napanalanginan ko og maayo. Makahimo nako sa mga butang karon nga wala nako nahibaloan nga mahimo nako. Makakumpas [conduct] nako sa musika. Makahimo ko sa pagtudlo sa mga bata diha sa Primary. Gihigugma ko sila, ug gihigugma usab ko nila. Makakanta ko diha sa choir. Mikanta pa gani ko diha sa choir atol sa sesyon sa Dominggo sa buntag sa pagpahinungod sa Washington D.C. Temple niadtong Agosto 2022. Wala gyud ko magdahom nga naa ko diha sa templo kauban ni Presidente Russell M. Nelson, nga nagkanta para niya. Apan nahitabo kini. Usa kadto ka nindot kaayo nga panalangin nga maanaa diha sa presensya sa propeta.

Usa sa akong paborito nga mga kasulatan mao ang 2 Nephi 28:30: “Ako mopadayag ngadto sa mga katawhan og pagtulon-an human sa usa ka pagtulon-an, lagda human sa usa ka lagda, diyotay dinhi ug diyotay didto.” Ingon niana ang pagdala sa Dios nako—hinay-hinay.

Wala ako makasabot sa tanan, apan nagkat-on ako kada-adlaw. Kada-adlaw ang Gospel Library nga app sa Simbahan naghatag nako og kasulatan. Ako kining basahon ug mamalandong niini sa dili pa ako mogawas. Dayon mag-ampo ko ngadto sa Langitnong Amahan. Ingon niana kon giunsa nako pagpuyo ang akong kinabuhi, nagkat-on og gamay sa tanan nga oras. Usa ka panalangin nga mahibaloan kon unsaon nato pagkinabuhi, bisan unsa pa ang atong kahimtang, bisan kon kita dato o kabos.

Si Jesus Makausab Kaninyo

Isip tawo, usahay gusto nato nga mahisalaag, apan kon atong tugotan Siya, si Jesus modala kanato balik ngadto sa atong Langitnong Amahan. Siya naghatag kanato sa Iyang ebanghelyo sa yano nga paagi. Siya motabang kanato subay sa dalan. Kon kita mosunod Kaniya, ang tanan mamaayo ra.

Kahibulongan kaayo si Jesus. Siya ang tanan alang kanako. Gihigugma nako Siya. Iya kong gipabati nga gihigugma ug gihatagan og bili, sama sa usa ka anak sa Langitnong Amahan. Si Jesus makausab kanimo kon moduol ka Kaniya—sa imong paagi sa pakigsulti, sa paagi sa imong pagbuhat sa mga butang, bisan sa imong kultura.

Ang mga misyonaryo nakakaplag kanako, ug akong gidawat si Jesus diha sa akong kinabuhi. Malipayon ko nga nakaplagan nako Siya. Gihimo ko niya nga bag-ong binuhat. Ang daang mga butang nagpangagi na. (Tan-awa sa 2 Mga Taga-Corinto 5:17.)

Wala ko kahibalo unsa ang umaabot alang kanako. Ang Langitnong Amahan nasayod niana. Ang akong plano mao ang pag-angkon og dugang nga edukasyon ug paghimo og mga tumong diha sa Ginoo—mahisama Kaniya, maglakaw sama Kaniya, makigsulti sama Kaniya, ug mas mopaduol Kaniya. Ingon niana ang Iyang gusto nga kita mamahimo.

Nagpaabot ko nga makigkita Kaniya pag-usab.