Ang Labing Mahinungdanon sa Tanan nga mga Gasa sa Dios

Ni Elder Brent H. Nielson

Sa Kapangulohan sa Seventy

Samtang akong naobserbahan ang diwa sa Pasko, ang akong mga hunahuna anaa sa tulo ka gasa.

Si Jose ug Maria nga ang kalangitan sa kagabhion ang background

Kanunay gayod ko nga madani sa hugpong sa mga pulong nga “ang diwa sa Pasko.” Panahon sa buwan sa Disyembre, sa Kristiyanos nga mga nasod, adunay makita nga kamabination, kalinaw, ug gugma. Ang akong asawa, si Marcia, ug ako mipuyo sa Estados Unidos, Finland, Chile, Mexico, New Zealand, ug sa Pilipinas. Bisan asa kami mopuyo, among makaplagan nga panahon sa bulan sa Disyembre, ang mga nasod, mga komunidad ug mga inidibidwal nagsinati sa diwa sa Pasko.

Usa ko ka abogado sa korte sulod sa 30 ka tuig. Kanunay kong interesado sa pagpaniid kon unsa kadaghan sa mga tawo ang mopalangay sa ilang kiha o mosulay sa pagpakigsabot sa ilang legal nga kaso o gani undangon ang ilang kaso atol sa bulan sa Disyembre. Adunay tinguha nga dili makig-away panahon sa Pasko. Daghan ang naninguha nga makakab-ot og kalinaw. Nakabantay ko nga panahon sa bulan sa Disyembre ang among mga silingan mas mahigalaon; ang mga tindera sa mga tindahan, mga bangko, ug mga opisina sa koreyo mas matinabangon kaayo; ug adunay diwa sa kamabination ug kalinaw samtang nagsaulog kita sa panahon sa Pasko.

Unsa man ang Diwa sa Pasko?

Samtang namalandong ko niini nga pangutana, naghunahuna ko mahitungod sa atong kaugalingon nga kasinatian uban sa milagro sa pagkatawo sa Manluluwas. Ang mga kasulatan nagtudlo kanato sa atong kinabuhi sa wala pa dinhi sa yuta ug sa Dakong Konseho sa Langit.¹ Ikaw ug ako dinha samtang ang atong Amahan mipresentar sa Iyang plano alang kanato sa pag-anhi dinhi sa yuta, mag-angkon og usa ka lawas, ug masulayan ug matestingan. Ang atong Amahan mipasabot ngari kanato nga kita makasala ug nga magkinahanglan kita og usa ka Manluluwas kinsa mobayad alang sa atong mga sala. Ingon sa gipangutana sa atong Amahan, “Kinsa ang Akong ipadala?” Si Jesukristo miingon, “Ania Ako, ipadala Ako” (Abraham 3:27; tan-awa usab sa Moises 4:1–4). Sa dihang ang Amahan mipresentar niini nga plano ngari kanato ug atong nahibaloan ang pagkaandam sa Manluluwas sa pag-anhi dinhi sa yuta, kita tanan misyagit sa kalipay (tan-awa sa Job 38:7).

Sa atong kinabuhi sa wala pa dinhi sa yuta, nasayod kita nga aron makaangkon kita og kinabuhing dayon, malimpyohan gikan sa sala, ug makabalik ngadto sa Amahan, ang Manluluwas kinahanglan nga matawo ug mopahigayon sa Pag-ula, lakip ang Pagpalansang sa Krus ug ang Pagkabanhaw.

Sa kinatung-an sa panahon, sa dihang sa kataposan natawo na gayod ang Manluluwas, daw kini makatarunganon nga magdahom nga miapil kita uban sa dakong panon sa mga anghel nga nagdayeg sa Dios ug nagpahayag og pasalamat alang niini nga hitabo nga gipaabot natong tanan. Si Lucas mirekord sa ingon niini nga paagi:

“Ug sa kalit mitungha usab uban sa anghel ang usa ka dakong panon sa mga anghel sa langit nga nag-awit ug mga pagdayeg sa Dios,

“Dalaygon ang Dios sa kahitas-an, ug sa yuta panagdait sa mga tawo” (Lucas 2:13–14).

Tungod kay kadtong uban kanato kinsa nagpuyo niini nga yuta karon mga saksi sa atong kinabuhi sa wala pa dinhi sa yuta ngadto sa plano nga gipresentar sa Amahan ug tungod kay kini posible kita dayon nahimong mga tigpaniid sa pagkatawo sa Manluluwas, dili ikahibulong nga atol sa panahon sa Pasko nga kita nagsaulog sa Iyang pagkatawo, ang tabil nagkanipis ug ang milagro sa pagkatawo sa Manluluwas mipukaw sa kinahiladman sa kalag sa matag Kristiyano og gugma alang sa Dios ug alang sa ilang isig ka tawo.

Annunciation to the Shepherds [Pagpahibalo ngadto sa mga Magbalantay sa Karnero], ni Del Parson

Mga Milagro sa Panahon sa Pagkatawo sa Manluluwas

Adunay daghang ubang milagro sa pagkatawo sa Manluluwas nga nakaimpluwensya sa mga Kristiyanos atol sa panahon sa Pasko. Kini naglakip sa:

Usa ka anghel nga nagpakita ngadto kang Maria aron sa pagpahibalo kaniya nga moapil siya sa milagrosong pagpanamkon sa usa ka birhen (tan-awa sa Lucas 1:26–35).
Usa ka anghel nagpakita ngadto kang Jose aron sa paghatag og instruksyon mahitungod sa papel ni Maria sa pagdala sa Manluluwas sa kalibotan ug ang panginahanglan alang ni Jose sa pagtabang ug pagsuporta kaniya (tan-awa sa Mateo 1:20–24).
Ang milagro sa pagpanamkon sa usa ka birhen (tan-awa sa Lucas 2:7).
Ang milagro sa pagkasabot ni Elisabet nga si Maria manamkon sa Manluluwas sa kalibotan (tan-awa sa Juan 1:39–44).
Ang pagpakita sa usa ka anghel niadtong mga magbalantay sa mga karnero didto sa sibsibanan nga nanagtukaw sa kagabhion sa pagbantay sa ilang mga hayop (tan-awa sa Lucas 2:8–12).
Ang katumanan sa panagna sa anghel nga ang mga magbalantay sa karnero makakaplag sa Manluluwas nga giputos og bakbak ug naghigda sa usa ka pasongan (tan-awa sa Lucas 2:12, 16).
Ang bitoon nga mipakita sa kalangitan nga wala lang mabantayi sa Jerusalem ug sa palibot nga mga komunidad apan usab nabantayan kini niadtong naa sa Basahon ni Mormon (tan-awa sa Mateo 2:1–2, 9; 3 Nephi 1:21).
Ug sa kataposan, usa ka dakong panon sa mga anghel, posible naglakip kanimo ug kanako, miapil uban sa anghel sa pagdayeg sa Dios, nanag-ingon, “Dalaygon ang Dios sa kahitas-an, ug sa yuta panagdait, sa mga tawo” (tan-awa sa Lucas 2:13–14).

Ang milagro sa Iyang pagkatawo misangpot sa kataposan ngadto sa milagro sa atong pagpakatawo og usab ug kinabuhi nga dayon, “ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7). Samtang mamalandong kita niana nga gasa, ang atong mga hunahuna ipunting og sakto sa milagrosong pagkatawo sa Manluluwas nga si Jesukristo ug sa Iyang walay kinutoban nga Pag-ula. Ang gasa sa Manluluwas ngari kanato talagsaon ug dili matukib.

Ang Gugma sa Langitnong Amahan

Ang laing mahinungdanon nga gasa nga adunay diwa sa Pasko gihatag sa Amahan, kinsa andam kaayo nga mitugot sa sakripisyo sa Iyang Bugtong Anak. Ang Manluluwas nagtudlo kanato diha sa Bag-ong Tugon nga kini nga gasa gihatagan og importansya pinaagi sa gugma sa Amahan nga ania alang sa matag usa kanato: “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag, kondili makabaton hinuon sa kinabuhing dayon” (Juan 3:16). Kana nga gasa sa kinabuhing walay kataposan mao ang labing mahinungdanon sa tanan nga mga gasa sa Dios.

Palandongi sa makadiyot ang dili matugkad nga gugma nga ang Amahan aduna alang kanimo. Kana nga gugma nakaaghat sa Amahan nga mohangyo sa Iyang Anak sa pagdala nganha sa Iyang kaugalingon sa atong mga sala ug mga kahuyang.

Tungod sa Iyang gugma alang kanato, ang Amahan mitan-aw sa Iyang Anak nga nag-agas ang dugo sa matag lungag sa panit diha sa Tanaman sa Getsemani (tan-awa sa Doktrina ug mga Pakigsaad 19:18); nga gilatos (tan-awa sa Mateo 27:26); may korona gikan sa mga sanga nga tunokon ug gipahaom kini sa Iyang ulo (tan-awa sa Mateo 27:29); gilud-an (tan-awa sa Mateo 27:30); ug gilansang sa krus (tan-awa sa Mateo 27:35).

Ang Amahan ug ang Anak makapahunong unta niini bisan kanus-a, apan tungod sa gugma alang kanato, Sila mitugot niini sa pagpadayon, nahibalo nga aron ang kalooy motagbaw sa kaangayan, aron mabayran ang atong mga sala ug mga kahuyang, kini nagkinahanglan nga mao ang “mahinungdanon ug kataposan nga sakripisyo” (Alma 34:14–16). Hunahunaa lang sa makadiyot ang gibating kahupay sa Amahan sa dihang gilitok sa Iyang Bugtong Anak ang Iyang kataposan nga mortal nga mga pulong, “Natapos na” (Juan 19:30), ug miduko sa Iyang ulo ug mibiya sa Iyang mortal nga lawas.

Unsay hangyo sa Amahan kanato agig balos alang niining talagsaon nga gasa? Si Hari Benjamin mitubag niana nga pangutana sa dihang siya miingon, “Ang tanan nga iyang gikinahanglan kaninyo mao ang paghupot sa iyang mga sugo” (Mosiah 2:22). Kita magtuman sa Iyang mga sugo sa atong paghigugma Kaniya ug sa paghigugma sa atong silingan (tan-awa sa Mateo 22:37–39). Kon kita makasabot sa dakong gasa sa Amahan ug sa dakong gasa sa Anak, kita masayod nga “kay gihatagan [kita] og daghan, [kita] usab mohatag.”²

Ang diwa sa Pasko gipakita sa dihang ang grasya sa Amahan ug ang grasya sa Anak natapos diha sa dugay nang gipaabot nga adlaw nga ang Manluluwas sa kalibotan matawo. Ang mga milagro nagpadayon sa atong matag kinabuhi samtang ang pagkatawo sa Manluluwas naghimo nga posible sa milagro sa atong pagkatawo og usab. Pinaagi sa Iyang grasya, kita mahimong hingpit diha ni Kristo (tan-awa sa Moroni 10:32). Ang gasa sa Amahan ug ang gasa sa Anak nagdala kanato og kinabuhing dayon, ang labing mahinungdanon sa tanan ng mga gasa sa Dios.

Kini nga Pasko samtang naniid ko sa diwa sa Pasko, ang akong mga hunahuna anaa sa tulo ka gasa: (1) ang gasa sa Anak samtang matugtanon Siyang mibayad sa walay kinutoban nga bili alang sa mga sala nga wala Niya mabuhat ug miantos sa kabug-at sa mga kagul-anan nga wala Niya mabuhat (tan-awa sa 1 Mga Taga-Corinto 7:23); (2) ang dili katoohan nga gasa sa Amahan samtang Iyang gitugotan ang sakripisyo sa Iyang Bugtong Anak aron kita makaangkon og kinabuhing dayon; ug (3) ang gasa nga kinahanglan nakong ibalik samtang magsunod ako sa Ilang balaang ehemplo.

Unta ang atong mga hunahuna niini nga Pasko mopunting ngadto Kanila. Unta mosunod kita Kanila samtang maghinuklog kita sa gasa nga Ilang gihatag ngari kanato ug modawat sa grasya nga gihatag Nila kanato.³