“Sa Unsang Paagi ang Pagkahimong usa ka Tigpasiugda sa Kalinaw Makatabang Kanako sa Pagpundok sa Israel?,” Liahona, Mar. 2024.
Dali, Sunod Kanako
Sa Unsang Paagi ang Pagkahimong usa ka Tigpasiugda sa Kalinaw Makatabang Kanako sa Pagpundok sa Israel?
Nakita ni Nephi nga ang mga tawo sa kataposan nga mga adlaw makigbingkil sa usag usa (tan-awa sa 2 Nephi 28:3–4, 20), apan ang panagbingkil dili mao ang paagi sa Ginoo. Sa pagkatinuod, aron sa pagpundok sa Israel gikinahanglan nato ang usa ka “mas taas ug mas balaan”1 nga paagi sa pagpakig-istorya sa uban.
Si Presidente Russell M. Nelson mitudlo: “Kon kamo seryoso mahitungod sa pagtabang sa pagpundok sa Israel ug mahitungod sa paglig-on sa mga relasyon nga molungtad hangtod sa kahangtoran, karon mao ang panahon sa paghunong sa kaligutgot. Karon mao ang panahon sa paghunong sa pag-insister nga ang imong paagi maoy matuman o walay mahitabo. Karon mao ang panahon sa paghunong sa paghimo og mga butang nga makapahimo sa uban nga magkinto tungod sa kahadlok nga ikaw masuko. Karon mao ang panahon sa paglubong sa inyong mga hinagiban sa gubat. Kon ang inyong mga pulong napuno sa mga panginsulto ug mga akusasyon, karon mao ang panahon sa paghunong niini. Kamo mobarog isip lig-on nga lalaki ug babaye sa espirituhanong paagi diha ni Kristo.”2
Ang Langitnong Amahan ug si Jesukristo nahigugma sa tanang mga anak sa Dios dili igsapayan sa ilang mga kalainan. Si Satanas mosulay sa paggamit sa atong mga kalainan aron sa pagbahin kanato, apan pinaagi sa pagpili og kalinaw kaysa sa panagbingkil, magmugna kita og usa ka maabiabihon nga palibot nga mopaduol sa mga tawo ngadto sa gipahiuli nga ebanghelyo sa Ginoo.
Ikonsiderar ang mosunod nga mga sitwasyon ug pamalandongi ang mga paagi nga kamo mahimong motubag inubanan ang gugma:
Kon kamo mainiton nga mobati mahitungod sa usa ka politikal nga panglantaw, unsaon man ninyo nga makabaton og mas dako nga pagsabot diha sa inyong mga panag-istoryahanay niadtong adunay sukwahi nga panglantaw?
Kon ang inyong pamilya wala magkasinabot, unsaon man ninyo sa pagdala og malinawon nga palibot sa gugma ug pagdawat ngadto kanila?
Kon mibati kamo nga nasagmuyo sa usa ka butang nga inyong nabasa sa social media, unsa man ang inyong mabuhat aron makalikay sa pagpakiglalis?