Digital Lamang
Ang Milagro sa Berde nga Medyas sa Pasko
Ang tagsulat nagpuyo sa California, USA.
Unsaon gayod namo nga makaplagan ang usa ka medyas taliwala sa 165+ nga nag-awas nga mga kariton sa hinatag nga mga butang?
Nianang Pebrero samtang naglimpyo sa akong garahe, mihukom ako sa paghatag og usa ka kaban nga puno sa mga dekorasyon sa Pasko, gumikan nga ang akong mga anak karon dagko na. Mga duha ka semana human magbutang niini diha sa usa ka tindahan nga barato og baligya [thrift store], mihisgot ako sa mga gihatag ngadto sa akong anak nga babaye, si Kim. Mipatuwaw siya, “Ma, anaa pa nimo ang akong berde nga medyas sa Pasko, nanghinaot ako?” Makaguol, kinahanglang ako siyang sultihan nga nahatag pa lamang gayod nako!
Nahimo ko ang mga medyas alang sa among unom ka gagmay nga mga bata gikan sa panapton nga de lana. Ang ilang mga ngalan gibutangan og pilak nga nagkidlap-kidlap tuyok sa ibabaw. Namugos si Kim nga siya gusto og usa ka berde nga medyas sa Pasko bisan tuod ang tanan pula. Wala nako naamgohi human niining tanan nga mga tuig nga kini dako pa kaayo og kahulogan ngadto kaniya. Dili maayo ang akong gibati nga akong nahatag ang iyang medyas, busa mihukom ako sa pagtawag sa tindahan nga barato og baligya aron mahibaloan kon makuha ko ba kini og balik bisan unsaon.
Si Tara, ang manedyer, nangutana kon kini nabutang ba sa usa ka pilak nga kariton o asul nga kariton. Wala ako mahibalo tungod kay usa ka trabahador mikuha sa mga kahon ug mga bag gikan sa akong kaban, ug ako wala manumbaling kon sa unsa nga mga kariton kini gipamutang. Misulti siya kanako nga dihay gatos ka pilak nga mga kariton ug 68 ka asul nga mga kariton nga nag-awas sa kapuno ug wala mapahimutang sa bisan unsang piho nga paagi! Si Tara miingon nga sa tanang katuigan nga siya nagtrabaho didto, siya walay nahibaloan gayod nga nangita og usa ka butang human nila nahatag og sayop. Apan malipay siya nga mouban kanako sa pagpangita didto sa kwarto nga han-ayanan [sorting room].
Mi-drayb ako ngadto sa tindahan nga may kanunay nga pag-ampo diha sa akong kasingkasing nga makit-an ang berde nga medyas sa Pasko, nagpaila nga kini may dako kaayong kahulogan ngadto sa akong anak nga babaye. Kita gisugo, bisan pa, sa “pagpangamuyo ngadto kaniya sa inyong mga balay, oo, sa tanan nga sulod sa inyong panimalay. … Himoa nga ang inyong mga kasingkasing puno, magpadayon sa pag-ampo ngadto kaniya sa kanunay alang sa inyong kaayohan, ug usab alang sa kaayohan niadto kinsa naglibot kaninyo” (Alma 34:21, 27).
Sumala sa gitudlo ni Elder Juan A. Uceda sa Seventy: “Sa higayon gayod nga moingon kita, ‘Amahan sa Langit,’ Siya nagpaminaw sa atong mga pag-ampo ug mabination ngari kanato ug sa atong mga panginahanglan. Ug busa ang Iyang mga mata ug ang Iyang mga dunggan nalambigit na karon nganha kaninyo. … Siya motan-aw kaninyo uban ang mga mata sa gugma ug kalooy—gugma ug kalooy nga kita dili hingpit nga makasabot. Apan ang gugma ug kalooy anaa Kaniya sa higayon gayod nga ikaw moingon, ‘Amahan sa Langit.’”1
Misugod ako sa pagpangita diha sa mga butang sa Pasko diha sa mga estante sa dakong bahin sa tindahan, apan ang medyas wala didto. Akong nasugatan si Tara, ug siya miuban kanako ngadto sa kwarto nga han-ayanan.
Asa magsugod! Samtang kami milabay sa nagsunod nga laray sa pilak nga mga kariton nga nagdung-aw kanamo, naningkamot ako og dali sa pagkaykay sa mga sulod sa matag usa. Mibitad si Tara og bisan hain nga kariton ug gipaligid sa unahan aron makakita ako sa kilid sa kariton nga sunod niini. Mihangad ako ug diha-diha dayon nailhan ang usa ka kahon nga karton nga adunay akong sinulat sa kamot sa kilid (“mga suga nga elektrik ug adaptor”). Ang security guard mipakanaog niini alang kanako, apan ang sulod mao lamang ang Dutch nga hurnohan nga akong gihatag.
Gilakaw nako libot ang kariton ngadto sa pikas kilid. Sa ibabaw sa laing kahon, ako nakakita sa berde nga panapton nga de lana nga medyas sa Pasko nga migimaw sa gawas sa usa ka puti nga plastik bag. Sa katingala sa tanan, among nakaplagan kon unsa ang akong gipangita!
Miingon si Tara, “Kinahanglan nga imong litratohan gikan sa itaas aron si Kim makakita unsa ka dako ang bag-o lamang nga nahitabo!”
Sa tanang mga dapit nga atong matan-aw, kita naadto didto kon diin kita gikinahanglan nga maadto. “Swerte,” tingali ang uban nag-ingon. Dili. “Sulagma?” Dili. Ebidensiya nga kita adunay usa ka maloloy-on ug mahigugmaong Langitnong Amahan kinsa nagtubag bisan sa labing walay hinungdan apan kinasingkasing nga mga pag-ampo sumala sa Iyang kaalam ug kabubut-on? Sigurado! Bisan tuod dili tanan nga mga pag-ampo gitubag diha gyod dayon o sa paagi kita milaom, kini usa ka milagro alang kanato nianang adlawa!
Karon, sa matag tuig nga kami magsaulog sa pagkatawo sa atong Manluluwas, nagbitay sa daoban [fireplace] ni Kim ang mahimong usa ka malumong pahinumdom sa milagro sa berde nga medyas sa Pasko––ebidensiya sa gugma sa Langitnong Amahan alang sa Iyang mga anak.