“Mga Pulong sa Kamatuoran,” Liahona, Mar. 2024.
Mga Hulagway sa Hugot nga Pagtuo
Mga Pulong sa Kamatuoran
Ako adunay daghang pangutana, apan ang akong pamanhonon ug ang Simbahan mitabang nako nga makakaplag sa mga tubag.
Mga litrato sa maayong kabubut-on sa tagsulat
Nagdako diha sa dili Kristiyano nga kultura sa Taiwan, wala ko gipadako nga relihiyoso. Nagtuo ko sa Dios, apan ako walay nahibaloan mahitungod ni Jesukristo. Ang akong relihiyon mao ang akong trabaho ug ang bisi nga katilingbanong kinabuhi nga uban niini. Kana naglakip sa daghang pag-inom sa makahubog ug pagpanigarilyo. Hinginom usab ko kaayo og kape ug tsaa. Kining tanan kabahin sa among kultura sa negosyo.
Napaila-ila ko sa Ang Simbahan ni Jesukristo sa mga Santos sa Ulahing mga Adlaw pinaagi sa akong pamanhunon ug sa iyang pamilya. Si Chase Amerikano. Nagdako siya sa Simbahan ug nakaserbisyo na og misyon, apan siya dili aktibo niadtong higayona. Ang iyang kinamagulangan nga anak, hinoon, nangandam na sa pagserbisyo og misyon, ug si Chase misuporta sa iyang desisyon.
Atol sa COVID-19 nga lockdown, kami mitambong og panagtigom sa sakramento sa panimalay sa mga ginikanan ni Chase, nagtan-aw og mga sibya nga nanukad sa meetinghouse sa ilang simbahan. Sa dihang natapos ang mga pakigpulong, ang duha ka anak nga mga lalaki ni Chase mipanalangin ug mipasa sa pan ug tubig.
Ako adunay daghang mga pangutana. Ang akong pamanhunon mapailubon nga mitubag sa matag usa. Kinsa si Jesus? Unsa man ning pagbati sa akong kasingkasing sa matag higayon nga kita magkatigom alang sa mga miting sa simbahan? Usa kadto ka pagbati nga wala pa nako sukad nabati. Unsa man ang girepresentar sa pan ug sa tubig? Nganong ang mga luha moagas kon ako mokaon sa sakramento? Unsa man kining kalinaw nga akong gibati?
Usa ka gabii nakakita ko og usa ka website diha sa akong lumad nga pinulongan nga mipasabot kon kinsa si Jesus ug misulti kabahin sa Iyang kinabuhi. Pagkasunod adlaw, akong gisultihan ang akong mama nga nakasabot na ko kon si kinsa si Jesus ug nga ako mituo diha Kaniya.
Usa ka Dominggo ang bishop miabot sa balay tungod kay ang kinamagulangan nga anak ni Chace moorden sa iyang manghod nga lalaki aron mahimong usa ka pari. Sa dihang ang mas magulang nga anak mipandong sa iyang mga kamot diha sa ulo sa iyang manghod nga lalaki, dili nako kapugngan ang paghilak. Gibati nako ang ingon ka dako nga emosyon sa akong kasingkasing, dili nako kapugngan ang mga luha. Unya, ang akong pamanhonon mipasabot nga akong nabati ang Espiritu Santo ug nga siya mibati usab niini.
Akong nakita nga ang gugma sa akong pamanhonon alang sa iyang simbahan mibalik ngadto kaniya. Sa bisan unsang paagi, ako nasayod nga ang tanang butang nga akong gibati mikonektar ngadto sa Dios ug ngadto sa butang nga tinuod. Mibati ko og gugma nga wala pa nako nabati sukad.
“Ako Misangpit sa Dios”
Ang akong visa sa pagkaturista natapos ug ako kinahanglan nang mobalik sa Taiwan. Atol sa misunod nga mga bulan nga nag-inusara, gimingaw ko sa unsay akong nabati. Usahay, napuno ko sa kawalay paglaom ug kangitngit. Kadto nga mga pagbati makapahasol nga gusto nako nga moundang. Dili gyod ko makamao unsaon sa pag-ampo, apan ako misangpit sa Dios ug misulti Kaniya sa tanang butang nga akong gibati ug gihunahuna. Usa ka pagbati sa kalinaw ang miabot—ang samang pagbati nga akong nasinati sa dihang mitambong ko sa atong simbahan nga naa sa panimalay. Ako nasayod nga kadto mao ang Espiritu Santo. Siya mikalma kanako.
Pagkahuman niini, ang akong pamanhonon mipadala og mga misyonaryo aron sa pagtudlo kanako. Ako misulti kanila nga ako nakahibalo na nga ang gipahiuli nga ebanghelyo tinuod ug ako nakasabot kon unsa ang pagbati sa Espiritu Santo. Apan nabalaka ko nga lisod alang kanako nga moundang sa pagpanigarilyo ug pag-inom og kape ug tsaa.
Misugod ko sa pagtambong sa simbahan, gibasa ang Basahon ni Mormon, ug nakigkita sa mga sister nga mga misyonaryo katulo o kaupat sa usa ka semana. Sa kataposan, ang Espiritu Santo mitabang kanako sa pag-undang sa pagpanigarilyo ug sa pag-inom og kape ug tsa.
Ang akong kababata nga higala nagsugod sa pagkakita sa mga kausaban ngari kanako sa kada semana. Gidapit nako siya sa akong mga pakigkita sa mga misyonaryo. Samtang siya naminaw, siya usab mibati sa Espiritu Santo ug nakabaton og usa ka pagpamatuod. Sa dihang mihinay na ang krisis sa COVID-19, ang akong pamanhonon, karon aktibo na sa Simbahan, sa kataposan nakaanhi na sa Taiwan. Kami nagminyo, ug siya mibunyag kanako. Usa na ako ka bag-o nga tawo.
Sister Weiling Chen Canfield (Winnie) uban sa sister nga mga misyonaryo ug mga miyembro sa ward nga nagtudlo ug miabi-abi kaniya. “Mag-istorya gihapon kami matag semana ug magtinabangay diha sa akong bag-o nga calling sa Simbahan sa Relief Society,” miingon siya.
Ang akong mga higala sa tibuok kinabuhi ug mga kasusyo sa negosyo, lakip sa pipila nga nagtrabaho og banko ug mga ahente sa stock market, miingon nga ilang nakita nga ako lahi na ug mas malipayon. Ako silang gidapit ngadto sa akong bunyag, ug sila miadto. Pagkahuman, sila misulti nako nga sila adunay nabati nga wala nila nabati sukad.
Ako dili mahadlok sa pagsulti sa uban kon unsa ang akong nahibaloan ug nabati mahitungod ni Jesukristo—nga unsay akong nahibaloan tinuod. Nasayod ako nga ang akong pagpamatuod dili matarog. Ang uban nga nakaila nako sa tibuok nakong kinabuhi nakakita niini. Ang ilang respeto alang sa akong hugot nga pagtuo nakapahunong gani kanila gikan sa pagpanigarilyo ug pag-inom og makahubog atol sa mga miting sa negosyo ug mga panihapon. Kining butanga lahi diha sa among kultura sa negosyo.
Sister Canfield uban ni Jin Hua, usa ka higala sa tibuok kinabuhi kinsa nainteresado sa Simbahan pinaagi sa pagkakabig ni Sister Canfield.
Ako wala mahadlok nga ang uban makakita, makadungog, ug mobati sa akong pagpamatuod. Ako motuo nga daghang mga tawo kinsa wala makahibalo kon unsaon sa pagpangita ang Dios ug si Jesukristo mobati sa samang butang nga akong nabati kon sila makadungog sa mga pulong sa kamatuoran. Ako kanunayng andam sa pagpakigbahin sa mga pulong nga miusab sa akong kinabuhi.