Usa ka Dagway diha sa Bentana

Ni Maija-Kaarina Mäkinen, Pirkanmaa, Finland

Nagtuo ko nga ang akong silingan susitador, apan akong nasuta nga nagkinahanglan lang siya og usa ka higala.

Kanunay nakong makita ang samang dagway nga motan-aw naggikan sa usa ka bentana sa apartment. Sa akong kaugalingon naghunahuna ko, “Makaguol nga adunay tawo nga perming maglantaw diha sa ilang bentana, manghukom sa mga kalihokan sa ilang silingan?”

Dayon usa ka adlaw nagtuo ko nga tingali kinahanglan moadto ko ug mangutana kon mahimo ba ako nga makatabang. Mihukom ko nga magdala og bag-ong luto nga pan.

Ang init-init nga pan nakapalukmay sa kasingkasing sa akong tigulang na nga silingan. Naghilak siya nga misulti nako kon unsa kamingaw ang iyang gibati. Walay usa nga mibisita kaniya ug walay mitawag kaniya, bisan ang iyang kaugalingong mga anak. Sa nagkurog nga kamot, gipahiran niya ang mga luha sa iyang mga aping.

Nanghupaw siya ug dayon miingon, “Pagkanindot na lang nga mobiya niining kalibotana. Wala ko manghukom ni bisan kinsa samtang nagtambo ko sa akong bentana. Motan-aw lang ko sa mga bata nga magdula ug sa ubang butang nga manghitabo sa tugkaran.”

Sa kadugayan, kami naghisgot kabahin sa ebanghelyo. Sa sinugdanan mataha siya tungod kay ang iyang bana miserbisyo isip usa ka opisyal sa lain nga simbahan. Apan sa nagkadaghan ang among naestoryahan, mas nadasig siya sa mga kamatuoran nga akong gipakigbahin mahitungod ni Jesukristo ug sa Iyang gipahiuli nga ebanghelyo.

“Pagkanindot nga kita adunay managsama nga Jesus!” miingon siya. “Magkita ba kita sa langit?”

“Oo,” mitubag ko, “mag-uban kita didto—maggunitay sa kamot.”

Gikan niadto, managhigala na kami sulod sa daghang katuigan, hangtod nga siya sa kataposan mitaliwan na gikan niining kalibotana.

Karon ganahan ko maghunahuna nga ang akong kanhi silingan magtambo gikan sa bentana sa iyang langitnong panimalay, nagsunod sa among mga kalihokan ug nanghinaot nga kami aduna pay igong pagsinabtanay ug gugma sa usag usa.