“Luwas nga Gigiyahan ngadto Asa Kita Gikinahanglan nga Maanaa,” Liahona, Mar. 2024.
Dali, Sunod Kanako
Luwas nga Gigiyahan ngadto Asa Kita Gikinahanglan nga Maanaa
Ang Manluluwas makanunayon nga moabag kanato sa atong panaw sa talagason nga mga paagi.
Sa dihang 12 anyos ko, ang akong pamilya mibalhin gikan sa subtropical Hong Kong ngadto sa usa ka dapit nga adunay mabugnaw, dili pamilyar nga mga tingtugnaw. Sa wala madugay, giimbitar ko sa akong unang pagbaktas atol sa tingtugnaw uban sa mga batan-ong lalaki sa akong ward.
Sa adlaw sa among pagbaktas, nagsul-ob ko sa kinainitan nga akong nahibaloan. Samtang mitungas kami sa nagliko-liko nga dalan sa bukid, mahinamon kong nakakita sa nangatagak nga niyebe nga mitabon sa yuta. Apan kulang gayod ang akong gisul-ob alang sa dapit [terrain] ug sa panahon, ug naglisod sa pag-apas sa akong grupo. Gisultihan nako sila nga mouna ug ako moapil niadtong akong gituohan nga nagsunod kanamo.
Samtang nagpadayon ko sa akong kaugalingon nga gipaspason, ang akong mga sapatos ug sinina nabasa og maayo ug ang akong mga kamot, mga tiil, ug nawong namanhod. Dayon nagsugod ang grabe nga pag-ulan og niyebe nga dili nako makakita sa dalan. Human naglaroylaroy sulod sa pipila ka panahon, nakaamgo ko nga nahisalaag ko, nag-inusara, ug dili segurado kon duna bay bisan kinsa nga nasayod nga nawala ko.
Usahay atol sa panaw sa kinabuhi, mobati kita nga dili andam, nahisalaag, o nabiyaan. Mahimong mawad-an kita sa atong pagbati sa direksiyon ug sa pagkakita sa agianan sa atong atubangan. Kini tingali ingon og kon mas maningkamot kita nga mopadayon sa unahan, mas malayo na hinuon kita sa atong padulngan. Mahimong moabot ang kasagmuyo, ug ang tentasyon nga moundang mahimong madanihon.
Pinaagi sa diosnong pakabana, ang Manluluwas nga si Jesukristo adunay gahom sa paggiya sa unsay atong buhaton, mobayaw kanato kon kita madagma (tan-awa sa Salmo 37:23–24), ug magdala kanato og kapahulayan (tan-awa sa Mateo 11:28), pagkaayo (tan-awa sa Isaias 53:5; Alma 15:8; Doktrina ug mga Pakigsaad 42:48), kamasaligon (tan-awa sa Doktrina ug mga Pakigsaad 121:45), ug kalinaw (tan-awa sa Mosiah 4:3; Alma 38:8; Doktrina ug mga Pakigsaad 19:23). “Paduol ngari kanako,” Siya miingon, “ug Ako mopaduol nganha kaninyo; pangita kanako nga makugihon ug kamo makakita kanako” (Doktrina ug mga Pakigsaad 88:63). Tingali dili kamo mahibalo kon unsay buhaton sa duol nga umaabot, apan kita makasunod sa Manluluwas uban sa hugot nga pagtuo nga ang atong panaw matahom ug madaogon nga matapos tungod kay Siya luwas nga mogiya kanato ngadto asa kita gikinahanglan nga maanaa.
Kita kanunayng makatan-aw kang Jesukristo tungod kay si Jesukristo mao “ang dalan, ang kamatuoran, ug ang kinabuhi” (Juan 14:6).
Ang Husto nga Dalan alang sa Atong Panaw
Sa atong pagtuon sa Basahon ni Mormon niining tuiga, atong gisundan si Lehi ug ang iyang pamilya diha sa ilang panaw ngadto sa gisaad nga yuta. Ikonsiderar kon unsay gilahutay sa pamilya ni Lehi samtang anaa sa ilang panaw:
-
biaybiay tungod sa pagtuo ug pagsunod sa mga propeta
-
pagbaylo sa pamilyar nga mga kaharuhay alang sa usa ka wala mailhi nga kamingawan
-
biyahe nga walay klaro sa gilay-on, padulngan, o gidugayon
-
kagutom, kasub-anan, sakit, ug kamatayon
-
lisod nga mga buluhaton, usahay nga wala makasabot sa mga rason alang niini o unsaon sa pagtuman niini
-
mga kapakyasan, mga kalangay, mga panagbingkil, ug mga kasagmuyo
-
lisod nga mga kahimtang alang sa pagpadako og batan-on nga mga pamilya
Sa pagpadayon subay sa dalan, naobserbahan gihapon nato kon sa unsang paagi ang Ginoo makanunayon nga mitabang kanila. Siya mihatag og
-
propetikanhon nga pagpangulo ug personal nga pagpadayag,
-
mga kasulatan nga naglangkob sa gisaad nga mga panalangin ug mga pakigsaad,
-
genealogical nga mga rekord ug family history,
-
bag-o nga mga himan ug mga pamaagi sa pagsangkap alang sa ilang mga panginahanglan,
-
gipadako nga kapasidad sa paglahutay og mga kalisod,
-
kaalam ug instruksiyon sa pagtuman sa dili pamilyar nga mga buluhaton,
-
ang Liahona (usa ka himan sa pagtabang nila sa pagtultol sa direksiyon sa ilang panaw), ug
-
kahilwasan ug panalipod alang sa ilang mga pamilya.
Sama lang sa pamilya ni Lehi, ang atong mga panaw dili nga walay mga hagit ug sakripisyo. Ang Manluluwas sa samang paagi makanunayon nga moabag kanato sa talagsaon nga mga paagi. Si Nephi mitudlo, “Ang matarong nga paagi mao ang pagtuo diha kang Kristo … uban sa tanan ninyo nga gahom, hunahuna, ug kusog, ug sa tibuok ninyo nga kalag” (2 Nephi 25:29). Kon kita mopili sa hugot nga pagtuo diha kang Jesukristo, mapainubsanon nga modawat sa Iyang pulong, ug magbaton sa kaisog nga molihok, makakapalag kita sa hingpit nga kalipay ug mga panalangin taliwala sa mga kalisod nga atong masugatan. Sa pagpadayon, makabaton kita sa kamasaligon nga kita makatuman sa unsay gusto Niya nga atong buhaton (tan-awa sa 1 Nephi 3:7).
Ang mosunod mao ang pipila sa daghang paagi nga ang Manluluwas padayon nga nagtabang kanato.
The Dawning of a Brighter Day [Ang Pagsubang sa usa ka mas Mahayag nga Adlaw], ni Simon Dewey
Siya Naghatag Kanato sa Iyang Doktrina
Si Jesukristo nasayod “sa kataposan gikan sa sinugdanan” (Abraham 2:8). Ang “dalan niya may timaan” usab.1 Ang iyang doktrina, nailhan diha sa mga kasulatan isip ang doktrina ni Kristo, mao ang dalan nga kinahanglan sundon natong tanan aron maluwas.
Kita kinahanglang padayon nga magpakita og hugot nga pagtuo kang Jesukristo, maghinulsol kanunay, magpabunyag, modawat sa gasa sa Espiritu Santo, mosulod sa mga pakigsaad, ug maningkamot sa atong labing maayo aron molahutay. Agig balos, kita gisaaran og kapasayloan, paglaom, ug kinabuhing dayon. (Tan-awa sa 2 Nephi 31:2–20.)
Sa usa ka kalibotan sa nagkalainlain nga mga dalan ug nagkasumpaki nga mga paagi, ang doktrina ni Kristo naghatag og klaro ug mabuhat nga direksiyon nga atong masunod aron sa pagpabilin kanato nga magpadulong sa husto nga agianan (tan-awa sa 2 Nephi 31:21).
Siya Naghatag Kanato og Kahupayan
Pinaagi sa Iyang maulaon nga sakripisyo, ang Manluluwas nasayod kon unsay bation nga mag-inusara gayod ug gibiyaan. Hingpit usab Siyang nasayod kon unsaon sa paghatag kanato og kahupayan. Miingon Siya, “Ayaw kamog kaguol” (Juan 14:1) ug “Dili ko kamo biyaan nga daw mga ilong tuwapos. Mobalik ako kaninyo” (Juan 14:18).
Ang Manluluwas misaad sa gasa sa Maghuhupay, nga mao ang Espiritu Santo, ngadto niadtong kinsa motuo Kaniya. Miingon Siya nga ang Maghuhupay, “magtudlo ug magpahinumdom kaninyo sa tanan nga akong gisulti kaninyo” (Juan 14:26).
Siya Naghatag Kanato sa Pulong sa Dios
Pinaagi sa Pagpahiuli sa ebanghelyo ni Jesukristo sa atong panahon, ang Ginoo mihatag kanato sa karaan ug ulahing adlaw nga kasulatan, nga naglangkob sa pulong sa Dios. Si Nephi nagtudlo nga “kinsa kadto nga mopatalinghog sa pulong sa Dios, ug hugot nga mogunit niini, dili gayod … malaglag” (1 Nephi 15:24).
Ang pagbusog kada adlaw sa pulong sa Dios maghatag og proteksiyon ug mogiya kanato nga mas buhong nga makasinati sa gugma sa Dios. Ang Iyang pulong nagdan-ag sa atong dalan (tan-awa sa Salmo 119:105) ug “magtug-an [kanato] sa tanan nga mga butang nga [atong] buhaton” (2 Nephi 32:3).
Siya Mogiya Kanato pinaagi sa Iyang mga Sulugoon—ang mga Propeta ug Apostoles
Si Jesukristo mitawag og mga propeta ug apostoles aron sa pagtabang kanato. Ang ilang tambag ug mga pagtulon-an alang kanato ug alang sa atong panahon. Kon makaplagan ninyo inyong kaugalingon nga nahisalaag o naglibog sa inyong panaw, mahimong makatabang ninyo ang pagpamalandong sa mosunod nga tulo ka pangutana:
-
Giunsa sa Ginoo pag-andam kanako pinaagi sa mga pulong sa mga propeta ug apostoles alang sa mga pagsulay nga akong nasinati?
-
Unsa ang gidapit sa mga propeta ug apostoles nga akong buhaton karon aron sa pagpangandam alang sa umaabot nga mga hagit?
-
Unsa ang akong gihimo karon sa pagbuhat sa propetikanhon nga mga pagdapit?
Pinaagi sa pagpamalandong niini nga mga pangutana, kita makaila sa importansiya sa giya sa mga propeta ug apostoles. Mas maayo kitang makadungog sa tingog sa Ginoo ug makabantay kon sa unsang paagi Siya makanunayon nga nagtabang kanato. Kon kita mopili, kita mahimong maminaw sa mga propeta ug apostoles ug makakaplag og giya, kabulahan, ug proteksiyon diha sa dalan nga mogiya balik ngadto sa Langitnong Amahan ug sa Iyang Anak, si Jesukristo.
Si Elder Tai didto sa Sierra Nevada range sa California niadtong mga 1988. Ang istorya nga iyang gipakigbahin nahitabo sa Mount Baden Powell didto sa San Gabriel Mountains sa California niadtong 1984.
Litrato sa maayong kabubut-on sa tagsulat
Ang Hugot nga Pagtuo sa Pagpadayon sa Unahan
Nahisalaag, gitugnaw, ug nag-inusara didto sa bukid nga may niyebe niadtong daghang katuigan nga milabay, nahimo kong desperado. Wala masayod kon unsa pay lain nga buhaton, miluhod ko diha sa bag-o nga natagak nga niyebe ug nag-ampo ngadto sa akong Langitnong Amahan alang sa tabang. Gipakigbahin nako ang akong kalisod ug mga kahadlok ngadto Kaniya ug nangamuyo nga mahimong makit-an ug maluwas.
Sa dihang mibarog ko gikan sa akong pag-ampo, ang niyebe mipatihulog sa tibuok palibot nako, ug usa ka matahom, kalma nga kahilom ang mipuno sa mga kahoy. Kini nga kalinaw natugaw sa dihang nakadungog ko og kanaas diha sa duol nga kalibonan. Duha ka mas magulang nga batang mga lalaki ang mitumaw. Naabot na sila sa kinatumyan, ug imbes nga mosunod sa dalan, midesisyon sila nga mopadailos paubos sa bukid. Sa tanang dapit, midailos gayod sila sa dapit diin ako!
Sa dihang nangutana sila kanako kon unsay gibuhat nako didto, gisultihan nako sila nga nahisalaag ko. Gidapit ko nila nga moapil kanila, ug magkauban nga luwas kaming mipadailos paubos ngadto sa sinugdanan sa dalan didto sa tiilan sa bukid. Sa kataposan nahiusa kami og usab sa uban sa among grupo.
Samtang mopadayon kita sa atong personal nga mga panaw uban ang hugot nga pagtuo, debosyon, ug paglahutay, hinaot atong mailhan kon sa unsang paagi ang Manluluwas naglakaw uban kanato ug aktibong nagtabang kanato. Si Jesukristo mao ang dalan, ang kamatuoran, ug ang kinabuhi. Hinaot nga ang atong hugot nga pagtuo diha Kaniya magdala og kalinaw sa atong mga hunahuna ug hingpit nga kalipay sa atong panaw.