Pagpangandam sa Pagtambong sa Templo

mga tawo nga naglakaw paingon ngadto sa Ogden Utah Temple

Diha sa mga templo sa Ang Simbahan ni Jesukristo sa mga Santos sa Ulahing mga Adlaw makadawat kita og sagrado nga mga pakigsaad ug mga ordinansa alang sa atong kaugalingon ug sa atong mga katigulangan. Motambong kita sa templo aron sa pagpakita sa atong gugma ug pasalamat alang sa Langitnong Amahan ug ni Jesukristo. Makapangandam kita sa pagtambong sa templo pinaagi sa pagkat-on ug pagpuyo sa ebanghelyo ni Jesukristo. Alang sa dugang nga impormasyon mahitungod sa mga templo, tan-awa ang artikulo sa Mga Sukaranan sa Ebanghelyo “Buhat sa Templo” sa Oktubre 2021 nga isyu sa Liahona.

Litrato sa Durban South Africa Temple pinaagi ni Matthew Reier

Ang Balay sa Ginoo

Ang mga templo gitawag og ang “balay sa Ginoo.” Sagrado kini nga mga dapit diin kita makabati sa Espiritu sa Dios ug sa Iyang gugma alang kanato. Mga dapit usab kini diin kita makahimo og mga pakigsaad ug makadawat og espesyal nga mga ordinansa nga moandam kanato nga makaangkon og mahangturon nga kinabuhi. (Ang mga pakigsaad maoy sagrado nga mga saad tali sa Dios ug sa Iyang mga anak.) Ang pagkamatinud-anon ngadto sa atong mga pakigsaad ug pagdawat niining mga ordinansa nagtabang kanato nga makaangkon og espesyal nga relasyon uban sa Langitnong Amahan ug ni Jesukristo.

Litrato sa Guayaquil Ecuador Temple pinaagi ni Janae Bingham

Kinsa ang Makatambong sa Templo?

Ang mga miyembro sa Simbahan makapahigayon og mga bunyag alang sa mga patay sugod sa tuig nga sila mag-edad na og 12. Ang usa ka miyembro makadawat sa pagtuga kon siya labing menos 18 anyos, namiyembro sa Simbahan sulod sa usa ka tuig, ug nagtinguha sa paghimo ug paghupot og mga pakigsaad sa templo (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 27.2.2, ChurchofJesusChrist.org). Ang usa ka lalaki ug usa ka babaye kinsa nakadawat na sa ilang pagtuga sa templo mahimong maselyo (maminyo) alang sa kahangtoran diha sa templo.

Mga Pakigsaad ug mga Ordinansa

Ikaw maghimo og mga pakigsaad ug modawat og mga ordinansa diha sa templo. “Ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon” (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 97). Ang ordinansa usa ka sagradong pisikal nga buhat nga ipahigayon pinaagi sa awtoridad sa pagkapari. Ang mga ordinansa adunay lawom nga espirituhanon nga kahulogan. Sama pananglit, kon moapil ka og ordinansa, imong gipakita sa Dios nga andam kang modawat ug mohupot sa Iyang mga pakigsaad.

Personal nga Pagpangandam

Pangandam sa espirituhanon nga paagi pinaagi sa pagsunod sa mga pagtulon-an ni Jesukristo ug paghupot sa mga pakigsaad nga imong gihimo uban sa Dios diha sa bunyag. Mahimo ka usab nga makatuon sa mga kapanguhaan sa Simbahan, sama sa mga kasulatan ug mga pakigpulong sa kinatibuk-ang komperensiya. Ang Temples.ChurchofJesusChrist.org naghatag og impormasyon mahitungod sa unsay paabuton kon motambong ka sa templo. Naglakip usab kini og dugang nga mga detalye mahitungod sa mga pakigsaad, mga ordinansa, ug mga simbolismo sa templo.

Litrato sa Nauvoo Illinois Temple pinaagi ni Eve Tuft

Simbolismo

Ang Ginoo kasagaran nagtudlo gamit ang mga simbolo. Sama pananglit, bunyag—pagpaunlod sa tubig ug pagtunga pag-usab—sama ra sa imong daan nga kaugalingon nga himatyon ug ang imong bag-o nga kaugalingon nga natawo pag-usab (tan-awa sa Mga Taga-Roma 6:3–6). Ang mga ordinansa sa templo nagtudlo ngadto ni Jesukristo ug sa Iyang Pag-ula. Kini mahimong malisod sa pagsabot ang tanang simbolismo sa unang higayon nga nagtambong ka sa templo, apan mahimo kang mopadayon sa pagkat-on samtang magbalik-balik ka sa templo sa imong tibuok kinabuhi.

Rekomend sa Templo

Sa pagsulod sa templo, kinahanglan kang andam ug takos. Ikaw mahimong makadawat og rekomend sa pagsulod sa templo human sa interbiyo sa imong bishop o presidente sa branch ug sa stake o presidente sa misyon. Kini nga mga lider mangutana og han-ay sa mga pangutana aron makaseguro nga nagpuyo ka sa ebanghelyo ni Jesukristo. Ang imong mga lider makasulti kanimo mahitungod niini nga mga pangutana sayo pa niana.

Pagbalik ngadto sa Templo alang sa Imong mga Katigulangan

Ang Langitnong Amahan gusto nga tanan Niyang anak mohimo og mga pakigsaad uban Kaniya ug modawat sa sagrado nga mga ordinansa. Kini nga mga ordinansa, sama sa bunyag ug ang pagtuga, kinahanglang buhaton sa mga templo alang niadtong kinsa mitaliwan na nga wala makadawat sa ebanghelyo. Mahimo kang mobalik sa templo aron mopahigayon og mga ordinansa alang sa namatay na nga mga sakop sa pamilya.