Mga Tingog sa mga Santos sa Ulahing mga Adlaw

Usa ka Malumo nga Kaluoy Paglabay sa 25 ka Tuig

Ni Mike Collins, California, USA

Mapasalamaton ko nga gigamit sa Dios ang usa ka nalimtan nga sulat aron sa pagpahinabo sa usa sa Iyang malumo nga mga kaluoy.

Litrato sa maayong kabubut-on sa tagsulat

Samtang nagtudlo ko og sayo sa buntag nga seminary didto sa Eureka, California, USA, gihangyo nako ang akong mga estudyante sa paghunahuna sa ilang mga kaugalingon 10 ka tuig ngadto sa umaabot. Dayon gihangyo nako sila sa paghimo og usa ka sulat nga adunay pagpamatuod nila sa ebanghelyo ug sa bisan unsa nga ganahan nilang ipakigbahin sa ilang mas magulang nga bersiyon sa ilang mga kaugalingon. Gisultihan nako sila nga ipadala nako ang mga sulat human sa 10 ka tuig.

Milabay ang panahon ug wala gayod ko nakahigayon sa pagpadala sa mga sulat. Usa ka adlaw paglabay sa 25 ka tuig, nakaplagan sa akong anak nga babaye nga si Heidi ang mga sulat ug nangutana mahitungod niini. Human gipasabot nako kon unsa akong giplano, gipangita niya ang mga address sa akong kanhi nga mga estudyante gamit ang mga himan sa social media.

Paghulagway pinaagi ni Alex Nabaum

Human gipadala niya ang mga sulat, nakadawat kami og pipila ka nindot kaayo nga mga tubag. Usa sa akong kanhi nga mga estudyante sa seminary misulat:

“Gikinahanglan nako nga mahibalo ang imong papa nga karon pa lang nakit-an niya kadto nga mga sulat tungod sa usa ka rason. Ang akong 18 anyos nga anak nga babaye nanglimbasog sa iyang pagpamatuod ug mibati nga ang pagkahimong usa ka ‘hingpit nga Santos sa Ulahing mga Adlaw nga babaye’ dili para kaniya. Dili siya mopakigbahin sa iyang mga pagbati kanamo. Lisod kaayo.”

Ang akong kanhi nga estudyante, emosyonal nga nahugno sa pipila ka butang nga bag-ohay lang gisulat sa iyang anak diha sa usa ka blog, midugang:

“Nasayod ko nga gikinahanglan kong makig-istorya kaniya mahitungod niini. Sama sa naandan, kon magkaistoryahanay na kami, ang iyang nawong walay emosyon ug masinupakon, ug wala siyay bisan unsa nga isulti. Akong gihatag kaniya ang akong sulat ug gisultihan siya nga gusto nako nga basahon niya kini.

“Nakita nako siya nga gibalik og basa ang unang parapo sa pipila ka higayon. Gisulat nako nga wala ko kahibalo kon ako adunay pagpamatuod, nga ang pagkahimong usa ka hingpit nga Santos sa Ulahing mga Adlaw sobra kaayo ug tingali dili para kanako.

“Misugod sa paghilak ang akong anak nga babaye. Gikinahanglan nako nga masayod siya nga tinud-anay akong nakasabot sa iyang mga panglimbasog. Dili unta gayod siya motuo niini kon wala pa ang sulat! Giwala niya ang pipila sa iyang emosyonal nga mga babag, ug gibati gayod nako nga ang pagkatukma sa panahon niini nga sulat usa ka malumo nga kaluoy. Kon nadawat pa nako kini 10 ka tuig kaniadto, tingali gilabay nako kini o nawala kini! Palihog pasalamati ang imong papa sa pagpasulat namo niini nga mga sulat ug sa pagkawani niini sa tanan niini nga katuigan! Walay butang nga sulagma.”

Ang atong mahigugmaon nga Langitnong Amahan nagbantay sa tanan Niyang mga karnero, ug sa Iyang talagsaon nga pagkatukma sa panahon, Siya makapahinabo sa malumo nga mga kaluoy ug mga milagro pinaagi sa matag usa kanato aron sa pagdala niadtong kinsa nahisalaag balik ngadto sa panon.