Digital Lamang: Mga Young Adult
Ang Kabalaka Makapahimo ba Nimo nga Mobati nga Nag-inusara? Kining 3 ka Sugyot Makatabang
Ang tagsulat nagpuyo sa American Samoa.
Ang akong panlimbasog sa pag-inusara ug kabalaka nakapaduol kanako ngadto sa Langitnong Amahan ug ni Jesukristo ug mitabang kanako nga masabtan ang akong dapit diha sa ebanghelyo.
Usahay, ang pagbati nga ikaw nahisakop isip usa ka young single adult lisod.
Sa daghang higayon mobati ko nga wala nahaom sa lugar. Ako naningkamot sa pagpalambo sa akong kaugalingong kinabuhi, apan bation gihapon nako ang responsibilidad sa pag-atiman sa akong pamilya. Ug samtang gusto ko nga mokonektar sa uban, gibati nako ang akong kaugalingon nga hinay-hinay nga nagpahilayo kanila ug sa mga butang nga gusto nakong buhaton.
Karon mismo, ang akong sakit sa kabalaka nakapahimo niining lisod alang kanako sa pagbuhat sa tanan niining mga butanga samtang mobati gihapon nga nahisakop. Mao kini ang kasagaran nga hinungdan sa daghan sa akong mga hagit.
Ang tumang kabalaka nagpahimo kanako nga mosulat sa akong mga hunahuna diha sa usa ka journal kay sa mokonektar sa uban, kadaghanan tungod kay gibati nako nga walay makasabot sa akong gisinati. Dinhi sa American Samoa, ang kahimsog sa pangisip dili kaayo hisgotan. Gibati nako nga ang uban adunay kinaiya nga “mopakaubos” kon mosulay ko sa pagpasabot sa akong panlimbasog sa kabalaka. Mao nga, imbis magpakitabang, akong ipalayo ang akong kaugalingon.
Apan, ang akong panlimbasog sa kabalaka nakatudlo kanako kon unsa gyod ka impotante ang mga koneksiyon sa uban, ilabi na ngadto sa Langitnong Amahan ug ni Jesukristo.
Ania ang pipila ka paagi nga ang akong panlimbasog sa kabalaka midala kanako paduol ngadto sa Langitnong Amahan ug mitabang kanako nga makaamgo nga ako tinuod nga nahisakop sa Ang Simbahan ni Jesukristo sa mga Santos sa Ulahing mga Adlaw.
Pagpalapad sa Gahom sa Pag-ampo
Bisan og ako kanunayng nanlimbasog sa kabalaka, kini nga hagit nahimong mas lisod sa pagka-young adult samtang ako nag-atubang og bag-ong mga oportunidad ug daghang kausaban. Ang magpuyo nga aduna niining makanunayon nga kahadlok ug kabalaka usahay makapahimo nako nga magduhaduha sa bili sa akong kaugalingon ug kon ako gimahal ba.
Apan, adunay nakatabang nako nga tinud-anay nga nakapaamgo nga ako nahisakop mao ang pakighinabi sa Langitnong Amahan pinaagi sa pag-ampo.
Sama sa gitambag ni Presidente M. Russell Ballard (1928–2023): “Ang pag-ampo makausab sa atong kinabuhi. Gidasig pinaagi sa sinserong pag-ampo, kita makapalambo ug makatabang sa uban sa paghimo og samang butang.”1
Tungod sa kabalaka, ako nagsalig og maayo sa pag-ampo, ug kini nakatabang nako nga mapalawman ang akong relasyon sa Langitnong Amahan ug ang akong hugot nga pagtuo nga Siya modungog sa tanang pag-ampo. Ang akong pag-ampo tinud-anay nga nahimo gayod nga mas makahuluganon paglabay sa panahon samtang ako nagsagubang niining mga hagit ug misalig ni Jesukristo ug sa Langitnong Amahan alang sa panabang.
Nakig-istorya ako sa Langitnong Amahan mahitungod sa akong mga pagbati, sa akong adlaw, sa akong mga kaguol—sa bisan unsang butanga, tinuod gayod. Bisan kon Siya dili motangtang sa hunahuna sa mga kabalaka ug mga pagbati, kon ako modangop ngadto Kaniya alang sa tabang, mabati nako nga daw ang Iyang kamot anaa sa akong abaga ug Siya mipaneguro kanako nga Siya naga-uban kanako.
Siya nagtabang kanako nga masayod nga ako Iyaha ug nga ako wala mag-inusara.
Pagpalawom sa Salabotan sa Pag-ula ni Jesukristo
Gikan sa tanang baroganan sa ebanghelyo, ang usa nga ako nakabaton og kinalig-onan nga pagpamatuod mao ang makaayo nga gahom sa akong Manluluwas, nga si Jesukristo.
Sa higayon nga akong maila kon giunsa sa Manluluwas sa pagtabang kanako, makahimo ako sa pagbati nga nahisakop ug sa kaseguroan nga ako nailhan. Ang akong panlimbasog sa kabalaka nagdasig nako sa pagtinguha sa makahupay nga presensiya sa Espiritu, ug tungod niini, ako kanunay nga naghimo sa gamay ug yano nga espirituhanon nga mga pamatasan (tan-awa sa Alma 37:6) sa matag adlaw aron sa pagpaduol sa gahom ni Kristo ngadto sa akong kinabuhi.
Ang pagbaton og hugot nga pagtuo sa Iyang grasya ug sakripisyo tinuod gayod nga mao ang labing talagsaon nga yawi nga akong gikinahanglan aron malahutay ang tanang kalisdanan sa kinabuhi ug mga hagit. Sama sa Iyang gitudlo, “Ako ang kahayag sa kalibotan” (Juan 8:12), nga, para nako, nagpasabot nga walay kangitngit nga atong masinati nga makapawong sa Iyang kahayag.
Si Elder Jeffrey R. Holland sa Korum sa Napulog Duha ka Apostoles mahigugmaon usab nga mitudlo sa kaimportante sa pagpangita sa mga himan alang niadtong nanglimbasog sa kahimsog sa pangisip, nga nag-ingon: “Pagpatambag sa mga eksperto nga sertipikado sa pagbansay, propesyonal nga mga kahanas, ug maayong mga hiyas. Isulti kanila ang tinuod ninyong kaagi ug mga panlimbasog. Mainampoon ug mabinantayong ikonsiderar ang tambag ug mga solusyon nga ilang gihatag. Ang atong Amahan sa Langit naglaom nga kita mogamit sa tanang talagsaong gasa nga Iyang gihatag niining mahimayaong dispensasyon.”2
Inabagan sa tabang sa Manluluwas, atong makita ang kahayag sa unahan.
Pag-ugmad og Makahuluganon nga mga Koneksiyon
Dili pa lang dugay ang milabay, ako nanlimbasog sa hilabihan nga kabalaka. Apan imbis magpalayo sa uban, ako nag-ampo sa Langitnong Amahan alang sa tabang, ug ang Espiritu mitabang kanako nga makakita og makapausab sa kinabuhi nga kamatuoran:
Nagkinahanglan kita sa usag usa.
Bisan og ang kabalaka makahimo nako nga gustong mopalayo gikan sa uban, ang ipahilayo ang akong kaugalingon dili mao ang gusto sa Langitnong Amahan alang kanako. Ang kaaway gusto nga atong bation nga dili konektado—nga kita wala mahisakop, ilabi na diha sa atong mga hagit. Apan kon ako mosalig diha sa Manluluwas sa paghatag kanako og kusog aron sa pagdangop ngadto sa akong mga igsoon o mga higala mahitungod sa akong mga hagit, sila motubag uban sa gugma ug motabang kanako sa pagpadayon sa unahan.
Ako nakakita nga kon kitang tanan andam nga mokonektar sa usag usa (ilabi na kon imbis idistansiya ang atong kaugalingon sa hilom), kita makabati nianang pagbati sa pagkanahisakop—kana nga pagbati sa panag-uban ug paglaom diha ni Kristo.
Ebanghelyo sa Pagkahisakop
Wala ko masayod kon nganong ang pipila ka mga hagit kinahanglang magmalisod kaayo. Apan ako nasayod nga pinaagi sa akong kasinatian sa kabalaka, ako nakahimo sa pagpalawom sa akong pagpamatuod sa Langitnong Amahan, ni Jesukristo, ug sa koneksiyon nga atong gikinahanglan. Human nakakaplag og tabang pinaagi sa ebanghelyo ug sa mga himan sa kahimsog sa pangisip, mas nakita na nako nga ako aduna gayoy luna diha sa ebanghelyo ni Jesukristo—ang tanan aduna, dili igsapayan sa ilang sirkumstansiya.
Ako nasayod nga sa kanunay adunay luna alang sa kalamboan sa pagtabang sa tanan nga mobati nga gihigugma diha sa Simbahan, ilabi na sa mga young adult. Apan ako padayon nga nakakita sa mga milagro nga nanghitabo.
Kon kamo nanlimbasog sa mga hagit sa kahimsog sa pangisip, ako manghinaot nga kamo nasayod nga ang ebanghelyo ni Jesukristo mao ang ebanghelyo sa pagkaayo, sa hingpit nga kalipay, ug ang labing importante sa tanan, sa pagkanahisakop— sa tanan nga mga anak sa Langitnong Amahan.
Akong mabati kana nga kamatuoran sa akong kasingkasing.