Ang Manluluwas sa Tanan, usa ka Ebanghelyo alang sa Tanan

Ni Elder Jeffrey R. Holland

Sa Korum sa Napulog Duha ka Apostoles

Ang ebanghelyo, Pag-ula, ug Pagkabanhaw ni Jesukristo mopanalangin sa tanang anak sa Dios.

Ang gipahiuli nga ebanghelyo ni Jesukristo mao ang, una, nag-una, ug sa kahangtoran, ang tinubdan sa malungtarong kalipay, tinuod nga kalinaw, ug hingpit nga kalipay alang sa tanan niining ulahing mga adlaw. Ang mga panalangin nga naggikan sa ebanghelyo ug gikan sa walay kinutoban nga kamaayo ni Kristo wala gayod gituyo nga alang lamang sa pipila ka pinili, sa karaan o diha sa modernong mga panahon.

Dili igsapayan kon unsa ka kulang ang atong bation, ug bisan pa sa mga sala nga mopalayo kanato gikan Kaniya sulod sa usa ka panahon, ang atong Manluluwas nagseguro kanato nga “siya mituy-od sa iyang mga kamot ngadto [kanato] sa adlaw nga tanan” (Jacob 6:4), nagdapit kanatong tanan nga moduol ngadto Kaniya ug mobati sa Iyang gugma.

Mga Panalangin sa Ebanghelyo alang sa Tibuok Kalibotan

Ang ebanghelyo ni Jesukristo “gipahiuli niining ulahing mga adlaw aron makab-ot ang … mga panginahanglan sa matag nasod, kaliwatan, pinulongan, ug katawhan sa kalibotan.”¹ Ang ebanghelyo magamit sa mga tawo sa matag nasod, kaliwat, ug kultura aron sa pagtudlo nga “ang tanan managsama ngadto sa Dios” (2 Nephi 26:33).² Ang Basahon ni Mormon mao ang usa ka talagsaon nga saksi niini nga kamatuoran.

Kining mahinungdanon nga rekord nagpamatuod nga si Kristo naghinumdom sa tanang nasod (tan-awa sa 2 Nephi 29:7) ug magpakita sa “iyang kaugalingon ngadto sa tanan kinsa motuo kaniya, … [ug] magbuhat og gamhanan nga mga milagro, mga timailhan, ug mga katingalahan, taliwala sa mga katawhan” (2 Nephi 26:13). Lakip niining gamhanan nga mga milagro, mga timailhan, ug mga katingalahan mao ang pagpakatap sa ebanghelyo. Mao nga, magpadala kita og mga misyonaryo sa tibuok kalibotan aron sa pagpamatuod sa maayong balita niini. Kita usab mopakigbahin sa ebanghelyo niadtong naglibot kanato. Ang paggamit sa gipahiuli nga mga yawe sa pagkapari alang sa mga buhi ug sa mga patay nagseguro nga ang kahingpitan sa ebanghelyo sa kataposan mahimong magamit sa matag anak nga lalaki ug anak nga baabye sa atong langitnon nga mga ginikanan—kaniadto, karon, o sa umaabot.

Ang labing importante nga aspeto niini nga ebanghelyo—ang nag-unang mensahe sa matag propeta ug apostol nga sukad gitawag ngadto sa buhat—mao nga si Jesus mao ang Kristo ug nga Siya mianhi aron sa pagpanalangin sa tanan. Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita nagpahayag nga ang Iyang maulaong sakripisyo alang sa tibuok kalibotan.

Ang Panginahanglan alang sa usa ka Walay Kinutoban ug Walay Kataposan nga Pag-ula

Samtang naglibot ko sa tibuok kalibotan, nagpahigayon ko og mga interbiyo sa mga miyembro sa Simbahan gikan sa nagkalainlain gayod nga mga kaagi. Nadasig ko nga makadungog kon sa unsang paagi nila nabati ang mga panalangin sa Pag-ula ni Jesukristo diha sa ilang mga kinabuhi, bisan kon mokompisal sila og sala nga nabuhat sa miagi. Pagkanindot nga ang makalimpyo nga kahupayan sa Iyang Pag-ula kanunay nga magamit natong tanan!

“Kinahanglan gayod nga adunay pag-ula nga pagahimoon,” mipahayag si Amulek, “o kon dili ang tanan nga mga katawhan dili makalikay nga mamatay.” Kita sa kahangtoran mahimong “[m]apukan ug [m]ahisalaag, … gawas kon kini pinaagi sa pag-ula,” nga nagkinahanglan og “usa ka walay kinutoban ug walay kataposan nga sakripisyo.” Kay “walay bisan unsa diin kubos sa walay kinutoban nga pag-ula nga igo sa mga sala sa kalibotan” (Alma 34:9, 10, 12).

Ang bantogan nga propeta nga si Jacob mitudlo usab nga tungod kay ang “kamatayon modangat ngadto sa tanan nga mga tawo, … gikinahanglan gayod nga adunay gahom sa pagkabanhaw” aron sa pagdala kanato ngadto sa presensiya sa Dios (2 Nephi 9:6).

Ang sala ug ang kamatayon gikinahanglan nga mabuntog. Kini mao ang misyon sa Manluluwas, nga maisogon Niyang gikompleto alang sa tanang anak sa Dios.

Gethsemane, ni J. Kirk Richards, dili mahimong pakopyahan

Ang Sakripisyo sa Atong Manluluwas

Sa Iyang kataposan nga gabii sa mortalidad, si Jesukristo misulod sa Tanaman sa Getsemani. Didto, Siya miluhod taliwala sa mga kahoy nga oliba ug misugod sa proseso sa pagbati og hilabihan nga pag-antos nga kamo ug ako dili gayod makasabot.

Didto, Siya misugod sa pagdala diha sa Iyang Kaugalingon sa mga sala sa kalibotan. Nabati niya ang matag sakit, kasubo, ug kaguol, ug gilahutay Niya ang tanang panghingutas ug pag-antos nga nasinati ninyo, nako, ug sa matag kalag kinsa nabuhi sukad o mabuhi pa. Kining dako ug walay kinutoban nga pag-antos “nakapahimo [Kaniya], … ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18). Siya lamang ang makabuhat niini.

Walay laing makahimo
Pagbayad sa sala.
Siya lang ang makaabli
Pasudlon ta unta.3

Gidala dayon si Jesus ngadto sa Kalbaryo, ug diha sa labing makalisang nga dili makiangayon nga higayon sa kasaysayan niini nga kalibotan, Siya gilansang sa krus. Walay laing makakuha sa Iyang kinabuhi gikan Kaniya. Isip ang Bugtong nga Anak sa Dios, Siya adunay gahom batok sa pisikal nga kamatayon. Siya mahimong mag-ampo unta ngadto sa Iyang Amahan, ug moabot unta ang mga panon sa anghel aron sa pagbuntog sa mga nagpaantos Kaniya ug sa pagpakita sa Iyang pagmando sa tanang butang. “Apan kon buhaton ko kini, unsaon man pagkatuman sa kasulatan,” nangutana si Jesus diha sa pagluib Kaniya, “nga nag-ingon nga kinahanglan mahitabo kini?” (Mateo 26:54).

Tungod sa Iyang hingpit nga pagkamasulundon ngadto sa Iyang Amahan—ug hingpit nga gugma alang kanato—si Jesus andam nga mihatag sa Iyang kinabuhi ug mikompleto sa Iyang walay kinutoban ug walay kataposan nga maulaong sakripisyo, nga molugway balik ngadto sa miagi ug mopadayon sa umaabot alang sa tanang kahangtoran.

Ang Kadaogan sa Atong Manluluwas

Si Jesukristo misugo sa Iyang Apostoles nga ipadayon ang Iyang buhat human sa Iyang kamatayon. Unsaon nila sa paghimo niini? Pipila kanila mga yano lamang nga mga mangingisda, ug walay nabansay diha sa mga sinagoga alang sa pagpangalagad. Nianang higayona, ang Simbahan ni Kristo ingon og padulong sa pagkawala. Apan ang Apostoles nakakaplag og kalig-on sa pagtuman sa ilang tawag ug nakaapekto sa kasaysayan sa kalibotan.

Unsay nakaingon sa kalig-on nga naggikan nianang dayag nga kahuyang? Ang lider sa Anglican nga simbahan ug eskolar nga si Frederic Farrar miingon: “Adunay usa, ug usa lamang ka posible nga tubag—ang pagkabanhaw gikan sa mga patay. Tanan niining lapad nga hingpit nga kausaban tungod sa gahom sa pagkabanhaw ni Kristo.”⁴ Isip mga saksi sa nabanhaw nga Ginoo, ang Apostoles nasayod nga walay makapugong niini nga buhat sa pag-uswag. Ang ilang pagsaksi mao ang tinubdan sa makapatunhay nga gahom samtang ang nahauna nga Simbahan mibuntog sa tanang kalisod.

Niining panahon sa Pasko sa Pagkabanhaw, isip usa sa Iyang giorden nga mga saksi, ako mopahayag nga sayo sa usa ka matahom nga buntag sa Dominggo, si Ginoong Jesukristo mibangon gikan sa kamatayon aron sa pagpalig-on kanato ug sa pagbugto sa mga higot sa kamatayon alang sa tanan. Si Jesukristo buhi! Tungod Kaniya, ang kamatayon dili mao ang atong kataposan. Ang Pagkabanhaw mao ang walay bayad ug malukpanon nga gasa ni Kristo ngadto sa tanan.

Christ and Mary at the Tomb [Si Kristo ug si Maria diha sa Lubnganan], ni Joseph Brickey

Duol ngadto kang Kristo

Ang ebanghelyo ug ang Pag-ula ni Jesukristo alang sa tanan—kana mao ang, matag usa. Ang paagi lamang nga atong masinati ang hingpit nga mga panalangin sa maulaon nga sakripisyo sa Manluluwas mao ang indibidwal nga pagdawat sa Iyang imbitasyon: “Duol kamo kanako” (Mateo 11:28).

Kita moduol ngadto kang Kristo samtang kita mopakita og hugot nga pagtuo diha Kaniya ug maghinulsol. Kita moduol ngadto Kaniya samtang kita mabunyagan diha sa Iyang ngalan ug modawat sa gasa sa Espiritu Santo. Kita moduol ngadto Kaniya samtang kita motuman sa mga sugo, modawat sa mga ordinansa, motahod sa mga pakigsaad, mohangop sa mga kasinatian diha sa templo, ug magpakabuhi sa matang sa kinabuhi nga puy-an sa mga disipulo ni Kristo.

Usahay, makasinati kamo og pagkawala sa kadasig ug kasagmuyo. Mahimong magmasulub-on kamo alang sa inyong kaugalingon o sa usa ka tawo nga inyong gihigugma. Mahimong mabug-atan kamo sa mga sala sa uban. Ang mga sala nga inyong nahimo—tingali seryoso nga mga sala—mahimong makaingon nga kamo mahadlok nga ang kalinaw ug kalipay mibiya na kaninyo sa kahangtoran. Niana nga mga panahon, hinumdomi nga ang Manluluwas wala lang mokuha sa kabug-at sa sala apan sa gihapon “[mi]antos sa mga sakit ug mga kasakit ug mga pagtintal sa matag matang” (Alma 7:11), lakip sa imoha! Tungod sa unsay Iyang giagian alang kaninyo, Siya personal nga nasayod unsaon sa pagtabang ninyo kon inyong dawaton ang Iyang makapausab sa kinabuhi nga imbitasyon: “Duol kamo kanako.”

Ang Tanan Giabiabi

Giklaro ni Jesukristo nga tanang anak sa Langitnong Amahan adunay managsama nga pag-angkon sa mga panalangin sa Iyang ebanghelyo ug Pag-ula. Siya nagpahinumdom kanato nga ang tanan “adunay kahigayonan ang usa sama ngadto sa uban, ug walay usa nga gidid-an” (2 Nephi 26:28).

“Siya nagdapit kanilang tanan sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye;” (2 Nephi 26:33).

“Siya nagdapit kanilang tanan”—kana nagpasabot kanatong tanan! Kinahanglan dili nato ihulagway ang atong kaugalingon o ang uban sa taphaw nga paagi o sa unsay naandan sa kalibotan. Kinahanglan dili gayod kita magbutang og mga babag sa pagbati sa gugma sa Manluluwas o motugot og mga hunahuna nga kita o ang uban dili na matabangan Niya. Sama sa akong gisulti kaniadto, “Imposible nga ang mahangtorong kahayag sa Pag-ula ni Kristo dili moabot [ni bisan kinsa].”⁵

Hinuon, sama sa gitudlo ni Sister Holland ug nako pipila lang ka bulan sa wala pa ang iyang pagtaliwan, kita gisugo nga “magbaton og gugma nga putli kansang gugma nga putli tiunay nga gugma” (2 Nephi 26:30).⁶ Kini mao ang gugma nga gipakita sa Manluluwas kanato, kay “Dili siya maghimo og bisan unsa gawas kon kini alang sa kaayohan sa kalibotan; kay siya nahigugma sa kalibotan, gani siya mitugyan sa iyang kaugalingon nga kinabuhi aron siya makadani sa tanan nga mga tawo ngadto kaniya” (2 Nephi 26:24).

Ako magpamatuod nga ang ebanghelyo ug ang Pag-ula ni Jesukristo alang sa tanang tawo. Ako nag-ampo nga kamo malipayon nga mohangop sa mga panalangin nga Iyang gidala.